Ia Faatuatuaina Ieova a o Lata Mai le Iʻuga

“Ia outou faatuatuaina e lē aunoa Ieova.”—ISA. 26:4.

1. O le ā le eseesega o auauna a le Atua ma tagata o le lalolagi?

UA TATOU soifua i se lalolagi ua lē iloa e le faitau miliona o tagata po o ai, ma po o le ā e ao ona faatuatuaina, ona ua tele taimi e tigā ai o latou faalogona. Ae ua matuā ese mai ai auauna a Ieova! Talu ai ua taʻitaʻia i le atamai o le Atua, ua latou iloa ai e lē aogā ona faatuatua atu i lenei lalolagi po o ona “tamālii.” (Sala. 146:3) Nai lo lea, e latou te faatuatua iā Ieova mo o latou ola ma le lumanaʻi, i le iloaina e alofa Ieova iā i latou ma e faataunuuina lava lana Afioga.—Roma 3:4; 8:38, 39.

2. Na faapefea ona molimau Iosua i le maufaatuatuaina o le Atua?

² Na molimau Iosua i le maufaatuatuaina o le Atua. Ina ua afu lona soifua, na faapea atu i tagata Isaraelu: “Ua outou iloa lelei ma o outou lotoatoa, ma o outou tagata atoa, e leʻi iʻuvale se upu e tasi i upu lelei uma na fetalai mai ai Ieova lo outou Atua iā te outou. Ua faataunuuina uma iā te outou.”—Iosua 23:14.

3. O le ā ua taʻu mai e le suafa o le Atua e uiga iā te ia?

³ E faataunuu e Ieova ana folafolaga ona e lē gata e alofa i ana auauna, ae e sili ai lona  lava suafa. (Eso. 3:14; 1 Samu. 12:22) I upu tomua o le Tusi Paia a J. B. Rotherham, na ia tusia ai e uiga i le suafa o le Atua: “O se folafolaga e sili ona matagofie; le mafai e le Atua ona taulima so o se tulaga, faigatā po o manaʻoga e tulaʻi mai . . . O lenei suafa o se folafolaga, . . . se faaaliga, se faamanatuga, ma se taʻutinoga. O le a faamaoni pea le Atua i lenei Suafa; auā o le a lē faalumaina ai o Ia.” (The Emphasized Bible)

4. (a) O le ā ua timaʻi mai le Isaia 26:4 iā i tatou e fai? (e) O ā mea o le a talanoaina i lenei mataupu?

⁴ Ia fesili ifo iā te oe lava: ‘Po o oʻu iloa lelei Ieova ma matuā faatuatuaina ai o ia? Po o oʻu taulaʻi atu ma le mautinoa i le lumanaʻi, i le iloaina e pule aoao le Atua i mea uma?’ Ua taʻua i le Isaia 26:4: “Ia outou faatuatuaina e lē aunoa Ieova, auā o Ioa Ieova o le Papa e faavavau ia.” I aso nei, e lē o faavavega ona faalaa mai le Atua i olaga o tagata, e pei ona ia faia i nisi taimi i aso ua mavae. Ae ona o ia o le “Papa e faavavau,” e mafai la ona faatuatuaina o ia “e lē aunoa.” E faapefea ona fesoasoani lo tatou Atua maufaatuatuaina i ona tagata tapuaʻi faamaoni i aso nei? E tolu auala o le a talanoaina: E na te faamalosia i tatou pe a ōle atu mo lana fesoasoani e teena ai faaosoosoga, lagolagoina i tatou pe a feagai ma le lē ano ma le tetee mai, ma faamalosia i tatou pe a lofitūina i popolega. A o iloiloina nei vaega, ia manatunatu i le auala e mafai ona faamalosia ai lou faatuatuaina o Ieova.

Pe a Faaosoosoina e Fai Mea Sesē

5. O lē fea tulaga e faigatā tele ona tatou faatuatuaina ai le Atua?

⁵ E faigofie ona faatuatuaina Ieova pe a mafaufau i lana folafolaga i le Parataiso po o le toetū, o mea e tatou te naunau i ai. E faigatā tele ona faatuatuaina Ieova pe a oo i mataupu tau i amioga tatau, ma matuā talitonu e tonu ona usiusitaʻi i ona ala ma tulafono ma iʻu ai i le fiafiaga sili. Na timaʻi mai le tupu o Solomona: “Ia e faatuatua iā Ieova ma lou lotoatoa, ae aua le faalagolago i lou lava malamalama. Ia e manatua o ia i ou ala uma, ona ia faasaʻoina lea o ou ala.” (Faata. 3:5, 6) Mātau le faaupuga o tatou “ala.” E tatau ona atagia atu lo tatou faatuatuaina o le Atua, i mea uma e faia ae e lē na o lo tatou faamoemoe faa-Kerisiano. E faapefea ona tatou faia faapea pe a tulaʻi mai faaosoosoga?

6. E faapefea ona faamalosia la tatou faaiʻuga e teena mafaufauga leaga?

⁶ O le liliuese mai i mea leaga, e amata mai i o tatou mafaufau. (Faitau le Roma 8:5; Efeso 2:3.) E faapefea ona faamalosia lau faaiʻuga e teena mafaufauga leaga? Seʻi mātau auala nei e lima: 1. Saʻili le fesoasoani a le Atua e ala i le tatalo. (Mata. 6:9, 13) 2. Manatunatu loloto i faaaʻoaʻoga faale-Tusi Paia a ē na faalogo ma ē e leʻi  faalogo iā Ieova. Ona mātau lea o iʻuga na oo iā i latou. * (1 Kori. 10:8-11) 3. Manatunatu i tigā tau i le mafaufau ma faalogona e oo iā te oe ma ē e pele iā te oe, pe a e faia se agasala. 4. Mafaufau i lagona o le Atua pe a faia e se tasi o ana auauna se agasala matuiā. (Faitau le Salamo 78:40, 41.) 5. Mafaufau i le olioli o Ieova pe a silasila mai, o teena e sana auauna faamaoni mea leaga ma fai le mea saʻo, e tusa po o iloa atu e nisi pe leai. (Sala. 15:1, 2; Faata. 27:11) E mafai foʻi ona e faatuatuaina Ieova.

Pe a Feagai ma le Lē Ano Mai ma Teteega

7. O ā tofotofoga na fesagaʻi ma Ieremia, ma o ā ona lagona i nisi taimi?

⁷ O loo feagai le toʻatele o o tatou uso i nisi o oganuu, ma tulaga e faigatā ona tumau ai. Na auauna le perofeta o Ieremia i se oganuu faapena—le malo o Iuta a o lata ina faaumatia. Sa tofotofoina lona faatuatua i aso uma, ona sa ia taʻu atu ma le faamaoni feʻau o le faasalaga a le Atua. E oo lava i lana failautusi faamaoni o Paruka na ōi ma lotovaivai. (Iere. 45:2, 3) Pe na lotovaivai ai Ieremia? I se tasi taimi na mafatia ai o ia. Na ia faapea atu: “Ia malaia le aso na ou fanau mai ai!” Na ia toe faapea atu: “Aiseā na ou sau ai mai i le manava ina ia ou vaai i galuega mamafa ma le tigā, ma iʻu ai oʻu aso i le māsiasi?”—Iere. 20:14, 15, 18.

8, 9. I le Ieremia 17:7, 8 ma le Salamo 1:1-3, o le ā e ao ona tatou fai ina ia fua mai ai pea fua lelei?

⁸ Peitaʻi e leʻi faavaivai ai Ieremia, ae na faaauau ona ia faatuatuaina Ieova. O lea la, na tofo lenei perofeta faamaoni i le faataunuuga o fetalaiga a Ieova o loo i le Ieremia 17:7, 8: “E manuia le tagata e faatuatua iā Ieova, o lē foʻi ua avea Ieova ma ona faatuatuaga. E avea lava o ia e pei o se laau ua totō i tafatafa o vai, e sosolo atu ona aa i tafatafa ane o le vaitafe; ma e lē iloa foʻi e ia pe a oo mai le vevela, ae e lauolaola ona lau. E lē popole o ia i le tausaga o le lāmala, e lē taitai foʻi taofia lona fua mai.”

⁹ E pei o se laau e lauolaola ma fua tele mai “ua totō i tafatafa o vai” po o se togālaau o loo tafe atu i ai vai, sa faapea foʻi ona galue Ieremia ma fua tele mai. E leʻi taaʻina o ia i tagata leaga o le nuu e tauemu. Peitaʻi, sa tumau o ia i Lē e puna mai ai “vai” o le ola, ma usitaʻia fetalaiga uma a Ieova. (Faitau le Salamo 1:1-3; Iere. 20:9) Maʻeu se faaaʻoaʻoga lelei ua faia e Ieremia mo i tatou, aemaise lava ē o loo auauna i le Atua i atunuu e faigatā ona talaʻi ai! Pe afai o lou tulaga lenā, ia matuā faalagolago pea iā Ieova, o lē e aumaia le lototele a o e ‘faailoa atu i tagata lona suafa.’—Epe. 13:15.

10. O ā faamanuiaga ua tatou maua, ma o le ā e ao ona fesili ifo ai iā i tatou?

¹⁰ Ua aumaia e Ieova le tele o fesoasoani ina ia tatou feagai ai ma faigatā i nei aso e gata ai. O se tasi o na mea o lana Afioga, lea o loo faaliliuina ma le saʻo i le tele o gagana. Ua ia saunia le tele o meaʻai faaleagaga i taimi e tatau ai, e ala mai i le vasega o le pologa faamaoni ma le faautauta. Ua iai foʻi i sauniga ma fonotaga le toʻatele o uso talitonu, o ē o ni uō mamae ma lagolagosua iā i tatou. Po o e faaaogāina na sauniuniga? O ē uma e faia faapea “o le a alalaga . . . i le fiafia ona o le lelei o o latou loto.” Ae o ē e lē faalogo i le Atua, o le a “tagiauē ona o le tigā o le loto, ma . . . ōi foʻi ona o le matuā mafatia tele o le agaga.”—Isa. 65:13, 14.

Pe a Feagai ma Popolega

11, 12. Ona o faafitauli o le lalolagi, o le ā le mea atamai e tatou te faia?

¹¹ E pei ona valoia, ua feagai tagata ma le tele o faafitauli e pei o se lolo. (Mata. 24:6-8; Faaa. 12:12) Pe a tupu se lolo, e masani  ona sosola tagata i se eleele maualuga pe feʻaʻei i taualuga o fale. I se tulaga tutusa, a o faateteleina faafitauli o le lalolagi, ua sulufaʻi atu le faitau miliona o tagata i faalapotopotoga tetele i mea tau tupe, faigāmalo po o lotu, ma faiga faasaienisi ma faatekinolosi. Peitaʻi e lē o maua mai ai se saogalemu. (Iere. 17:5, 6) Ae o loo maua e auauna a Ieova se sulufaʻiga malu, “o le Papa e faavavau.” (Isa. 26:4) Na taʻua e le faisalamo: “O [Ieova] o loʻu papa, o loʻu faaolataga, ma loʻu ʻolo e saogalemu ai.” (Faitau le Salamo 62:6-9.) E faapefea ona fai lenei Papa ma o tatou sulufaʻiga?

¹² E tatou te tumau iā Ieova pe a usitaʻia lana Afioga, lea e tele lava ina feteenaʻi ma le atamai faaletagata. (Sala. 73:23, 24) E masani ona faapea mai ē ua taaʻina i le atamai faaletagata: ‘E lē tumau lenei olaga, fai mea uma e te manaʻo i ai manū o maua le avanoa.’ ‘Suʻe se galuega e lelei le totogi.’ ‘Saʻili ni tupe se tele.’ ‘Faatau le mea lea ma lea mea.’ ‘Malaga e vaai i le matalasi o isi atunuu.’ Ae o le atamai mai i le Atua e ōgatusa ma le fautuaga lenei: “O i latou o faaaogā mea a le lalolagi, ia peiseaʻī e lē o faaaogāina atoatoa; auā o loo suia le tulaga o mea a lenei lalolagi.” (1 Kori. 7:31) Ua timaʻi mai foʻi Iesu ia faamuamua pea la tatou tapuaʻiga iā Ieova ma faaputu “ʻoa i le lagi,” lea e mautinoa e tumau ma saogalemu.—Mata. 6:19, 20.

13. E tusa ai o le 1 Ioane 2:15-17, o ā fesili e ao ona tatou fesili ifo ai?

¹³ Po o atagia atu i lou manatu i “le lalolagi” ma “mea o iai i le lalolagi,” e te matuā faatuatuaina le Atua? (1 Ioa. 2:15-17) Po o sili ona e faatāua ʻoa faaleagaga ma faaeaga i le auaunaga iā Ieova, i lo mea e ofo mai e le lalolagi? (Fili. 3:8) Po o e taumafai e “faafaigofie lau vaai”? (Mata. 6:22, fpl.) E lē finagalo le Atua e te faatamala i ou tiute, aemaise pe afai o loo e tausia se aiga. (1 Timo. 5:8) Ae e na te faatalitalia ana auauna e faatuatua atoatoa atu iā te ia, ae lē o le lalolagi a Satani o le a mavae atu.—Epe. 13:5.

14-16. O ā faamanuiaga ua maua e nisi ona o le ‘faafaigofie pea o le vaai,’ ma le faamuamua o mea e fesootaʻi i le Malo?

¹⁴ Seʻi manatu i le faaaʻoaʻoga a Risati ma Ruta, o mātua o ni tamaiti se toʻatolu. Ua taʻua e Risati: “Na ou lagona e tele mea e mafai ona ou faia mo Ieova. Sa tu lelei lo matou aiga, ae na ou lagona e lē o tele ni mea o oʻu faia mo le Atua. Ina ua uma ona tatalo e uiga i le mataupu ma iloilo pe lava tupe e tausi ai le aiga, na ma ioe ai ma Ruta e talosaga i loʻu pule e tipi oʻu aso faigaluega i le fā aso i le vaiaso, e ui sa lē lelei le tulaga tau tamaoaiga o le atunuu. Sa talia laʻu talosaga, ma e leʻi umi ae ou amata i lenei faasologa fou.” O ā lagona o Risati i lenei taimi?

¹⁵ Ua faapea mai o ia: “Ua faaitiitia i le 20 pasene le aofaʻiga o loʻu totogi, ae o lea ua faaopoopo le isi 50 aso i le tausaga e matou te mafuta ai ma loʻu aiga ma aʻoaʻo le fanau. Ua faaluaina oʻu itula i le talaʻiga, faatoluina suʻesuʻega faale-Tusi Paia, ma ua tele mea ua ou auauna ai i le faapotopotoga.  Ma ona ua maua loʻu taimi e vaai ai le fanau, ua mafai ai ona paeonia lagolago Ruta i nisi taimi. Ou te taumafai ia tumau i lenei faasologa i le umi e mafai ai.”

¹⁶ Sa mafai e Roy ma Petina o ē o loo tausia pea se la tama teine, ona faaitiitia o la aso faigaluega ina ia auai ai i le faiva faataimi atoa. Ua taʻua e Roy: “E tolu aso o le vaiaso ou te faigaluega ai, a o Petina e lua aso. Na matou ō ese mai foʻi i se fale telē ae nonofo i se tamaʻi fale e faigofie ona tausia. Na ma paeonia a o leʻi fananau mai le ma fanau o le tama ma le teine, ma na ma faanaunau pea e paeonia. Ina ua matutua le ma fanau, ona toe amata lea o le ma paeonia. E lē mafai e le tele o tupe ona faatusatusa atu i faamanuiaga ua ma mauaina.”

Ia Leoleoina Lou Loto i “le Filemu Mai i le Atua”

17. E ui e lē iloa le mea e tupu a taeao, ae ua faapefea ona faamāfanafanaina oe i le Tusi Paia?

¹⁷ E lē iloa e se tasi le mea e tupu a taeao, auā “e tutupu faafuaseʻi mea iā i [tatou] uma i le taimi e leʻi faatalitalia.” (Fai. 9:11) Ae e lē avea lenā ma itu e tatou te soona popolevale ai i lenei aso, e pei ona masani ona tupu i ē e leai sa latou mafutaga māfana ma le Atua. (Mata. 6:34) Na tusi Paulo: “Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai; ona leoleoina ai lea o o outou loto ma mafaufau i le filemu mai i le Atua, e silisili i mea uma lava e manatu i ai.”—Fili. 4:6, 7.

18, 19. O ā auala e faamāfanafana ai e le Atua i tatou? Faataʻitaʻi.

¹⁸ O le toʻatele o uso ma tuafāfine ua tofo i le toʻafimālie ma le filemu mai iā Ieova, a o feagai ma tulaga faigatā. Ua taʻua e se tuafafine: “Sa taumafai lava se fomaʻi tipitipi e faafefe aʻu ina ia ou ioe ai e tui le toto. Na faafeiloaʻi aʻu i le faapea mai: ‘Matuā faavalevalea tele pe a lē tuiina lou toto.’ Na ou tatalo lē leoa iā Ieova i lenā taimi atoa ai ma isi taimi, ma na ou lagona le filemu mai iā te ia. Sa ou malosi e pei o se papa. E ui na ou vaivai ona ua maulalo loʻu toto, ae na mafai ona ou faailoa atu mai i le Tusi Paia māfuaaga ou te lē talia ai se tuigātoto.”

¹⁹ O nisi taimi e ono saunia mai e le Atua se fesoasoani e ala i le faamāfanafana mai o se uso talitonu, po o meaʻai faaleagaga i le taimi talafeagai. Atonu ua e faalogo o faapea mai se uso po o se tuafafine: “E ese le fetaui o le mataupu. Na tusia ina ia fesoasoani iā te aʻu!” Ioe, po o ā lava o tatou tulaga ma mea o manaʻomia, o le a alofa mai Ieova iā i tatou pe a faatuatuaina o ia. Auā foʻi o i tatou o ana “mamoe” ma ua ia faaigoa i tatou i lona suafa.—Sala. 100:3; Ioa. 10:16; Galu. 15:14, 17.

20. Aiseā o le a saogalemu ai auauna a Ieova pe a oo mai le faaumatiaga o le lalolagi a Satani?

²⁰ Ua matuā faaloloʻi mai le “aso o le toʻasā o Ieova,” ma o le a faaumatia i lenā aso mea uma o loo faatuatuaina e le lalolagi a Satani. E lē mafai e auro, siliva po o isi mea tāua ona puipuia se tasi. (Sefa. 1:18; Faata. 11:4) E pau le sulufaʻiga, o lo tatou “Papa e faavavau.” (Isa. 26:4) Seʻi o tatou matuā faatuatuaina Ieova i le taimi nei, e ala i le usitaʻia o ona ala amiotonu, faalauiloa atu le feʻau o le Malo e ui e tatou te feagai ma le lē ano mai ma teteega, ma tuu atu o tatou popolega iā te ia. A o faia nei mea, e mautinoa o le a tatou ‘saogalemu ma lē fefefe i so o se puapuaga.’—Faata. 1:33.

[Faamatalaga faaopoopo]

Pe Mafai Ona E Faamatala?

E faapefea ona faatuatuaina le Atua

• pe a faaosoosoina e fai mea sesē?

• pe a lē ano ma tetee mai nisi?

• pe a feagai ma popolega?

[Fesili mo le Suʻesuʻega]

[Ata i le itulau 13]

O le tausia o tulafono a le Atua e iʻu ai i le fiafia

[Ata i le itulau 15]

‘O Ieova o le Papa e faavavau ia’