Pepese Atu iā Ieova!

“Ou te faia pesega i loʻu Atua po o le ā lava le umi ou te ola ai.”—SALA. 146:2.

1. O le ā na uunaʻia ai le talavou o Tavita e fatu nisi o ana salamo?

A O TALAVOU Tavita, sa ia faaalu le tele o le taimi e leoleo ai lafu mamoe a lona tamā i laufanua e latalata i Peteleema. A o leoleoina e Tavita mamoe, sa ia mātauina galuega matagofie o le foafoaga a Ieova: o le lagi ua tumu i fetu, “o manu vaefā . . . o le fanua,” ma “manufelelei o le lagi.” Ona na matuā aafia i mea na vaai i ai, o lea na uunaʻia ai o ia e fatuina ni pese faagaeeloto e viia ai Lē na faia nei mea matagofie. O le tele o fatuga a Tavita e maua i le tusi o Salamo. *—Faitau le Salamo 8:3, 4, 7-9.

2. (a) O le ā le aafiaga o musika i se tasi? Aumai se faaaʻoaʻoga. (e) O le ā e tatou te aʻoaʻoina mai i le Salamo 34:7, 8 ma le Salamo 139:2-8, e uiga i le faiā a Tavita ma Ieova?

 ² E foliga mai o le taimi lea na aʻoaʻoina lelei ai Tavita e avea o se faimusika tomai. Ona o lona tomai tele i le faimusika, na valaaulia ai o ia e tā le kitara i luma o le tupu o Saulo. (Faata. 22:29) Na aogā musika a Tavita e faatoʻafilemu ai le tupu popolevale, e pei foʻi ona aogā musika mananaia i tagata i aso nei. O taimi uma na tā ai e Tavita lana kitara, sa “mapu ai Saulo ma ua lelei iā te ia.” (1 Samu. 16:23) O loo aogā pea i aso nei pese na fatuina e lenei faimusika e mataʻu i le Atua. Seʻi manatu i ai! Ua silia nei i le 3,000 tausaga talu ona fanau mai Tavita, ae e faitau miliona tagata eseese i so o se itu o le lalolagi, e masani ona faitau i ana salamo ina ia maua ai ni faamāfanafanaga ma le faamoemoe.—2 No. 7:6; faitau le Salamo 34:7, 8; 139:2-8; Amo. 6:5.

Le Tāua o Musika i le Tapuaʻiga Moni

3, 4. O ā faatulagaga na faia i aso o Tavita mo le tāina ma le usuina o musika paia?

³ Sa talenia Tavita, ma na ia faaaogā lana taleni i se auala e sili ona aogā—ia viia ai Ieova. Ina ua avea o ia ma tupu o Isaraelu, sa faatulaga e Tavita ia faaaofia ai musika mananaia i sauniga o le faleʻie paia. Mai i le 38,000 o le ʻau sa Levī na galulue i le faleʻie paia, na tofia le 4,000 e avea ma “ē e vivii atu,” ma o le 288 mai i le fā afe, “na aʻoaʻoina i pesega iā Ieova, o tagata tomai uma.”—1 No. 23:3, 5; 25:7.

⁴ O le tele o pese na tāina ma usu e le ʻau sa Levī, na fatu e Tavita. O tagata Isaraelu uma na maua le faaeaga e auai ai i faatasiga na usu ai salamo a Tavita, e mautinoa na matuā faagaeetia i mea na latou faalogo i ai. Ina ua avatu le atolaau o le feagaiga i Ierusalema, “ona fai atu lea o Tavita i alii sili o le ʻau sa Levī, ina ia tofia o latou uso o ē e pepese faatasi ma meafaifaaili, o meafaifaaili e iai uaua, o kitara, ma sumepalo, ina ia tā leotele pese fiafia.”—1 No. 15:16.

5, 6. (a) Aiseā na uaʻi atu ai i musika i le taimi o le pulega a Tavita? (e) E faapefea ona tatou iloa na matuā tāua musika i le tapuaʻiga i Isaraelu anamua?

⁵ Aiseā na uaʻi atu ai i musika i aso o Tavita? Pe ona o le tupu o se faimusika? E leai, e iai se isi māfuaaga, lea na faaalia mai i senituri mulimuli ane ina ua toe amata e le tupu amiotonu o Esekia sauniga o le malumalu. Ua taʻua i le 2 Nofoaiga a Tupu 29:25: “Ona ia [Esekia] tofia lea o sa Levī i le fale o Ieova, faatasi ma sumepalo, o meafaifaaili e iai uaua, ma kitara e tusa ma le poloaʻiga a Tavita ma Kato o lē e faamatalaina faaaliga a le tupu, ma Natano le perofeta, auā o le aao o Ieova na oo mai ai le poloaʻiga e ala i ana perofeta.”

⁶ Ioe, na poloaʻia e Ieova ana auauna e ala mai i ana perofeta, ia vivii atu iā te ia i pese. Sa saʻoloto le ʻaupepese mai i tiute ia e tatau ona faia e isi tagata sa Levī, ina ia lava lo latou taimi e fatu ai pese ma atonu foʻi e faataʻitaʻi ai.—1 No. 9:33.

7, 8. Pe a usu a tatou pese o le Malo, o le ā le mea e sili atu ona tāua i lo o le tomai i musika?

⁷ Atonu e te faapea mai, “E lē o saʻu taleni le pese, ma e mautinoa e lē aofia ai aʻu i tagata tomai na tāina ma usuina pese i luma o le faleʻie paia!” Ae e lē o le ʻaufaimusika sa Levī uma o ni tagata e tomai i musika. E tusa ai ma le 1 Nofoaiga a Tupu 25:8, sa iai foʻi ‘ē ua faatoʻā aʻoaʻoina.’ E tāua foʻi ona mātau, atonu sa iai ni tagata i isi ituaiga o Isaraelu e tomai e pepese ma faimusika, ae na tofia e Ieova le ʻau sa Levī e taulimaina musika. E tatou te mautinoa e tusa po o i latou o ni ‘ē e tomai’ po o ‘ē ua faatoʻā aʻoaʻoina,’ ae na fai e le ʻau sa Levī faamaoni le mea sili e latou te mafai e faataunuu ai lo latou tofiga.

 ⁸ Sa fiafia Tavita i musika ma na poto i le faimusika. Ae pe e na o le taleni e tāua i le Atua? Na tusi Tavita i le Salamo 33:3: “Ia outou faia le mea e sili ona lelei i le tāina o uaua faatasi ma le alaga fiafia.” E manino le feʻau: O le mea tāua, ia tatou “faia le mea e sili ona lelei” e tatou te mafaia, e viia ai Ieova.

Le Vaega a Musika Ina ua Mavae Aso o Tavita

9. Faamatala mea e te vaai ma faalogo i ai pe ana e iai i le faapaiaga o le malumalu a o pule Solomona.

⁹ Sa iai se vaega tāua a musika i le tapuaʻiga mamā i le taimi o le pulega a Solomona. Ina ua faapaiaina le malumalu, sa iai se faaili toʻatele e aofia ai ma tagata e 120 na iliina pū. (Faitau le 2 Nofoaiga a Tupu 5:12.) Ua taʻua i le Tusi Paia: “Ua tasi le leo o ē e ilia pū [o ositaulaga uma] ma ē e pepese i viiga ma faafetai iā Ieova, . . . auā e ‘lelei o ia, e alofa faamaoni o ia e oo i le faavavau.’” O le taimi lava na usuina ai na pesega matagofie, “ona faatumuina ai lea o le fale o Ieova i le ao,” e faaalia ai lona finagalo malie. Maʻeu le faagaeeloto o le faalogo atu i le manaia o le autasi o leo o pū, faatasi ma le faitau afe o le ʻaupepese!—2 No. 5:13.

10, 11. O le ā e faaalia ai na faaaogā e uluaʻi Kerisiano musika i le tapuaʻiga?

¹⁰ Sa faaaogā foʻi e uluaʻi Kerisiano musika i le tapuaʻiga. E leʻi faia a latou sauniga i ni faleʻie paia po o ni malumalu, ae sa fai i fale o aiga. E ui sa feagai na Kerisiano ma sauāga ma le tele o faafitauli, ae na latou vivii atu pea i le Atua i pesega.

¹¹ Na timaʻi atu Paulo i ona uso Kerisiano i Kolose: “Ia faaauau ona . . . apoapoaʻi atu le tasi i le isi i salamo, o viiga i le Atua, o pese mananaia faaleagaga.” (Kolo. 3:16) Ina ua faafalepuipuiina Paulo ma Sila, na la “tatalo . . . ma usu viiga i le Atua” e ui e leai sa laʻua tusi pese. (Galu. 16:25) Pe afai e faafalepuipuiina oe, e fia ni a tatou pese o le Malo o le a e usu taulotoina?

12. E faapefea ona faaalia e tatou te talisapaia a tatou pese o le Malo?

¹² Talu ai e tāua tele musika i la tatou tapuaʻiga, e lelei la ona tatou fesili ifo: ‘Po o ou matuā talisapaia le tāua o pese o le Malo? Po o ou taumafai e vave taunuu i sauniga, fonotaga ma tauaofiaga ina ia usu faatasi ma oʻu uso ma tuafāfine i le pese amata, ma pese ma oʻu faalogona? Po o ou fai i laʻu fanau e aua le manatu i le pese i le va o le Aʻoga o le Faiva Faatiokarate ma le Sauniga o le Auaunaga, po o le pese i le va o le lauga lautele ma le Suʻesuʻega o le Olomatamata, o se taimi e ō ese ai mai i o latou nofoa e aunoa ma se māfuaaga tatau, atonu ina ia faaloaloa ai o latou vae?’ O le usuina o pese o se vaega o la tatou tapuaʻiga. Ioe, e tusa po o i tatou o ni ‘⁠ē e tomai’ po o ni ʻē ua faatoʻā aʻoaʻoina,’ e mafai ma e tatau iā i tatou uma ona autasi o tatou leo i le usuina o viiga iā Ieova.—Faatusatusa i le 2 Korinito 8:12.

Ua Manaʻomia ni Suiga

13, 14. O le ā le aafiaga o le usuina ma faalogona o pese i taimi o sauniga a le faapotopotoga? Faataʻitaʻi.

¹³ I le silia i le 100 tausaga ua tuanaʻi, na faamatala ai i le Zion’s Watch Tower se tasi o māfuaaga e tāua tele ai a tatou pese o le Malo. Ua taʻua e faapea: “O le peseina o upu moni, o se auala lelei lea e manatua ai e tagata o le Atua upu moni ma faaoo i o latou loto.” O le tele o upu o a tatou pese e faavae mai i mau o le Tusi Paia, o le aʻoaʻoina la o upu o ni pese, o se auala lelei lea e faaloloto ai le upu moni i o tatou loto. O le toʻatele o tagata faatoʻā asiasi mai i a tatou sauniga, e fiafia tele i le usuina e le faapotopotoga o pese ma o latou faalogona.

 ¹⁴ I se tasi afiafipō i le 1869, ina ua taliu atu le uso o C. T. Russell i lona fale mai i le galuega, na faalogo atu ai o usu mai ni pese i se fogāfale pito i lalo o se fale telē. I lenā taimi, ua faavaivai o ia ma manatu e lē taitai ona ia maua le upu moni e uiga i le Atua. Ona filifili lea o ia e uaʻi atu i mea tau pisinisi. Auā afai e maua ni ana tupe, o le a ia fesoasoani atu i manaʻoga faaletino o tagata, e ui e lē mafai ona ia fesoasoani atu iā i latou i le itu faaleagaga. Na alu atu le uso o Russell i totonu o lenā fale pefua ma palapalā, ma ia iloa ai o loo faia ai se sauniga faalotu. Sa ia nofo i lalo ma faalogologo. Na ia tusi mulimuli ane, o mea na faalogo i ai i lenā pō, “na lava ma totoe, ona o le fesoasoani a le Atua, e toe faamalosia ai lona faatuatua, o le Tusi Paia e mai i le Atua.” Ia mātau, o le usuina o pese na tosina ai le uso o Russell e alu i le sauniga.

15. O ā suiga i lo tatou malamalamaga ua manaʻomia ai ona toe teuteu le tusi pese?

¹⁵ A o faagasolo taimi, ua toe faia ni suiga i lo tatou malamalamaga i le Tusi Paia. Ua faapea mai le Faataoto 4:18: “O le ala o ē e amiotonu ua pei o le susulu o le malamalama lea e atili ai ona malamalama ma malamalama pea, seʻia oo ina matuā ao lelei le aso.” O le faateleina pea o le malamalama ua faia ai ni suiga i le auala e tatou te ‘peseina ai upu moni.’ Ua 25 nei tausaga talu ona faaaogā e Molimau a Ieova i le tele o atunuu le tusi pese ua faamatuaina Pese atu Viiga iā Ieova. * Talu mai tausaga na uluaʻi lomia ai lenā tusi pese, ua faasolo pea ina tupu tele le malamalama i nisi o mataupu, ma o nisi o faaupuga i lenā tusi pese ua lē o toe fetaui ma a tatou aʻoaʻoga. O se faaaʻoaʻoga, e tatou te lē o toe taʻua le alofa, olioli ma le filemu o ni fua o le agaga, ae o vala o le fua o le agaga. E manino mai, pe a fua i a tatou aʻoaʻoga, ua manaʻomia ai ona toe teuteu la tatou tusi pese.

16. E faapefea ona tatou faatatauina le fautuaga a Paulo o loo i le Efeso 5:19?

¹⁶ Ona o lenā tulaga ma isi māfuaaga, na ioe ai le Vaega Pule e lomia se tusi pese fou. Ua faaitiitia le aofaʻi o pese i lenei tusi pese fou i le 135. Talu ai ua faaitiitia pese e tatou te aʻoina, e tatau ai la ona tatou taulotoina upu o nisi pese fou. Ua talafeagai lea ma le fautuaga a Paulo o loo i le Efeso 5:19.—Faitau.

Ia Faaalia Lou Talisapaia

17. O ā manatu e fesoasoani iā i tatou e lē matamumuli ai e usu pese i sauniga a le faapotopotoga?

¹⁷ Pe e tatau ona avea lo tatou matamumuli ma pogai e tatou te lē pepese ai ma le lotoatoa i sauniga faa-Kerisiano? Ia manatu i le mea lenei: E tusa ai o la tatou tautala, pe  e lē moni “e sesē i tatou uma i mea e tele”? (Iako. 3:2) Peitaʻi, e ui e tatou te sesē i le tautala, ae e lē o taofia ai i tatou e vivii atu iā Ieova mai i lea fale i lea fale. E lē tatau foʻi la ona taofia i tatou mai i le vivii atu i le Atua i pese, ona e faapea e lē o sa tatou taleni le pese. E fiafia Ieova o lē “na faia le gutu o le tagata,” e faafofoga mai o loo faaaogā o tatou siʻufofoga e usu atu ai ona viiga.—Eso. 4:11.

18. O le ā ua fesoasoani i le tele o uso ma tuafāfine e aʻoaʻoina ai pese fou?

¹⁸ Ua fesoasoani le CD ua faamatuaina Sing to Jehovah—Piano Accompaniment i le tele o uso ma tuafāfine, e aʻoaʻoina ai pese fou. E ese le manaia pe a faalogologo i le auala e tā ai nei pese. Pe afai e te faalogologo i ai e lē aunoa i lou fale ma mulimuli i ai i lau tusi pese, o le a fesoasoani iā te oe e aʻo upu, ma e lagona ai le toʻa pe a usuina na pese i le Maota mo Sauniga.

19. O ā laasaga e aofia ai i le sauniunia o musika o a tatou pese o le Malo?

¹⁹ E faigofie ona tatou lē ano i musika o loo tāina i a tatou aso faapitoa o fonotaga, fonotaga matagaluega ma tauaofiaga itumalo. E telē se galuega ua faia i le sauniunia o na musika. Pe a uma ona filifilia pese e tāina, e tatau ona tusia ma le faaeteete nota mo sui e 64 o le faaili a le Olomatamata, e latou te tāina. Ona faaalu lea e le ʻaufaimusika o se taimi umi e iloilo ai pese ma faataʻitaʻi, ona puʻeina lea i la tatou fale puʻe leo i Patterson, i Niu Ioka. O le toʻasefulu o nei uso ma tuafāfine e lē nonofo i Amerika. E manatu i latou uma o se faaeaga le faia o se sao i le sauniunia o musika mananaia mo a tatou faatasiga faaleagaga. E ao ona tatou talisapaia a latou taumafaiga alolofa. Pe a valaaulia i tatou e le taʻitaʻifono o a tatou fonotaga ma tauaofiaga e alaala i o tatou nofoa, seʻi o tatou faia loa faapea ma faalogologo lelei i musika ua saunia ma le alofa.

20. O le ā le mea ua e maumauaʻi e fai?

²⁰ E faafofoga mai Ieova i a tatou pese e viia ai o ia. E tāua tele iā te ia na pese. E tatou te faafiafia lona finagalo e ala i le pepese mai i o tatou loto, i so o se taimi e faapotopoto ai mo le tapuaʻiga. Ioe, e tusa po o i tatou o ni ē e tomai po o ni ē faatoʻā aʻoaʻoina, seʻi o tatou ‘pepese atu iā Ieova’!—Sala. 104:33.

[Faaopoopoga i lalo]

O le ā Sou Manatu?

• O ā ni faaaʻoaʻoga i le Tusi Paia e faaalia ai, o musika o se vaega tāua o la tatou tapuaʻiga?

• O le ā le sootaga o le usitaʻia o le faatonuga a Iesu o loo i le Mataio 22:37, ma le usuina ma le lotoatoa o pese o le Malo?

• O ā ni auala e faaalia ai lo tatou talisapaia o a tatou pese o le Malo?

[Fesili mo le Suʻesuʻega]

[Ata i le itulau 23]

Pe e te vavao lau fanau ia aua neʻi ō ese mai i o latou nofoa e aunoa ma se māfuaaga tatau i taimi e usu ai pese?

[Ata i le itulau 24]

Po o e aʻoina i lou fale upu o a tatou pese fou?