Maua Faamanuiaga e Ala i le Tupu ua Taʻitaʻia e le Agaga o le Atua!

“O le a oo iā te ia le agaga o Ieova ma tumau ai.”—ISA. 11:2.

1. O ā popolega ua faaalia e nisi e faatatau i faafitauli o le lalolagi?

“O LE a faapefea ona ola tagata mo le isi 100 tausaga, pe afai o lea e matuā fenuminumiaʻi le lalolagi i faiga faapolotiki, le va fealoaʻi, faapea le siʻosiʻomaga?” O le fesili lenā na fesili ai i le 2006 Stephen Hawking, o se saienitisi e suʻesuʻe i mea i le vateatea. Na taʻua i le mekasini o le New Statesman: “E lē o mafai ona tatou aveesea le mativa pe faatupuina le filemu i le lalolagi. Nai lo lea, e foliga mai e matuā tuufaafeagai lava ma mea ua mafai ona tatou faia. E lē faapea ona e tatou te lē o taumafai malosi. Ua tatou faataʻitaʻia faiga malo eseese, mai i malo faa-komunisi i malo saʻoloto, mai i taumafaiga e faavae Malo Sosoo i le faaputuina o meatau faaniukilia e taofia ai le fetauaʻi. E anoanoaʻi taua ua tatou tauina ina ia ‘faaiʻuina ai taua,’ ma le manatu, ua tatou iloa le auala e mafai ona faaiʻu ai taua.”

2. O le ā le auala ua toeitiiti ona faatino ai lea e Ieova lana pule silisili ese i le lalolagi?

² O na faamatalaga, e lē faateʻia ai auauna a Ieova. Ua taʻu mai iā i tatou i le Tusi Paia, e leʻi faia tagata e pule iā i latou lava. (Iere. 10:23) E na o Ieova lava lo tatou Pule Silisili Ese. O lona uiga, o ia e iai le aiā e faatulaga mai ai tapulaa mo i tatou, e faailoa mai po o le ā lona finagalo mo i tatou, ma faasino mai iā i tatou le auala e faia ai. E lē gata i lea, ua lē o toe umi ona faatino lea o Lana pule, e faamuta taumafaiga iʻuvale a tagata e pulea i latou lava. O le taimi foʻi lenā, e na te faaumatia ai i latou uma e tetee i le tonu o lana pule silisili ese, auā o le a faaauau ai pea ona pologa tagata i le agasala, le lē lelei atoatoa, faapea ma Satani le Tiapolo, “le atua o lenei faiga o mea a le lalolagi.”—2 Kori. 4:4.

3. O le ā na valoia e Isaia e faatatau i le Mesia?

³ I le Parataiso i le lalolagi fou, o le a faatino ai le Pule Silisili Ese alofa a Ieova mo tagata e ala i le Malo o le Mesia. (Tani. 7:13, 14) Na valoia e Isaia e faatatau i le Tupu o lea Malo: “O le a tupu mai se lālā itiiti i le pogati o Iese; o le a tupu mai foʻi i ona aa se tātupu e fuatele mai. O le a oo iā te ia le agaga o Ieova ma tumau ai, o le agaga o le atamai ma le malamalama, o le agaga o le fautuaga ma le mana, o le agaga o le poto ma le mataʻu iā Ieova.” (Isa. 11:1, 2) O ā auala faapitoa ua fesoasoani ai le agaga paia o le Atua ina ia agavaa Iesu Keriso, le “lālā itiiti i le pogati o Iese,” e pule i tagata? O ā faamanuiaga o le a maua mai i lana pulega? Ma o le ā e tatau ona tatou faia ia maua ai na faamanuiaga?

Ua Avatu e le Atua Agavaa iā Iesu e Pule Ai

4-6. O le ā le malamalamaga tāua e mafai ai ona auauna Iesu o se Tupu, Ositaulaga Sili, ma o se Faamasino e atamai ma alofa?

⁴ E finagalo Ieova ia ausia e tagatānuu o lana pulega le tulaga lelei atoatoa, e ala i le taʻitaʻiga a Lē e sili ona atamai, o se Tupu e tigā alofa, o se Ositaulaga Sili, ma se Faamasino. O le pogai lenā ua filifilia ai e le Atua Iesu Keriso, o lē ua agavaa e ala i le agaga paia mo na matafaioi e sili ona tāua. Ia iloilo nisi o māfuaaga ua mafai ai e Iesu ona faatino atoatoa ona tofiga mai i le Atua.

 ⁵ E sili ona malamalama Iesu i le Atua. E na o le Alo lava e toʻatasi e na te silafia lelei le Tamā nai lo o se isi, atonu mo le faitau piliona tausaga le umi. A o faagasolo lenā taimi, na silafia lelei ai e Iesu Ieova, o le ala lea ua faamatalaina ai o ia, e “foliga i le Atua e lē vaaia.” (Kolo. 1:15) O Iesu lava ia na fetalai: “O lē ua vaai mai iā te aʻu, ua vaai foʻi o ia i le Tamā.”—Ioa. 14:9.

⁶ E pito atu iā Ieova, e sili ona malamalama Iesu i foafoaga uma, e aofia ai ma tagata. Ua taʻua i le Kolose 1:16, 17: “Na foafoaina isi mea uma i le lagi ma le lalolagi e ala iā te ia [le Alo o le Atua], o mea e vaaia ma mea e lē vaaia . . . O ia foʻi na muamua i isi mea uma lava, ma ua iai isi mea uma lava ona o ia.” Seʻi mafaufau i lenā mea! O Iesu o le “tufuga poto” a le Atua, na faia sona sao i isi vala uma o le foafoaga. O lea la, e malamalama Iesu i mea uma i le aoao o mea, mai i vaega ninii o le atoma e aofia ai ma le faiʻai ofoofogia o le tagata. Ioe, o Keriso, o le faatinoga atoatoa o le atamai!—Faata. 8:12, 22, 30, 31.

7, 8. Na faapefea ona faaaogā e le Atua lona agaga e fesoasoani i le faiva a Iesu?

⁷ Na faauuina Iesu i le agaga paia o le Atua. Na fetalai Iesu: “Ua i oʻu luga le agaga o Ieova, auā ua ia faauuina aʻu e folafola le tala lelei i ē e matitiva, ua ia auina atu aʻu e talaʻi le saʻolotoga i ē ua ave faapagota, ma ia pupula mata o ē e tauaso, ma ia faasaʻolotoina ē ua nutimomoia, ia talaʻi le tausaga e talileleia mai ai e Ieova.” (Luka 4:18, 19) Ina ua papatisoina Iesu, e foliga mai o le agaga paia, na mafai ai ona ia toe manatua mea na ia aʻoaʻoina, a o leʻi afio mai i le lalolagi, e aofia ai ma mea na finagalo le Atua e na te faataunuu i lana faiva i le lalolagi i le avea ai ma Mesia.—Faitau le Isaia 42:1; Luka 3:21, 22; Ioane 12:50.

⁸ Talu ai na faamalosia o ia e le agaga paia, ma e atoatoa i le tino ma le mafaufau, e lē gata ina avea ai Iesu o se tagata silisili o ē uma na soifua i le lalolagi, ae o ia foʻi o le Faiaʻoga sili. O le mea moni, na ‘matuā ofo le motu o tagata i lana aʻoaʻo atu.’ (Mata. 7:28) Na mafai e Iesu ona faailoa mai le pogai autū o faafitauli o tagata, o le agasala, lē lelei atoatoa, ma le lē iloa o le Atua. E lē gata i lea, na ia silafia mea o i loto o tagata ma faia iā i latou e tusa ai ma na tulaga.—Mata. 9:4; Ioa. 1:47.

9. E faapefea ona faateleina lou faatuatuaina o Iesu o se Pule, pe a e manatunatu i lona soifuaga i le lalolagi?

⁹ Na soifua Iesu o se tagata. O lona soifuaga o se tagata ma aufaatasiga ma tagata lē lelei atoatoa, na fesoasoani tele i le maua e Iesu o agavaa e avea ma Tupu. Na tusi le aposetolo o Paulo: “Na tatau ai ona pei [Iesu] o ona ‘uso’ i mea uma lava, ina ia mafai ona avea o ia ma ositaulaga sili e alofa mutimutivale ma faamaoni i mea a le Atua, ina ia mafai ona ia ofoina atu le taulaga o le leleiga ma le Atua mo agasala a le nuu. Talu ai na mafatia o ia ina ua tofotofoina, ua mafai ai ona ia fesoasoani i ē ua tofotofoina.” (Epe. 2:17, 18) E tigā alofa Iesu i ē o loo tofotofoina ona sa “tofotofoina” o ia. Sa manino mai uiga tigā alofa o Iesu a o faia lana auaunaga i  le lalolagi. Na fia faalatalata atu iā te ia i latou e mamaʻi, o ē iai manaʻoga faapitoa, e oo lava tamaiti. (Mare. 5:22-24, 38-42; 10:14-16) Na faalatalata atu foʻi iā te ia ē e agamalu ma naunau e fia iloa le Atua. A o ē e faamaualuluga ma faasausili, e “lē alolofa i le Atua” na latou tetee ma ʻinoʻino iā te ia.—Ioa. 5:40-42; 11:47-53.

10. O le ā le auala sili na faaalia ai e Iesu le tele o lona alofa mo i tatou?

¹⁰ Na foaʻi e Iesu lona ola mo i tatou. Atonu o le faamaoniga sili o le agavaa o Iesu e avea ma o tatou Pule, o lona lotomalie lea e maliu mo i tatou. (Faitau le Salamo 40:6-10.) “E leai lava se tasi e sili atu lona alofa nai lo o lenei, o le foaʻiina atu lea e se tasi o lona ola mo ana uō.” (Ioa. 15:13) Ioe, na foaʻi mai e Iesu lona soifua mo tagata, e ese ai mai taʻitaʻi lē lelei atoatoa, o ē faaaogā le malosi o o latou tagatānuu e ola lelei ai.—Mata. 20:28.

Ua iā Iesu le Mana e Faatino ai Aogā o le Togiola

11. Aiseā e tatou te faatuatuaina atoatoa ai Iesu o Lē e togiolaina i tatou?

¹¹ Maʻeu le talafeagai ona avea Iesu le Ositaulaga Sili ma taʻimua, i le faatatauina iā i tatou o aogā o lana taulaga togiola! I le taimi o lana faiva i le lalolagi, na faaali mai ai e Iesu o Lē e togiolaina i tatou, se faataʻimuaga o mea o le a ia faia i Lana Pulega i le Afe o Tausaga, lea e mafai ona tatou olioli ai pe a faamaoni. Sa ia faamālōlō tagata mamaʻi ma ē e lē atoatoa le malosi, faatutū ē ua oti ma fafaga le anoanoaʻi o tagata, ma faatoʻafilemu matagi ma le vai. (Mata. 8:26; 14:14-21; Luka 7:14, 15) E na te leʻi faia nei mea e faalialia ai lana pule ma lona malosi, ae ia faaalia ai lona tigā alofa ma lona alofa. Na fetalai atu o ia i se lepela na ʻaiʻoi ane ia faamālōlōina o ia: “Ou te loto i ai.” (Mare. 1:40, 41) O le a faatino e Iesu lenā tigā alofa i le lalolagi aoao, i le taimi o lana Pulega i le Meleniuma.

12. O le a faapefea ona faataunuuina le Isaia 11:9?

¹² O le a faaauau foʻi ona faia e Keriso ma ē latou te pule faatasi le polokalame o aʻoaʻoga faaleagaga, lea na amataina e Iesu i le tusa ma le 2,000 tausaga ua mavae. Ona taunuu ai lea o upu i le Isaia 11:9: “O le a tumu le lalolagi i le poto e uiga iā Ieova e pei ona ufitia o le ilititai i le suāsami.” E mautinoa, o na aʻoaʻoga mai le Atua, o le a aofia ai faatonuga i le auala e tausia ai le lalolagi, ma le lē mafaitaulia o mea faiola o loo i ai, e pei ona poloaʻia ai Atamu e faia i le amataga. E oo ane i le faaiʻuga o le 1,000 tausaga, ua faataunuuina le fuafuaga a le Atua na iai i le amataga e pei ona taʻua i le Kenese 1:28, ma faatatauina atoatoa ai aogā o le taulaga togiola.

 Ua iā Iesu le Mana e Fai ai ma Faamasino

13. Na faapefea ona faaalia e Iesu lona naunau i le amiotonu?

¹³ O Keriso, “o Ia lenei ua tofia e le Atua e fai ma faamasino o ē ola ma ē oti.” (Galu. 10:42) Maʻeu la se faamāfanafanaloto i le iloa e maufaatuatuaina Iesu, o le amiotonu ma le faamaoni, ua pei o se fusi ua fusimau ai lona sulugātiti! (Isa. 11:5) Sa ʻinoʻino Iesu i le matapeʻapeʻa, faafiaamiotonu, ma isi amioga leaga, ma sa ia silafia foʻi ē na lē alolofa i mafatiaga o isi. (Mata. 23:1-8, 25-28; Mare. 3:5) E lē gata i lea, e leʻi faasesēina Iesu i foliga vaaia o mea, “talu ai ua silafia e ia loto o tagata.”—Ioa. 2:25.

14. O le ā le auala ua faaalia ai e Iesu lona naunau i le amiotonu ma le faamasinogatonu i le taimi nei, ma o ā fesili e tatau ona tatou fesili ai iā i tatou lava?

¹⁴ Na faaalia pea e Iesu lona naunau i le amiotonu ma le faamasinogatonu, i lona vaavaaia o se tauiviga tele i le galuega talaʻi ma le aʻoaʻo atu, i le faagasologa o le talafaasolopito o le lalolagi. E leai se tagata po o se malo, po o se agaga leaga e mafai ona taofia le faataunuuina o lenei galuega, e tusa ai ma le finagalo o le Atua. O lona uiga, e tatou te mautinoa atoatoa, pe a uma Amaketo, e na o le faamasinogatonu a le Atua o le a iai. (Faitau le Isaia 11:4; Mataio 16:27.) Fesili ifo iā te oe lava: ‘⁠Po o iā te aʻu le uiga e pei ona iā Iesu e faatatau i tagata i laʻu faiva? Po o oʻu avatu iā Ieova le mea sili ou te mafaia e ui ina tapulaa mea ou te mafaia ona o loʻu soifua mālōlōina ma loʻu tulaga?’

15. O le ā le mea ia manatua e fesoasoani iā i tatou e avatu ai iā Ieova le mea sili tatou te mafai?

¹⁵ E mafai ona tatou auauna i le Atua ma o tatou ola atoa pe a manatua, o le talaʻiga, o Lana galuega. O Ia na poloaʻi mai e fai; ua ia faatonutonu mai le auala e faia ai e ala mai i lona Alo; ma e na te faamalosia i latou o loo faia e ala i lona agaga paia. Pe e tāua iā te oe le faaeaga o sē e faigaluega faatasi ma le Atua, faapea ma lona Alo o loo taʻitaʻiina e le agaga paia? E na o Ieova lava e mafai ona uunaʻia tagata e sili atu i le fitu miliona, ma o le toʻatele “e leʻi lava ni aʻoaʻoga ma e faatauvaa,” e faalauiloa atu le feʻau o le Malo i atunuu e 236.—Galu. 4:13.

Faamanuiaina Outou e Ala iā Keriso!

16. O le ā e uiga i ai le Kenese 22:18 e faatatau i faamanuiaga a le Atua?

¹⁶ Na fetalai Ieova iā Aperaamo: “O lau fanau e maua ai e nuu uma o le lalolagi faamanuiaga talu ai ua e faalogo i loʻu leo.” (Kene. 22:18) O lona uiga, o ē e faatāua la latou auaunaga i le Atua ma lona Alo, e vaavaai atu ma le mautinoa i faamanuiaga o le a maua e ala i le Fanau, le Mesia folafolaina. O le mea lea e tatou te pisi ai i le auaunaga i le Atua.

17, 18. O le ā le folafolaga a Ieova ua tatou faitau ai i le Teuteronome 28:2, ma o le ā le uiga o lea mea mo i tatou?

¹⁷ Na fetalai atu le Atua iā Isaraelu, le fanau faaletino a Aperaamo: “E oo foʻi iā te oe nei faamanuiaga uma, ma maua oe, pe afai e te faalogo pea i le siʻufofoga o Ieova lou Atua.” (Teu. 28:2) E faatatau foʻi lenā fetalaiga i auauna a le Atua i aso nei. A e manaʻo e maua le faamanuiaga a Ieova, ia e “faalogo pea” i lona siʻufofoga, ona ‘oo foʻi lea iā te oe o nei faamanuiaga uma, ma maua oe.’ Ae o le ā e aofia ai i le “faalogo”?

¹⁸ E aofia ai i le faalogo, le iloilo totoʻa o mea o loo aumaia i le Afioga a le Atua, atoa ai ma taumafa faaleagaga o loo ia saunia mai. (Mata. 24:45) E uiga foʻi i le usiusitaʻi i le Atua ma lona Alo. Na fetalai Iesu: “E lē  ulu atu i le malo o le lagi i latou uma o ē fai mai iā te aʻu, ‘Le Alii e, le Alii e,’ ae e na o lē na te faia le finagalo o loʻu Tamā o i le lagi.” (Mata. 7:21) O le uiga o le faalogo i le Atua, o le gauaʻi ma le lotomalie i le faatulagaga ua faavaeina e le Atua, le faapotopotoga Kerisiano atoa ai ma toeaina tofia, po o “meaalofa i tagata.”—Efe. 4:8.

19. E faapefea ona tatou maua se faamanuiaga?

¹⁹ E aofia ai i “meaalofa i tagata” sui o le Vaega Pule, o ē ua avea ma sui o le faapotopotoga Kerisiano atoa. (Galu. 15:2, 6) O le mea moni, o o tatou uiga agaʻi i uso faaleagaga o Keriso, o se vala tāua e fua i ai le faamasinoina o i tatou pe a oo mai le puapuaga tele. (Mata. 25:34-40) O lea la, o se tasi o vala e tatou te maua ai se faamanuiaga, e ala lea i le lagolagoina ma le faamaoni o le ʻaufaauuina a le Atua.

20. (a) O le ā se matafaioi autū a “meaalofa i tagata”? (e) E faapefea ona faaalia lo tatou talisapaia o nei uso?

²⁰ E aofia ai foʻi i “meaalofa i tagata” sui o Komiti o Lālā, o ovasia femalagaaʻi, ma toeaina o le faapotopotoga, o i latou uma ua tofia e le agaga paia. (Galu. 20:28) O le matafaioi autū a nei uso, o le atiaʻe lea o tagata o le Atua “seʻi oo ina tasi i tatou uma i le faatuatuaga, ma le poto saʻo e faatatau i le Alo o le Atua, ia oo ina avea ma tagata matua, ina ia atoatoa lona matua e pei o Keriso.” (Efe. 4:13) E moni e lē lelei atoatoa i latou, e pei foʻi o i tatou. Ae a tatou talisapaia i latou ma la latou galuega alofa faaleoleo mamoe o loo fai, o le a tatou maua se faamanuiaga.—Epe. 13:7, 17.

21. Aiseā e faanatinati ai ona tatou usitaʻi i le Alo o le Atua?

²¹ Ua toeitiiti ona gaoioi loa lea o Keriso faasaga i le faiga o mea amioleaga a Satani. O le a faalagolago o tatou ola i lenā taimi i le faamasinoga a Iesu, auā ua tofia o ia e le Atua e taʻitaʻia le “motu o tagata e toʻatele” lea na valoia mai, i “vaipuna o le vai o le ola.” (Faaa. 7:9, 16, 17) O lea, ia faia le mea sili e tatou te mafai e gauaʻi ai ma le lotomalie, ma le agaga faafetai i le Tupu tofia a Ieova, o loo taʻitaʻia e lona agaga paia.

O le ā ua E Aʻoaʻoina Mai i le . . .

• Isaia 11:1-5?

• Mareko 1:40, 41?

• Galuega 10:42?

• Kenese 22:18?

[Fesili mo le Suʻesuʻega]

[Ata i le itulau 17]

Sa manino mai le tigāalofa o Iesu ina ua ia faatūina le afafine o Iairo

[Ata i le itulau 18]

O loo vaavaaia e Iesu Keriso se tauiviga tele o le talaʻiga i le talafaasolopito