Fesili Mai le ʻAufaitau

Aiseā na fai atu ai Iesu i se fafine sa lauiloa o sē e agasala, ua faamagaloina ana agasala?—Luka 7:37, 48.

A o taoto Iesu e taumafa i le fale o se Faresaio e igoa iā Simona, ua sau se fafine ‘i tua o Iesu ma tootuli i ona vae.’ Na faasusū e ia aao o Iesu i ona loimata ma soloi i ona lauulu. Ona sogi lemū atu lea o ia i ona vae ma uu i se suāuu manogi. Ua taʻua i le tala a Evagelia e faapea, o le fafine “e lauiloa i le aai o sē e agasala.” E moni, o tagata lē lelei atoatoa uma e agasala, ae e masani ona taʻua i le Tusi Paia lenei faaupuga, e faamatala ai se tasi e lauiloa ana agasala po o sē e iai se talaaga i le faia o agasala. E foliga mai o le fafine e talitane. Na fetalai atu Iesu iā te ia: “Ua faamagaloina au agasala.” (Luka 7:36-38, 48) O le ā le uiga o le fetalaiga a Iesu? Talu ai e leʻi ofoina atu i lea taimi le taulaga togiola, na faapefea la ona faia lenei faamagaloga?

Na fufulu ma uu e le fafine aao o Iesu a o leʻi faamagaloina o ia, na fai atu e Iesu se talafaatusa e faaalia ai se manatu tāua iā Simona, o lē na talimālō iā te ia. I le faatusaina o le agasala i se aitalafu matuā telē e faigatā ona toe totogi, na fetalai atu Iesu iā Simona: “E toʻalua ni tamāloloa na nofo aitalafu i se tagata na nonō atu tupe iā i laʻua, o le tasi na aitalafu i le lima selau tenari, a o le isi e lima sefulu tenari. Ina ua leai ni a la mea e toe totogi atu ai, ona ia faamagalo lea ma le lotoatoa o a la aitalafu. O lea, o ai o i laʻua e sili ona alofa iā te ia?” Ua tali mai Simona: “Ou te manatu o lē na faamagaloina lana aitalafu telē.” Ua tali atu Iesu: “Ua saʻo lau tali.” (Luka 7:41-43) Ua nofo aitalafu i tatou uma i le Atua i le usiusitaʻi, o lea, afai e tatou te lē usiusitaʻi iā te ia ma agasala ai, ua lē mafai la ona tatou totogi atu i le Atua le mea e tatau iā te ia. O lea ua faateleina ai la tatou aitalafu. Ae ua pei Ieova o le tagata na nonō atu tupe ua malie e faamagalo aitalafu. Na faalaeiau Iesu i ona soo e tatalo i le Atua ma ōle atu e faapea: “Faamagalo mai i a matou agasala e pei foʻi ona matou faamagalo atu i ē o agasala mai iā i matou.” (Mata. 6:12) Ua taʻua i le faamatalaga pito i lalo o le Luka 11:4 o a tatou agasala e pei o ni aitalafu.

O ā tulaga na faamagalo ai e le Atua agasala i aso ua mavae? O lona faamasinotonu lelei atoatoa, na manaʻomia ai ona faasala tagata i le oti ona ua agasala. O lea, na totogi ai e Atamu lana agasala i lona ola. Ae i le Tulafono na avatu e le Atua i le nuu o Isaraelu, e mafai ona faamagaloina agasala a lē e fai mea sesē e ala i le faia o se taulaga iā Ieova i se manu. Na taʻua e Paulo: “E toetoe o mea uma lava e faamamāina i le toto e tusa ai ma le Tulafono, ma e lē mafai ona faamagaloina agasala seʻi vaganā ua faamaligiina le toto.” (Epe. 9:22) E leai lava se isi auala na iloa e tagata Iutaia e mafai ona maua ai le faamagaloga a le Atua. E lē o se mea la e ofo ai, ona i aso o Iesu, na lē fiafia ē na faalogo i lana fetalaiga na fai atu i le fafine. Na faapea ifo i latou na taooto faatasi ma Iesu i le laulau: “O ai ea lenei tagata o lē e faamagaloina agasala?” (Luka 7:49) Na faapefea la ona faamagaloina agasala a lenei fafine ua tumu i le agasala?

Ua taʻua i le uluaʻi valoaga na faia ina ua fouvale le uluaʻi ulugalii, le finagalo o Ieova ia iai se “fanau,” o lē o le a tuʻimomomoina lona mulivae e Satani ma lana “fanau.” (Kene. 3:15) Na taunuu lenei tuʻimomomoina ina ua fasiotia Iesu e fili o le Atua. (Kala. 3:13, 16) O le toto maligi o Iesu ua avea ma togiola e faasaʻoloto ai tagata mai i le agasala ma le oti. Talu ai e lē mafai ona taofia Ieova mai i le faataunuuina o lona finagalo, o le taimi lava la na faailoa mai ai upu o loo i le Kenese 3:15, e pei lava ua uma ona totogi le togiola i le silafaga  a le Atua. Ua mafai nei ona ia faamagalo i latou e faatuatua i ana folafolaga.

A o lumanaʻi le faa-Kerisiano, sa iai i latou na silasila i ai Ieova o ē e amiotonu. O nisi o i latou o Enoka, Noa, Aperaamo, Raava ma Iopu. Ona o le faatuatua, na faamoemoe ai i latou i le faataunuuina o folafolaga a le Atua. Na tusi Iakopo: “Na faatuatua Aperaamo iā Ieova, ma na ia silasila ai iā te ia o lē e amiotonu.” Na taʻua e Iakopo e uiga iā Raava: “Pe e leʻi faapena foʻi ona taʻuamiotonuina Raava le fafine talitane i ana galuega?”—Iako. 2:21-25.

Na faia e Tavita, le tupu o Isaraelu anamua ni agasala matuiā, ae sa faatuatua malosi o ia i le Atua moni ma faaalia le salamō moni i taimi taʻitasi. Ua taʻua foʻi i le Tusi Paia: “Ua tuuina mai [Iesu] e le Atua e fai ma taulaga ina ia tatou lelei ai ma le Atua, i le faatuatua i lona toto. Na faia lenei mea ina ia faaalia ai lana lava amiotonu, auā na ia faamagaloina agasala ua mavae, a o faapalepale mai pea le Atua; ina ia faaalia ai lana lava amiotonu i le taimi nei, ma iloa ai lona amiotonu a o ia taʻuamiotonuina le tagata e faatuatua iā Iesu.” (Roma 3:25, 26) Na faamagalo e Ieova agasala a Tavita e faavae i le taulaga togiola a Iesu e ui e leʻi faia i lenā taimi, ma na faamaoni pea Ieova i Ana tapulaa amiotonu.

E foliga mai e faapena foʻi le fafine lea sa uuina aao o Iesu. Na ola o ia i se olaga lē mamā, ae na salamō. Sa iloa e ia e manaʻomia ona laveaʻi o ia mai i le agasala, ma faailoa atu i ana gaoioiga lona talisapaia moni o lē ua saunia ai e Ieova lenā togiola. E ui e leʻi totogiina i lenā taimi le togiola, ae e mautinoa o le a totogiina, o lea sa mafai ona maua aogā i tagata e pei o lenā fafine. O lea na fetalai atu ai Iesu iā te ia: “Ua faamagaloina au agasala.”

E pei ona faaalia mai i lenei tala, e leʻi teena e Iesu tagata agasala. Sa agalelei o ia iā i latou. O lea la, e nofosauni Ieova e faamagalo tagata agasala ua salamō. Maʻeu se faamautinoaga matagofie ma faamāfanafanaloto mo tagata lē lelei atoatoa e pei o i tatou!

[Ata i le itulau 7]

Na silasila Ieova iā i latou o ē e amiotonu