Ia Faamaoni Pea i le Atua e Ui i Suiga o le Olaga

PO UA iai ni suiga i lou olaga? Po o faigatā ona e feagai ma na suiga? O le toʻatele o i tatou ua oo, po o le a oo foʻi i lenā tulaga. O nisi o faaaʻoaʻoga o mea na tutupu i isi tagata i aso ua mavae, e fesoasoani iā i tatou e iloa ai uiga lelei e aogā iā i tatou.

O se faaaʻoaʻoga, seʻi manatu i suiga e tele na oo iā Tavita. Ua na o ia o se tama leoleo mamoe, ina ua faauuina o ia e Samuelu e avea ma tupu i se taimi o i luma. A o laʻitiiti lava, sa ofo atu o ia e tau ma le Filisitia tinoese o Koliata. (1 Samu. 17:26-32, 42) Na valaaulia le tauleʻaleʻa o Tavita e nofo i le maota o le tupu o Saulo, ma tofia ai e avea ma taʻitaʻiʻau. Sa lilo i manatu o Tavita o le a oo nei suiga i lona olaga; ma e na te leʻi iloa foʻi le mea o le a tupu.

Na oo ina matuā lē lelei le faiā a Tavita ma Saulo. (1 Samu. 18:8, 9; 19:9, 10) Na ola Tavita o se tagata e maumausolo mo ni tausaga, ina ia faasaoina ai lona ola. E oo lava foʻi i le taimi a o avea o ia ma tupu o Isaraelu, na matuā suia tulaga na oo iā te ia, aemaise lava ina ua ia mulilua, ma taumafai e ufiufi lenā agasala e ala i le faia o le fasioti tagata. O ana agasala na oo ai mala i lona aiga. O se faaaʻoaʻoga, na fouvale iā te ia lona atalii o Apisaloma. (2 Samu. 12:10-12; 15:1-14) Ae ina ua salamō Tavita mai i ana agasala o le mulilua ma le fasioti tagata, na faamagalo o ia e Ieova ma ia toe maua le finagalo malie o le Atua.

E ono oo foʻi suiga iā te oe. O faafitauli i le soifua mālōlōina, faigatā tau tamaoaiga, po o faafitauli i le aiga—faapea foʻi a tatou lava gaoioiga—e ono māfua ai suiga i o tatou olaga. O ā uiga e mafai ona fesoasoani iā i tatou e onosaia ai nei faafitauli?

E Fesoasoani le Lotomaulalo iā i Tatou

O le lotomaulalo e aofia ai le gauaʻi. O le lotomaulalo moni, e mafai ai ona tatou iloa lo tatou tagata moni o loo iai, faapea foʻi ma uiga moni o isi. O le amanaʻia o uiga lelei ma mea ua taulau manuia ai isi, o le a atili ai ona tatou talisapaia i latou ma mea e latou te faia. E ono fesoasoani foʻi le lotomaulalo iā i tatou, e malamalama ai i le māfuaaga ua tupu ai se mea iā i tatou, ma iloa ai le auala e taulimaina ai.

 O le atalii o Saulo o Ionatana, o se faaaʻoaʻoga lelei. Na suia tulaga na oo iā te ia ona o mea e lē maʻalofia na tutupu. Ina ua taʻu atu e Samuelu iā Saulo o le a aveesea e Ieova le malo, e leʻi fai atu Samuelu o le a soloaʻi ane Ionatana e avea ma tupu. (1 Samu. 15:28; 16:1, 12, 13) Na filifilia e le Atua Tavita e avea ma tupu e sosoo ai o Isaraelu, ae e lē o Ionatana. O lea la, o le lē usiusitaʻi o Saulo na iai se aafiaga lē lelei iā Ionatana. E ui lava e leai se vaega a Ionatana i le mea na faia e Saulo, ae e leʻi soloaʻi ane o ia e fai ma tupu e sui aʻi lona tamā. (1 Samu. 20:30, 31) O ā uiga faaalia o Ionatana i lenei tulaga? Pe na ia teuloto se mea na lē fiafia pe fuā ai iā Tavita? E leai. E ui lava e matua atu ma tele atu le tomai o Ionatana, ae na ia lagolagoina ma le faamaoni Tavita. (1 Samu. 23:16-18) O le lotomaulalo na fesoasoani iā te ia e iloa ai lē ua faamanuiaina e le Atua, ma e na te ‘⁠leʻi faasili lona manatu iā te ia lava, i lo o le mea e tatau ona manatu i ai.’ (Roma 12:3) Na malamalama Ionatana i le mea e faafinagaloina e Ieova mai iā te ia, ma talia Lana faaiʻuga.

O le mea moni, o le tele o suiga e māfua ai ni faafitauli. I se tasi taimi, na faifaimea faatasi Ionatana ma ni tagata eseese se toʻalua na pele iā te ia. O le tasi, o lana uō o Tavita, o lē na filifilia e Ieova e avea ma tupu i se taimi o i luma. A o le isi, o lona tamā o Saulo, o lē na teena e Ieova a o avea pea ma tupu. O lenei tulaga na matuā mafatia ai faalogona o Ionatana, a o ia taumafai e faamaoni pea iā Ieova. O suiga e tatou te fesagaʻia e ono faapopoleina ai i tatou ma lē maua ai se toʻa. Ae afai e tatou te taumafai e iloa le silafaga a Ieova, o le a mafai ona faaauau ona tatou auauna atu ma le faamaoni iā te ia, a o feagai ma suiga o le olaga.

Le Tāua o le Faamaulalo

O le faamaulalo, o le iloa lea o mea e gata mai ai lou mafai. E eseese le faamaulalo ma le lotomaulalo. O se tagata lotomaulalo atonu e na te lē iloa atoatoa mea e gata mai ai lona mafai.

O Tavita o se tagata e faamaulalo. E ui lava ua filifilia o ia e Ieova e fai ma tupu, ae e leʻi mafai lava ona soloaʻi ane o ia i le nofoālii mo le tele o tausaga. E lē o taʻua i le Tusi Paia, pe na maua e Tavita se faamatalaga mai iā Ieova i le māfuaaga ua tuai ai. E ui lava e ono fiu ai se tasi e faatalitali i tulaga faapea, ae e leʻi popolevale ai o ia. Na ia iloa le mea e gata mai ai lona mafai, ma iloa o loo tauaaoina e Ieova lea mataupu. O lea, na lē mafai ai e Tavita ona fasiotia Saulo ina ia faasaoina lona ola, ma na ia taofia foʻi lana uō o Apisai i le faia faapea.—1 Samu. 26:6-9.

O nisi taimi, e ono tulaʻi mai ai i la tatou faapotopotoga se tulaga e tatou te lē malamalama ai, pe tatou te manatu foʻi e lē o taulimaina i se auala maopoopo ma lelei. Pe tatou te faamaulalo e amanaʻia o Iesu o le Ulu o le faapotopotoga, ma e na te faia mea e ala i le ʻautoeaina ua tofia e taʻimua i le faapotopotoga?  Pe e tatou te faamaulalo i le iloaina, o le faamaoni pea iā Ieova, e tatou te faatalitali ai i lana taʻitaʻiga e ala iā Iesu Keriso? Po o le a tatou faatalitali pea ma le faamaulalo e ui e lē faigofie ona faia faapea?—Faata. 11:2.

O le Agamalu e Tatou te Maua ai se Vaaiga Saʻo

O le agamalu, o le toʻafimālie. O lea uiga e mafai ai ona tatou onosaia le faatigā mai o isi e aunoa ma le ita, le ita faamoemoe po o le fia tauimasui. E faigatā ona atiaʻe lenei uiga o le agamalu. I se tasi o mau o le Tusi Paia, ua talosagaina ai “ē ua agamalu i le lalolagi” ina ia “saʻili le agamalu.” (Sefa. 2:3) E iai le fesootaʻiga o le agamalu i le lotomaulalo ma le faamaulalo, ae e aofia ai foʻi ma isi uiga e pei o le mataalofa, ma le amio filemu. O le tagata agamalu, e mafai ona tupu aʻe faaleagaga pe a talia e ia mea ua ia aʻoaʻoina, ma suia ai ona uiga.

E faapefea ona fesoasoani le agamalu e feagai ai ma suiga fou o o tatou olaga? Atonu ua e mātauina ua manatu le toʻatele e faapea, o se mea leaga le iai o suiga. A o le mea moni, e mafai ona avea suiga ma mea e aʻoaʻoina atili ai i tatou e Ieova. Ua faataʻitaʻia mai i le olaga o Mose lenā tulaga.

I le 40 o tausaga o Mose, ua iai ni uiga lelei tele iā te ia. Ua faamaonia lona manatu mamafa i tagata o le Atua, ma faaalia se agaga faataulaga. (Epe. 11:24-26) Ae peitaʻi, a o leʻi tofia o ia e Ieova e aveesea le nuu o Isaraelu mai Aikupito, sa feagai Mose ma ni suiga, lea na faaleleia atili ai lona agamalu. Sa sola ese o ia mai Aikupito ma nofo i le nuu o Mitiana mo le 40 tausaga, ma galue o se leoleo mamoe, o se galuega faatauvaa. O le ā le iʻuga? O lenei suiga na avea ai o ia ma tagata lelei tele. (Nu. 12:3) Na ia iloa faamuamua mea faaleagaga nai lo o ona lava manaʻoga.

Ina ia faataʻitaʻia le agamalu o Mose, seʻi tatou manatunatu i le mea na tupu ina ua fetalai mai Ieova, ua finagalo o Ia e lafoaʻi le nuu lē usiusitaʻi, ma avea ē na tupuga mai iā Mose ma nuu tele. (Nu. 14:11-20) Na fautua Mose mo le nuu. Ua faaalia i ana upu lona manatu mamafa i le taʻuleleia o le suafa o le Atua, faapena foʻi ma le manuia o ona uso ae e lē o lona lava lelei. O le matafaioi na tauave e Mose, na manaʻomia ai se tagata e agamalu, auā sa avea o ia ma taʻitaʻi, ma puluvaga o le nuu. Na muimui Miriama ma Arona faasaga iā te ia, ae ua faapea mai le Tusi Paia e uiga iā Mose, o ia “o le tagata e sili ona agamalu i tagata uma.” (Nu. 12:1-3, 9-15) E foliga mai na onosaia ma le agamalu e Mose faitioga na fai atu iā te ia. O le ā le mea semanū e tupu pe ana lē agamalu Mose?

I se isi aso, na oo le agaga o Ieova i nisi o tane, ma latou faia ai ni valoaga. Na manatu Iosua le auauna a Mose, ua lē saʻo  gaoioiga a nei tagata Isaraelu. Ae na vaai Mose, e tusa ma le silafaga a Ieova e tusa ai ma lenei mataupu, ma e leʻi popole i le mauaina e isi o le pule. (Nu. 11:26-29) Pe ana lē agamalu Mose, pe faamata e na te taliaina lea suiga i le faatulagaga a Ieova?

O le agamalu na mafai ai e Mose ona faaaogā lelei le pule na tuuina atu iā te ia, ma le matafaioi ua tofia ai o ia e le Atua. Na fetalai Ieova iā Mose, e alu atu i luga o le Mauga o Horepa ma tu i luma o tagata. Na fetalai atu le Atua iā Mose e ala i se agelu, ma tofia o ia e avea ma puluvaga o le feagaiga. O le agamalu o Mose na mafai ai ona ia talia lenei suiga tele e uiga i le pule, ma tumau ai pea ona faamaoni i le Atua.

Ae faapefea i tatou? E tāua tele le agamalu i lou lava tuputupu aʻe faaleagaga. O i latou uma ua tuuina atu i ai faaeaga ma le pule i tagata o le Atua, e latou te manaʻomia le agamalu. E puipuia ai i tatou mai le mimita pe a suia o tatou tulaga, ma mafai ai ona feagai ma ia tulaga i se auala saʻo. E tāua le auala tatou te tali atu ai. Po o le a tatou talia suiga e oo mai? Po o le a tatou vaai i ai o se avanoa e faaleleia atili ai o tatou uiga? E ono avea o se suiga mataʻina e ati aʻe ai le agamalu!

O le a faaauau pea ona tatou fesagaʻi ma suiga i o tatou olaga. O nisi taimi e lē faigofie ona tatou malamalama pe aiseā ua tutupu ai mea. O mea e gata mai ai lo tatou malosi ma mafatiaga i faalogona, e faigatā ai iā i tatou ona maua pea se vaaiga faaleagaga i mea. Ae o uiga e pei o le lotomaulalo, faamaulalo, ma le agamalu, o le a fesoasoani iā i tatou e talia ai suiga, ma tumau ai i le faamaoni i le Atua.

[Faamatalaga faaopoopo i le itulau 4]

O le lotomaulalo moni e mafai ai ona tatou iloa lo tatou tagata moni o loo iai

[Faamatalaga faaopoopo i le itulau 5]

E tāua tele le agamalu i lou lava tuputupu aʻe faaleagaga

[Ata i le itulau 5]

O faafitauli na feagai ma Mose na faaleleia ai lona agamalu