E Mautinoa e Iʻuvale le Pulega a Satani

“E lē iʻu i se manuia le tagata amioleaga.”—FAI. 8:13.

1. Aiseā o se tala faamāfanafana ai le faamasinoga o loo fotuaʻi mai o ē amioleaga?

O LE mea moni o le a faamasinoina ma faasalaina tagata amioleaga. O le a latou tali atu i mea na latou faia. (Faata. 5:22; Fai. 8:12, 13) O se tala e faamāfanafanaina ai, aemaise lava i latou e naunau i le amiotonu ma ua pagatia i faiga lē tonu ma faiga leaga a tagata amioleaga. O le a faasalaina le taʻitaʻi o ē amioleaga, o Satani le Tiapolo, o lē ua avea ma faatamā o mea leaga.—Ioa. 8:44.

2. Aiseā na manaʻomia ai se taimi ina ia foʻia ai le luʻi na lāgā i Etena?

² I tuā i Etena, ona o le matuā lotofaamaualuga o Satani, na ia faapogaia ai tagata e teena le pule a Ieova. O le iʻuga, na ʻau atu o tatou uluaʻi mātua iā Satani i le luʻia o le tonu o le pule a Ieova, ma avea ai ma tagata agasala i Lana silafaga. (Roma 5:12-14) O le mea moni, na silafia e Ieova le iʻuga o le a iʻu i ai lo latou ala lē faaaloalo ma fouvale. Peitaʻi, e tatau ona manino foafoaga atamamai uma i lenā iʻuga e lē maʻalofia. O lea la, na manaʻomia ai se taimi ina ia foʻia ai le luʻi, ma matuā faamaonia atu ai le sesē o le ʻaufouvale.

3. O le ā e ao ona tatou fai e tusa ai o pulega a tagata?

³ Talu ai ua teena e tagata le pule a Ieova, o lea ua latou faatūina ai a latou lava pulega. Ina ua tusi atu le aposetolo o Paulo i uso talitonu i Roma, na ia taʻua ai na pulega faaletagata o “faipule silisili.” I taimi o Paulo, sa tele ina faasino atu faipule silisili i le malo o Roma lea sa taʻitaʻia e le Emeperoa o Nero, o lē na pule mai i le 54-68 T.A. Na taʻua e Paulo o na faipule silisili “ua faataga e le Atua e pule i o latou tulaga eseese.” (Faitau le Roma 13:1, 2.) Po o lona uiga na lagolagoina e Paulo le manatu e faapea ua sili pulega faaletagata i lo le pulega a le Atua? E leai. Nai lo lea, na ia faapea mai, a o faataga e Ieova pulega a tagata e fai, e ao i Kerisiano ona faaaloalo i “le faatulagaga a le Atua” ma talia na pule.

O se Ala e Iʻu ai i Mala

4. Faamatala le māfuaaga e iʻuvale ai pulega a tagata.

⁴ Peitaʻi, ua mautinoa le iʻuvale o pulega a tagata ia e taaʻina e Satani. Aiseā? O se tasi o mea, ona e lē o faavae i le atamai mai le Atua. Ua na o Ieova o loo iai le atamai e atoatoa ona lelei. O lea la, ua na o ia o le taʻitaʻi maufaatuatuaina auā e na te silafia le auala e taulau manuia ai se pulega. (Iere. 8:9; Roma 16:27) E ese mai ai la i tagata, o ē e masani ona tofotofo i faiga eseese ina ia iloa ai le mea e lelei, ae o Ieova e na te silafia i taimi uma le auala sili e gaoioi ai. O so o se pulega e lē mulimuli i lana taʻitaʻiga, e mautinoa e iʻuvale. Ona o lenei māfuaaga, atoa ai ma le mea moni e manatu faapito uunaʻiga a Satani, ua tatou iloa ai, e mai lava i le amataga, ua iʻuvale lana pulega ua faia e ala mai i tagata.

5, 6. O le ā e foliga mai na māfua ai ona tetee Satani iā Ieova?

⁵ O le tagata faautauta e taumamao mai i le amataina o se taumafaiga e mautinoa e iʻuvale. Pe afai e na te maumauaʻi e faia pea  lenei taumafaiga, o le a mulimuli ane ia iloa lona sesē. Ua tele taimi o faamaonia i le talafaasolopito le lē aogā o le tetee atu i Lē e ona le malosi uma lava na foafoaina mea. (Faitau le Faataoto 21:30.) Peitaʻi, na faatauasoina Satani i le fiasili ma le faamaualuga, ma fulitua ai iā Ieova. Na filifili le Tiapolo i se ala e na o mala e iʻu i ai.

⁶ Na mulimuli ane atagia mai le uiga faafiapoto o Satani i se tupu Papelonia o lē na gugutu mai e faapea: “Ou te alu aʻe i lagi. Ou te sii loʻu nofoālii i luga o fetu a le Atua, ma ou te saofaʻi i luga o le mauga o feiloaʻiga, i le vaega pito i mamao o le itu i mātū. Ou te alu aʻe i luga o mea maualuluga o ao; ou te faia aʻu e tusa ma le Silisili Ese.” (Isa. 14:13-15) Na lē taulau le fuafuaga valea a lenā tupu, ma na iʻu i se iʻuga faalumaina le aiga tupu o Papelonia. O le a faapea foʻi ona matuā faatoʻilaloina Satani ma lana lalolagi.

Aiseā ua Lē Taofia Ai?

7, 8. O ā nisi o aogā ona o le faatagaina e Ieova o le amioleaga mo se taimi?

⁷ E ono taumānatu nisi pe aiseā na lē taofia ai e Ieova tagata mai le ʻau atu iā Satani, ma le faia o se isi auala e pulea ai i latou, lea e mautinoa e iʻuvale. Talu ai o ia o le Atua o Lē e ona le malosi uma lava, na mafai la ona ia faia faapea. (Eso. 6:3) Peitaʻi, e na te leʻi faia. O lona atamai na ia silafia ai, o le lē faalavelave mo se taimi i le fouvalega a le tagata, o le a iʻu ai i se tulaga e sili ona lelei. I le iʻuga, o le a faamaonia ai o Ieova o le Pule e amiotonu ma alofa, ma o le a manuia tagata faamaoni i le filifiliga na faia e le Atua.

⁸ Pe ana teena e tagata taumafaiga a Satani ma lē fia tutoʻatasi ese mai i le pule a le Atua, semanū e lē aafia le fanau a tagata i le tele o mala! Peitaʻi, ua iai aogā o le filifiliga a Ieova e faataga tagata e latou te pulea i latou lava mo se taimi. Ua matuā iloa ai e tagata lotofaamaoni, o se ala atamai le faalogo i le Atua ma faatuatuaina o ia. A o faagasolo le tele o senituri, ua tofo le fanau o tagata i ituaiga eseese o pulega, ae e leai se pulega ua lelei atoatoa. O lenā mea moni ua faamalosia ai le mautinoa o tagata tapuaʻi o le Atua, e sili le pule a Ieova. O le mea moni, ona o le faatagaina e Ieova o le pulega amioleaga a Satani, ua aafia ai tagata i le tele o faafitauli, e aofia ai ma ē o loo tapuaʻi faamaoni i le Atua. Peitaʻi, o le faatagaina mo se taimi lē tumau o le amioleaga, ua iʻu ai foʻi i ni iʻuga aogā mo nei tagata tapuaʻi faamaoni.

 Se Fouvalega ua Faamamaluina ai Ieova

9, 10. Faamatala pe ua faapefea i le pulega a Satani ona faamamaluina ai Ieova.

⁹ O le faataga o tagata ia taaʻina e Satani ma pulea e i latou i latou lava, ua lē faalēaogāina ai le pule a Ieova. E matuā leai lava! Ua faamaonia i le talafaasolopito le moni o upu a Ieremia, lea na taʻua e ala i le agaga paia, e faatatau i le lē taulau o tagata e pulea i latou lava. (Faitau le Ieremia 10:23.) E lē gata i lea, o le fouvalega a Satani ua maua ai e Ieova le avanoa e faaalia atu Ona uiga lelei i se auala sili. E faapefea?

¹⁰ Talu ai ua tatou vaaia āuga leaga o le pulega a Satani, o lea ua faigofie ai ona tatou vaaia uiga lelei atoatoa o Ieova. I lenei auala, ua faamamaluina ai o ia i le vaaiga a i latou o ē e alolofa iā te ia. Ioe, atonu e foliga mai e feteenaʻi lenei manatu, ae o le mea moni o le pulega a Satani ua faamamaluina ai le Atua. Ua faamatilatila mai ai le auala e sili ona lelei na tauaao ai e Ieova lenei luʻi i lana pule silisili ese. Ina ia faataʻitaʻia lenā mea moni, seʻi o tatou iloiloina puupuu nisi o uiga o Ieova, ma vaai pe ua faapefea i le pulega leaga a Satani ona uunaʻia ai Ieova e faaalia nei uiga i nisi auala.

11. Ua faapefea ona faaalia le alofa o Ieova?

¹¹ Alofa. Ua taʻua i le Tusi Paia “o le Atua o le alofa lava ia.” (1 Ioa. 4:8) I le amataga, o le foafoaina o tagata o se faaaliga o le alofa o le Atua. E lē gata i lea, o le auala mataʻutia ma ofoofogia ua faia ai i tatou, ua faamaonia ai foʻi le alofa o le Atua. Na saunia foʻi ma le alofa e Ieova se nofoaga matagofie mo le fanau a tagata, ua iai mea uma e talafeagai mo lo latou mauaina o le fiafia. (Kene. 1:29-31; 2:8, 9; Sala. 139:14-16) Ae ina ua agasala le tagata, na faaalia e Ieova lona alofa i ni auala fou. E faapefea? Na sii mai e le aposetolo o Ioane fetalaiga nei a Iesu: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.” (Ioa. 3:16) E leai se isi auala e sili ona mataʻina ua faaalia ai e le Atua lona alofa mo tagata, i lo le auina mai o lona Alo pele e toʻatasi ina ia togiolaina tagata agasala. (Ioa. 15:13) O lenei faaaliga sili o le alofa, ua fai foʻi ma faaaʻoaʻoga mo tagata, ma latou maua ai le avanoa e faaatagia atu i aso taʻitasi le alofa faataulagaina o le Atua, e pei ona sa faia e Iesu.—Ioa. 17:25, 26.

12. O le ā le auala e faaalia ai e Ieova lona mana?

¹² Mana. E na o “le Atua, o Lē e ona le malosi uma lava,” e iai le mana e foafoaina ai mea. (Faaa. 11:17; Sala. 36:9) Pe a fanau mai se tagata, e tai pei o ia o se laupepa ua leai se mea o tusia ai. Pe a maliu, ua tumu lenā laupepa i ana faaiʻuga, gaoioiga, ma mea na tutupu i lona olaga, ma iloa ai le ituaiga tagata moni e iai o ia. E mafai ona manatua e Ieova na faamatalaga. I le lumanaʻi, o le a toe faafoʻisia e Ieova le ola i le tagata, atoa ai ma ona uiga. (Ioa. 5:28, 29) O lea la, e ui lava e leʻi finagalo le Atua ia oti le tagata, ae o le  oti ua maua ai le avanoa e faaalia ai e Ieova lona mana e toe faatutū ai ē ua maliliu. Ioe, o Ieova o “le Atua, o Lē e ona le malosi uma lava.”

13. Ua faapefea i le taulaga a Iesu ona iloa ai le faamasinotonu lelei atoatoa o Ieova?

¹³ Faamasinotonu. E lē tala pepelo Ieova; pe faia ni mea e lē tonu. (Teu. 32:4; Tito 1:2) E tausisi pea o ia i le mea moni ma mea ua tonu, e ui lava o le faia faapea e foliga mai e lē faigofie mo ia. (Roma 8:32) E mautinoa na mafatia le finagalo o Ieova ina ua silasila atu i lona Alo pele, a o maliu i luga o le laau na faapuapuagatia ai, ma pei ai Iesu o sē na fai upuleaga ma le lē faamaoni. Peitaʻi, ona o lona alofa i tagata lē lelei atoatoa, na finagalo ai Ieova e faataga lenei tulaga tigā e tupu, ina ia tausia ai lana lava faatulagaga lelei atoatoa o le faamasinotonu. (Faitau le Roma 5:18-21.) Talu ai ua tumu le lalolagi i faiga lē tonu, ua maua ai e Ieova le avanoa e faaalia ai o ia o le faaaʻoaʻoga sili o le faamasinotonu.

14, 15. O ā nisi o auala ua faaalia ai le atamai ma le onosaʻi o Ieova?

¹⁴ Atamai. Ina ua agasala Atamu ma Eva, na faaalia e Ieova le auala o le a ia aveesea ai āuga leaga uma e māfua mai i le la fouvalega. (Kene. 3:15) O lenā gaoioiga vave, atoa ai ma le faasolosolo ona faailoa mai i ana auauna o faamatalaga e faatatau i lona finagalo, ua faaalia manino mai ai le atamai o Ieova. (Roma 11:33) E leai se mea e mafai ona taofia ai le Atua mai le faataunuuina ma le taulau manuia o mea. Ua tele avanoa e faaalia atu ai e Ieova i ana foafoaga le atamai moni, ona ua tumu lenei lalolagi i amioga lē mamā, o taua, le lē mafaufau, lē usiusitaʻi, leai se alofa mutimutivale, faailoga tagata, ma le faatagāfai. Na faapea mai le soo o Iakopo: “O le atamai mai i lugā, e muamua ona mamā, e filemu, e magafagafa, e gauaʻigofie, e tumu i le alofa mutimutivale ma fua lelei, e lē faailoga tagata, e lē faatagāfai.”—Iako. 3:17.

¹⁵ Onosai ma Faapalepale. Ua manaʻomia ona faaalia e Ieova i taimi uma nei uiga o le onosaʻi ma le faapalepale, ina ia feagai ai ma le lē lelei atoatoa, agasala, ma mea sesē a tagata. O le finagalo malie o Ieova e faia faapea mo le faitau afe o tausaga, ua faaalia ai o loo iā te ia nei uiga matagofie i se auala e sili, ma e ao ai ona tatou matuā lotofaafetai mo lea tulaga. Na faapea mai ma le tonu le aposetolo o Peteru, e ao ona tatou “manatunatu . . . o le onosai o lo tatou Atua ua maua ai le faaolataga.”—2 Pete. 3:9, 15.

16. Aiseā e matuā olioli ai ona o le finagalo malie o Ieova e faamagalo?

¹⁶ Finagalo Malie e Faamagalo. O i tatou  uma o tagata agasala, ma o i tatou uma e sesē i le tele o taimi. (Iako. 3:2; 1 Ioa. 1:8, 9) Ae maʻeu lo tatou lotofaafetai e ao ona iai ona e finagalo Ieova e na te “matuā” faamagaloina i tatou! (Isa. 55:7) Seʻi manatu foʻi i le mea moni lenei: O le fananau mai o ni tagata agasala e lē lelei atoatoa, ua mafai ai ona tatou tofo i le matuā olioli pe a faamagalo e le Atua a tatou mea sesē. (Sala. 51:5, 9, 17) O le tofo moni i lenā uiga faamāfanafanaloto o Ieova, e faamalosia ai lo tatou alofa mo ia ma uunaʻia ai i tatou e mulimuli i lana faaaʻoaʻoga i le auala e feutagaʻi ai ma isi.—Faitau le Kolose 3:13.

Le Pogai ua Matuā Leaga ai le Lalolagi

17, 18. O ā auala ua iʻuvale ai le pulega a Satani?

¹⁷ Ua faitau senituri o faaauau pea ona iʻuvale le faiga o mea a le lalolagi a Satani, lea na māfua mai ona o lana pulega. E moni lenei mea! Na taaʻina o tatou uluaʻi mātua e Satani, ma la filifilia ai le pulega a tagata nai lo le pulega a Ieova. Ma o lea na la amata ai se pulega e mautinoa e iʻuvale. O tulaga tigā ma faigatā o loo lutia ai tagata i le lalolagi aoao, o faailoga ia o le matuā iʻuvale o pulega a tagata.

¹⁸ Ua taulaʻi atu le pulega a Satani i le manatu faapito. Peitaʻi, e lē taitai ona manumalo le manatu faapito i le alofa, lea e faavae ai le pulega a Ieova. Ua lē taulau ona aumaia e le pulega a Satani se tulaga mautū, fiafia po o le saogalemu. Ua faamaonia le tonu o le pule a Ieova! Po o iai ni faamaoniga i aso nei o lenā mea moni? Ioe, o le a tatou iloiloina i le mataupu o sosoo mai.

O le ā ua Tatou Aʻoaʻoina e Uiga i le Pulega, Mai i le Faitauina o le . . .

• Roma 13:1, 2?

• Faataoto 21:30?

• Ieremia 10:23?

• Kolose 3:13?

[Fesili mo le Suʻesuʻega]

[Ata i le itulau 25]

E matuā leai se mea lelei ua maua e tagata mai i le pulega a Satani

[Ē Ana le Ata s]

U.S. Army photo

WHO photo by P. Almasy

[Ata i le itulau 26]

E faaalia e Ieova lona mana e ala i le toe faatutū mai o ē ua maliliu

[Ata i le itulau 27]

Ua faaalia le alofa ma le faamasinotonu o Ieova e ala i le taulaga a lona Alo