Pe na Iai Sou Faaeaga? Pe e Mafai Ona E Toe Aapa Atu?

PE NA e galue i se faaeaga maufaatuatuaina i le faapotopotoga? Atonu na avea oe o se auauna o le faiva po o se toeaina. Atonu na e auai i se vala o le auaunaga faataimi atoa. E lē taumatea na e matuā olioli ma maua ai le lotomalie i ou tofiga, ae na e tuua lenā tofiga ona o se māfuaaga.

Atonu na e tuua lou faaeaga ina ia tausia nisi o le aiga. I le isi itu, atonu ua māfua ona o le soifua matua po o le faalētonu o le soifua mālōlōina. O na filifiliga e lē o se faailoga o le lē taulau. (1 Timo. 5:8) I le uluaʻi senituri na galue ai Filipo o se misionare, ma na mulimuli ane faamautū i Kaisareia ma tausia lona aiga. (Galu. 21:8, 9) Ina ua toeaina Tavita le tupu o Isaraelu anamua, sa ia faatulaga loa lona atalii o Solomona e soloaʻi ane i le nofoālii e sui iā te ia. (1 Tu. 1:1, 32-35) Ae na alofagia pea Filipo ma Tavita e Ieova, ma o loo faaaloalogia e oo mai lava i aso nei.

Peitaʻi, atonu ua aveesea lou faaeaga ona o se amioga lē talafeagai na fai. Pe atonu foʻi o ni faafitauli i le aiga. (1 Timo. 3:2, 4, 10, 12) Atonu sa e manatu e lē saʻo le faaiʻuga ua aveesea ai lou faaeaga, ma o loo tumau pea ou lagona lē fiafia e oo mai i le taimi nei.

E Mafai Ona E Toe Aapa Atu

Po o le a lē mafai ona toe maua lou faaeaga o le auaunaga sa iai? E leai, e lē o le tulaga lenā i le tele o taimi. Ae ina ia e toe galue i lou faaeaga, e tatau ona e aapa atu. (1 Timo. 3:1) Aiseā e naunau ai i lenei faaeaga? O le māfuaaga lava e tasi lea na tuuina atu ai oe i le Atua, o le alofa iā Ieova ma tagata o loo auauna atu iā te ia. Pe afai e te lotomalie e faaali atu lenā alofa e ala i le toe aapa atu, o le a toe faaaogā e Ieova lou poto masani na iai muamua a o leʻi aveesea lou faaeaga, faapea ma le taimi na aveesea ai.

Seʻi manatu i le faamautinoaga na avatu e Ieova iā Isaraelu, ina ua ia aveesea ma le tonu faaeaga mai iā i latou. Ua faapea mai lana Afioga: “Auā o aʻu o Ieova, ou te lē liliu; o le mea lea ua lē faaumatia ai outou le fanauga a Iakopo.” (Mala. 3:6) Na alofa Ieova i tagata Isaraelu ma finagalo e faaaogā atili i latou. Ua faapena foʻi ona naunau Ieova e faaaogā oe i le lumanaʻi. O le ā e mafai ona e faia i lenei taimi? O le galue i manaʻoga faatiokarate, e faalagolago tele i le tulaga lelei faaleagaga nai lo o tomai faaletino. O lea la, ona e lē o toe iai nisi ou tiute tauave i le faapotopotoga, ia uaʻi atu loa i le faamalosia o lou tulaga faaleagaga.

Ina ia ‘malosi’ i le faatuatua, e tatau ona e ‘saʻili iā Ieova ma lona malosi.’ (1 Kori. 16:13; Sala. 105:4) O se tasi o auala e faia ai lenei mea, o le tatalo faatauanau. Pe a faamatala atu lou tulaga iā Ieova, ia faailoa atu ou lagona iā te ia, ma talosaga atu mo lona agaga. O le faia faapea, o le a e latalata atu ai iā Ieova ma faatumauina ai oe. (Sala. 62:8; Fili. 4:6, 13) O le isi auala e faamalosia ai lou tulaga faaleagaga, o le faaleleia lea o le suʻesuʻeina o le Afioga a le Atua. Ona e lē o tele ni ou tiute tauave i le taimi nei, e mafai ona e faaleleia atili au lava suʻesuʻega ma suʻesuʻega faaleaiga, pe atonu e toe faaleleia se faasologa na faigatā ona pipii atu i ai.

 O le mea moni, o loo avea pea oe ma sui o Ieova i le avea ma se tasi o ana Molimau. (Isa. 43:10-12) O le faaeaga sili lava e mafai ona maua e so o se tasi, o le avea lea ma se tasi o le “ʻaufaigaluega faatasi ma le Atua.” (1 Kori. 3:9) O le faateleina o galuega i le auaunaga i le fanua, o se auala sili ona lelei e faamalosia ai lou tulaga faaleagaga, faapea ma au aumea i le faiva.

Fesagaʻia o Ou Faalogona

O le aveesea o se faaeaga i le auaunaga, e ono oso aʻe ai ou faalogona māsiasi ma le faanoanoa. Atonu e oso aʻe se lagona e te manaʻo e taʻutonuina au gaoioiga. Ae faapefea pe afai e faalogo atu uso maufaatuatuaina i lau faamatalaga, ae e latou te lagona e lē tatau ona e tumau pea i lenā faaeaga? Atonu e oso aʻe ni ou faalogona ita i nei uso, ma taofia ai oe mai le aapa atu ma oo ai ina faafaigatā ona e aʻoaʻo se lesona mai le mea na tupu. Seʻi o tatou talanoaina mea na tutupu iā Iopu, Manase, ma Iosefa e fesoasoani i se tasi e fesagaʻia ai ona faalogona lē lelei.

Sa fai Iopu ma sui o isi i luma o Ieova, ma na avea foʻi ma toeaina ma faamasino i se nuu na iai augātamā. (Iopu 1:5; 29:7-17, 21-25) I se taimi e sili ona faigatā o le olaga o Iopu, na mou atu ai lona tamaoaiga, leai sana fanau, ma lē lelei lona soifua mālōlōina. E faaopoopo atu i na mea, na mou atu lona talaaga lelei i le vaaiga a isi. Ua faapea mai Iopu: “Ua tapisa mai ai iā te aʻu i latou e itiiti o latou aso i oʻu.”—Iopu 30:1.

Na lagona e Iopu e mamā lava o ia ma manaʻo e taʻutonuina o ia i luma o le Atua. (Iopu 13:15) Ae peitaʻi, na lotomalie e faatalitali iā Ieova, ma na faamanuiaina ai o ia i lenei mea. Na ia iloa e na te manaʻomia ni faasaʻoga, aemaise lava i ona uiga faaalia i le tofotofoga na oo iā te ia. (Iopu 40:6-8; 42:3, 6) O le lotomaulalo o Iopu, na iʻu ai ina matuā faamanuiaina o ia e le Atua.—Iopu 42:10-13.

Afai na aveesea lou faaeaga ona o se mea sesē na e faia, atonu e te taumānatu po o le a faamagalo ma faagalo oe e Ieova faapea ma ou uso Kerisiano. Seʻi manatu i le tulaga o le tupu o Iuta, o Manase. E “tele lava le amio leaga na ia faia i luma o Ieova e faaonoono ai” iā te ia. (2 Tu. 21:6) Ae peitaʻi ina ua oti Manase, na taʻua o ia o se tagata faamaoni a o pule o se tupu. Na faapefea ona tupu lenei mea?

Na oo ina talia e Manase le aʻoaʻiga. Ina ua ia lē amanaʻia lapataʻiga, ona tuuina atu lea o ia e Ieova i lima o Asuria, o ē na saisaia o ia i filifili ma ave faapagota i le nuu mamao o Papelonia. O inā na “matuā faamaulalo [ai] o ia i luma o le Atua o ona tamā, na ia tatalo foʻi iā te ia.” O le salamō mai le loto na iʻu ina faasaʻo ai le mea sesē ma faamagaloina ai Manase.—2 No. 33:12, 13.

E seāseā ona toe vave maua uma ni faaeaga na aveesea. Ae peitaʻi, e sau se taimi e te toe maua ai ni faaeaga. O le talia o na faaeaga ma faia le mea sili e mafai, e masani ona toe maua ai nisi o tofiga. E lē o le uiga o lenei manatu, e faigofie ona toe maua nei tofiga. E  ono iai ni faalētonu mulimuli ane. Ae peitaʻi, o le lotomalie ma le maumauaʻi e maua ai ni iʻuga lelei.

O se faaaʻoaʻoga, o Iosefa le atalii o Iakopo. Ina ua 17 ona tausaga, na faatau atu ai ma le lē tonu Iosefa e ona uso e fai ma pologa. (Kene. 37:2, 26-28) E mautinoa e lē o le faiga lea na ia faatalitalia mai i atalii o lona tamā. Ae peitaʻi, na ia lotomalie pea e fesagaʻia nei tulaga, ma o le faamanuia a Ieova na ia mau ai “i le fale o lona alii.” (Kene. 39:2) Mulimuli ane, na tuuina Iosefa i le falepuipui. Na faamaonia lona faamaoni ma sa faatasi Ieova iā te ia, ma oo ina tuuina atu iā te ia le vaaiga o le falepuipui.—Kene. 39:21-23.

E leʻi iloa e Iosefa o nei mea uma o le a faataunuu ai se fuafuaga. Sa faaauau pea ona fai na o mea na ia mafaia. O lea, sa faaaogā ai o ia e Ieova e faasaoina le gafa o le Fanau folafolaina. (Kene. 3:15; 45:5-8) Ona e leai se isi o i tatou e mafai ona faia le vaega tāua na faia e Iosefa, ae ua faaalia e faamatalaga faagaeeina, e fesoasoani Ieova i faaeaga e maua e Ana auauna. Ia faaavanoa atu pea oe mo le mauaina o faaeaga, e ala i le faaaʻoaʻo iā Iosefa.

Lesona Mai Mea Faigatā na Tutupu

Na oo uma Iopu, Manase, ma Iosefa i ni mea faigatā. Na talia uma e nei tane e toʻatolu mea na faataga e Ieova, ma na aʻoaʻoina uma ai e i latou ni lesona tāua. O le ā ua e aʻoaʻoina?

Ia iloa po o ā mea o loo taumafai Ieova e aʻoaʻo mai iā te oe. A o tauivi Iopu ma ona mafatiaga, na ia taulaʻi atu iā te ia lava, ma lē saʻo ai lana vaai i mea. Peitaʻi o le faasaʻoga a Ieova, na toe saʻo ai lana vaai i le faapea mai: “Auā ua ou tautala atu ma loʻu lē mafaufau.” (Iopu 42:3) Pe afai ua e tigā ona ua aveesea ou faaeaga, “aua neʻi faasili le manatu o se tasi iā te ia lava, i lo o le mea e tatau ona manatu i ai; a ia mafaufau lelei.” (Roma 12:3) Atonu o loo taumafai Ieova e faasaʻo oe i se auala e te lē o malamalama atoatoa i ai.

Ia talia aʻoaʻiga. Atonu na lagona muamua e Manase e lē tatau le aʻoaʻiga matuiā na avatu iā te ia. Peitaʻi na ia talia, salamō, ma lafoaʻi ona ala sesē. Po o le ā lava lou lagona e faatatau i le aʻoaʻiga ua tuuina atu iā te oe, a ia e ‘faamaulalo i luma o le silafaga a Ieova, ona faaeaina lea o oe e ia.’—1 Pete. 5:6; Iako. 4:10.

Ia onosaʻi ma lotomalie. O le mea na oo iā Iosefa sa ono faigofie ona taʻitaʻiina ai o ia e faaputuputu ni lagona ita ma le fia tauimasui. Nai lo lea, sa ia atiaʻe le tofā mamao ma le alofa mutimutivale. (Kene. 50:15-21) Afai na e lē fiafia, ia onosaʻi. Ia lotomalie e toleni oe e Ieova.

Pe na iai se taimi na e galue ai i se faaeaga maufaatuatuaina i le faapotopotoga? Ia tuu iā Ieova na te tuuina atu faaeaga iā te oe i le lumanaʻi. Ia faamalosia lou tulaga faaleagaga. Ia pulea ou faalogona e ala i le onosaʻi ma le lotomaulalo. Ia e lotomalie e talia so o se tofiga e tuu atu e Ieova iā te oe. Ia mautinoa, “e lē taofia e ia se mea lelei i ē ua sao lo latou savavali.”—Sala. 84:11.

[Faamatalaga faaopoopo i le itulau 30]

Ia malosi i le faatuatua e ala i le tatalo faatauanau

[Ata i le itulau 31]

O le faateleina o galuega i le faiva i le fanua, o se auala lelei e faamalosi ai lou tulaga faaleagaga

[Ata i le itulau 32]

Ia tuu atu iā Ieova e na te tuuina atu iā te oe faaeaga i le lumanaʻi