Ia Tetee Atu i le “Agaga o le Lalolagi”

“Tatou te leʻi maua le agaga o le lalolagi, a o le agaga mai le Atua.”—1 KORI. 2:12.

1, 2. (a) I aso ua mavae, aiseā na tuu ai manulele e taʻua o canary i nofoaga e ʻeli ai le koale i Peretania? (e) O le ā le lamatiaga ua fesagaʻi ma Kerisiano?

I LE tausaga e 1911, na pāsia ai e taʻitaʻi o Peretania se tulafono sa fai fuafua mo le faasaoina o ola o tagata eli koale. Sa tatau ona tofu le nofoaga e ʻeli ai le koale ma manu e lua o le ituaiga e taʻu o le canary. Mo le ā le fuafuaga? Pe afai e sasao se afi i le mea e ʻeli ai le koale, e ō tagata fesoasoani i lalo i le eleele ma ave manulele nei. E ilitata tele tamaʻi manulele nei i kasa oona, e pei o le karaponi monookesaita. Pe afai e faaoonaina le ea, o le a faaalia mai e nei manulele le lē toʻa, ma oo ai lava ina paʻuʻū i lalo mai mea na faatutū ai. Sa tāua tele lenei uluaʻi lapataʻiga. O le karaponi monookesaita o se kasa e leai sona lanu ma e leai foʻi sona manogi, ae e mafai ona feoti ai ona e taofia e lenei kasa sela mumū o le tagata mai le tufaina atu o le okesene i lona tino. Pe a lē mataalia i lamatiaga, e mafai ona matapogia ai le ʻau fesoasoani laveaʻi ma maliliu ai, e aunoa ma le iloaina na onanā i latou i le kasa.

² I sona uiga faaleagaga, o loo fesagaʻi Kerisiano ma se tulaga e talitutusa ma tagata ʻeli koale. E faapefea? Ina ua tuu atu e Iesu i ona soo le tofiga e talaʻi le tala lelei i le lalolagi aoao, sa ia silafia ua ia tuu atu i latou i se siʻomaga lamatia, lea ua pulea e Satani ma le agaga o le lalolagi. (Mata. 10:16; 1 Ioa. 5:19) O lea, i le pō a o lumanaʻi lona maliu, sa manatu mamafa tele Iesu i ona soo ma ia tatalo atu i lona Tamā: “Ou te talosaga atu iā te oe, e aua neʻi aveesea i latou mai le lalolagi, a ia leoleo iā i latou ona o lē ua leaga.”—Ioa. 17:15.

3, 4. O le ā le lapataʻiga na avatu e Iesu i ona soo, ma aiseā e tāua ai mo i tatou?

³ Sa lapataʻia e Iesu ona soo e faatatau i lamatiaga o le lē mataala i taaʻiga o loo siʻomia ai i latou, lea e mafai ona iʻu ai i le oti faaleagaga. E iai  se uiga tāua o ana upu mo i tatou, a o tatou ola ai i le iʻuga o le faiga o mea. Na ia fautuaina ona soo: “O lea la, ia mataala pea, . . . ina ia outou sao mai i nei mea uma o le a oo mai, ma ia tutū i luma o le Atalii o le tagata.” (Luka 21:34-36) Ae o le mea e fiafia ai, sa folafola atu foʻi e Iesu o le a saunia e lona Tamā le agaga paia, ina ia fesoasoani iā i latou e manatua mea na latou aʻoaʻoina, ma ia latou mataala ma lototetele ai.—Ioa. 14:26.

⁴ Ae faapefea i tatou i aso nei? Po o mafai foʻi ona fesoasoani lenā lava agaga paia iā i tatou? Afai o lea, o le ā e ao ona tatou fai ina ia maua ai lenā agaga paia? O le ā le agaga o le lalolagi, ma e faapefea ona galue? Ma e faapefea ona tatou taulau manuia i le teeaina o lenei agaga o le lalolagi?—Faitau le 1 Korinito 2:12.

Agaga Paia po o le Agaga o le Lalolagi?

5, 6. O le ā e mafai ona fai e le agaga paia mo i tatou, ae o le ā e ao ona tatou fai ina ia maua ai?

⁵ E leʻi muta ai i le uluaʻi senituri le meaalofa o le agaga paia. E mafai foʻi ona maua le agaga paia i aso nei, ma e mafai e le agaga o le Atua ona aumaia iā i tatou le malosi e fai ai le mea saʻo, ma faamalosia ai i tatou i le auaunaga iā te ia. (Roma 12:11; Fili. 4:13) E mafai foʻi ona faapogaia ai iā i tatou uiga agamalu, e pei o le alofa, agalelei, ma le amiolelei, o ni vala o le “fua o le agaga.” (Kala. 5:22, 23) Peitaʻi, e lē aumaia faamalosi e Ieova lona agaga paia i tagata e lē o mananaʻo i ai.

⁶ O lea, o se mea talafeagai mo i tatou ona fesili ifo iā i tatou lava, ‘⁠O le ā e mafai ona ou faia ina ia maua ai le agaga paia?’ Ua faaalia mai i le Tusi Paia e tele ni mea e mafai ona tatou faia. O se laasaga tāua ma e faigofie—ia talosaga atu i le Atua mo lenā agaga. (Faitau le Luka 11:13.) O se isi laasaga tāua o le suʻesuʻe lea ma faatatau fautuaga o loo i le Afioga a le Atua, lea ua faagaeeina e lona agaga. (2 Timo. 3:16) Ioe, e lē o tagata uma o loo faitauina le Tusi Paia e mauaina le agaga o le Atua. Peitaʻi pe a suʻesuʻe e se Kerisiano faamaoni le Afioga a le Atua, o le a ia maua lagona ma manatu lea o loo faaalia mai i le Afioga faagaeeina. E tāua foʻi ona tatou ioe ua tofia e Ieova Iesu e fai ma Ona sui, ma e ala iā te ia ua saunia mai ai e le Atua lona agaga. (Kolo. 2:6) O lea la, e ao ona tatou mulimuli i le faaaʻoaʻoga a Iesu ma ola e tusa ai ma ana aʻoaʻoga. (1 Pete. 2:21) O le tele tatou te taumafai ai ia pei o Keriso, o le tele foʻi lenā o lo tatou mauaina o le agaga paia.

7. Ua faapefea ona taaʻina e le agaga o le lalolagi tagata taʻitoʻatasi?

⁷ I se faaeseesega, ua taaʻina e le agaga o le lalolagi tagata ina ia faaatagia mai uiga o Satani. (Faitau le Efeso 2:1-3.) E tele auala ua galue ai le agaga o le lalolagi. E pei ona faamaonia i so o se vaipanoa o lo tatou siʻomaga i aso nei, ua faagaee e le agaga o le lalolagi le fouvale i tapulaa a le Atua. Ua faaauiluma e le agaga o le lalolagi “tuʻinanauga o le tino, ma tuʻinanauga o mata, ma le faalialiavale o meafaitino a se tasi.” (1 Ioa. 2:16) Ua fua mai ai galuega o le tino, e pei o le faitaaga, le ifo i  tupua, faiga faataulāitu, le lotoleaga, o le losilosi vale, ma le onā. (Kala. 5:19-21) Ma ua tutupu mai ai faamatalaga e tetee i le upu moni, lea e faaleagaina ai le mea e paia. (2 Timo. 2:14-18) E mautinoa la, o le tele e faataga ai e se tagata o ia ina ia taaʻina i le agaga o le lalolagi, o le tele foʻi lenā o lona faataʻitaʻi i uiga o Satani.

8. O le ā le filifiliga ua fesagaʻi ma i tatou uma?

⁸ E lē mafai ona tatou ola e aunoa ma ni taaʻiga mai isi. E ao i tagata taʻitoʻatasi ona filifili po o le ā o le a pulea lona olaga—le agaga paia po o le agaga o le lalolagi. E mafai e i latou o loo pulea i le taimi nei e le agaga o le lalolagi ona saʻoloto mai ana taaʻiga, ma faataga le agaga paia e taʻitaʻia o latou olaga. Peitaʻi, i le isi itu, o i latou o taʻitaʻia e le agaga paia, e mafai ona maileia e le agaga o le lalolagi. (Fili. 3:18, 19) Seʻi o tatou iloilo pe faapefea ona tatou teena le agaga o le lalolagi.

Ia Iloa Faailoilo e Lapataʻia Ai

9-11. O ā nisi o faailoilo lapataʻi e iloa ai atonu ua taaʻina i tatou i le agaga o le lalolagi?

⁹ Sa faaaogā e tagata ʻeli koale o Peretania lea na taʻua i le amataga ia manulele e taʻu o canary, ina ia muaʻi lapataʻia ai i latou e faatatau i le kasa oona. Pe afai e vaai atu se tagata ʻeli koale ua paʻū ese se manulele mai le mea na tū ai, ona ia iloa lea ua manaʻomia ona ia gaoioi vave ina ia faasaoina lona ola. I se uiga faaleagaga, o ā nisi o uluaʻi faailoilo lapataʻi e iloa ai ua taaʻina i tatou i le agaga o le lalolagi?

¹⁰ Ina ua tatou faatoʻā aʻoaʻoina le upu moni o loo i le Afioga a le Atua, ma tuuina atu o tatou ola iā Ieova, atonu sa tatou naunau e faitau le Tusi Paia. Atonu sa tatou tatalo faatauanau ma e lē aunoa. Sa tatou fiafia foʻi e auai i sauniga a le faapotopotoga, ma vaai i ai i nei sauniga taʻitasi o se puna o le faafouina faaleagaga, e pei o se vaipanoa e maua i ai le vai mo se tagata o loo galala i le fia inu. O le auala lenā na fesoasoani iā i tatou e saʻoloto ai mai le agaga o le lalolagi.

¹¹ Po o faaauau pea ona tatou taumafai e faitau le Tusi Paia i aso taʻitasi? (Sala. 1:2) Po o tatou tatalo e lē aunoa ma tatalo mai le loto? Po o tatou fiafia i sauniga a le faapotopotoga, e ala i le auai i sauniga uma i vaiaso taʻitasi? (Sala. 84:10) Ia, po ua lē toe iai nisi o nei masaniga lelei? O le mea moni, atonu e tele ni o tatou tiute tauave e manaʻomia ai lo tatou taimi ma le malosi, ma ua avea o se luʻitau le tausisi pea i se faasologa lelei faaleagaga. Ae pe afai ua umi se taimi o lē faataunuuina pea nisi o a tatou masaniga lelei, faamata e lē māfua mai ona ua taaʻina i tatou i le agaga o le lalolagi? Pe e lē o le taimi ea lenei e fai ai sa tatou taumafaiga malosi, ina ia toe faaleleia ai masaniga lelei sa iā i tatou?

Aua “Neʻi Faamamafaina”

12. Na fetalai atu Iesu i ona soo ia “uaʻi atu” iā te ai, ma aiseā?

¹² O le ā se isi mea tatou te fai ina ia teena ai le agaga o le lalolagi? Ina ua apoapoaʻi atu Iesu i ona soo ia “mataala,” faatoʻā uma lava ona ia lapataʻia i latou e faatatau i nisi o lamatiaga patino. Na ia fetalai atu, “Ia outou uaʻi atu iā te outou lava, ina neʻi faamamafaina o outou loto i le ʻai tele, ma le inu tele, ma le popole i mea o le olaga nei, neʻi oo faafuaseʻi mai lenā aso iā te outou e pei o se mailei.”—Luka 21:34, 35.

13, 14. O ā fesili e tāua ona tatou fesili ifo ai iā i tatou lava, e faatatau i le ʻai ma le inu?

¹³ Seʻi manatu e faatatau i lenā lapataʻiga. Pe sa taʻusalaina e Iesu le fiafia e maua mai le ʻai ma le inu? E leai! Sa ia silafia upu a Solomona e faapea: “Ua ou iloa e leai se mea lelei iā te i latou [le fanau a tagata], na ona ia olioli le tagata, ma ia fai mea lelei i lona olaga nei. I le ma lea, ia taʻitasi le tagata ma ʻai, ma inu, ma fiafia i mea lelei i ana galuega uma; o le mea foaʻiina mai lea e le Atua.” (Fai. 3:12, 13) Peitaʻi, sa silafia e Iesu ua faaauilumaina e le agaga o le lalolagi le lē pulea totino i na vala.

¹⁴ E faapefea ona tatou mautinoa e lē o faaoonaina pe faaleagaina e le agaga o le lalolagi o tatou lagona e ala i lamatiaga o le ʻai tele ma le inu tele? Atonu tatou te fesili ifo iā i tatou lava: ‘O faapeʻī oʻu uiga faaalia pe a ou faitauina fautuaga i le Tusi Paia po o lomiga e faatatau i le ʻai tele? Po o oʻu taumafai e teena lenei fautuaga e pei e lē aogā pe e lē fetaui, atonu e ala i le faia o ni faamolemolega pe fai ni faamatalaga e fai ma ʻalofaga  i loʻu ʻaitele? * Pe afai ou te inu ʻava malosi, o le ā laʻu vaaiga i fautuaga i le faaaogāina tatau o le ʻava ma ʻalofia “onāga”? Po o oʻu taʻufaatauvaaina lea fautuaga, i le manatu e faapea e lē o faatatau mai lea fautuaga iā te aʻu? Pe afai o faaalia mai e isi lo latou manatu mamafa i le auala o loo oʻu inu ai, po o oʻu tetee ma ita? Po o oʻu faalaeiau isi ia taʻufaatauvaaina fautuaga faapena a le Tusi Paia?’ Ioe, o uiga e faaalia e se tagata, o se faailoga lea e iloa ai ua ia lolo atu i le agaga o le lalolagi.—Faatusatusa i le Roma 13:11-14.

ʻAlofia le Fetinaʻiina i Popolega

15. O le ā le uiga faaletagata na lapataʻi mai ai Iesu?

¹⁵ O se tasi laasaga tāua i le teenaina o le agaga o le lalolagi, e aofia ai le auala e taulima ai popolega. Na silafia e Iesu e faapea i le avea ma tagata e lē lelei atoatoa, e iā i tatou le uiga masani o le soona popole i mea masani o le olaga. Na ia fetalai atu ma le alofa i ona soo: “Aua tou te toe popole.” (Mata. 6:25) E talafeagai lo tatou manatu mamafa i mataupu tāua, e pei o le faafiafiaina o le Atua, le tausia o tiute tauave faa-Kerisiano, ma le saunia o mea e manaʻomia o le olaga mo o tatou aiga. (1 Kori. 7:32-34) O le ā la tatou te aʻoaʻoina mai i le lapataʻiga a Iesu?

16. Ua faapefea ona aafia le toʻatele o tagata i le agaga o le lalolagi?

¹⁶ Ua aafia tagata taʻitoʻatasi i popolega lē talafeagai, ona ua faamamafa e le agaga o le lalolagi le faaalialia o meafaitino a se tasi. E manaʻo le lalolagi ia tatou talitonu faapea o tupe e maua ai le saogalemu, ma e lē fuaina le tāua o se tagata i ni ona uiga faaleagaga, ae fua i le lava ma le tele o ana ʻoa. O i latou ua faasesēina i lenei manatu o le a nofo pologa i le fia mauʻoa, ma e tele lava ina popole i le saʻilia o mea aupito sili ona fou ma tetelē, e leʻi maua e isi. (Faata. 18:11) O lenā manatu sesē e faatatau i mea faitino, ua faapogaia ai popolega ma tutaʻia ai le tuputupu aʻe faaleagaga o se tasi.—Faitau le Mataio 13:18, 22.

17. E mafai faapefea ona tatou ʻalofia le fetinaʻiina i popolega?

¹⁷ E mafai ona tatou ʻalofia le fetinaʻiina i  popolega pe afai tatou te usitaia le faatonuga a Iesu: “O lea, ia faaauau pea ona outou saʻilia muamua le malo ma le amiotonu a le Atua.” Ua faamautinoa mai e Iesu iā i tatou pe afai tatou te faia lenei mea, o le a faaopoopoina mai iā i tatou mea o loo tatou manaʻomia moni lava. (Mata. 6:33) E faapefea ona tatou faaalia e tatou te talitonu i lenei folafolaga? O se tasi o auala o le saʻilia muamua lea o le amiotonu a le Atua—e ala i le mulimuli i tapulaa a le Atua i le mea e saʻo e tusa ai o mataupu i mea tau tupe. O se faaaʻoaʻoga, tatou te teena le faasesē o a tatou lafoga o tupe maua, pe faia foʻi sina pepelo “itiiti” i a tatou feutagaʻiga faapisinisi. Tatou te faia mea uma e gata ai lo tatou malosi ina ia faataunuu ai o tatou tiute tauave i mea e ao ona totogi, e ala i le avea o la tatou upu o le “Ioe, ia Ioe” pe a oo mai i le totogiina o lafoga. (Mata. 5:37; Sala. 37:21) O lenā faamaoni atonu e lē mauʻoa ai se tagata, peitaʻi e aumaia ai le faamaoniga a le Atua, se lotofuatiaifo mamā, ma matuā faaitiitia ai popolega.

18. O le ā le faaaʻoaʻoga lelei ua faataatia e Iesu mo i tatou, ma e faapefea ona tatou maua aogā mai le faaaʻoaʻo iā te ia?

¹⁸ O le saʻilia muamua o le Malo e aofia ai le iloa lelei o le mea e sili ona tāua i o tatou olaga. Seʻi manatu i le faaaʻoaʻoga a Iesu. O nisi taimi sa ia laʻeiina ai se ofu anagatā. (Ioa. 19:23) Sa ia olioli i meaʻai ma uaina i aufaatasiga ma aumea lelei. (Mata. 11:18, 19) Peitaʻi, sa pei o se meaʻai iā Iesu le faia o le finagalo o Ieova. Ae o meafaitino ma mea faafiafia sa pei o ni mea faamanogi meaʻai ae lē o le meaʻai autū. (Ioa. 4:34-36) E matuā tauia le olaga pe afai tatou te faaaʻoaʻo i le faaaʻoaʻoga a Iesu! E tatou te maua le olioli i le fesoasoani i tagata loto mafatia ia maua faamāfanafanaga mai le Tusi Paia. Tatou te maua le alofa ma le lagolagosua a le faapotopotoga. Ma ua tatou faafiafiaina ai foʻi le finagalo o Ieova. Pe a faatulaga lelei mea e faamuamua i o tatou olaga, o le a lē avea la meafaitino ma mea faafiafia, o ni mea e pulea ai o tatou olaga. Nai lo lea, o na mea o ni auauna, po o ni meafaigaluega e fesoasoani iā i tatou e tapuaʻi atu ai iā Ieova. Ma o le tele tatou te auai ai i galuega e lagolagoina ai le Malo o le Atua, o le itiiti foʻi lenā o le faatoʻilaloina o i tatou e le agaga o le lalolagi.

Ia Faaauau Ona “Uaʻi Atu i le Agaga”

19-21. E mafai faapefea ona faaauau ona tatou “uaʻi atu i le agaga,” ma aiseā e ao ai ona tatou faia faapea?

¹⁹ O mafaufauga e uunaʻia ai gaoioiga. Ua masani ona manatu le toʻatele, o gaoioiga e lē fuafua lelei, o gaoioiga ia ua uunaʻia e mafaufauga faaletino. O lea, ua faamanatu mai ai e le aposetolo o Paulo iā i tatou, e manaʻomia ona leoleo i o tatou mafaufauga. Na ia tusi e faapea: “O i latou e naunau i le tino, e taulaʻi atu o latou manatu i mea a le tino, a o ē e naunau i le agaga, e taulaʻi atu i mea a le agaga.”—Roma 8:5.

²⁰ E mafai faapefea ona tatou ʻalofia le puleaina o o tatou mafaufauga—faapea ma a tatou gaoioiga—e le agaga o le lalolagi? E tatau ona tatou puipuia o tatou mafaufau, e ala i le taumafai i le tele tatou te mafai ai e aveese manatu o le lalolagi. O se faataʻitaʻiga, pe a filifilia faafiafiaga, tatou te lē mananaʻo e aafia o tatou mafaufau i polokalame o loo faaauilumaina ai amioga lē mamā po o faiga sauā. Ua tatou iloa e lē iai le agaga paia ma mamā o le Atua, i se mafaufau lē mamā. (Sala. 11:5; 2 Kori. 6:15-18) E lē gata i lea, e tatou te talia le agaga o le Atua ia iai i o tatou mafaufau e ala i le faitauina e lē aunoa o le Tusi Paia, tatalo, manatunatu loloto, ma auai i sauniga. Ma e tatou te galulue faatasi ma lenā agaga a o tatou auai e lē aunoa i le galuega talaʻi faa-Kerisiano.

²¹ E mautinoa, e ao ona tatou tetee atu i le agaga o le lalolagi ma tuʻinanauga o le tino o loo uunaʻia mai ai. Peitaʻi, o le faia faapea e tāua tele ai a tatou taumafaiga filigā, auā e pei ona taʻua e Paulo, “o le uaʻi atu i le tino, e iʻu ai i le oti, ae o le uaʻi atu i le agaga, e iʻu ai i le ola ma le filemu.”—Roma 8:6.

[Faaopoopoga i lalo]

Pe E te Manatua?

• O le ā e ao ona tatou fai ina ia maua ai le agaga paia?

• O ā nisi o auala e ono aafia ai i tatou i le agaga o le lalolagi?

• E mafai faapefea ona tatou tetee atu i le agaga o le lalolagi?

[Fesili mo le Suʻesuʻega]

[Ata i le itulau 21]

Ia tatalo mo le agaga paia a o leʻi alu i le galuega po o le aʻoga

[Ata i le itulau 23]

E tatau ona mamā o tatou mafaufau, ia tausisia pea ni faiga faapisinisi lelei, ma ia talafeagai amioga