Iesu Keriso—Le Misionare Sili

“O aʻu o lona sui, ma o Ia o lē na auina mai aʻu.”—IOA. 7:29.

1, 2. O le ā uiga o le upu misionare, ma o ai ua taʻua o le Misionare sili?

O LE ā e mapuna aʻe i lou mafaufau pe a taʻua le upu “misionare”? E mafaufau nisi i misionare o lotu, o ē e tele ina aafia i mataupufai ma faiga faapisinisi a atunuu o loo galulue ai. Peitaʻi, afai o oe o se Molimau a Ieova, atonu e te mafaufau i misionare o loo auina atu e le Vaega Pule e talaʻia le tala lelei i le lalolagi aoao. (Mata. 24:14) E lē manatu faapito nei misionare i le faaalu o latou taimi ma taumafaiga i lenei galuega tāua, ina ia fesoasoani ai i tagata e faalatalata atu iā Ieova le Atua ma faia se faiā māfana ma ia.—Iako. 4:8.

² E lē o maua i le Tusi Paia o le Lalolagi Fou, le upu “misionare.” Ae i le faaopoopoga i lalo o le Efeso 4:11, o loo taʻua ai le upu “misionare,” o le isi na faaupuga o “ē e folafola le tala lelei,” po o le upu Eleni o le “evagelia.” O Ieova o le Faievagelia sili, ae e lē mafai ona taʻua o ia o le Misionare sili, auā e leʻi auina mai o ia e se tasi. E tusa ma lona Tamā o i le lagi, na faapea mai Iesu: “O aʻu o lona sui, ma o Ia o lē na auina mai aʻu.” (Ioa. 7:29) I le faaalia o le tele o lona alofa mo tagata, na auina mai ai e Ieova lona Atalii e toʻatasi i le lalolagi. (Ioa. 3:16) E mafai ona taʻua Iesu o le Misionare sili, auā o se tasi o māfuaaga na auina mai ai o ia i le lalolagi, ina ia “molimau i le upu moni.” (Ioa. 18:37) Na taulau atoatoa o ia i le faalauiloaina o le tala lelei o le Malo, ma o loo mafai pea ona tatou maua aogā o lana auaunaga. O se faaaʻoaʻoga, pe o i tatou o ni misionare pe leai, e mafai ona tatou faataʻitaʻi i le auala na ia aʻoaʻo ai i la tatou faiva.

3. O ā fesili o le a tatou iloiloina?

³ I le avea o Iesu ma sē e folafola atu le Malo, ua tulaʻi mai ai ni fesili: O ā mea na fesagaʻia e Iesu i lana auaunaga? Aiseā na taulau ai le auala na ia aʻoaʻo ai? Ma aiseā na taulau ai lana faiva?

Lotomalie e Talaʻi i Nofoaga Fou

4-6. O ā ni suiga na fesagaʻi ma Iesu ina ua auina mai o ia i le lalolagi?

⁴ O misionare ma Kerisiano i aso nei o loo siitia i vaipanoa e iai le manaʻoga mo ē e faalauiloa atu le Malo, atonu ua faamasani e ola i tulaga e lē tutusa le lelei, ma mea na latou masani ai. Ae e faigatā ona tatou malamalama i le telē o le eseesega o le tulaga o Iesu a o iai i le lalolagi, ma le taimi o soifua o ia i le lagi, a o nonofo ma lona Tamā, faatasi ma agelu o ē na auauna ma le lotoatoa iā Ieova. (Iopu 38:7) E mautinoa, e matuā telē le eseesega o le nonofo faatasi ma tagata lē lelei atoatoa i lenei lalolagi leaga! (Mare. 7:20-23) Sa fesagaʻi foʻi o ia ma uiga faatautavā o ona soo. (Luka 20:46; 22:24) Ae e mautinoa lava, na lelei  atoatoa le auala na ia fesagaʻi ai ma tulaga eseese i le lalolagi.

⁵ E leʻi faavavega foʻi ona iloa e Iesu tautala i se gagana; ae sa ia aʻoaʻoina mai le taimi a o laʻitiiti. O se suiga telē lea, ona sa masani o ia i le faatonuina o agelu i le lagi! A o i le lalolagi o ia, pe ā ma le tasi le “gagana a tagata” na ia iloa, ma e matuā ese lava mai le ‘gagana a agelu.’ (1 Kori. 13:1) Ae e leai se isi e tutusa ma Iesu i le auala faagaeeloto lea na ia tautala ai.—Luka 4:22.

⁶ Mātau isi auala e tele na sui ai le olaga o le Atalii o le Atua ina ua afio mai i le lalolagi. E ui e leʻi aafia Iesu i le agasala tuufaasolo a Atamu, ae na avea o Ia ma tagata, e pei o i latou na mulimuli ane avea ma ona “uso,” o ona soo faauuina. (Faitau le Eperu 2:17, 18.) I le pō mulimuli o Iesu i le lalolagi, e leʻi talosaga atu o ia i lona Tamā i le lagi e auina mai “se ʻautau tele o agelu,” ae seʻi mafaufau i le tele o agelu na ia pulea a o avea o ia ma Mekaeli le Agelu sili! (Mata. 26:53; Iuta 9) Ioe, na faia e Iesu vavega; ae peitaʻi, o mea na ia faia a o i le lalolagi e lē mafaatusalia i mea na te mafaia ona fai a o i le lagi.

7. Na faapefea ona gaoioi le ʻau Iutaia e tusa ai ma le Tulafono?

⁷ I le avea ai o Iesu o “le Upu” a o soifua i le lagi, atonu na fai o ia ma Fofoga fetalai a le Atua, e taʻitaʻia le nuu o Isaraelu i le vao. (Ioa. 1:1; Eso. 23:20-23) Peitaʻi, na latou ‘maua foʻi le Tulafono na tuuina mai e ala i agelu, ae latou te leʻi tausia lava.’ (Galu. 7:53; Epe. 2:2, 3) O lea la, e leʻi iloa moni e taʻitaʻi lotu Iutaia le autū o le Tulafono. O se faaaʻoaʻoga, seʻi mafaufau i le tulafono o le Sapati. (Faitau le Mareko 3:4-6.) Sa “manatu māmā” le ʻautusiupu ma le ʻau Faresaio “i mataupu matuā tāua o le Tulafono, e pei o le faia o mea tonu, le alofa mutimutivale, ma le faamaoni.” (Mata. 23:23) E ui i lea, e leʻi faavaivai ai Iesu ma lē fia faalauiloaina atu le upu moni.

8. Aiseā e mafai ai ona fesoasoani mai Iesu iā i tatou?

⁸ Sa matuā faanaunau lava Iesu e fesoasoani atu. Na uunaʻia o ia e lona alofa mo tagata. E leʻi iai se taimi na tau mou atu ai lona agaga e fia folafola atu le tala lelei. Ona o lona faamaoni iā Ieova a o iai i le lalolagi, na ‘tuu atu iā Iesu le tiute tauave ina ia maua ai e i latou uma o ē e usiusitai iā te ia le faaolataga e faavavau.’ E lē gata i lea, “na mafatia o ia ina ua tofotofoina, ua mafai ai ona ia fesoasoani i ē ua tofotofoina.”—Epe. 2:18; 5:8, 9.

Ia Lava le Tomai e Avea ai ma Faiaʻoga

9, 10. Na faapeʻī le aʻoaʻoga na maua e Iesu a o leʻi afio mai i le lalolagi?

⁹ A o leʻi auina atu Kerisiano i aso nei o ni misionare, e faia e le Vaega Pule se fuafuaga ina ia aʻoaʻoina i latou. Pe na aʻoaʻoina Iesu? Ioe, ae e leʻi auai i se aʻoga mo rapi a o leʻi oo ina faauuina o ia e avea ma Mesia, ma e leʻi aʻoaʻoina foʻi o ia e ni taʻitaʻi lotu lauiloa. (Ioa. 7:15; faatusatusa i le Galu. 22:3.) Ae aiseā na matuā agavaa ai Iesu e aʻoaʻo atu?

¹⁰ Po o ā lava mea na aʻoaʻoina e Iesu mai lona tinā o Maria, ma lona tamā fai o Iosefa, ae na ia aʻoaʻoina mea tāua uma mo lana faiva, mai le Puna sili o aʻoaʻoga, o Ieova. Na faapea mai Iesu: “Ou te lē tautala atu i oʻu lava manatu, a o le Tamā o lē na auina mai aʻu, ua ia tuuina mai le poloaʻiga e tusa ma le mea e taʻu atu ma tautala atu ai.” (Ioa. 12:49) Ia mātau, na tuuina i le Alo ni faatonuga patino e tusa ma mea e aʻoaʻo atu. O le mea moni, a o leʻi afio mai Iesu i le lalolagi na tele se taimi na ia faalogologo ai i faatonuga a lona Tamā. O fea se isi mea e mafai ona ia maua ai aʻoaʻoga faapena?

11. O le ā le tele na faaata ai e Iesu uiga o lona Tamā e faatatau i tagata?

¹¹ E mai le taimi na foafoaina ai le Atalii, sa māfana le la mafutaga ma lona Tamā. A o leʻi avea Iesu ma tagata, na ia mātauina uiga ma le auala na feutagaʻi ai Ieova ma tagata.  Na matuā atagia mai lava i le Atalii le alofa o le Atua mo tagata, ma i le avea o ia o le autū o le poto, na ia faapea mai: “O loʻu fiafia foʻi, sa i le fanau o tagata lea.”—Faata. 8:22, 31.

12, 13. (a) O le ā le mea na aʻoaʻoina e Iesu mai le auala na feutagaʻi ai lona Tamā ma le nuu o Isaraelu? (e) E faapefea ona faaaogā e Iesu le toleniga na ia maua?

¹² O le aʻoaʻoga lea na maua e le Atalii, na aofia ai ma le mātauina o le auala na taulimaina ai e lona Tamā tulaga faigatā. O se faaaʻoaʻoga, seʻi iloiloina feutagaʻiga a Ieova ma le nuu faalogogatā o Isaraelu. O loo faapea mai le Neemia 9:28: “Ua maua e i latou le filemu, ona latou toe faia lea o amio leaga i ou luma; ona e tuua lea o i latou i lima o ē ita mai iā te i latou, na latou faatoʻilaloina ai i latou; a ua latou toe foʻi, ma alalaga atu iā te oe, ona e faafofoga mai lea ai le lagi, ma laveaʻi soo iā te i latou e tusa ma lou alofa mutimuti vale.” A o galulue ma mātauina e Iesu ia Ieova, na ia atiaʻe ai le alofa mo tagata o lona nuu, e pei lava o lona Tamā.—Ioa. 5:19.

¹³ Sa faaaogā e Iesu lenei toleniga a o ia feutagaʻi ma le agaalofa ma ona soo. I le pō a o leʻi maliu, na ‘tuua o ia e ona soo uma ma latou sosola,’ o ē na ia alofa i ai. (Mata. 26:56; Ioa. 13:1) E oo foʻi i le aposetolo o Peteru, na ia faafitia faatolu le Keriso! E ui i lea, na tuu pea e Iesu le avanoa i ona aposetolo e toe foʻi atu iā te ia. Na ia faapea atu iā Peteru: “Ua ou faatoga atu mo oe, ina ia aua neʻi mou atu lou faatuatua; a o oe, pe a e toe foʻi mai, ia e faamalosi i ou uso.” (Luka 22:32) Ua faavae aʻe le Isaraelu faaleagaga i “aposetolo ma perofeta,” o se faiga lea ua faamanuiaina, ma ua tusia igoa o aposetolo faamaoni e toʻa 12 a le Tamaʻi Mamoe o Iesu Keriso, i maa faavae o le pa o Ierusalema Fou. I aso nei, o loo faatupulaʻia pea o se faapotopotoga e talaʻia le Malo, ia Kerisiano faauuina faatasi ma a latou aumea tuuina atu o “isi mamoe,” e ala i le aao malosi o le Atua ma le taʻitaʻiga a lona Alo pele.—Efe. 2:20; Ioa. 10:16; Faaa. 21:14.

Le Auala na Aʻoaʻo Atu ai Iesu

14, 15. O ā vala na sili atu ai le aʻoaʻo a Iesu nai lo le ʻautusiupu ma le ʻau Faresaio?

¹⁴ Na faapefea ona faaaogā e Iesu le aʻoaʻoga na ia mauaina e aʻoaʻo ai ona soo? Pe a tatou faatusatusa le aʻoaʻo a Iesu i taʻitaʻi lotu Iutaia, e matuā manino lava le sili atu o le auala e aʻoaʻo ai Iesu. Ua “faalēaogā” e le ʻautusiupu ma le ʻau Faresaio ‘afioga a le Atua i a latou tū masani.’ Ae o mea na fetalai ai Iesu, e lē o ni ona manatu; ae na ia pipii atu pea i afioga ma le feʻau a le Atua. (Mata. 15:6; Ioa. 14:10) O le mea foʻi lenā e ao ona tatou faia.

¹⁵ E iai se isi vala e matuā ese mai ai Iesu i taʻitaʻi lotu. Na ia faapea mai e faatatau i le ʻautusiupu ma le ʻau Faresaio: “O mea uma latou te fai atu ai iā te outou, ia outou faia ma tausi i ai, ae aua tou te faaaʻoaʻo i mea o loo latou faia, auā ua latou fai atu, ae latou te lē faia.” (Mata. 23:3) Na fai e Iesu mea na ia aʻoaʻo atu. Seʻi o tatou iloiloina se faataʻitaʻiga e faamaonia ai lenei manatu.

16. Aiseā e mafai ai ona faapea, na ola Iesu e tusa ma ana fetalaiga o loo i le Mataio 6:19-21?

¹⁶ Na timaʻi Iesu i ona soo e “faaputu ʻoa i le lagi.” (Faitau le Mataio 6:19-21.) Pe na ola Iesu e tusa ma ana upu? Ioe, auā na ia faapea mai e tusa o ia lava: “E fai lua o alope, e iai foʻi mea e momoe ai manufelelei o le lagi, a o le Atalii o le tagata e leai se mea e moe ai.” (Luka 9:58) Sa faigofie le olaga o Iesu. Sa alu  le tele o lona taimi i le folafolaina o le tala lelei o le Malo, ma na ia faaali mai le uiga o le ola e aunoa ma le popole ona o le faaputuina o ʻoa o le lalolagi. Na taʻua e Iesu le sili atu o le faaputu o ʻoa i le lagi, auā e leai se “ele e faaumatia ai, e leai foʻi ni tagata gaoi e osofaʻi atu ma gaoia.” Po o e mulimuli i le fautuaga a Iesu i le faaputuina o ʻoa i le lagi?

O Uiga na Tosina ai Tagata iā Iesu

17. O ā uiga na avea ai Iesu ma se faievagelia uigaese?

¹⁷ O ā uiga na matuā faaesea mai ai Iesu o se faievagelia? O se tasi o na uiga, o ona uiga faaalia i ē na ia fesoasoani i ai. O nisi o uiga mataʻina o Ieova na faaalia e Iesu o le agamalu, alofa, ma le agalelei. Mātau le tosina atu o tagata iā Iesu ona o nei uiga.

18. Aiseā e mafai ai ona faapea atu e lotomaulalo Iesu?

¹⁸ Ina ua talia e Iesu le tofiga e afio mai i le lalolagi, na “tuua e ia o mea uma lava ma fai o ia ma pologa, ma avea ai o ia e pei o se tagata.” (Fili. 2:7) O se gaoioiga lotomaulalo lenā. E lē gata i lea, e leʻi manatu faatauvaa Iesu i tagata. E leʻi manatu faapea, ‘Sa ou sau mai lugā, e tatau la ona outou faalogo mai iā te aʻu.’ E leʻi pei Iesu o mesia pepelo faafiaamiotonu, auā e leʻi faailoa atu e Iesu lona tulaga o le Mesia moni. O nisi taimi na ia faapea atu i tagata e aua le taʻuina o ia i isi po o mea foʻi na ia faia. (Mata. 12:15-21) Na manaʻo Iesu e filifili tagata e mulimuli iā te ia ona o mea na latou mātauina. O se faamanuiaga mo ona soo, ona e leʻi faatalitalia e lo latou Alii i latou ina ia pei o agelu lelei atoatoa ia na latou mafuta faatasi i le lagi!

19, 20. Na faapefea ona uunaʻia Iesu e le alofa ma le agalelei ina ia fesoasoani i tagata?

¹⁹ Sa faaalia foʻi e Iesu le alofa, o se uiga autū o lona Tamā o i le lagi. (1 Ioa. 4:8) Na faaalia le alofa o Iesu i lona aʻoaʻoina o tagata na faalogologo atu. O se faaaʻoaʻoga, seʻi mātau ona faalogona e faatatau i se taʻitaʻi talavou. (Faitau le Mareko 10:17-22.) Na “alofa [Iesu] iā te ia” ma manaʻo e fesoasoani iā te ia, ae e leʻi  fia foaʻi atu e lenei taʻitaʻi talavou ana mea mo isi, ma avea ai o ia ma soo o Keriso.

²⁰ O se tasi o uiga na alofagia ai Iesu, o lona agaalofa. I le pei o tagata lē lelei atoatoa uma, o i latou na tali ane i ana aʻoaʻoga sa lofitūina i faafitauli. I le amanaʻiaina o o latou tulaga, sa aʻoaʻo i latou e Iesu i le alofa mutimutivale. O se faataʻitaʻiga: I se tasi taimi, na matuā pisi lava Iesu ma ona aposetolo ma leai ai se taimi e aai ai. E ui i lea, o le ā le lagona na oo iā Iesu ina ua ia iloa atu le motu o tagata o loo faatasitasi ane? “Ona tigā alofa ai lea o ia mo i latou, auā ua pei i latou o mamoe e leai se leoleo mamoe. Ona ia aʻoaʻo atu lea iā i latou i le tele o mea.” (Mare. 6:34) Na mātau e Iesu le tulaga mafatia o tagata i lona vaipanoa, ma faaaogā ai lona malosi e aʻoaʻo ma faia ai vavega mo i latou. Na tosina nisi i ona uiga lelei, ma uunaʻia i ana fetalaiga, ma avea ai ma ona soo.

21. O le ā le mea o le a talanoaina i le mataupu o sosoo mai?

²¹ E tele atu nisi mea e mafai ona tatou aʻoaʻoina mai le faiva a Iesu, lea o le a talanoaina i le mataupu o sosoo mai. O ā nisi auala e mafai ona tatou faaaʻoaʻo ai iā Iesu Keriso, le Misionare sili?

O le ā Lau Tali?

• O ā aʻoaʻoga na maua e Iesu a o leʻi afio mai i le lalolagi?

• Aiseā e sili atu ai le aʻoaʻo a Iesu nai lo le ʻautusiupu ma le ʻau Faresaio?

• O ā uiga na tosina atu ai tagata iā Iesu?

[Fesili mo le Suʻesuʻega]

[Ata i le itulau 15]

Na faapefea ona aʻoaʻo e Iesu le motu o tagata?