E Fiafia e Faatalitali iā Ieova

PO UA e tausami i se fualaau ʻaina ae moto? E lē taumate sa e lē fiafia i lona tofo. O fualaau ʻaina e manaʻomia se taimi e matua pe pula ai, ma e tāua tele le faatali seʻi oo i lenā taimi. E iai foʻi nisi tulaga e matuā tauia ai le faatalitali. Ua taʻua i le Tusi Paia: “E lelei ona faamoemoe [pe faatalitali] ma le faalologo i le olataga mai iā Ieova.” (Auega 3:26; Tito 2:13) O ā auala e tatau ai i Kerisiano ona faatalitali iā Ieova? E faapefea ona tatou maua aogā i le faatalitali atu iā te ia?

Mea e Aofia ai i le Faatalitali iā Ieova

I le avea ai o i tatou ma Kerisiano, o loo tatou “faatalitali ma naunau atu ia aulia mai le aso o le Atua.” O loo tatou taulaʻi atu i le mapusaga pe a ia aumaia le aso e “fano ai tagata faalēmataʻu.” (2 Peteru 3:7, 12) O loo naunau le finagalo o Ieova e faamuta mea leaga uma, peitaʻi o loo ia faatali ina ia aumai le faaolataga o Kerisiano i le auala e viia ai lona suafa. Ua taʻua i le Tusi Paia: “Ua onosai le Atua, ma ua matuā faapalepale i ipu o le toʻasā ua faatatauina i le malaia, ina ua finagalo o ia e faaali mai ai lona toʻasā, ma faailoa mai ai lona mana; e faailoa mai ai foʻi le faulaʻi o lona viiga i ipu o le alofa.” (Roma 9:22, 23) E pei lava ona Ia faia i aso o Noa, e silafia e Ieova le taimi talafeagai e faasaoina ai ona tagata i aso nei. (1 Peteru 3:20) O lea la, o le faatalitali i le Atua e aofia ai le faatalitali i lana taimi talafeagai e gaoioi ai.

A o tatou faatalitali i le aso o Ieova, e iai taimi atonu tatou te popole ai i le vaai atu i le faaauau pea ona paʻū maulalo tapulaa tau amio a lenei lalolagi o loo siʻomia ai i tatou. Pe a tatou iai i se tulaga faapena, o se mea lelei le manatunatu i upu a le perofeta a le Atua o Mika, o lē na tusia: “Ua fano lē ua agalelei nai le nuu; e leai se tasi tagata ua amiotonu.” Ona ia toe faaopoopo mai lea: “O aʻu, ou te faatalitali iā Ieova, ou te faamoemoe i le Atua o loʻu olataga.” (Mika 7:2, 7) O le ā le ituaiga “faatalitali” tatou te manaʻomia? Talu ai o le faatalitali o se uiga e lē masani ona tatou fiafia e fai, e faapefea la ona tatou olioli a o tatou faatalitali i le Atua?

Ia Fiafia a o Faatalitali Pea

E mafai ona tatou aʻoaʻoina le vaaiga saʻo mai iā Ieova. E tumau pea le avea o ia ma “Atua manuia” po o le Atua fiafia. (1 Timoteo 1:11) E fiafia o ia a o faatalitali auā o loo faaauau ona galue e faataunuu lana fuafuaga, o le siitia lea o tagata o ē alolofa iā te ia, i le lelei atoatoa e pei ona ia finagalo ai ina ua ia faia le tagata. (Roma 5:12; 6:23) Ma o loo ia silafia mai iʻuga fiafia o lana galuega—i le faitau miliona o tagata ua tosina mai i le tapuaʻiga moni. Na fetalai Iesu: “O loo galue loʻu Tamā e oo mai lava i le aso nei; o loo galue foʻi aʻu.” (Ioane 5:17) E mafai ona maua le fiafia i le faia o galuega lelei mo isi. (Galuega 20:35) E faapena foʻi Kerisiano moni, e lē o faatalitali e aunoa ma se mea o fai. Na i lo lea, o loo faaauau pea ona latou fesoasoani atu i isi ina ia latou iloaina le fuafuaga a le Atua mo tagata.

O tagata faamaoni e lotomalilie e vivii iā Ieova a o faatalitali i lana taimi tatau e gaoioi ai. O se faaaʻoaʻoga o le faisalamo o Tavita. Sa sauāina e lona tupu, faalata e se tasi o ana aumea vavalalata, ma fōua foʻi e lona lava atalii. Pe sa fiafia moni Tavita a o ia fesagaʻia nei tulaga taʻitasi, ma faatalitali i le taimi  talafeagai e laveaʻi ai o ia e Ieova? O le Salamo 71 lea e foliga mai na tusia e Tavita o loo faapea mai: “O aʻu, ou te faamoemoe e lē aunoa, ma aʻu toe faaopoopoina atu i ou viiga uma lava. E taʻutaʻu atu i loʻu gutu le amiotonu mai iā te oe, e taʻutaʻu foʻi le olataga mai iā te oe i aso uma lava.” (Salamo 71:14, 15) Na i lo le fiu e faatalitali, sa faaalia pea lona olioli auā sa ia uaʻi atu e vivii iā Ieova ma faalaeiau i isi ina ia faatasi mai i le tapuaʻiga moni.—Salamo 71:23.

E lē pei le faatalitali iā Ieova o lou fiu e faatalitali se pasi ua tuai mai. E tai pei o le faatalitali atu ma le fiafia o mātua a o tuputupu aʻe se tasi o le fanau ma avea ma tagata matua, e la te mitamita ai. E tele ni tausaga e fai ai ni taumafaiga—i le aʻoaʻoina, faatonuina, ma le aʻoaʻiina—lea e taulaʻi uma atu i le mauaina o ni iʻuga fiafia. I se tulaga tutusa, o i tatou o loo faatalitali iā Ieova e maua le fiafia pe a fesoasoani atu i isi e faalatalata i le Atua. E tatou te mananaʻo foʻi ia maua le faamaoniga a le Atua, ma mulimuli ane maua ai le ola.

Ia Aua Neʻi Mou Atu Lou Faamoemoe

O le faatalitali iā Ieova e manaʻomia ai le faaauau pea ona alofa ma auauna iā te ia e aunoa ma le mou atu o lou faamoemoe. E mafai ona avea o se luʻi lenei mea. O loo soifua le toʻatele o auauna a Ieova i aso nei, i ni siʻomaga o loo iai tagata e tauemu i so o se tasi e ola i se olaga e faatuatua ma faamaoni i folafolaga a le Atua. Peitaʻi, seʻi manatu i le faaaʻoaʻoga a tagata faamaoni o Isaraelu, o ē na faaauau pea lo latou faamoemoe a o faaaunuua i Papelonia mo le 70 tausaga. O le ā sa fesoasoani iā i latou e faia faapea? E mautinoa, sa faamalosia i latou e ala i le faitauina o salamo. O se tasi o salamo e faalaeiauina ai lea atonu na tusia i lenā taimi o loo faapea mai: “Ou te faamoemoe foʻi i lana afioga. O loo faatalitali atu loʻu agaga i le Alii e sili i ē o leoleo ona faatalitali i le taeao; e sili lava i ē o leoleo ona faatalitali i le taeao. Ia faamoemoe Isaraelu iā Ieova.”—Salamo 130:5-7.

O tagata Iutaia na olaola pea lo latou faamoemoe e ala i le faitau ma talanoa i ai, sa tauia ina ua faatoʻilalo Papelonia e ē na osofaʻia. E faitau afe Iutaia faamaoni sa vave ona toe agaʻi i Ierusalema. E uiga i lenā taimi, ua tusia e faapea: “Na faafoʻisia mai e Ieova o Siona nai le tafeaga, . . . Ona tumu ai lea o [o] tatou gutu i le featani.” (Salamo 126:1, 2) E leʻi faavaivai na Iutaia, ae sa faamalosia pea lo latou faatuatua. Ma e leʻi muta lo latou usuina o viiga o Ieova.

E faapena foʻi aso nei, o Kerisiano moni o loo faatalitali i le Atua i le taimi o “le gataaga o le lalolagi,” o loo faia taumafaiga faifai pea e faaolaola ai lo latou faatuatua. O loo latou suʻesuʻeina pea le Afioga a le Atua, faalaeiau le tasi i le isi, ma faaauau ona vivii iā Ieova e ala i le talaʻia o le tala lelei o lona Malo.—Mataio 24:3, 14.

E Aogā le Faatalitali i le Atua

Na tusi le perofeta a le Atua o Ieremia: “E lelei ona faamoemoe [faatalitali] ma le faalologo i le olataga mai iā Ieova.” (Auega 3:26) Sa manatu Ieremia e lelei i tagata o le Atua ona aua neʻi faitio i le auala na aʻoaʻi ai i latou e Ieova ina ua ia lē taofia le faaumatiaga o Ierusalema.  Ae sa tatau ona latou aʻoaʻo mai ai se lesona i le manatunatu i lo latou lē anaana, ma le manaʻoga ia suia o latou uiga.—Auega 3:40, 42.

E ono faatusaina le auala e aogā ai iā i tatou aʻoaʻiga a Ieova, i le auala e faasolosolo ai ona matua pe pula se fualaau ʻaina. Fai mai le Tusi Paia e uiga i aʻoaʻiga mai le Atua: “E fua mai ai le fua o le amiotonu e manuia ai ē ua aʻoaʻoina ai.” (Eperu 12:11) E manaʻomia se taimi e faatali ai seʻi pula lelei se fualaau ʻaina; e faapena foʻi ona manaʻomia se taimi ia suia ai o tatou uiga i le tali atu i toleniga ua saunia mai e Ieova. O se faaaʻoaʻoga, pe afai ua aveesea nisi o tatou faaeaga i totonu o le faapotopotoga ona o se amio sesē ua faia, o lo tatou faatalitali pea i le Atua o le a tatou lē lotovaivai ai ma fiu. Pe a tulaʻi mai na tulaga, e faamāfanafanaina i tatou i upu faagaeeina nei a Tavita: “O lona [le Atua] toʻasā ua se emo o le mata lea, a o lona alofa tunoa o le ola lava lea; e afe ane le tagi i le afiafi, a o le alaga fiafia i le taeao.” (Salamo 30:5) Pe afai tatou te ati aʻe se uiga faatalitali ma faatatauina fautuaga ua tatou maua mai le Afioga a le Atua ma lana faalapotopotoga, o le a iai le taimi tatou te ‘alalaga fiafia’ ai.

Ina ia Matua Faaleagaga e Umi se Taimi e Alu Ai

Po o oe o se talavou pe e leʻi leva ona e papatiso, atonu o loo e naunau e te mauaina nisi o tiute tauave i le faapotopotoga Kerisiano. Peitaʻi e tele se taimi e manaʻomia ona e matua ai faaleagaga, ina ia mafai ona e faatinoina na tiute tauave. O lea la, ia faaaogā tatau tausaga amata o lou olaga ina ia e tuputupu aʻe ai o se tagata faaleagaga. O se faaaʻoaʻoga, o le talavou o se taimi lelei lea e faitau ai le Tusi Paia atoa, ati aʻe uiga faa-Kerisiano, ma ati aʻe tomai i le faia o soo. (Failauga 12:1) Pe afai e te faatalitali ma le lotomaulalo, o le a iai le taimi a Ieova mo oe e te tauaveina ai le tele o tiute tauave.

E manaʻomia foʻi le onosai i le galuega o le faia o soo. E pei lava ona manaʻomia e se fai faatoʻaga ona faasūsū pea ma faatalitali seʻia faatupuina e Ieova le fatu, e faapena foʻi le galuega o le faia ma soo. (1 Korinito 3:7; Iakopo 5:7) O le faatupuina o le faatuatua ma le talisapaia o Ieova i loto o isi, e alu ai ni masina po o ni tausaga e suʻesuʻe ai ma le onosai le Tusi Paia. O le faatalitali atu iā Ieova e aofia ai le finafinau, e tusa pe lē vave ona tali mai tagata aʻoga i mea ua latou aʻoaʻoina. Ae pe afai ua latou faaalia sina talisapaia, atonu o se faailoga lenā o lo latou tali atu i le agaga o Ieova. Pe afai e te onosai, e te ono maua le olioli i le mātauina ua faapogaia e Ieova lau tagata aʻoga e tupu aʻe e avea ma soo o Keriso.—Mataio 28:20.

Ia Faaalia le Alofa e Ala i le Faatalitali Pea

Ina ia faaaʻoaʻo pe faapefea ona avea le faatalitali o se faailoga o le alofa ma le talitonu mautinoa, seʻi manatu i le tulaga o se tuafafine matua e nofo i se vaipanoa maotua i Andes, i Amerika i Saute. E na o i laʻua ma se isi tuafafine, ni Molimau a Ieova i lo latou nuu. Seʻi faaata i lou mafaufau lo la faatalitali ma le naunautaʻi i le asiasi atu o nisi o uso Kerisiano. I se tasi taimi, na sē ai se ovasia femalagaaʻi a o agaʻi atu i lana uluaʻi asiasiga iā i laʻua. Sa tatau ona toe foʻi le uso i le amataga o le auala e toe amata mai ai lana malaga ma ua iʻu ai ina tuai. O le teʻa o le 12 i le pō na faatoʻā iloa mamao atu ai e le uso le tau vavala mai o le nuu. Talu ai sa leai se eletise, sa faateʻia o ia i lona iloa atu o se ataata mai o se molī. Maʻeu lona fiafia ina ua taunuu atu i le amataga o le aai ma iloa ai o le malamalama lenā o le molī matagi o loo uʻu mai e le tuafafine matua. Sa ia mautinoa e alu atu lava le uso, o le ala lea na ia faatali ai pea.

I le pei o le onosai o lenei tuafafine, o loo tatou faatalitali foʻi ma le olioli iā Ieova. Tatou te mautinoa e faamaoni Ieova i ana folafolaga. I le pei o le ovasia femalagaaʻi, tatou te talisapaia i latou o loo naunau e faatali mai mo i tatou. E lē se mea foʻi la e faateʻia ai, le iloa ma le mautinoa e matuā talisapaia e le Atua i latou uma e faatalitali iā te ia. Ua taʻua i le Tusi Paia, o loo finagalo fiafia Ieova i ē faamoemoe pe faatalitali atu i lona alofa.—Salamo 147:11.

[Ata i le itulau 18]

O i latou o loo pisi i le viiaina o le Atua e fiafia e faatalitali iā Ieova