Pe Mafai Ona E Faalautele Atu i le Alofa?

E TATAU ona lavatia e le filifili lea e taofia le taula o le vaa tulaga faigatā o le sami, ina ia aua neʻi tafea ese atu le vaa. Peitaʻi, e faatoʻā mafai lenei mea pe a mausalī ma malosi sooga o le filifili, auā a leai o le a motu.

E faapena foʻi le faapotopotoga Kerisiano. Ina ia malosi ma mālōlōina le faapotopotoga, e ao i tagata taʻitasi ona autasi. O le ā se mea e autasia ai i latou? O le alofa, le malosi sili lea mo le autasi. E lētioa fetalai Iesu i ona soo: “O le poloaʻiga fou ou te tuu atu ai iā te outou, ia outou fealofani; faapei ona ou alofa atu iā te outou, ia fealofani foʻi outou. O le mea lea e iloa ai e tagata uma lava o oʻu soo outou, pe afai ua outou fealofani.” Ioe, e iai i Kerisiano moni le ituaiga o alofa mo le tasi lea e sili atu na i lo le tau ina faauō ma faaaloalo. E latou te ati aʻe le alofa lē manatu faapito.—Ioane 13:34, 35.

Talisapaia o Tatou Uso Talitonu

O loo faia aʻe le tele o faapotopotoga i tagata e eseese le matutua, ituaiga, atunuu, aganuu, gagana, ma talaaga eseese o o latou soifuaga. E tofu le tagata ma mea e fiafia ma lē fiafia i ai, o faamoemoega ma popolega, ma e masani foʻi e tofu lava le tagata ma lana avega e tauave—atonu o se maʻi po o se faafitauli tau tupe. E ono tulaʻi mai ai se luʻi i le autasi o Kerisiano ona o nei eseesega. O le ā la se mea e fesoasoani iā i tatou e faalautele atu ai le alofa, ma autasia ai pea e ui i le luʻi? O le talisapaia moni o i latou uma i le faapotopotoga, o le a fesoasoani e faalolotoina ai lo tatou alofa mo le tasi.

O le ā la le uiga o le talisapaia o le tasi? E tusa ai o le lomifefiloi e taʻua o le The New Shorter Oxford English Dictionary, e uiga atu le upu “talisapaia” i le “ia mafaufau lelei po o le manatu mamafa; matuā faatāua; ia manatu i ai e aogā pe sili ona lelei; ma ia loto faafetai.” Afai tatou te talisapaia o tatou uso talitonu, ua tatou manatu mamafa la i o latou manaʻoga, matuā faatāuaina i latou, iloa mea e sili ona lelei ai i latou, ma loto faafetai ona ua tatou aufaatasi i le tapuaʻiga. O le iʻuga, ua amata ona tatou alolofa tele ai iā i latou. O se iloiloga puupuu o le tusi a le aposetolo o Paulo i Kerisiano i Korinito o le uluaʻi senituri, o le a fesoasoani tatou te iloa ai pe faapefea ona faaalia le alofa faa-Kerisiano i le tele e mafai ai.

Na “Taofiofi” Lagona o Tagata Korinito

Na tusi e Paulo lana uluaʻi tusi i tagata Korinito i le 55 T.A., ma lana tusi lona lua i le tausaga lava lenā ina ua uma le uluaʻi tusi. Na taʻua i lana tusi, na lē talisapaia e nisi i le faapotopotoga i Korinito o latou uso talitonu. Na faamatala e Paulo le tulaga i upu nei: “Outou Korinito e, ua matou matuā tautala atu iā te outou, ua tatala o matou loto iā te outou. Ua lē o taofia outou e i matou, a o o outou lava loto ua taofiofi ai outou.” (2 Korinito 6:11, 12) O le ā sa uiga i ai Paulo ina ua ia faamatalaina i latou e faapea “ua taofiofi”?

 Sa ia uiga faapea na lē tatala atu pe faalautele atu lo latou alofa. Na manatu se faitofā o le Tusi Paia o le alofa o tagata Korinito mo Paulo, sa “taofiofi e tulaga faigatā ona o ni masalosaloga lē faavaea . . . ma le loto tigā.”

Mātau le fautuaga na avatu e Paulo: “Ou te fai atu iā te outou pei o laʻu fanau, ia outou taui mai i lo outou foʻi loto mataala.” (2 Korinito 6:13) Na faalaeiau e Paulo tagata Korinito ina ia taui pe faalautele atu le alofa mo uso talitonu. O lona uiga, ia uunaʻia e se uiga saʻo ma se loto alofa, ae lē o le lē maufaatuatuaina ma le manatu faatauvaa.

Faalautele Atu le Alofa i Aso Nei

O se faamāfanafanaloto le vaai atu i taumafaiga a tagata tapuaʻi moni o le Atua i aso nei o faalautele atu le alofa i isi. E mautinoa o le faalautele atu e aofia ai ni taumafaiga, ae e lē tau na o le iloa o le mea e ao ona fai. E manaʻomia ai le ese o a tatou amioga mai tagata e lē o ola e tusa ai o tapulaa a le Tusi Paia. O tagata na e masani ona latou lē talisapaia isi. E latou te faatalalē, lē faaaloalo, ma faatigā. Ia aua la neʻi o tatou aafia ai i nei uiga. Pagā le faanoanoa pe a faavaivaia lo tatou alofa, e pei o le alofa o i latou i Korinito, ona o faalogona o le lē maufaatuatuaina! E ono tupu lenei mea, pe a vave ona tatou mātauina ni mea e sesē ai se uso Kerisiano, ae tuai ona mātaulia ona uiga lelei. E ono tupu foʻi pe a taofiofi o tatou loto pe tatou te lē agalelei i se tasi, ona e ese le aganuu e sau ai.

I se faaeseesega la, o se auauna a le Atua e faalautele atu le alofa, e na te talisapaia moni ona uso talitonu. E na te matuā faatāuaina i latou, faaaloalo i ai, ma manatu mamafa i o latou manaʻoga. E tusa pe iai se māfuaaga  saʻo e faitio ai, ae e naunau e faamagalo atu ma e lē manaʻo e avea o se mea e mamafa iā te ia. Na i lo lea, e na te talitonu i uunaʻiga o gaoioiga a ona uso talitonu. O se loto alofa, e fesoasoani iā te ia e faaalia ai le alofa lea na manatu i ai Iesu ina ua ia faapea mai: “O le mea lea e iloa ai e tagata uma lava o oʻu soo outou, pe afai ua outou fealofani.”—Ioane 13:35.

Ia Aapa Atu ma Fai ni Uō Fou

E fesoasoani le alofa moni e tatou te aapa atu ai e fai ni uō fou, ma saʻilia le faauōga a i latou i le faapotopotoga e lē masani ona tatou fesootaʻi vavalalata i ai. O ai i latou na? O nisi o o tatou uso ma tuafāfine Kerisiano e matamumuli, pe atonu foʻi e tau leai ni a latou uō. E tatou te ono manatu e itiiti se mea tatou te tutusa ai ma i latou, seʻi vaganā ai o lea e tatou te autasi i le tapuaʻiga. Ae pe lē moni ea o nisi o faigauō sili ona vavalalata i le Tusi Paia, o ni tagata e eseese foliga vaaia ma e itiiti se mea e tutusa ai?

O se faaaʻoaʻoga, o Ruta ma Naomi e eseese lo la matutua, atunuu ma aganuu, ma e eseese foʻi a la gagana. Ae e leʻi avea na eseesega e aafia ai le la faauōga. Na tausia aʻe Ionatana o se perenise, ma o Tavita o se leoleo mamoe. Na matuā telē le eseesega o o la tausaga, ae o le la mafutaga, o se tasi lea o faigauō sili ona vavalalata o loo taʻua i le Tusi Paia. O nei faauōga uma, sa avea o se puna o le fiafiaga ma le lagolagosua faaleagaga mo i latou.—Ruta 1:16; 4:15; 1 Samuelu 18:3; 2 Samuelu 1:26.

E oo foʻi i aso nei, e mafai ona ati aʻe ni faigauō vavalalata a ni Kerisiano moni e eseese le matutua, pe e matuā eseese o la tulaga i le olaga. O se faaaʻoaʻoga o Regina, o se tinā nofo toʻatasi e iai sana fanau laiti e toʻalua. * E pisi lana faasologa ma e itiiti lava se taimi e fiafia ma faatasi ai ma isi tagata. O Harald ma Ute, o se ulugalii ua litaea mai galuega, ma e leai se la fanau. E foliga mai e itiiti se mea e tutusa ai nei aiga e lua. Ae na faatatauina e Harald ma Ute le fautuaga a le Tusi Paia e tatala pe faalautele atu. Na la aapa atu e faaaofia Regina ma lana fanau i le tele o mea fai, faifaimea faatasi i le talaʻiga ma olioli i nisi o mea e fiafia i ai ma evaevaga.

Pe mafai ona tatou faalautele atu i le faia o ni uō? Aiseā e lē faia ai ni fesootaʻiga vavalalata ma uso talitonu o se isi atunuu, aganuu, po o nisi e eseese le matutua?

Tali Atu i Manaʻoga o Isi

O se loto alofa e uunaʻia ai i tatou e tali atu i manaʻoga o isi. O ā ituaiga manaʻoga? Seʻi mātau tagata i le faapotopotoga Kerisiano. E manaʻomia e talavou le taʻitaʻiga, e manaʻomia e ē ua matutua ni faalaeiauga, e manaʻomia e faifeʻau faataimi atoa le faamālō ma le lagolagosua, ma e manaʻomia e uso talitonu o loo mafatia se faamāfanafanaga. E tofu uma tagata ma manaʻoga. E tatou te mananaʻo e tali atu i nei manaʻoga i le tele e mafai ai.

E uiga foʻi le faalautele atu i lo tatou malamalama iā i latou e iai manaʻoga faapitoa. Pe e te silafia se tasi o loo iai sona maʻi faaumiumi, po o loo fesagaʻia nisi faigatā o le olaga? O le faalautele atu o le alofa ma le ati aʻe o le agalelei, o le a fesoasoani iā te oe e malamalama ma lagolagosua ai i ē o loo manaʻomia le fesoasoani.

A o faataunuuina valoaga a le Tusi Paia i le lumanaʻi lata mai, o le a sili atu ona tāua sootaga malolosi o le autasi i le faapotopotoga, na i lo ʻoa, tomai, po o mea e taulau manuia ai. (1 Peteru 4:7, 8) E mafai ona tatou saosaolaumea i le faamalosia o sootaga o le autasi i a tatou lava faapotopotoga, e ala i le faalautele atu o le alofa i uso talitonu. E tatou te mautinoa o le a faamanuiaina i tatou e Ieova ona o le gaoioi e tusa ai ma fetalaiga a lona Alo o Iesu Keriso, o lē na fetalai: “O laʻu poloaʻiga lenei, ia outou fealofani, pei ona ou alofa atu iā te outou.”—Ioane 15:12.

[Faamatalaga pito i lalo]

[Faamatalaga faaopoopo i le itulau 10]

O le talisapaia o o tatou uso ma tuafāfine, o lo tatou matuā faatāuaina lea o i latou, faaaloalo i ai, ma ia manatu mamafa i o latou manaʻoga