Ia E Tumau i le Alofa o le Atua!
Ia E Tumau i le Alofa o le Atua!
“Le ʻau pele e, . . . ia outou faatumau iā te outou i le alofa o le Atua, . . . e oo atu i le ola [e] faavavau.”—IUTA 20, 21.
1, 2. E mafai faapefea ona e tumau i le alofa o le Atua?
UA FAAPEA lava ona alofa tele mai Ieova i le lalolagi o tagata, ua ia auina mai ai lona Alo pele e toʻatasi, ina ia maua e i latou o ē faatuatua iā te ia le ola e faavavau. (Ioane 3:16) Maʻeu le matagofie o le tofo i lenā alofa! Afai o oe o se auauna a Ieova, e mautinoa lava lou naunau e te fia maua lenā alofa e faavavau.
2 Na faailoa mai e le soo o Iuta le auala e mafai ai ona e tumau i le alofa o le Atua. Na tusi Iuta: “Ia outou ati aʻe iā te outou i lo outou faatuatua e silisili ona paia, o le Agaga Paia tou te tatalo ai; ia outou faatumau iā te outou i le alofa o le Atua, ma faatalitali atu i le alofa mutimutivale o lo tatou Alii o Iesu Keriso, e oo atu i le ola [e] faavavau.” (Iuta 20, 21) O lou suʻesuʻeina o le Afioga a le Atua ma talaʻia le tala lelei, e mafai ai ona atiaʻe oe i le “faatuatua e silisili ona paia”—o aʻoaʻoga faa-Kerisiano. Ina ia e tumau i le alofa o le Atua, e tatau ona e tatalo faatasi ma le ‘agaga paia,’ o lona uiga, e taʻitaʻia oe e le agaga paia. Ina ia faamanuiaina oe i le ola e faavavau, e tatau foʻi ona e faatuatua i le taulaga togiola a Iesu Keriso. —1 Ioane 4:10.
3. Aiseā ua lē toe avea ai nisi o ni Molimau a Ieova?
3 O nisi sa muaʻi iai i le faatuatua, ae ua lē tumau i latou i le alofa o le Atua. Ua latou filifili e ola i ni olaga agasala, ma ua lē toe avea ai o ni Molimau a Ieova. E mafai faapefea ona lē oo iā te oe lenā iʻuga faanoanoa? O lou mafaufau loloto i manatu tāua nei, e mafai ai ona e taumamao mai le faia o le agasala, ma e tumau ai i le alofa o le Atua.
Ia Faailoa Lou Alofa i le Atua
4. O le ā le tāua o le usiusitai i le Atua?
4 Ia faailoa lou alofa i le Atua e ala i lou usiusitai iā te ia. (Mataio 22:37) Na tusi le aposetolo o Ioane: “O lenei lava le alofa i le Atua, ia tatou tausi i ana poloaʻiga; e lē mamafa foʻi ana poloaʻiga.” (1 Ioane 5:3) Afai o lau masani e te usiusitai i le Atua, e mafai ona e maua ai le malosi e teena faaosoosoga, ma maua ai le fiafia. Na faapea mai le faisalamo: “Amuia le tagata e lē savali i le filifiliga a ē amio leaga, . . . a e naunau o ia i le tulafono a Ieova.”—Salamo 1:1, 2.
5. O le ā lau gaoioiga e fai, ona o lou alofa iā Ieova?
5 O lou alofa iā Ieova, e te faaeteete ai ia aua lava neʻi e faia se agasala matuiā e faalumaina ai lona suafa. Na tatalo Akuru: “Aua e te tuu mai iā te aʻu le mativa po o le mauʻoa; ia e fafaga mai iā te aʻu i ni mea e ʻai e tatau ma aʻu; ina neʻi oʻu matuā maʻona, ona ou faafiti lea, ma ou faapea, O ai ea Ieova? ina neʻi oʻu mativa foʻi, ma ou gaoi, ma ou taʻufuaina le suafa o loʻu Atua.” (Faataoto 30:1, 8, 9) Ia faamautinoa e te lē o ‘taʻufuaina le suafa o le Atua,’ i lou faia o se mea e faalumaina ai o ia. Na i lo lea, taumafai malosi e fai le mea tonu ina ia maua ai sona viiga.—Salamo 86:12.
6. O le ā e ono tupu pe afai e te faaua maaa pea ma fai le agasala?
6 Ia e tatalo e lē aunoa i lou Tamā i le lagi e fesoasoani mai ina ia e teena le faaosoosoga e faia se agasala. (Mataio 6:13; Roma 12:12) Ia e utagia pea fautuaga a le Atua, ina neʻi lē faafofogaina au tatalo. (1 Peteru 3:7) Ae afai e te faaua maaa pea ma fai le agasala, o le a ogaoga foʻi āuga e te fesagaʻia, auā o le a peiseaʻī ua poloka e Ieova i se puao tele le faalatalata atu a ē fouvale, ina ia lē oo atu a latou tatalo iā te ia. (Auega 3:42-44) O lea, ia e lotomaulalo, ma tatalo ina ia aua lava neʻi e faia se mea e ono punitia ai au tatalo i le Atua.—2 Korinito 13:7.
Ia E Alofa i le Alo o le Atua
7, 8. E faapefea e le utagia e se tasi o le fautuaga a Iesu, ona ia teena ai le faia o le agasala?
7 Ia faaalia lou alofa iā Iesu Keriso e ala i lou usitai i ana poloaʻiga, auā o le a mafai ai foʻi ona e teena le faia o le agasala. Na fetalai Iesu: “Afai tou te tausia aʻu poloaʻiga, ona tumau lea o outou i loʻu alofa; [e] pei ona ou tausia poloaʻiga a loʻu Tamā, ma ou tumau i lona alofa.” (Ioane 15:10) E mafai faapefea e lou tausisia o fetalaiga a Iesu, ona e tumau ai i le alofa o le Atua?
8 O le amanaʻia o fetalaiga a Iesu, e mafai ai foʻi ona e faamaoni ma utagia taʻiala i amioga tatau. Na taʻua e le Tulafono a le Atua i le nuu o Isaraelu e faapea: “Aua e te mulilua.” (Esoto 20:14) Ae na faailoa e Iesu le manatu autū e faavae mai ai lenā poloaʻiga, i lona fetalai: “Ai sē vaai atu i le fafine ina ia manaʻo i ai, ua uma ona mulilua ma ia i lona loto.” (Mataio 5:27, 28) Na taʻua e Peteru le iai o nisi i le faapotopotoga i le uluaʻi senituri sa “tutumu o latou mata i le . . . mulilua” ma sa latou “maileia tagata ua lē faatumauina” po o ē sa leʻi mausalī i le faatuatua. (2 Peteru 2:14) Ae ina ia lē pei oe o i latou, e mafai ona e ʻalofia le faia o amioga lē mamā faaleituaiga, pe afai e te alofa ma usitai i le Atua ma Keriso, ma ia e maumauaʻi e puipuia la outou faiā.
Ia Taʻitaʻia Oe e le Agaga o Ieova
9. O le ā e mafai ona tupu i le agaga paia pe a faaauau pea ona fai e se tasi le agasala?
9 Tatalo i le Atua mo lona agaga paia, ma ia e faataga lenā agaga e taʻitaʻia oe. (Luka 11:13; Kalatia 5:19-25) Afai e faaauau pea ona e faia le agasala, e ono aveese e le Atua le fesoasoani a lona agaga mai iā te oe. Ina ua uma ona fai e Tavita le agasala ma Patesepa, sa ia ʻaiʻoi atu i le Atua: “Aua e te lafoaʻiina aʻu i ou luma; aua foʻi e te aveeseina lou Agaga Paia iā te aʻu.” (Salamo 51:11) Ona o le lē salamō o le tupu o Saulo, na ia lē toe maua ai le agaga o le Atua. Sa agasala Saulo i lona ofoina atu o se taulaga mū, ma lona faatotoeina o le lafu mamoe ma ʻoti, ma le lafu povi, faapea ma le tupu o sa Amalekā. Mulimuli ane sa leʻi toe iai le agaga paia o Ieova iā Saulo.—1 Samuelu 13:1-14; 15:1-35; 16:14-23.
10. Aiseā e tatau ai ona e teena le manatu o le faia o se agasala?
10 Ia matuā teena lava le manatu o le faia o se agasala. Na tusi mai le aposetolo o Paulo: “Afai tatou te agasala ma le loto i ai pe a uma ona talia o le malamalama o le upu moni, ua lē toe lava se taulaga mo agasala.” (Eperu 10:26-31) Pagā le mataʻutia pe afai e faaauau pea ona e faia ma lou loto i ai le agasala!
Ia E Alofa Moni i Isi
11, 12. O ā auala o le a mafai e le alofa ma le faaaloalo, ona taofia ai se tasi mai le faia o amioga lē tatau faaleituaiga?
11 O lou alofa i ou tuaoi o le a taofia ai oe mai le faia o amioga lē tatau faaleituaiga. (Mataio 22:39) O le alofa lenā o le a e lē taumafai ai fua e fāoa mai mo oe le alofa o le paaga faaipoipo a le isi tagata. O lou faia o lenā gaoioiga e taʻitaʻia atu ai i le mulilua. (Faataoto 4:23; Ieremia 4:14; 17:9, 10) Ia e pei o le tagata amiotonu o Iopu, sa ia lē faatagaina ona mata e tosina atu fua i se isi fafine e lē o sana avā.—Iopu 31:1.
12 O lou faaaloalo i le tulaga paia o le faaipoipoga e mafai ai ona e ʻalofia se agasala matuiā. Na fuafuaina e le Atua ina ia avea le faaipoipoga mamalu ma feusuaʻiga a le ulugalii, o se auala e maua mai ai nisi ola po o le mauaina o ni fanau. (Kenese 1:26-28) Manatua, o totoga fanautama o loo faatino ai feusuaʻiga, na fuafua mo le mauaina ai o le ola, o lona uiga e paia. O ē faitaaga ma mulilulua, ua lē usiusitai i latou i le Atua, ua latou lē faamamaluina le fuafuaga o feusuaʻiga, ua leai so latou faaaloalo i le paia o le faaipoipoga, ma ua latou agasala i o latou lava tino. (1 Korinito 6:18) Peitaʻi o le alofa i le Atua ma tuaoi, faatasi ai ma se uiga usiusitai i le Atua, o le a lē faia ai e se tasi amioga e iʻu ina faateʻaina ai o ia mai le faapotopotoga Kerisiano.
13. O le ā le uiga o le faapea mai ua faaumatia e le tagata amio lē mamā oloa po o mea tāua?
13 E tatau ona tatou teena ni faanaunauga e fai le agasala, ina ia tatou lē faapogaia ni tigā i ē pele iā i tatou. Ua faapea mai le Faataoto 29:3: “O lē aumea ma fafine talitane, na te faaumatia oloa” po o mea tāua. O le tagata e faia le mulilua ae lē salamō, ua ia faaleagaina le la faiā ma le Atua, faapea foʻi lana faiā ma le mafutaga ma lona aiga. Afai o se tane, o lona uiga ua iai i lana avā māfuaaga tatau e ono tatala ai le faaipoipoga. (Mataio 19:9) Pe o le tane po o le avā lea ua faia le agasala, ae mafai e le malepe o le faaipoipoga ona faapogaia tigā matuitui i le paaga o loo mamā, si fanau, faapea ma isi tagata. Faamata e te ioe, o lo tatou iloaina o iʻuga malaia o amioga lē mamā, e tatau ona uunaʻia ai i tatou e teena le faaosoosoga o le faia o nei amioga?
14. O le ā se lesona e faatatau i le faia o mea sesē, tatou te aʻoaʻoina mai le Faataoto 6:30-35?
14 E leai se mea e mafai ona suia pe taʻusaʻoina ai le faia o le mulilua. E tatau lava la i se tasi ona ʻalofia le faia o lenei amioga matagā manatu faapito. Ua taʻua mai i le Faataoto 6:30-35, e ono tigā alofa tagata i sē na gaoi ona o le fiaʻai. Peitaʻi latou te ʻinoʻino i se tagata mulilua, auā e leaga faanaunauga o lona loto. E tusa ua ia faaleagaina pe ‘faaumatia lona lava ola.’ Pe a tuu atu i le Tulafono a Mose, e tatau ona fasiotia o ia. (Levitiko 20:10) E faatigā e le tagata mulilua faalogona o isi a o taumafai e faamalie ona tuʻinanauga, ma o lona mulilua ma le lē salamō o le a lē tumau ai o ia i le alofa o le Atua, ae o le a faateʻaeseina mai le faapotopotoga mamā faa-Kerisiano.
Ia Iai Pea se Lotofuatiaifo Mamā
15. O le ā le tulaga o iai se lotofuatiaifo ua faailogaina “i le uʻamea aasa”?
15 Ina ia tatou tumau i le alofa o le Atua, e lē tatau la ona tatou faaua maaa pea ma lē lagona ai le faia o le agasala. E mautinoa lava, e lē tatau ona tatou taliaina tapulaa matagā tau amio a le lalolagi. Ae ia tatou faaeteete i tulaga e pei o le filifilia o a tatou aumea, o mea o loo tatou faitauina, ma faafiafiaga. Na lapataʻi mai Paulo: “E ō ese nisi i le faatuatua i tausaga amulī, latou te faalogo i agaga e faasesē ma aʻoaʻoga a temoni; ona o le pepelo o tagata tala pepelo, o ē ua faailogaina o latou lava loto fuatia ifo i le uʻamea aasa.” (1 Timoteo 4:1, 2) O se lotofuatiaifo ua faailogaina “i le uʻamea aasa” e tai pei o se vaega o le tino na manuʻa ma ua toe pē ma iloga ai se maʻila, ae ua lē toe lagona ai se tigā i musele pepē o loo iai. O lona uiga e lē mafai e se lotofuatiaifo faapena, ona ia lapataʻia i tatou ina ia faamamao ese mai iā i latou ua fulitua ma tetee mai i le upu moni, faapea tulaga e ono faavaivaia ai lo tatou faatuatua.
16. Aiseā e tāua ai le iai o se lotofuatiaifo mamā?
16 E faalagolago lo tatou faaolataga i le iai o so tatou lotofuatiaifo mamā. (1 Peteru 3:21) O lo tatou faatuatua i le toto maligi o Iesu, ua faamamāina ai o tatou lotofuatiaifo mai galuega e oti ai, “ina ia [tatou] auauna i le Atua soifua.” (Eperu 9:13, 14) Ae afai la tatou te toe faia ma le loto i ai le agasala, o le a faaleagaina o tatou lotofuatiaifo, ma tatou lē toe mamā ai i le silafaga a Ieova, o nisi e talafeagai ona auauna iā te ia. (Tito 1:15) Peitaʻi, e mafai e Ieova ona fesoasoani mai, ina ia tatou toe maua se lotofuatiaifo mamā.
O Isi Gaoioiga e ʻAlofia ai Amioga Sesē
17. O le ā le aogā o le ‘mulimulituʻi iā Ieova’?
17 ‘Ia mulimulituʻi iā Ieova’ e pei ona sa faia e Kalepo i Isaraelu anamua. (Teuteronome 1:34-36) Ia e faia mea o loo finagalo Ieova e te faia, ma ia aua lava neʻi e tau mafaufau e te fia auai i “le laʻoʻai a temoni.” (1 Korinito 10:21) Aua neʻi e fulitua ma tetee mai i le upu moni. Ia e naunau e faaaogā taumafa faaleagaga o loo maua atu i le laʻoʻai a Ieova, ona lē faasesēina ai lea o oe e aʻoaʻo pepelo po o agaga leaga. (Efeso 6:12; Iuta 3, 4) Ia uaʻi atu i mea faaleagaga, e pei o suʻesuʻega faale-Tusi Paia, le auai i sauniga, ma le talaʻiga. E mautinoa lou fiafia pe a e mulimulituʻi iā Ieova, ma ia tele mea e fai i le galuega a le Alii.—1 Korinito 15:58.
18. O ā aafiaga i lau amio ona o lou mataʻu iā Ieova?
18 Ia e filifili maumauaʻi e ‘auauna i le Atua ma le migao, ma le mataʻu ina ia fiafia mai o ia.’ (Eperu 12:28) O le mataʻu ma le migao iā Ieova o le a uunaʻia ai oe ina ia teena so o se ala sesē. O le a mafai ai ona e amioaʻi e ōgatusa ma le fautuaga a Peteru i ona uso faauuina e faapea: “Afai foʻi tou te valaau atu i le Tamā o lē na te lē faailogaina tagata, o lē na te faamasino e tusa ma le galuega a tagata e taʻitoʻatasi, ia outou nonofo ma le mataʻu, a o outou o āumau i inei.”—1 Peteru 1:17.
19. Aiseā e tatau ai ona faifai pea ona e faatatauina mea o loo e aʻoaʻoina mai le Tusi Paia?
19 Ia e faatatauina pea mea o loo e aʻoaʻoina mai le Tusi Paia. O lou faia faapea o le a e ʻalofia ai le faia o se agasala matuiā, auā o le a e iai faatasi ma “i latou ua masani ona lagona ina ua aʻoaʻosooina e iloa ai le lelei ma le leaga.” (Eperu 5:14) Na i lo o lou faatalalē i le auala e te tautala ai ma amioaʻi, ae o le a e mataalia ina ia e savali e faapei o le tagata poto, e faaaogā tatau le taimi i nei aso ua leaga. ‘Ia e iloa le finagalo o Ieova,’ ma ia faia pea.—Efeso 5:15-17; 2 Peteru 3:17.
20. Aiseā e tatau ai ona tatou ʻalofia se uiga losilosi?
20 Ia ʻalofia atoatoa le uiga losilosi—se tuʻinanauga e matapeʻapeʻa fua i mea a isi. Ua faapea mai se tasi o Tulafono e Sefulu: “Aua e te manaʻo [pe losilosi fua] i le fale o lē lua te tuaoi, aua e te manaʻo i le avā a lē lua te tuaoi, po o lana auauna tane, po o lana auauna fafine, po o lana povi, po o lana asini, po o se tasi mea a lē lua te tuaoi.” (Esoto 20:17) O lenei tulafono na puipuia ai le fale o se tasi, o lana avā, o ana auauna, o manu, ma isi mea faapena. Ae sili ai lava ona tāua le fetalaiga a Iesu e faapea, o le losilosi, lea foʻi e taʻua o le manumanu, o mea na e leaga ai le tagata.—Mareko 7:20-23.
21, 22. O ā gaoioiga e puipuia ai, e ao ona utagia e se Kerisiano ina ia ʻalofia le faia o le agasala?
21 Ia gaoioi e puipuia oe ina ia lē oo atu lenā faanaunauga i le faia ai o le agasala. Na tusi mai le soo o Iakopo: “Ua taʻitasi ma faaosoosoina, pe a tosina ma maileia i lona lava tuʻinanau; pe a tō le tuʻinanau ona fanau mai ai lea o le agasala; a matua le agasala ona fanaua mai ai lea o le oti.” (Iakopo 1:14, 15) Mo se faaaʻoaʻoga, afai o se faafitauli i se tasi i taimi ua teʻa, le lē pulea o le ʻava malosi, atonu o le a ia filifili e lē teuina ni ʻava malosi i lona fale. Ina ia ʻalofia le faaosoosoina e fai ni amioga lē mamā ma se tasi o le isi itupā, e ono manaʻo ai se Kerisiano e sui le vaega o le falefaigaluega e galue ai, po o le suʻe o se isi ana galuega.—Faataoto 6:23-28.
22 Aua lava neʻi e tau faalatalata i le ala e taʻitaʻia atu i le agasala. O uiga faatafai ma le mafaufau i amioga lē mamā e mafai lava ona oo ai i le faitaaga po o le mulilua. Afai ua masani se tasi i le faia o ni tamaʻi pepelo, e iʻu ai lava ina lē toe fefe e fatu ni pepelo matuiā, ma iʻu ai i le agasala o le ola pepelo. O le gaoi i ni mea ninii e iʻu ai ina lē toe gaoioi le lotofuatiaifo o se tasi, ma amata loa ona gaoi i ni mea tetele. Afai e amata ona tau faataga ni mafaufauga tetee i le upu moni, e iʻu ai lava ina matuā fulitua atoatoa mai i ai.—Faataoto 11:9; Faaaliga 21:8.
Ae Faapefea pe Afai ua E Faia se Agasala?
23, 24. O le ā le faamāfanafanaga e maua mai le 2 Nofoaiga a Tupu 6:29, 30 ma le Faataoto 28:13?
23 O tagata uma lava e lē lelei atoatoa. (Failauga 7:20) Ae afai ua e faia se agasala matuiā, e faamāfanafanaina oe i le tatalo lenei na faia e Solomona, i le aso na faaulufaleina ai le malumalu o Ieova. Na tatalo atu Solomona i le Atua: “O talosaga uma ma ʻaiʻoi uma e fai e se tasi tagata, po o lou nuu o Isaraelu uma, o ē ua iloa taʻitoʻatasi o lona maʻi, ma lona tigā, ma faaloaloa ona lima i lenei fale; ia e faafofoga mai mai le lagi, o le mea o loo e afio ai, ma e faamagalo mai, ma e taui atu i tagata taʻitoʻatasi e tusa ma ana amio uma, ua e silafia lona loto; auā na o oe lava e silafia loto o tagata.”—2 Nofoaiga a Tupu 6:29, 30.
24 E silasila mai le Atua i lou loto, ma faamagalo mai. Fai mai le Faataoto 28:13: “O lē ua ufiufi lona solitulafono, e lē manuia o ia; a o lē ua faaali ma lafoaʻiina, e alofagia o ia.” O le salamō ma taʻutino le agasala ma ia lē toe faia, e mafai ai e se tasi ona maua le alofa mutimutivale o le Atua. Peitaʻi, afai ua e vaivai faaleagaga, o le ā se isi fesoasoani e mafai ona e maua ina ia e tumau ai i le alofa o le Atua?
O le a Faapefea Ona E Tali?
• E mafai faapefea ona tatou tumau pea i le alofa o le Atua?
• E fesoasoani mai faapefea le alofa mo le Atua ma Keriso iā i tatou, ina ia teena le faia o le agasala?
• Aiseā e avea ai le alofa i isi ma itu e taofia ai i tatou mai le faia o ni amioga lē mamā faaleituaiga?
• O ā nisi o auala e ʻalofia ai le faia o amioga sesē?
[Fesili mo le Suʻesuʻega]
[Ata i le itulau 21]
Ua faailoa mai e Iuta le auala e mafai ai ona tatou tumau pea i le alofa o le Atua
[Ata i le itulau 23]
O le malepe o le faaipoipoga, e faapogaia ai tigā matuitui i le paaga e leʻi agasala faapea si fanau
[Ata i le itulau 24]
Po o pei oe o Kalepo, e te filifili maumauaʻi e ‘mulimulituʻi iā Ieova’?
[Ata i le itulau 25]
Ia tatalo e lē aunoa mo se fesoasoani ina ia teena faaosoosoga