Le Tulaʻi Mai ma le Toe Mou Atu o Fautuaga a Ē Atamamai

I LE lalolagi i aso nei, ua mafai ona saʻili atu tagata i ni fautuaga mo mātua i le tausia aʻe o tamaiti i se polokalame i le komepiuta, ma e vave lava ona maua ai ni faamatalaga e silia i le 26 miliona i lenei mataupu. Afai e te faaalu se minute e tilofaʻia ma faitau ai na faamatalaga, e alu le fia tausaga e leʻi māeʻa lava lau faitau.

O fea sa saʻili i ai mātua mo ni fautuaga, a o leʻi iai ni fomaʻi o tamaiti, tagata suʻesuʻe i mafaufau ma amioga a tamaiti, ma le Initineti? E masani ona saʻili atu i le aiga potopoto. E nofo sauni tinā, tamā, ma tauaiga e ofo atu ni taʻiala, fesoasoani tau seleni, ma le vaavaaia o tamaiti. Ae i le tele o atunuu, o le toʻatele o tagata ua siitia mai nuu maotua ma ola i le taulaga, ma ua tauau ina motusia ai nei sootaga vavalalata faaleaiga. Ua masani ai i aso nei le taulima lava e tinā ma tamā na o i latou, o luʻi i le tausia aʻe o fanau.

E mautinoa o se tasi lenei o pogai o le vave faateleina o fale e tausia ai tamaiti i aso nei. O se isi māfuaaga, o le taatele o le talitonuga faapea e maua fautuaga aogā i le faasaienisi. I le taulalata atu i le 1810, na talitonu ai tagata Amerika e mafai ona faaleleia vala uma o le olaga e le faasaienisi. Na manatu tagata o le faasaienisi e faaleleia ai le tausia o fanau. Ina ua faailoa i le lautele e le faalapotopotoga i Amerika o le National Congress of Mothers, le “lē agavaa o mātua” i le 1899, na vave ona ofo atu e le toʻatele o “saienitisi atamamai” le fesoasoani. Na latou folafola atu e fesoasoani i tinā ma tamā o loo tauivi ina ia maua ni taʻiala i le tausia aʻe o fanau.

Saʻili Atu i Tusi mo ni Fautuaga

Peitaʻi, o ā mea na faataunuuina e nei tagata atamamai? Po o faaitiitia ai ea popolega o mātua, ma lava tā oso ai e tausia le fanau i aso nei na i lo tausaga e leʻi leva atu? E lē o le tulaga lenā e tusa ai ma se palota na faia talu ai nei i Peretania. Na faaalia i lenā palota, pe tusa o le 35 pasene o mātua e iai fanau laiti, o loo saʻili atu pea mo ni fautuaga aogā. E manatu nisi na pau la latou filifiliga e ao ona fai, o le usiusitai pea i o latou faalogona.

I lana tusi Raising America: Experts, Parents and a Century of Advice About Children, na suʻesuʻe ai e Ann Hulbert faamaumauga o loo i tusi a ē atamamai, i le tausia aʻe o fanau. Na taʻua e Hulbert lea e toʻalua lana fanau, e na o ni nai manatu o nisi o ē atamamai na faavae lelei mai le faasaienisi. Na i lo lea, e foliga mai na sili atu ona taaʻina a latou fautuaga i mea na tutupu i o latou olaga, na i lo o ni faamaumauga patino na maua mai i ni suʻesuʻega. Pe a toe tepa i tua, e foliga mai o le tele o mea na latou tusia, na lē aogā, na feteenaʻi, ma i nisi taimi e lē fuafuaina lelei.

O le ā la le tulaga ua oo i ai mātua i aso nei? E toʻatele ua lē mautonu a o fesagaʻia le tele o fautuaga, manatu, ma feteenaʻiga o manatu ua iai na i lo le taimi muamua. Peitaʻi, e lē o mātua uma e lagona faapea ua leai so latou taʻitaʻiga. Ua maua e mātua o le lalolagi aogā mai se puna o le atamai ua loa ona iai, lea e faamaonia pea le avea o se puna o fautuaga maufaatuatuaina, e pei ona o le a faaalia i le mataupu o sosoo mai.