E Faapefea Ona E Iloa le Atua?

E ono masalosalo nisi faapea e naunau moni le atua e faailoa mai o ia i tagata. afai e naunau mai, e faapefea la ona ia faailoa mai o ia?

NA TAʻUA e John Calvin mai le lotu Porotesano Toefuataʻiina o le senituri lona 16, e lē mafai ona iloa e tagata le Atua i ni a latou lava taumafaiga, seʻi vaganā ua ia faailoa mai o ia iā i latou. Peitaʻi, e ono manatu nisi pe faamata o naunau moni le Atua e faailoa mai o ia i tagata. Pe afai e naunau i ai, e faapefea la ona ia faailoa mai o ia?

E iai se pogai o mea uma e faia e Ieova, “Lē na Faia” i tatou. E lē gata i lea, ona o ia o le “Atua e ona le malosi uma lava,” e mautinoa e mafai ona ia faataunuu lona finagalo. (Failauga 12:1; Esoto 6:3) E tatou te mautinoa sa ia finagalo malie e faailoa mai lona finagalo i tagata, auā na faagaeeina lana perofeta o Amosa e tusi: “E lē faia lava se mea e le Alii o Ieova, a e faaalia lona finagalo i ana auauna o perofeta.” Ae mātau mai, na fetalai le Atua e na o ana auauna e faailoa i ai lona finagalo, o ē e alolofa faamaoni iā te ia. Pe lē moni ea lenā manatu? O ai e te faailoa i ai mataupu e fitoitonu iā te oe lava ia? Po o so o se tasi lava, po o sau uō e sili ona e vavalalata i ai?—Amosa 3:7; Isaia 40:13, 25, 26.

Ua maofa ē lotomaulalo i le poto ma le silafaga po o le iloa o loo i le Atua, ma e moni lenā manatu. Peitaʻi, e lē lava le na ona maofa pe a tatou mananaʻo e maua aogā mai le poto ma le silafaga o loo i le Atua. Ua faamamafa i le Tusi Paia faapea, ina ia aʻoaʻoina le finagalo o le Atua, e ao ona tatou lotomaulalo: ‘Teu i lou loto aʻu poloaʻiga. Uaʻi atu ou taliga i le poto. Faasaga atu lou loto i le faautauta. Valaau atu i le atamai, ma leo tele atu i le faautauta. Saʻiliʻili iā te ia, e pei ona saʻiliʻili i le ario.’—Faataoto 2:1-4.

O se tagata lotomaulalo e faia ni taumafaiga faapena, o le a ia iloa le Atua. Ua faaauau lenā fuaiupu i le Faataoto: “O Ieova na te foaʻi mai le poto; mai lona fofoga le poto ma le faautauta.” Ioe, o ē e saʻilia faamaoni le mea moni, o le a ‘lagona le amiotonu, ma le faamasinoga, ma le amio saʻo; o ala lelei uma lava.’—Faataoto 2:6-9.

Le Saʻiliga o le Mea Moni

Ua taʻua i le Encyclopedia of Religion: “Ua iloa le tagata i le manaʻoga ia iloa le mea moni ma le mea pepelo, malosi ma le vaivai, saʻo ma le taufaasesē, mamā ma palapalā, manino ma nenefu, faapea ma le iloa o le eseesega o mea i o latou tulaga faatapulaaina.” Ina ia faamalieina lenei manaʻoga, ua loa ona saʻilia e tagata le mea moni. O lo latou saʻilia o Ieova lea na taʻua e le faisalamo o “le Atua faamaoni,” ua latou taulau ai i le mauaina o le mea moni.—Salamo 31:5.

O le uiga o le suafa o Ieova i le uluaʻi gagana Eperu, E Gaoioi o Ia e Tusa ma Tulaga Manaʻomia. (Kenese 2:4) O lea, ua faauaʻi  atu i tatou e le uiga o le suafa o le Atua i lona tulaga o Lē na foafoaina mea, faapea ma lona finagalo. O le mea moni, o le iloaina ma le faaaogāina o le suafa o Ieova, o se faailoga lea o le lotu moni. E silafia lelei e Iesu lenā mea moni. I le faasino atu i ona soo, na ia tatalo i le Atua: “Ua ou faailoa atu foʻi lou suafa iā te i latou, o le a ou faailoa atu ai foʻi; ina ia i totonu iā te i latou le alofa ua e alofa mai ai iā te aʻu, o aʻu foʻi i totonu iā te i latou.”—Ioane 17:26.

I le faalagolago i lana faiā māfana ma le Atua, na taʻua ma le mautinoa e se Eperu e igoa iā Iosefa, ina ua feagai ma le tiute e faailoa atu uiga o miti: “E lē o i le Atua ea faamatalaga?”—Kenese 40:8; 41:15, 16.

I senituri mulimuli ane, na faia ai e le tupu Papelonia o Nepukanesa se miti lea na lē mafai e ona tagata popoto ona faamatala le uiga. Na faapea atu le perofeta o Tanielu i le tupu: “O i ai le Atua i le lagi, o lē na te faaalia mea ua lilo, ma faailoa mai iā Nepukanesa le tupu o mea e oo mai i aso amuli.”—Tanielu 2:28.

Ua faaalia i faaaʻoaʻoga a Iosefa ma Tanielu, e na o ē e auauna iā Ieova e mafai ona maua le poto ma le silafaga a le Atua. E ono aofia i lo tatou mauaina o le finagalo o le Atua le lafoaʻia o o tatou manatu tuai. Na faia faapea e Iutaia o le uluaʻi senituri, o ē na avea ma Kerisiano. I le ola aʻe ia faaaloalo ma usitai i tulafono na faavae mai i Iutaia, na latou manaʻomia se taimi e talia ai Iesu o le Mesia. Na ia afio mai e faataunuu le Tulafono a Mose lea na avea o le “ata o mea lelei atalī.” (Eperu 10:1; Mataio 5:17; Luka 24:44, 45) Na suia i “le tulafono a Keriso,” lea e silisili atu i le Tulafono a Mose.—Kalatia 6:2; Roma 13:10; Iakopo 2:8.

Na tatou fananau uma mai se lalolagi ua vavae ese mai le Atua. Ona o le agasala tuufaasolo mai le uluaʻi ulugalii, ua avea ai i tatou ma ē ita i le Atua, o ē leai se poto saʻo e uiga i lona finagalo. Ua iai foʻi iā i tatou le loto faaʻoleʻole. (Ieremia 17:9; Efeso 2:12; 4:18; Kolose 1:21) Ina ia maua le faauōga ma le Atua, e ao ona aʻoaʻoina i tatou e faaōgatusa o tatou mafaufauga ma ala o le Atua. E lē faigofie lenā mea.

E ono faigatā ona lafoaʻi manatu ma tū o lotu sesē, aemaise pe afai na tatou aʻoaʻoina na manatu ma tū mai lava a o laiti. Ae po o le iai pea i le ala sesē, o se mea sili ona poto lenā e ao ona fai? E leai! E sili atu ona poto le suia o le auala e mafaufau ai se tasi ma maua ai le finagalo malie o le Atua.

 Ia Iloa le Auala a le Atua e Aumai ai Ana Aʻoaʻoga

O fea tatou te maua ai le fesoasoani e malamalama ai i upu moni o le Afioga a le Atua, ma ola e ōgatusa ai ma na mea? Na saunia e le Atua le taʻitaʻiga e ala mai i tagata maufaatuatuaina ma faamaoni i o latou tofiga, i taimi o Isaraelu anamua. Ua faapena ona taʻitaʻia e Keriso le Ulu o le faapotopotoga Kerisiano i aso nei, ē saʻilia faamaoni le upu moni. Na te faia faapea e ala i ona soo maufaatuatuaina ma faamaoni, o ē ua ala mai ai le taʻitaʻiga ma le puipuiga o ē o loo saʻili faamaoni i le upu moni. (Mataio 24:45-47; Kolose 1:18) E faapefea ona iloa e se tasi le auala e aumai ai e le Atua ana aʻoaʻoga?

E taumafai soo moni o Iesu Keriso e faaatagia atu uiga ia na ia faaalia a o avea ma tagata. I se lalolagi o loo faatupulaʻia pea le leaga, o lo latou autasi i le faaalia atu o nei uiga faaleagaga, ua faigofie ai ona mātaulia i latou. (Tagaʻi i le pusa i le itulau e 6.) Po o faaalia nei uiga i le lotu o loo e auai ai, po o lotu foʻi a ou tuaoi? O le a tāua mo oe le iloilo o lenei mataupu faatasi ma le fesoasoani a le Tusi Paia.

E matou te valaaulia oe lē faitau ina ia faia faapea, e ala i le faia o se suʻesuʻega faale-Tusi Paia. I se faatatauga i le tausaga ua mavae, e silia i le 6,000,000 tagata i atunuu e 235, na faaaogāina lenei faatulagaga e suʻesuʻe le Tusi Paia ma Molimau a Ieova. O le mauaina o le poto ma le silafaga a le Atua, o se galuega e faaauau pea ona fai, e faamalieina ma e tauia ai foʻi. Aiseā e lē saʻilia ai nei loa le poto ma le silafaga a le Atua? O se saʻiliga o le a lē taitai ona e salamō mulimuli ane ai. Ioe, e mafai moni lava ona tatou iloa le Atua!

[Pusa i le itulau 6]

O Ē E GALULUE E ŌGATUSA MA LE FINAGALO O LE ATUA . . .

e tausisia le solitū i feteenaʻiga faapolotiki.—Isaia 2:4.

e maua ni fua lelei e ala i le faia o le finagalo o le Atua.—Mataio 7:13-23.

e fealofani.—Ioane 13:35; 1 Ioane 4:20.

e autasi manatu uma. —Mika 2:12.

e lē faataʻitaʻi i uiga ma amioga sesē a le lalolagi o loo siʻomia ai i latou.—Ioane 17:16.

e molimau atu i le upu moni ma faia soo.—Mataio 24:14; 28:19, 20.

e olioli i sauniga e lē aunoa e maua ai faamāfanafanaga.—Eperu 10:25.

e vivii i le Atua o se faalapotopotoga faavaoatunuu.—Faaaliga 7:9, 10.

[Ata i le itulau 7]

E mafai ona maua e se tasi, e se aiga, ma se faapotopotoga, le poto e uiga i le Atua