Talaaga o le Soifuaga

Ua Autasi Nei lo Matou Aiga!

FAAMATALAINA E SUMIKO HIRANO

Na ou maua se olaga sili ona lelei, ma na ou naunau lava ia maua foʻi e laʻu tane. Peitaʻi e 42 tausaga na mavae faatoʻā tupu lenā mea.

NA MA faaipoipo ma laʻu tane i le 1951, ina ua 21 oʻu tausaga. I le uluaʻi fā tausaga talu ona ma nonofo, na maua ai la ma fanau tama e toʻalua, ma na foliga fiafia mea uma i loʻu olaga.

I se tasi aso i le 1957, na fai mai ai loʻu uso matua, sa asiasi ane se tamaʻitaʻi misionare a Molimau a Ieova iā te ia. E ui sa lotu Puta loʻu uso, ae sa ia suʻesuʻeina le Tusi Paia ma le misionare ma ia faalaeiau aʻu e suʻesuʻe foʻi i le Tusi Paia. O lea na ou talia ai. O le taimi lenā sa ou alu i le lotu Porotesano, ma sa ou manatu, o le a ou maua ni mea sesē i talitonuga a Molimau a Ieova.

E leʻi umi ae ou iloa, e laʻitiiti lava mea sa ou iloa e uiga i le Tusi Paia. Sa ou fesili atu i le misionare, “O ai ea Ieova?” Ou te leʻi faalogo lava i lenā igoa i le matou lotu. Na faasino mai e le misionare o Daphne Cooke (lea na mulimuli ane sui lona faaiʻu iā Pettitt) le Isaia 42:8, o loo manino ai, o Ieova le suafa o le Atua e Ona le Malosi Uma Lava. Na faaaogā e Daphne le Tusi Paia e tali uma ai aʻu fesili.

Na ou fesiligia foʻi le matou faifeʻau i fesili lava nei. Ae na faapea mai: “O le agasala le fesili. Pau le mea, talitonu i mea ua taʻu atu iā te oe.” E ui ou te leʻi ioe i lona manatu, ae na ou auai pea i le lotu i taeao o Aso Sa uma mo le ono masina ae ou alu i sauniga a Molimau a Ieova i le afiafi.

 Aafiaga i Laʻu Faaipoipoga

Sa matuā ou fiafia i mea na ou aʻoaʻo mai le Tusi Paia, ma sa ou faailoa atu foʻi i laʻu tane, o Kazuhiko. O taimi uma lava e uma ai saʻu suʻesuʻega po o se sauniga, ou te faamatala iā te ia ni mea na ou aʻoaʻoina. Ae o le iʻuga, na faasolo ina leaga ai la ma faiā. Na te leʻi manaʻo e avea aʻu o se Molimau a Ieova. Peitaʻi, na matuā faamalieina aʻu i le suʻesuʻeina o le Tusi Paia, o lea na faaauau ai pea aʻu suʻesuʻega ma ou aufaatasi atu i Molimau a Ieova.

A o leʻi tuua le fale i pō o sauniga, sa ou kukaina se meaʻai e fiafia i ai Kazuhiko, peitaʻi na amata ona ia alu atu ma ʻai i faleʻaiga. Pe a uma le sauniga ma ou toe foʻi i le fale, sa lē fiafia o ia ma lē fia talanoa mai iā te aʻu. Pe ā o le lua i le tolu aso, ua amata ona tau feoloolo lona ita, ae ua oo ai foʻi i le aso o le isi sauniga.

O le vaitaimi lea, na ou maʻi ai i le fatafata vaivai, o se maʻi na maliliu ai nisi o le aiga o laʻu tane. Na popole Kazuhiko ma fai mai, a ou manuia ona fai lea o so o se mea lava ou te manaʻo i ai. Pau le mea na ou talosaga i ai, o lona talia ma le fiafia o loʻu auai i sauniga faalevaiaso. Sa ia lotomalie i ai.

E ono masina faatoʻā ou toe malosi, ma i lenā taimi sa ou suʻesuʻe ma le filigā le Tusi Paia. Na ou taumafai e suʻe ni mea e sesē ai aʻoaʻoga a Molimau, ma loʻu manatu ou te maua loa se mea sesē ona taofi lea o laʻu suʻesuʻega. Ou te leʻi maua se mea sesē se tasi. Na i lo lea, na manino mai ai iā te aʻu le sesē o aʻoaʻoga a le lotu Porotesano. Na oo ina ou talisapaia le alofa o Ieova ma lana faamasinotonu, ma ou iloa le aogā o le faaōgatusa o loʻu olaga ma ana tulafono.

Ina ua ou toe malosi, na tausi e laʻu tane lana upu na fai, ma lē toe tetee i loʻu auai i sauniga. Na tupu pea loʻu talisapaia o mea faaleagaga, ma iā Me 1958, sa papatiso ai aʻu e avea o se Molimau a Ieova. Sa ou moomoo lava e tapuaʻi faatasi loʻu aiga i le Atua moni.

Fesoasoani Faaleagaga i Laʻu Fanau

Sa auai pea laʻu fanau i sauniga ma talaʻiga, ae e iai mea na tutupu, na ou iloa ai le agaʻigaʻi i luma o lo la iloa o le Tusi Paia. I se tasi aso, a o ono tausaga o laʻu tama o Masahiko, sa taalo ai i fafo o le fale. Na ou faalogo atu i se paʻō leo tele ma le eʻē o le tagata. Na tamoʻe mai se tuaoi ma valaau mai ua lavea laʻu tama i le taavale. Na ou lē mautonu po ua oti. Ae sa ou faamalosi pea ma alu faavave i fafo. Na lagona loʻu fefe ina ua ou vaai atu i le uila ua maanuminumi, peitaʻi na ia savali agaʻi mai iā te aʻu, e lē manuʻa tele. A o ia fusi mau aʻu, na ia fai mai, “Tinā, o Ieova lea na faasaoina aʻu, a ea?” O loʻu vaai atu o loo ola pea ma loʻu faalogo i lana tala lenā, na maligi ai oʻu loimata.

I se isi aso, a o i le galuega talaʻi, na matou fetaui ai ma se toeaina na eʻē mai: “O le ā le mea e te alu ai ma ave faamalosi lenā tamaitiiti? Talofa e, i sinā tamaitiiti.” A o leʻi tali atu i le toeaina, na faapea atu Tomoyoshi, a o valu lenā o ona tausaga: “Tamā, e lē o ave faamalosi aʻu e loʻu tinā i le talaʻiga. Ou te talaʻi ona ou te fia auauna iā Ieova.” Sa na o le sioa o le toeaina ua leai sana tala.

 I le tulaga faaleagaga, sa pei e mātuaoti laʻu fanau ona sa lē auai mai le la tamā. Na paʻū iā te aʻu le tiute e aʻoaʻo laʻua i upu moni o le Tusi Paia, e ui na tele mea na manaʻomia foʻi ona ou aʻoaʻoina. Sa ati aʻe loʻu alofa, faatuatua, ma loʻu maelega ma ou taumafai e avea o se faaaʻoaʻoga lelei. I aso taʻitasi na ou tatalo faafetai iā Ieova faatasi ma laʻu fanau. Sa ou faamatala iā i laʻua mea na tutupu i le galuega talaʻi. Sa faalaeiauina ai i laʻua. Ina ua fesiligia i laʻua i se taimi mulimuli ane, pe aiseā na avea ai ma paeonia, po o faifeʻau faataimi atoa o Molimau a Ieova, na la tali faapea, “Na ma vaaia le fiafia o lo ma tinā i le auauna o se paeonia, ma sa ma mananaʻo foʻi ma te fiafia.”

Sa ou taumafai malosi ia ou lē upuleagaina lo la tamā ma so o se isi i le faapotopotoga. Na ou iloa aafiaga leaga i laʻu fanau pe afai la te faalogo i talanoaga lē lelei. E ono aveesea ai lo la faaaloalo mo le tagata o loo upuleagaina aemaise lē o loo faia tala.

Foʻia ni Mea sa Faafaigatā ai le Agaʻigaʻi i Luma

I le 1963 na matou siitia ai i Taiwan ona o le galuega a laʻu tane. Na ia fai mai, afai ou te talaʻi i tagata Iapani o lenā aai, o le a tutupu ai ni faafitauli. E iʻu ina toe faafoʻi ai matou i Iapani, ma lē taulau ai lana kamupani. O lea, na ia manaʻo ai ia matou mamao ese lava ma le mea e iai ni Molimau.

I Taiwan, sa faia sauniga uma i le gagana Saina, peitaʻi na faafeiloaʻia ma le māfana i matou e Molimau. Na ou filifili ou te aʻoaʻoina le gagana Saina ina ia mafai ai ona ou talaʻi i tagata Saina, ae lē o tagata Iapani. O le auala foʻi lenā o le a leai ai ni faafitauli ia na taʻua e laʻu tane.

Na faamalosia i matou ona o la matou faauōga ma Molimau i Taiwan. Na fesoasoani malosi iā i matou se ulugalii misionare, o Harvey ma Kathy Logan. Na avea le uso o Logan ma tamā faaleagaga i laʻu fanau. Na ia fesoasoani iā i laʻua e iloa e lē o se olaga faigatā ma lē fiafia le auauna iā Ieova. Ou te talitonu lava o le taimi na matou nonofo ai i Taiwan na filifili ai laʻu fanau e fia auauna iā Ieova.

Na auai Tomoyoshi ma Masahiko i se aʻoga na aʻoaʻoina ai le gagana faa-Peretania ma le faa-Saina i Taiwan. O inā na saunia ai i laʻua e auauna o ni faifeʻau a Ieova le Atua moni, i se taimi mulimuli ane. Ou te matuā faafetai iā Ieova i lona faamanuia o i matou i lenā taimi na semanū o ni taimi faigatā. Ina ua mavae le tolu ma le ʻafa tausaga talu ona matou nonofo i Taiwan, na matou toe foʻi loa i Iapani.

O le taimi lenā ua talavou laʻu fanau ma ua mananaʻo e nonofo ese atu ma le aiga. E tele  itula na matou talanoa ai i mataupu silisili o le Tusi Paia, ma sa fesoasoani tele Ieova iā i laʻua i lenā taimi faigatā. Ina ua iʻu aʻoga a Tomoyoshi na amata ona paeonia. E toʻafā tagata na ia fesoasoani ia tuuina atu ma papatiso i uluaʻi tausaga o lana paeonia. Na mulimuli foʻi Masahiko i le faaaʻoaʻoga a lona uso ma amata ona paeonia ina ua iʻu lana aʻoga. E toʻafā ni talavou na ia fesoasoani e avea ma Molimau i uluaʻi tausaga e fā o lana paeonia.

Ona faamanuia atili lea o Ieova i laʻu fanau. Na amata suʻesuʻe Tomoyoshi ma le tane a se fafine na ou fesoasoani i ai ia iloa upu moni o le Tusi Paia. Na iʻu ina avea le la fanau teine e toʻalua ma Molimau. Mulimuli ane, na faaipoipo atu Tomoyoshi i le teine matua, o Nobuko, ae faaipoipo atu Masahiko i le teine laʻitiiti o Masako. O loo auauna nei Tomoyoshi ma Nobuko i le ofisa ulu o Molimau a Ieova i Brooklyn, i Niu Ioka, i le Iunaite Setete o Amerika. A o Masahiko ma Masako o loo auauna o ni misionare i Paraguay.

Ni Suiga Mālie i Laʻu Tane

Sa foliga i lenā vaitaimi e lē ano laʻu tane i lo matou talitonuga, peitaʻi na matou vaaia ni faailoga o le faasolosolo ina suia. Pe a tetee mai nisi iā te aʻu, sa ia tū atu mo oʻu talitonuga ma lagolagoina upu moni o le Tusi Paia ma lona lē iloa. Sa ia fesoasoani atu i Molimau na manaʻomia le fesoasoani faaletino. I lana tautalaga puupuu na faia i le faaipoipoga a se tasi o la ma fanau, na ia faapea ai: “O le aʻoaʻoina o tagata ia ola i le auala saʻo, o se galuega sili ona lelei, ae matuā faigatā lava. Ua filifilia e oʻu atalii le ala faigatā lenā e avea ma la galuega. Faamolemole, fesoasoani iā i laʻua.” O nei mea uma na ou mafaufau ai, o le a iai se taimi e auauna ai o ia iā Ieova.

Na ou valaaulia isi Molimau i le ma fale ina ia tafafao ma laʻu tane. Na ou valaaulia foʻi Kazuhiko i sauniga faa-Kerisiano ma fonotaga faapea ma le Faamanatuga o le maliu o Keriso. Pe a lē faalavelave i ona taimi faigaluega, na ia auai, e ui lava e sau ma le musuā. E tele taimi na ou faapea ai o le a ia talia se suʻesuʻega faale-Tusi Paia, o lea na ou valaaulia ai toeaina Kerisiano i lo ma fale. Ae na te leʻi taliaina se suʻesuʻega. Na ou manatu po o le ā se mea o faalētonu.

Na ou manatua upu a le aposetolo o Peteru: “Ia faapea outou fafine, ia usiusitai i a outou lava tane, afai foʻi e lē faalogo nisi i le upu, ia maua i latou i le amio lelei a avā, a e leai se upu, pe a latou vaai ane i a outou amio mamā ma le faaaloalo.” (1 Peteru 3:1, 2) Na ou iloa ai, ou te leʻi mulimuli i na faatonuga i taimi uma. Ina ia faatatauina atoatoa lenā faatonuga sa manaʻomia ona faaleleia loʻu itu faaleagaga.

I le 1970, na amata ona ou paeonia ma le sini ia avea atili o se tagata faaleagaga. Na mavae tausaga e 20, e leʻi vaaia lava se suiga i le tulaga faaleagaga o laʻu tane. Na faapea mai se tasi na suʻesuʻe i le Tusi Paia: “E lē taumate e faigatā le fesoasoani i isi tagata ae e lē o mafai ona e fesoasoani i lau lava tane.” O se tala faalotovaivai, peitaʻi ou te leʻi fiu ai.

I le vaitaimi o le 1985-1989, na faasolo ina afu soifua o o ma mātua. O le tausiga o i latou ma le faataunuu o isi aʻu matafaioi na lagona ai le vaivai ma le mafatia. E tele tausaga na latou tetee mai i loʻu talitonuga, ae na ou taumafai lava e faaali atu pea le alofa. A o lata ina maliu loʻu tinā i le 96 o ona tausaga, na ia faapea mai iā te aʻu: “Sumiko, afai ae toe faatūina aʻe aʻu, o le a ou auai atu i lau tapuaʻiga.” Na ou iloa i inā e leʻi alu lē aogā loʻu tautigā.

Sa mātau e laʻu tane aʻu gaoioiga uma na faia mo o ma mātua. Na faaalia lona loto talisapaia e ala i le auai e lē aunoa i sauniga. Na ia faia faapea mo le tele o tausaga ae leʻi agaʻigaʻi lava i luma faaleagaga. Na faaauau pea ona ou taumafai e faafiafia o ia. Sa ou valaaulia ana uō matou te faiʻaiga faatasi i lo matou fale, e oo lava i tagata na latou faigaluega faatasi e ese atunuu na ō mai ai. Na ma tafafao faatasi. Ina ua faaitiitia itula manaʻomia o paeonia i le 70 i le masina, sa tele atu loʻu taimi e faaalu ma te faifaimea faatasi ai .

 Se Suiga Ina ua Litaea

Na litaea laʻu tane mai galuega i le 1993. Na ou faapea, ua maua le taimi na te suʻesuʻe ai le Tusi Paia. Ae na ia fai mai, o le tapuaʻi i le Atua ona ua faatoʻā maua le taimi e fai ai, o se upuleaga ma le lē migao lenā i le Atua. Fai mai a ia, o le a tapuaʻi i le Atua pe a uunaʻia o ia e lona loto, ae aua neʻi oʻu faamalosia o ia.

I se tasi aso na fesili mai ai Kazuhiko iā te aʻu pe mafai ona faaalu loa tausaga o totoe o loʻu ola mo ia. Sa tigā oʻu faalogona i lenā tala, ona e talu ona ou faaipoipo iā te ia sa ou faia mea uma mo ia. Sa ou taumafai malosi e faafiafia, ae o lea e foliga mai e manatu sa alu tele loʻu taimi mo Ieova na i lo ia. Ina ua uma ona ou mafaufau mo sina taimi, na ou fai i ai, ua leai se isi mea e sili atu ou te mafaia mo ia. Ae afai na te auai i laʻu tapuaʻiga, o le a mafai ona amata faatasi se ma olaga fou e tumau, e lē mo ni nai tausaga, ae e faavavau. Na mavae nai aso e leʻi tali mai lava. Ae mulimuli ane, na ia faapea mai: “E mafai la ona e faia saʻu suʻesuʻega faale-Tusi Paia?” O taimi uma lava ou te mafaufau ai i ana upu e lagona ai le olioli o loʻu loto.

Na vave lava ona ou fuafua mo se toeaina Kerisiano e suʻesuʻe ma laʻu tane, peitaʻi na ia fai mai: “Ou te lē fia suʻesuʻe ma se isi tagata, ou te manaʻo ta te suʻesuʻe.” Ona ma suʻesuʻe loa lea o le Tusi Paia i aso taʻitasi. Talu ai ou te iai i le faapotopotoga e tautatala i le gagana Saina ma e lelei tele le malamalama o laʻu tane i lenā gagana, na ma suʻesuʻe ai i le gagana Saina. E leʻi atoa se tausaga na ma faitauina faatasi ai le Tusi Paia atoa.

A o faagasolo lenā taimi, sa naunau lava se toeaina o le faapotopotoga Saina ma lana avā, iā i maʻua o se ulugalii. E ui e laiti atu i la ma fanau, ae na avea i laʻua o ni uō moni iā i maʻua. E tele foʻi isi Molimau na faaali le naunau faapitoa i laʻu tane. Na latou talimālō iā i maʻua, ma talatalanoa iā Kazuhiko e peiseaʻī o so latou lava tamā. Na fiafia tele ai o ia.

I se tasi aso na maua ai se tusi valaaulia i le ma fale mo se faaipoipoga, e faatuatusi mai i laʻu tane. O le amanaʻia o ia o le ulu o la ma aiga na matuā pāʻia ai o ia, ma sa ia filifili e auai. E leʻi umi ae amata ona ia faauō atu i Molimau ma amata loa ona ia suʻesuʻe le Tusi Paia ma se toeaina Kerisiano. O lana suʻesuʻega faale-Tusi Paia, auai i sauniga, ma le alofa o le faapotopotoga na fesoasoani iā te ia e agaʻigaʻi i luma faaleagaga.

Ua Autasi Nei le Aiga

Iā Tesema 2000, na papatiso ai laʻu tane, e faailoga ai lona tuuina atu iā Ieova. Na faimalaga mamao mai laʻu fanau ma a la avā e maimoaina lenā “vavega” faaonapō nei. E ui ina 42 tausaga le umi na faatalitali ai mo lenei mea e tupu, peitaʻi ua autasi nei lo matou aiga.

O taeao taʻitasi, ma te faitau faatasi le mau ma le Tusi Paia. O aso uma, ma te fiafia i ni talanoaga faaleagaga ma auai i galuega faaleagaga. Ua avea nei laʻu tane ma auauna o le faiva i le faapotopotoga, ma e leʻi leva atu na ia faia ai se lauga lautele faale-Tusi Paia i le gagana Saina. Ou te faafetai iā Ieova mo le faatasia o lo matou aiga. I le pei o isi aʻu uō ma oʻu aiga e pele iā te aʻu, ou te naunau e faasilisilia lona suafa ma lana pule silisili ese e faavavau.

[Faafanua/Ata i le itulau 13]

SAINA

MALO FAATEMOKALASI O KOREA

MALO O KOREA

Sami i Sasaʻe o Saina

Taipei

TAIWAN

Sami o Iapani

IAPANI

Tokyo

[Ata i le itulau 12]

Ma loʻu aiga i le 1958, le tausaga na ou papatiso ai

[Ata i le itulau 13]

Na faamalosia faaleagaga i matou e uō e pei o Harvey ma Kathy Logan ina ua matou siitia mai Tokyo i Taipei

[Ata i le itulau 15]

I aso nei ua autasi loʻu aiga i le tapuaʻiga moni