“O Lē Usiusitai i le Aʻoaʻiga, e Faautauta Lava Ia”

UA TAʻUA i le Faataoto 23:12: “Uaʻi mai lou loto i mea e aʻoaʻoina, ma ou taliga i upu e poto ai.” I lenei mau, o “mea e aʻoaʻoina” po o le aʻoaʻoina o le amio, e aofia ai le aʻoaʻia e se tasi o ia lava, ma aʻoaʻiga tatou te maua mai i isi. O le ituaiga aʻoaʻiga lea e manaʻomia ai le iloa po o le ā le faasaʻoga e manaʻomia, ma le auala e avatu ai. O lea la, e tāua i aʻoaʻiga “upu e poto ai” mai se tasi e maufaatuatuaina.

O le Faataoto o se tusi e sili ona lelei o loo iai upu atamai. O faataoto o loo iai, e “iloa ai le poto ma ia aʻoaʻiina; . . . ia maua ai le aʻoaʻoina i le poto, ma le amiotonu, ma le faamasinoga, ma le amio saʻo.” (Faataoto 1:1-3) O se mea poto le ‘uaʻi o o tatou taliga’ i na faataoto. Ua aumaia i le Faataoto 15 ni taʻiala aogā i le auala e pulea ai le ita, faaaogā ai le laulaufaiva, ma le faaooina atu o le poto. Seʻi o tatou iloiloina nisi o fuaiupu mai lenā mataupu.

O le ā e “Liliueseina ai le Ita”?

I le faamatalaina o le auala e mafai e upu ona aafia ai le ita, na faapea mai le tupu Isaraelu o Solomona: “O le tali filemu e liliueseina ai le ita; a o le upu faatigā e tupu ai le ita.” (Faataoto 15:1) O le upu “ita” e faamatala ai se faalogona malosi po o le tali lē fiafia atu. E faapefea ona fesoasoani lenei faataoto iā i tatou e feagai ai ma se tasi pe a ita, faapea ma le pulea o lo tatou foʻi ita?

O upu ʻinaʻinā ia e māfua ai le tigā, e atili leaga ai se tulaga lē manuia. I le isi itu, o se tali filemu e masani ona iai se aafiaga toʻafilemu. Peitaʻi, e lē faigofie i taimi uma le avatu o se tali filemu i se tagata o loo ita. Ae ui i lea, e faigofie ona avatu se tali filemu, pe a tatou taumafai e malamalama i le pogai o lona ita. Ua taʻua i le Tusi Paia: “O le māfaufau o le tagata e faagesegese ai lona ita; o lona viiga foʻi lea, ina ua lē manatua lona agaleagaina.” (Faataoto 19:11) Pe faamata o le māfuaaga o le ita o se tasi o le lē mautonu, pe ona e manaʻo ia uaʻi atu iā te ia? Atonu e lē ona o se tala na tatou faia po o se gaoioiga foʻi ua māfua ai lona ita. Pe a tatou fetaiaʻi ma se tali ita mai i le talaʻiga, pe e  lē masani ea ona tupu lenei mea ona o le lē malamalama o lē ona le fale i o tatou talitonuga, pe ua taʻitaʻiina sesē foʻi i se faamatalaga? E lē tatau ona e manatu faapea o oe lea e vevesi mai ai le tagata, ma iʻu ai ina e tali ʻinaʻinā atu. E tusa pe leʻi manino mai le pogai o le ita o se tasi, ae o le tali atu i upu e faapogaia ai le tigā, e faaalia ai le lē mafai ona aʻoaʻia o i tatou lava. E ao ona ʻalofia lea ituaiga tali.

E aogā foʻi le fautuaga ia avatu se tali filemu i le pulea o lo tatou ita. E tatou te faatatauina lea fautuaga, i le faaali atu o o tatou faalogona i ni auala e lē faatigā ai lē o faalogo mai. Pe a feutagaʻi ma sui o le aiga, na i lo le tautala ʻinaʻinā pe valaau i latou i ni igoa e māsiasi ai, ia taumafai e faaali atu o tatou faalogona i se auala toʻafilemu. O faaupuga ita e faatupu ai le fia taui ma sui. E lē faigatā ona taʻu atu i se auala filemu o tatou faalogona i se tasi, ma e ono uunaʻia ai o ia e faatoese.

“O Laulaufaiva o Ē Popoto e Faafiafia Tagata”

O le aʻoaʻia o le tagata e ia lava, e aafia ai le auala tatou te tautatala ai, faapea foʻi ma mea o tatou fai atu ai. Na faapea mai Solomona: “O laulaufaiva o ē popoto e faafiafia tagata i le poto; a o gutu o ē valelea e luai mai ai le valea.” (Faataoto 15:2) Pe a tatou ati aʻe se faanaunauga e fesoasoani i isi ma talanoa i ai i le finagalo o le Atua ma ana sauniuniga alofa, pe tatou te lē o ‘faafiafia ea tagata i le poto’? E lē faia e se tagata valea lenei mea ona e leai sona poto.

A o leʻi avatu se isi taʻitaʻiga i le faaaogāina o le laulaufaiva, na faailoa atu e Solomona se eseesega faatupu manatu. “O loo i mea uma lava fofoga o Ieova; o loo matuā silasila i ē amio leaga ma ē amio lelei.” (Faataoto 15:3) E tatou te olioli ona ua faamautinoa mai: “O fofoga o Ieova e fetaufetuliaʻi i le lalolagi uma, na te fesoasoani iā te i latou o ē ua sao o latou loto iā te ia.” (2 Nofoaiga a Tupu 16:9) E silafia e le Atua po o tatou faia mea lelei. E na te silafia foʻi ē o loo faia mea leaga ma o le a ia tauia i latou.

Na faamamafa atili e Solomona le tāua o se laulaufaiva filemu i le faapea mai: “O le laulaufaiva e mālōlō ai, o le laau o le ola lea; a o le laulaufaiva faapiʻopiʻo e momomo ai le loto.” (Faataoto 15:4) O le faaupuga “laau o le ola” e taʻu mai ai le faamālōlōina ma le faamalosia o uiga. (Faaaliga 22:2) O faaupuga mālū a se tagata poto, e faafouina ai ē o faalogo mai. E logoleleia i o latou uiga lelei. I se faaeseesega, o se laulaufaiva faagutugutulua pe faapiʻopiʻo, e nutimomoia ai loto o ē faalogo mai.

Mauaina o Aʻoaʻiga ma le ‘Faasalalauina o le Poto’

Na faaauau le faamatalaga a le tupu poto: “E tetee atu e le vale le aʻoaʻo atu a lona tamā; a o lē usiusitai i le aʻoaʻiga, e faautauta lava ia.” (Faataoto 15:5) E faapefea i se tasi ona “usiusitai i le aʻoaʻiga” pe a lē avatu i ai? O loo faailoa mai i lenei mau, e ao ona avatu aʻoaʻiga e faasaʻo ai pe a manaʻomia. I se aiga, o le tiute a mātua aemaise lava le tamā le saunia o aʻoaʻiga, ma o le tiute a le tamaitiiti le talia o lenā aʻoaʻiga. (Efeso 6:1-3) Peitaʻi, e eseese aʻoaʻiga e maua e auauna uma a Ieova. Ua taʻua i le Eperu 12:6: “O lē ua alofagia e le Alii, ua aʻoaʻi atu o ia iā te ia; ua sasaina foʻi e ia atalii uma ua talia e ia.” O la tatou tali atu i aʻoaʻiga e faaalia ai pe tatou te popoto pe valea.

Na faailoa mai e Solomona se isi eseesega: “E faasalalauina le poto i laugutu o ē popoto; a e lē faapea loto o ē valelea.” (Faataoto 15:7) E tai pei le faaooina atu o le poto o le faasalalauina o ni fatu. I aso anamua, e lē lūlūina e se faifaatoʻaga fatu i se nofoaga se tasi. Na i lo lea, na te faasalalau nisi fatu i se isi taimi i  le fanua atoa. E tai faapena le faaooina atu o le poto. O se faaaʻoaʻoga, afai tatou te feiloaʻi i se tasi i le talaʻiga, e lē o se mea poto le faailoa uma atu o mea ua tatou iloa i le Tusi Paia i se taimi e tasi. Na i lo lea, e pulea lelei le tautala atu a le tagata poto. E na te “faasalalauina” le poto a o auaumālie ona faamatilatila se upu moni o le Tusi Paia, i se taimi se tasi ma talanoa ai, e fua i le tali mai a le tagata. Na faia faapea e lo tatou Faaʻoaʻo o Iesu ina ua talanoa i se fafine Samaria.—Ioane 4:7-26.

O le faailoa atu o le poto, e aofia ai le fai atu o se tala e tāua ma aogā. E aofia ai le mafaufau lelei e tautala atu i ni upu e faalaeiauina ai. O lea la, “e manatunatu le loto o lē amiotonu, ina ia fai se tali.” (Faataoto 15:28) Maʻeu le tāua o le pei o a tatou upu o se timu māʻuluʻulu, e faasūsū ai le eleele ma e aogā, e lē pei o se tafega e lē manaʻomia e tafiesea ai mea uma!

‘Ia Paia le Amio’

O le faasalalauina o le poto e uiga iā Ieova ma lona finagalo, ma le ofoina atu iā te Ia o “le taulaga o le viiga” e mautinoa o se ala poto. (Eperu 13:15) Peitaʻi, ina ia talia e Ieova lea ituaiga taulaga, e ao ona ‘paia a tatou amio uma.’ (1 Peteru 1:14-16) Na faaaogā e Solomona nei faataoto tuufaafeagai e lua, e faamanatu mai ai iā i tatou lenei upu moni tāua. Na ia faapea mai: “O le taulaga a ē amio leaga e inosia lea e Ieova; a o le tatalo a ē amio saʻo o lona lea fiafia. E inosia e Ieova le ala o ē amio leaga; a e alofa o ia i lē ua tausisi atu i le amiotonu.”—Faataoto 15:8, 9.

O le ā le vaaiga a ē ua tuua le ala e tau atu i le ola i aʻoaʻiga, ma o le ā lo latou iʻuga? (Mataio 7:13, 14) “E leaga le aʻoaʻiga i lē ua tuua le ala; o lē ʻinoʻino i le aʻoaʻiga, e oti lava ia.” (Faataoto 15:10) Na i lo le talia o aʻoaʻiga e faasaʻo ai mai ē taiulu i le faapotopotoga Kerisiano ma salamō moni, ua filifili nisi o ē o loo i se ala sesē e tuua le ala o le amiotonu. Pagā le valea!

Ae ā pe a faafoliga se tasi o loo ia talia aʻoaʻiga ae o le mea moni e ʻinoʻino i ai? E lē o se mea poto foʻi lea. Na taʻua e le tupu o Isaraelu: “O seoli ma le malaia, o loo i luma o Ieova ia; e lē sili ea ona faapea o loto o tagata?” (Faataoto 15:11) E leai se isi mea e faatusa i ai le mamao mai le Atua, na i lo seoli le tuugamau o ē maliliu. Ae o loo Ia manatua pea i latou. E na te silafia mea uma ma uiga o ē o i tuugamau, ma o le a Ia faatutūina i latou. (Salamo 139:8; Ioane 5:28, 29) E  faigofie iā Ieova ona silafia mea o i loto o tagata! Na tusi Paulo: “Ua taatia fua ma ua aliali mai o mea uma i lana silafaga, tatou te taʻu atu iā te ia a tatou amio.” (Eperu 4:13) E faasesēina tagata i le faafoliga ae lē o le Atua.

O le tagata e teena aʻoaʻiga, e lē gata e ita i aʻoaʻiga ae e ʻinoʻino foʻi i ē o loo aumaia. Na faapea mai Solomona: “E lē alofa lē tauemu i lē aʻoaʻi atu iā te ia.” Na ia toe aumaia se isi manatu taitutusa e faalautele ai lea manatu: “Na te lē alu atu i ē popoto.” (Faataoto 15:12) E mautinoa e itiiti se faamoemoe e faapea o le a faasaʻo e lea tagata lona ala!

Vaaiga Mautinoa

O le upu “loto” e fesootaʻi ai isi faataoto e tolu o sosoo mai a Solomona. Na faamatala e le tupu poto le aafiaga o o tatou faalogona i o tatou foliga vaaia, i le faapea mai: “O le loto fiafia e tupu ai mata fiafia; a o le loto faanoanoa e momomo ai le agaga.”—Faataoto 15:13.

O le ā e māfua ai ona momomo le loto? Ua taʻua i le Tusi Paia: “O le atuatuvale i le loto o le tagata ua faavaivai [faanoanoa] ai o ia.” (Faataoto 25:25) E mafai faapefea ona tatou teena vala lē lelei o le olaga mai le nutimomoia ai o o tatou loto? Na i lo le manatunatu pea i tulaga ia e ono lē mafai ona tatou puleaina, e mafai ona tatou tomānatu i le tele o faamanuiaga faaleagaga ua aumaia nei e Ieova iā i tatou, ma le mea o le a Ia faia i le lumanaʻi. O le a tatou atili vavalalata atu ai iā te Ia. Ioe, o le faalatalata i le “Atua manuia [fiafia]” o le a olioli ai lou loto faanoanoa.—1 Timoteo 1:11.

E lē gata i lea, o se puna sili o faamāfanafanaga ma le fiafia le feʻau a le Tusi Paia. Na faaleo mai e le faisalamo le fiafia o le tagata e “naunau o ia i le tulafono a Ieova; e mafaufau foʻi o ia i lana tulafono i le ao atoa ma le pō.” (Salamo 1:1, 2) E tusa pe tigā o tatou loto, o le faitau o le Tusi Paia ma mafaufau i mea o taʻua ai, e faamalosia ai i tatou. O loo iai foʻi la tatou faiva na tofia mai le Atua. E tatou te mautinoa “o ē lūlū saito ma loimata, latou te seleseleina ma le alaga fiafia.”—Salamo 126:5.

Na taʻua e Solomona: “O le loto o lē ua mafaufau, ua saʻili lea i le poto; a o gutu o ē valelea ua aai i le valea.” (Faataoto 15:14) Ua faamanatu mai e lenei faataoto iā i tatou se eseesega tele i le fautuaina o se tagata poto ma sē e valea. A o leʻi avatu le fautuaga, e saʻili le tagata e malamalama lona loto i le poto. E na te faalogo lelei ma puʻepuʻe maua mea e manaʻomia. E na te saʻili i le Tusi Paia e faamautinoa ai tulafono ma taʻiala e uiga i le mataupu. E faavae ana fautuaga i le Afioga a le Atua. Peitaʻi, e lē saʻilia e le tagata valea mea moni e uiga i le mataupu ma e talaoso foʻi. O lea la, pe a tatou saʻili ni fautuaga, o se mea poto le fesili i ē popoto ma taʻumatuaina, na i lo ē e ono taʻu maia le mea o loo tatou fia faalogo i ai. Maʻeu le lelei o le iai o “mea alofa i tagata” i le faapotopotoga Kerisiano, o ē ‘saʻili i le poto’ a o leʻi avatu ni fautuaga!—Efeso 4:8.

Ua faaalia i le faataoto o sosoo mai se aogā sili o le iai o se vaaiga mautinoa. Na taʻua e le tupu Isaraelu: “O aso uma o lē ua tigāina, ua leaga ia; a o le loto fiafia, o le tausamiga e lē aunoa lea.” (Faataoto 15:15) E iai aso o le olaga e fiafia, faanoanoa, olioli, ma maligi ai loimata. Afai tatou te mafaufau i faamanuiaga ua tatou maua ma le faamoemoe ua foaʻiina mai e le Atua, o le a mou atu vala o le olaga ia e faavaivaia ai, ma o le a tatou tofo ai i le olioli. O se vaaiga mautinoa, o le a tatou olioli ai i se “tausamiga e lē aunoa.”

O lea la, ia tatou matuā faatāuaina aʻoaʻiga. Tau ina ia faaaafia ai e lē gata o o tatou faalogona, upu e tautala ai, ma gaoioiga, ae o la tatou vaaiga foʻi.

[Ata i le itulau 13]

“O le tali filemu e liliueseina ai le ita”

[Ata i le itulau 15]

O le tiute o mātua le saunia o aʻoaʻiga

[Ata i le itulau 15]

“E faasalalauina le poto i laugutu o ē popoto”