Sui Fou o le Vaega Pule

I LE taeao o le Aso Lulu iā Aokuso 24, 2005, na faafofoga uma ai aiga Peteli o le Iunaite Setete ma Kanata e ala mai i le vitiō, i se faasilasilaga faafiafia loto. E amata atu iā Setema 1, 2005, o le a iai isi sui fou e toʻalua i le Vaega Pule o Molimau a Ieova, o Geoffrey W. Jackson, ma Anthony Morris III.

Na amata galue le uso o Jackson o se paeonia iā Fepuari 1971 i Tasmania, o se motu o Ausetalia. Iā Iuni 1974, na ia faaipoipo atu iā Jeanette, po o Jenny e pei ona iloa ai. E leʻi leva mulimuli ane, ae tofia loa i laʻua e galulue o ni paeonia faapito. Mai le 1979 i le 2003, sa la galulue ai o ni misionare i Tuvalu, Samoa, ma Fiti, o ni motu o le Pasefika i Saute. A o iai i nei motu, sa tele se fesoasoani na la faia i le faaliliuina o lomiga faale-Tusi Paia. Sa amata galue le uso o Jackson i le Komiti o le Lālā i Samoa i le 1992, ma i le Komiti o le Lālā i Fiti i le 1996. Sa avea i laʻua o ni sui o le aiga Peteli i le Iunaite Setete iā Aperila 2003, ma galulue ai i le Matagaluega o Galuega Faaliliu. E leʻi leva mulimuli ane, ae avea loa le uso o Jackson ma fesoasoani i le Komiti Tauaʻoaʻoga a le Vaega Pule.

Na amata galue le uso o Morris i le galuega faapaeonia i le 1971 i le Iunaite Setete. Na faaipoipo atu iā Susana iā Tesema i le tausaga lava lenā, ma faaauau ai pea le auaunaga paeonia mo le toeitiiti lava fā tausaga, seʻia oo ina maua la laʻua tama muamua o Iese. E leʻi leva, ae toe maua foʻi le isi a la tama e igoa iā Paulo. Na toe galue le uso o Morris o se paeonia sauatoa i le 1979. Sa aufaatasi atu ai lana avā ina ua aʻoʻoga tamaiti. Sa galulue lenei aiga i le mea na tele ai le manaʻoga i Rhode Island, ma le setete o North Carolina i le Iunaite Setete. I North Carolina, sa auauna ai le uso o Morris o se ovasia suitulaga o le matagaluega, ae amata ai ona atalii i le auaunaga paeonia. Sa valaaulia Iese ma Paulo e galulue i le lālā i le Iunaite Setete ina ua atoa o la taʻi 19 tausaga. I le taimi lenā, sa amata ai loa le uso o Morris i le galuega femalagaaʻi. Ae i le 2002, sa valaaulia ai i laʻua ma Susana i Peteli, lea na amata ai lo la tofiga fou iā Aokuso 1. Sa galue le uso o Morris i le Matagaluega o Auaunaga i Patterson, ma mulimuli ane avea o se fesoasoani i le Komiti o le Auaunaga a le Vaega Pule.

O sui la nei o le Vaega Pule, faatasi ai ma sui fou e toʻalua. O i latou nei o C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; ma D. Sydlik. O i latou uma o ni Kerisiano faauuina.