“Ia Faamatala Pea!”

I NEZLOBNAYA, i Rusia, na suʻesuʻe ai e se vasega i se aʻoga maualuga tusitusiga a le tusitala Rusia o Mikhail Bulgakov. O se tasi o ana tusitusiga o se tala o loo faitioina ai Iesu Keriso, ae ua taʻua ai Satani e pei o se toa taʻutaʻua. Ina ua uma le talanoaga a le vasega, na faatulaga e le faiaʻoga se suʻega e faavae i lenei tusi. Peitaʻi, na taʻu atu ma le faaaloalo e se tasi o tamaitiiti aʻoga, o se Molimau a Ieova e 16 tausaga e igoa iā Andrey, e lē mafai ona ia faia le suʻega, ona o le a afāina ai lona lotofuatiaifo. Na ia fai atu e mafai ona ia tusia se tala e faamatala ai lona manatu e uiga iā Iesu Keriso. Na malie i ai le faiaʻoga.

Na ia faamatala i lana tala, e ui e na te amanaʻia manatu o isi, ae ua ia iloa o le auala sili e aʻoaʻo ai e uiga iā Iesu, o le faitau lea o se tasi o Evagelia e fā. O le faia faapea, “o le a e iloa ai le soifuaga ma aʻoaʻoga a Iesu e faavae i tala a ē na vaaitino i ai.” Na toe faaopoopo atu Andrey: “O se isi mea ou te lē fiafia ai o le auala o loo faamatala ai Satani. Atonu e mālie i isi le faitau i se tusi o loo faamatala ai le toa taʻutaʻua o Satani, peitaʻi ou te lē fiafia i ai.” Na ia faamatalaina, o Satani o se agaga leaga malosi o lē na liliu ese mai le Atua, ma o ia ua māfua ai le amioleaga, puapuaga ma mafatiaga o tagata. Na faaiʻu e Andrey lana tala e faapea: “Ou te manatu o le faitauina o lenei tala e lē aogā iā te aʻu. Ae i le taimi e tasi ou te lē tetee iā Bulgakov. Ae peitaʻi, iā te aʻu lava ia, e sili ai loʻu faitau i le Tusi Paia e iloa ai talafaasolopito moni e uiga iā Iesu Keriso.”

Na fiafia le faiaʻoga a Andrey i le tala ma o lea na ia valaaulia ai loa Andrey e faamatala se lipoti iā Iesu Keriso i le vasega. Na malie i ai Andrey. I le isi aso, na faitau ai e Andrey lana lipoti i le vasega. Na ia faamatala le māfuaaga na ia manatu ai o Iesu o le tagata silisili o ē uma na soifua mai. Ona ia faitau lea o se mataupu e uiga i le maliu o Iesu mai le tusi o Mataio. Talu ai ua uma le taimi faatulagaina o lana lipoti, na manaʻo ai Andrey e faauma peitaʻi, na faapea atu tamaiti iā te ia: “Ia faamatala pea! O le ā le isi mea na tupu?” O lea, na ia faaauau ai le faitauina o le tala i le Mataio e uiga i le toe faatūina o Iesu.

Ina ua uma le lipoti a Andrey, na tele ni fesili a tamaiti o lana vasega e uiga iā Iesu ma Ieova. Ua faapea mai Andrey: “Na ou tatalo iā Ieova mo le poto ma na ia tali mai. Na ou taliina uma a latou fesili!” Ina ua tuua le vasega, na avatu e Andrey i le faiaʻoga se tusi o Le Tagata Silisili o Ē Uma na Soifua Mai, * lea sa ia naunau e faitau. Na faapea mai Andrey: “Na ia tuuina mai iā te aʻu ni togi maualuluga mo laʻu lipoti, viviia aʻu i oʻu talitonuga, ma loʻu lē mā e faailoa atu oʻu talitonuga. Na ia fai mai e ioe i nisi o oʻu talitonuga.”

Ua fiafia Andrey ona o le mulimuli i lona lotofuatiaifo ua aʻoaʻoina i le Tusi Paia, e ala i lona lē faitau i tusi e lē viia ai Ieova ma lona Alo o Iesu Keriso. O lenā tulaga, e lē gata na puipuia ai o ia mai manatu e lē faale-Tusi Paia, ae na maua ai foʻi le avanoa matagofie e talaʻi atu ai upu moni o le Tusi Paia i isi.

[Faamatalaga pito i lalo]