Se Faamaoniga o le Alofa, Faatuatua ma le Usiusitai

O LE taeao o Me 16, 2005, o se aso manaia ma le mālū i le Watchtower Farm i Wallkill, i Niu Ioka. Na matuā lelei ona teu le mutia ma togālaau ma ua iila mai lau i le timu faatoʻā uma atu. O loo feʻausi se pato ma lana toloaʻi e valu ma le filemu i le augutu o le vailepa. Na matuā maofa le ʻaumaimoa i le matagofie. Na latou taumusumusu, e lē mananaʻo e faalavelave i le toʻafilemu o le taeao.

O le ʻaumaimoa, o Molimau a Ieova mai i atunuu e 48. Ae e leʻi ō mai e maimoa i le laufanua. Na latou fia iloa mea o loo faia i totonu o se fale telē e fai i piliki mūmū, o se fale fou lea na faia i le Peteli i Wallkill i Amerika. Na latou maofa foʻi i totonu o lenā fale, e ui e lē o toʻafilemu ona o le malomaloā o masini.

Na tilotilo ifo le ʻaumaimoa mai le faapaologa i masini lomitusi e lima e matuā tetelē lava, e fola i simā lamolemole e sili atu lona telē i malae taaalo e iva ia e fai ai taaloga lakapi. O i inei o loo lomia ai Tusi Paia, tusi ma mekasini. E vave tele le alu o taʻaiga pepa lapopoʻa i totonu o masini ma o le mamafa e 3,800 pauna [1,700 kilokalama]. O nei taʻaiga pepa e tusa ma le 14 maila [23 kilomita] le umi, e 25 minute le umi e alu ai i totonu o le masini. A o faagasolo lenā faiga, e tuu i ai le vaitusi ma faamago ma faamālū ai i inā ina ia mafai ona tāʻai i mekasini ma auina atu e ala i ni mea faapitoa ma tuu i pusa ina ia auina atu i faapotopotoga. O loo lomia i isi masini vaega eseese o tusi, a uma ona ave lea e teu i se vaega faapitoa seʻia oo i le taimi e avatu ai i le potu e fai ai le faavaa. E faatonutonuina nei mea uma i le komepiuta.

 Ina ua tuua le potu lomitusi, na ō atu le ʻaumaimoa i le potu e fai ai faavaa. O i inei o loo faia ai e masini faavaa malō o tusi ma Tusi Paia e fai i paʻu o manu e pe a ma le 50,000 kopi i aso taʻitasi. E tuufaatasi vaega o tusi ona saisai lea ma tipi pito ma faapipii atu loa iai ma faavaa. O faaputuga o tusi ua uma e tuu i totonu o pusa. E otometi ona faamau pusa ma tuu i ai le tuatusi ma teu i se tulaga e mafai ona feaveaʻi. E lē gata i lea, o se isi masini e masani ona tuufaatasia tusi e vaivai faavaa ma teu i pusa e tusa ma le 100,000 i aso taʻitasi. E ese le lavelave o nei faiga, ua iai afi eseese, mea faataamilomilo, kia, uili ma isi mau mea e vave le gaoioi ina ia lomia ai lomiga faale-Tusi Paia.

O loo gaoioi lelei nei masini uma e pei o se uati ua lelei ona faia, ma o nei masini uma o ni mea ofoofogia. O le a tatou iloa ai foʻi o se faamaoniga lea o le alofa, faatuatua ma le usiusitai o tagata o le Atua. Aiseā na sii mai ai le lomiaina o tusi mai Brooklyn Niu Ioka, i Wallkill?

O se māfuaaga autū lava, ina ia faafaigofie ai le faia o galuega ma le auina atu, auā o le a faia i le nofoaga e tasi. Mo le tele o tausaga, na lomia ma auina atu tusi mai Brooklyn, o mekasini sa lomia ma auina atu mai i Wallkill. O le faia o ia galuega i le nofoaga e tasi e lē manaʻomia ai le toʻatele o tagata, ma e mafai ona faaaogā foaʻi tauofo i se auala sili ona lelei. E lē gata i lea, talu ai o masini i Brooklyn ua amata ona tuai, na otaina mai Siamani ni masini lomitusi fou se lua o le ituaiga o le MAN Roland Lithoman. E fai si tetelē tele o nei masini ma e lē ofi i le fale lomitusi i Brooklyn.

O Loo Lagolago e Ieova le Galuega

O le fuafuaga o le lomiaina o tusi, o le talaʻia o le tala lelei o le Malo o le Atua. Ua manino ua faamanuia e Ieova lenei galuega mai lona amataga. Mai le 1879-1922 na lomia ai a tatou tusi e isi kamupani lomitusi. I le 1922, na totogi ai se fale fogāfale ono i le 18 Concord Street i Brooklyn ma faatau masini e lomia ai tusi. I lenā taimi, na masalosalo ai nisi pe e mafai e uso ona taulimaina le galuega.

O se tasi o i latou o le peresitene o le kamupani lea na lomia ai le tele o a tatou tusi. Ina ua ia asiasi atu i Concord Street, na ia faapea atu: “Ua outou maua se fale lomitusi e sili ona lelei, ae e leai se tasi e na te iloaina pe faapefea ona faagaoioia. O le a lē toe aogā nei masini pe a uma le ono masina, ma o le a outou iloa ai e lelei pe a toe tuu atu i tagata e masani i lenei galuega auā o la latou galuega lenā.”

Na mātauina e le ovasia o le fale lomitusi i lenā taimi, o Robert J. Martin: “E foliga mai e saʻo lea manatu peitaʻi o loo galo iā te ia le Alii; e faatasi o ia ma i tatou. . . . E leʻi leva lava, ae matou lomia loa tusi.” A o faagasolo le isi 80 tausaga, na lomia ai e Molimau a Ieova le faitau piliona o lomiga i a latou lava masini.

Na faasilasilaina iā Oketopa 5, 2002, a o faia le fono faaletausaga a le Watchtower Bible and Tract Society of Pennsylvania, ua ioe le vaega pule e siitia atu le lomiaina o lomiga ua faia i le lālā o Amerika i Wallkill. Ua uma ona ota ni masini lomitusi fou se lua, ia o le a taunuu iā Fepuari 2004. O lea la, sa tatau i uso ona saunia ni ata o le fale ma faalautele le fale lomitusi i totonu o le 15 masina, ina ia lava saunia mea uma mo le taunuu mai o nei masini fou. E lē gata i lea, e ao ona māeʻa le faatūina o le potu e fai ai faavaa o tusi ma le sauniuniga o le auina atu o tusi, i le iva masina mulimuli ane ai. E lē taumatea na masalosalo  nisi ina ua latou faalogo i le faasologa, e foliga mai e lē mafai ona fai lenei galuega telē. Peitaʻi, na iloa e uso o le faamanuia a Ieova o le a mafai ai ona faia.

“E Matagofie le Agaga o le Galulue Soosootauau”

I le iloaina e fai taulaga ma le loto iai tagata o Ieova, na amata ai loa e uso le galuega. (Salamo 110:3) Ona o le telē o le galuega sa manaʻomia ai se ‘aufaigaluega e sili atu na i lo i latou mai matagaluega o faugāfale i Peteli. E silia i le 1,000 uso ma tuafāfine mai Amerika ma Kanata e iai tomai tau faugāfale na tauofo e galulue, mai le tasi vaiaso i le tolu masina e tusa ai ma se polokalame tauofo lē tumau. Na valaaulia nisi mai le ʻaufaigaluega tauofo i le lalolagi aoao ma polokalame tauofo ina ia fesoasoani i le galuega. Na fesoasoani foʻi Komiti o Faugāfale.

E tele tupe na faaalu e le toʻatele na tauofo mo le galuega i Wallkill e malaga atu ai, ma na lē toe faigaluega i a latou galuega masani. Peitaʻi, sa latou olioli e faia na mea uma. Na maua le avanoa o le aiga Peteli e lagolagoina ai le galuega e ala i le saunia o mea e nonofo ai, ma taumafa mo lenei faaopoopoga tele o le ʻaufaigaluega tauofo. E sili atu i le 535 sui o le aiga Peteli mai Brooklyn, Patterson ma Wallkill na tauofo mai e galulue i le galuega i Aso Toonaʻi, e faaopoopo atu i o latou tofiga masani i aso o le vaiaso. Sa mafai ona lagolagoina e tagata o le Atua lenei galuega mataʻina ona o le fesoasoani a Ieova.

Na auina mai e nisi fesoasoani tautupe. O se faaaʻoaʻoga, na maua e uso se tusi mai iā Abby e iva tausaga. Sa ia tusi mai: “Ou te matuā talisapaia le galuega o loo outou faia, o le faia lea o tusi mananaia. Atonu ua toeitiiti ona ou asiasi atu lea. Na fai mai loʻu tamā o le tausaga fou matou te ō atu ai! O le a fai atu laʻu pine fatafata ina ia outou iloa ai aʻu. O le $20 lea mo le faia o masini fou! O le tupe o laʻu alauni ae ou te manaʻo e avatu iā te outou.”

Na tusi mai se isi tuafafine: “Faamolemole ia talia laʻu meaalofa o pulou kolosē na ou faia. Ou te manaʻo e avatu nei pulou i le ʻaufaigaluega o loo galulue i le galuega i Wallkill. Na fai mai le tagata vaai tau o le a matuā mālūlū lava le tau. Ou te leiloa pe saʻo pe leai. Peitaʻi, ou te iloa o le tele o galuega i Wallkill o le a faia i fafo, ma ou te manaʻo e faamautinoa ua māfanafana ao o oʻu uso ma tuafāfine. E leai ni oʻu tomai e pei ona mananaʻo i ai le ʻauuso, ae e mafai ona ou faia kolosē, o lea na ou mafaufau ai e faaaogā lenei tomai e fai ai le mea ou te mafaia.” Sa auina faatasi lenei tusi ma pulou kolosē e 106!

Na māeʻa le fausiaina o le fale lomitusi e tusa ai ma le faasologa. Na faapea mai le ovasia o le fale lomitusi o John Larson: “E matagofie le agaga o le galulue soosootauau. E lē masalomia le faamanuia a Ieova i le galuega. Na matuā vave le gasologa o le galuega. Ua ou  manatua, iā Me 2003, na ou tū i le vaivai palapalā ma matamata atu i uso o fai le faavae o le fale. Pe itiiti ifo ma se tausaga mulimuli ane ai, na ou toe tū ai i le mea lava lenā ma mātauina se fale lomitusi ua faaaogā.”

Polokalame o le Faapaiaga

Sa faia le polokalame o le faapaiaga o le fale lomitusi fou, ma isi fale e tolu e nonofo ai i Wallkill i le Aso Gafua o Me 16, 2005. Na mafai ona matamata uso i fale Peteli i Patterson, Brooklyn ma Kanata, i le polokalame e ala i le televise. E toʻa 6,049 i latou na olioli i le polokalame. Na avea Theodore Jaracz, o se sui o le Vaega Pule o Molimau a Ieova, ma taʻitaʻi fono ma na ia faia se otootoga puupuu o le talaaga o le galuega lomitusi. E ala i faatalatalanoaga ma faataʻitaʻiga i vitiō, na autalu ai e ni sui o le Komiti o le Lālā o John Larson ma John Kikot, se talaaga o le galuega faugāfale ma le lomiaina o tusi i Amerika. Sa faia e John Barr, o se tasi o le Vaega Pule le lauga mulimuli, e tuuina atu ai le fale lomitusi fou ma isi fale e tolu iā Ieova le Atua.

I le vaiaso mulimuli ane ai, na maua ai le avanoa e tagata Peteli mai Patterson ma Brooklyn e ō mai e maimoa i fale fou. E toʻa 5,920 na asiasi mai i lenā taimi.

O le ā so Tatou Manatu i le Fale Lomitusi?

I le lauga o le faapaiaga, na faamanatu atu ai e le Uso o Barr i le aofia, e ui e ofoofogia ia masini fou ae e lē o le mea tāua lenā. E tāua tagata. O lomiga o loo tatou lomia e iai se aafiaga tāua i olaga o tagata.

E mafai e masini fou taʻitasi ona lomia e tasi le miliona o sāvali i le itula e tasi! Peitaʻi e telē se āuga lelei e mafai ona oo i se tagata ona o se sāvali e tasi. O se faaaʻoaʻoga, i le 1921 i Aferika i Saute, sa galulue ai ni tagata faigaluega e vaavaaia le auala  e feoaʻi ai nofoaafi. Na mātauina e se tasi o i latou e igoa iā Christiaan, se fasi pepa o mau i lalo o le uʻamea. O se tasi o a tatou sāvali. Sa faitauina ma le naunau e Christiaan. Na ia momoʻe atu e faafeiloaʻi le toʻalua o lona afafine ma faailoa atu ma le fiafia: “Ua ou maua le upu moni!” E leʻi umi lava, ae la tusi atu mo nisi faamatalaga atili. Na auina atu e le lālā i Aferika i Saute isi lomiga faale-Tusi Paia. Na suʻesuʻe nei tamāloloa e toʻalua, papatisoina i laʻua ma talaʻi atu le upu moni o le Tusi Paia i isi. O le iʻuga, e toʻatele nisi na taliaina le upu moni. O le mea moni, pe a ma le 1992, ua sili atu i le selau o la tauaiga o ni Molimau a Ieova, o iʻuga uma na ona o le mauaina e se tamāloa o se sāvali i le auala o nofoaafi!

Na faapea mai le Uso o Barr, o lomiga ia tatou te lomiaina, ua aumaia ai tagata i le upu moni, ua faatumauina ai i latou i le upu moni, uunaʻia ai ia atili ona maelega ma ua autasia ai le ʻauuso. Ae o le laualuga o na mea uma, o lomiga o loo tatou tufatufaina atu, ua faamamaluina ai lo tatou Atua o Ieova!

O le ā le Silasila a Ieova i le Fale Lomitusi?

Na faapea atu foʻi le Uso o Barr i le aofia ina ia manatunatu i le silafaga a Ieova i le fale lomitusi. E lē faapea e faalagolago Ieova i lenei fale lomitusi. Na te mafai ona faapogaia maa ina ia talaʻi atu le tala lelei! (Luka 19:40) E lē gata i lea, e lē maofa o ia i le lavelave, telē, saosaoa po o mea e mafai ona faia e nei masini. Auā foʻi, na ia faia mea uma lava! (Salamo 147:10, 11) E silafia e Ieova auala e sili atu ina ia gaosia ai lomiga, o auala e lē mafai ona faia pe manatunatu i ai tagata. O lea la, o le ā le silafaga a Ieova i le mea e na te faatāuaina moni? E mautinoa, o loo ia silasila i uiga tautele o ona tagata i lenei fale lomitusi—o lo latou alofa, faatuatua ma le usiusitai.

Na faataʻitaʻia mai le vala o le alofa. Na tao e se teineitiiti se keke mo ona mātua ma na matuā faafiafiaina ai laʻua. E ui lava na faalēlelei le keke, ae na pāʻia ona mātua i le alofa o la laʻua tama, e pei ona faaalia i lana gaoioiga alofa. I se tulaga tutusa, ina ua silasila Ieova i lenei fale lomitusi fou, e lē silasila o ia i le tāua o le fale ma le masini. E silasila o ia o se faailoaga lea o le alofa mo ia.—Eperu 6:10.

E lē gata i lea, e pei ona silasila Ieova i le vaa o se faailoaga o le faatuatua o Noa, ua ia silasila foʻi i lenei fale lomitusi o se faamaoniga moni o lo tatou faatuatua. O le faatuatua i le ā? Na faatuatua Noa i le mea na valoia atu e Ieova o le a oo moni mai lava. Tatou te faatuatua ma talitonu ua tatou ola i aso e gata ai, ma o le tala lelei o le feʻau sili lea ona tāua ua talaʻia i le lalolagi, ma e tatau i tagata ona faalogo i ai. Ua tatou iloa, o le feʻau o le Tusi Paia e mafai ona faasaoina ai ola.—Roma 10:13, 14.

E lē taumatea, ua silasila Ieova i lenei fale lomitusi o se faailoaga o lo tatou usiusitai. Ua tatou iloa, o lona finagalo, ia talaʻia le tala lelei i le lalolagi a o leʻi oo mai le iʻuga. (Mataio 24:14) O lenei fale lomitusi, faatasi ai ma isi o loo i isi vaipanoa o le lalolagi, o le a fesoasoani i le faataunuuina o lenā faatonuga.

Ua faaalia le agaga o le alofa, faatuatua ma le usiusitai e ala i le faatupeina ma le fausia o nei fale ma galuega o loo faia i inā. Ua faaalia foʻi lenei agaga i gaoioiga maelega a tagata o Ieova i so o se mea a o latou faalauiloa atu pea le upu moni iā i latou uma o le a faalogo mai.

[Pusa/Ata i le itulau 11]

Faatelega o le Lomiaina o Tusi i Amerika

1920: Na lomia ai mekasini i se masini lomitusi fou i 35 Myrtle Avenue, Brooklyn.

1922: Na sii atu i se fale fogāfale ono i 18 Concord Street ina ia fai ai lenei galuega. Na amata ona lomia ai tusi.

1927: Na sii atu lenei galuega i se fale fou lea na faia i 117 Adams Street.

1949: E faalua ona tele le avanoa e lomia ai tusi ona sa toe sosoo i se fale fogāfale iva.

1956: Na toe faalua le telē o le fale lomitusi i Adams Street ina ua faia se fale fou i 77 Sands Street.

1967: Na fausia se fale fogāfale sefulu, ma faateleina le avanoa e fai ai lomiga e faasefulu le telē na i lo le fale muamua.

1973: Na faia se fale lomitusi i Wallkill e faapitoa lava mo le faia o mekasini.

2004: Na amata ona faia i Wallkill galuega uma tau le lomiaina o tusi, faia o faavaa ma le laʻuina atu o tusi i Amerika.