“Ua Faateleina Foʻi lo Outou Fealofani”

I LE 2004, na pagatia ai Iapani i mala e pei o afā, lologa ma mafuiʻe. Na puapuagatia ai le toʻatele o tagata e aofia ai ma Molimau a Ieova. (Failauga 9:11) Ae na iloa le fealofani o Molimau a Ieova i taimi o nei mala mataʻutia.—1 Peteru 1:22.

O se faaaʻoaʻoga, na pā se vaitafe i le ogatotonu o Iapani i timuga iā Iulai. Na faaleagaina le silia i le 20 fale o Molimau a Ieova i lologa. E silia i le tolu futu [1 mita] le loloto o le vai sa i totonu o se Maota o le Malo. Na ō ane faatopetope Molimau a Ieova mai isi faapotopotoga ina ia fesoasoani. E faitau afe tagata na faamamāina fale ua tumu i palapala. Na faamamāina atoa le Maota o le Malo ma toe faaleleia a o leʻi atoa le lua vaiaso.

Na lūlū se mafuiʻe e 6.8 le malosi, i le vaipanoa lava lenā iā Oketopa 23. Pe tusa e toʻa 40 na maliliu ai, ma e silia i le 100,000 tagata na aveesea mai o latou fale. Na motusia le vai, kesi ma le eletise. E leʻi faaleagaina le Maota o le Malo lea na toe faaleleia, e ui e na o le 30 maila [50 km] le mamao o le mata o le mafuiʻe. O lea Maota o le Malo na faamaopoopo i ai le fesoasoani laveaʻi. Na vave ona siaki e toeaina Kerisiano po o saogalemu o latou uso. Na faamāfanafanaina toeaina ona na saogalemu uma le ʻauuso. Ina ua malama le taeao, na tauofo ai Molimau a Ieova se toʻaono o ē na aafia i lologa iā Iulai, e latou te momolia meaʻai ma vaitaumafa i ē na aafia i lenei mala. O lea la na auina atu mea e fesoasoani i tagata a o leʻi leva ona uma le mafuiʻe.

Na faapea mai se toeaina: “Na manatu ē na aafia i lologa, o le fesoasoani atu i ē na pagatia i le mafuiʻe, e faaalia ai lo latou agaga faafetai mo le fesoasoani lea na latou mauaina ina ua uma lologa. Na galulue mamafa i latou i le taeao pō seʻi tau i le leva o le pō. Ioe, na laufofoga fiafia i latou!”

E faaauau ona fealofani Molimau a Ieova tusa lava pe puapuagatia i lologa ma mafuiʻe. A tulaʻi mai mala faapena, o le mea lenei e oo iā i latou e pei ona fai atu ai Paulo i Kerisiano i Tesalonia: “Ua faateleina foʻi lo outou fealofani o outou uma lava taʻitoʻatasi.”—2 Tesalonia 1:3.