Ia Iloa Ona Faalogologo ma le Alofa

“FAAFETAI i le faalogologo mai iā te aʻu.” Po ua fai atu se tala faapena a se tagata iā te oe? Ioe, o se tala e fiafia ai! E talisapaia e tagata se tasi e faalogologo lelei. Pe a tatou faalogologo lelei, e faafouina ai agaga o ē mapuitigā po o ē tele o latou faafitauli. E pele tagata iā i tatou pe a tatou faalogologo lelei iā i latou. E tāua le faalogologo ma le alofa i sauniga faa-Kerisiano, ina ia ‘manatunatu le tasi i le tasi ma taufaatupu ai le alofa ma galuega lelei.’—Eperu 10:24.

Ae e lē faalogologo lelei le toʻatele o tagata. Latou te fiafia e fai atu ni fautuaga pe faamatala ni mea na tutupu iā i latou, pe taʻu atu foʻi so latou manatu ae e lē fia faalogologo atu i isi. E lē faafuaseʻi ona tatou iloa faalogologo lelei. E faapefea la ona tatou iloa faalogologo ma le alofa?

Se Vala Tāua

O Ieova o lo tatou “aʻoaʻo” sili. (Isaia 30:20) E tele mea tatou te iloa mai iā Ieova e uiga i le faalogologo lelei. Ia mafaufau i le taimi na fesoasoani ai Ieova i le perofeta o Elia. Ina ua lamalama lona ola e le masiofo o Iesepela, na sola ai Elia i le vao ma faatoga atu ia oti o ia. Ona fetalai atu lea o le agelu a le Atua iā te ia. A o faamatala atu e le perofeta lona atugaluga, na faafofoga i ai Ieova ma faaali i ai lona mana. Ona ā lea? Na lē toe palaai Elia, ma toe foʻi e fai lana galuega. (1 Tupu 19:2-15) Aiseā e faafofoga ai Ieova i atugaluga a ana auauna? Auā e manatu mai o ia iā te i latou. (1 Peteru 5:7) O se vala tāua la i le faalogologo lelei, o le manatu mamafa i tagata.

Ina ua agasala se tamāloa i Polivia, na lotofaafetai o ia auā na manatu mamafa ane se Kerisiano iā te ia. Na taʻua e le tamāloa: “Ou te lē iloa faamatala le nutimomoia o loʻu loto. Semanū ou te lē toe auauna iā Ieova, pe ana lē seanoa si uso lea na faalogologo mai iā te aʻu. E tau leai sana tala na fai mai, ae na faalaeiauina aʻu ona o lona manatu mamafa mai ma faalogologo mai. Na ou iloa le mea na tatau ona fai. Ae pau le mea na ou fia iloa, o loo manatu mamafa mai se tagata iā te aʻu. Na semanū ou te matuā atuatuvale pe ana lē faalogologo mai le uso iā te aʻu.”

O Iesu Keriso, o se faaaʻoaʻoga lelei o sē e iloa faalogologo ma le alofa. A o leʻi leva le maliu o Iesu, na malaga atu ai ona soo e toʻalua mai Ierusalema, e agaʻi atu i se tamaʻi aai pe tusa e fitu maila (11 kilomita) le mamao. E lē taumatea na lotovaivai i laʻua. Na faatasi atu Iesu Keriso iā te i laʻua ma latou savavali faatasi. Na fili ma le poto e Iesu ana fesili e fai i le ʻausoo, ina ia faamatala atu o la popolega. Na la taʻua le mea na  la faamoemoe i ai, aemaise lo la lē fiafia ma le faaluafesasi. Na manatu mamafa Iesu iā te i laʻua. Na la uaʻi atu iā Iesu ona na faalogologo ma le alofa Iesu i o la manatu. “Ona faamatala ai lea e ia iā te i laʻua o mea ua tusia iā te ia i Tusi uma.”—Luka 24:13-27.

Afai tatou te faalogologo atu i isi, e latou te faalogologo mai foʻi iā i tatou. Ua faapea mai se tinā i Polivia: “Na lē fiafia oʻu mātua ma mātua o laʻu tane i le auala o loo oʻu aʻoaʻoina ai laʻu fanau. Ou te leʻi fia faalogo iā i latou. Ae ou te leʻi mautinoa po o aʻu o se tinā lelei. O le taimi lenā na asiasi mai ai se Molimau a Ieova. Na talanoa mai o ia i folafolaga a le Atua. Peitaʻi, na ou iloa lona fia faalogo mai iā te aʻu, ona o ana fesili. Na ou fai i ai e susū mai i totonu o le fale, ma na ou faamatala i ai loʻu faafitauli. Na ia faalogologo ma le lē gasē. Na fesili mai po o ā ni oʻu faanaunauga mo laʻu fanau, ma po o le ā foʻi se taofi o laʻu tane. O le mea na ou faafetai ai, ona na fia malamalama moni le Molimau a Ieova i loʻu faafitauli. Ina ua ia faitau mai le tala a le Tusi Paia i aiga, na ou iloa ai o loo manatu mamafa mai o ia iā te aʻu.”

Ua faapea mai le Tusi Paia: “E lē saʻilia e [le alofa] ana lava mea.” (1 Korinito 13:4, 5) Ina ia faalogologo la ma le alofa, e tatau ona tuu ese mea tatou te fiafia i ai. Atonu e manaʻomia ona tapē le T.V., pe tuu tasi le faitauina o le nusipepa, pe tapē foʻi le telefoni feaveaʻi a o talanoa mai se tagata i se mataupu tāua. O le faalogologo ma le alofa, o le matuā naunau atu lea i manatu o le isi tagata. Aua neʻi o tatou talanoa e faatatau iā i tatou lava i le faapea atu, “Ou te manatua le mea na tupu iā te aʻu.” E ui e fetaui tala faapena a o talatalanoa faasamasamanoa, ae e tatau ona tuu mea tatou te naunau i ai, a o talanoa mai se tagata i se mataupu matuiā. E iai foʻi se isi auala e iloa ai lo tatou naunau atu i tagata.

Ia Faalogologo Ina ia Iloa Faalogona o le Tagata

E silia i le sefulu lauga a Iopu na faalogo i ai ana uō. Peitaʻi, na faapea mai Iopu: “E! fia faafofogaina mai aʻu e ia.” (Iopu 31:35) Aiseā? Auā e leʻi faamāfanafanaina Iopu e ui na latou faalogologo atu iā te ia. E leʻi manatu mamafa i latou iā Iopu, ma e leʻi ano foʻi i ona faalogona. E leʻi alolofa iā Iopu. Ae o le fautuaga lenei a Peteru: “Ia loto gatasi outou uma, ia fealofani, ia alolofa i le ʻau uso, ia mutimuti vale i le alofa, ia agalelei.” (1 Peteru 3:8) E faapefea ona iloa lo tatou fealofani? Ia amanaʻia faalogona o tagata ma ia taumafai e malamalama iā i latou. O se tasi o mea e iloa ai lo tatou manatu mamafa, o le fai atu lea o ni faamatalaga alofa e pei o le “talofa e, iā te oe” pe “ia mālō lava le onosai.” E lelei foʻi ona tatou toe taʻu atu le mea na faamatala mai e le tagata, auā e iloa ai o loo tatou malamalama i lana tala. O le faalogologo ma le alofa, o le uaʻi atu lea i tala aemaise o faalogona o le tagata.

O Ropati * o se tagata talaʻi faataimi atoa a Molimau a Ieova. O lana tala lenei: “Na ou  lotovaivai i laʻu galuega talaʻi, ma na ou fia talanoa i le ovasia femalagaaʻi. Na faalogologo lelei o ia ma taumafai e malamalama i oʻu faalogona. E foliga mai na iloa e le uso, na ou popole neʻi mea ane ua ia faitio iā te aʻu. Na fai mai o ia ua malamalama i oʻu faalogona, auā o le mea foʻi lenā na tupu iā te ia. Na faamalosiau ai aʻu e tumau i laʻu galuega.”

Pe e mafai ona tatou faalogologo pea, e ui tatou te lē ioe i manatu o loo faamatala mai? Pe e mafai ona tatou fai i se tagata, e lelei ua ia faamatalaina mai ona faalogona? Ioe. Ae faapefea pe afai na fufusu sou alo ma se tamaitiiti i le aʻoga, pe taʻu atu foʻi e lou afafine talavou e iai se tama e fia alu i ai? E lelei ona faalogologo muamua le matua ma taumafai e malamalama i faalogona o le fanau, a o leʻi taʻu i ai le mea e tatau ona fai.

Ua taʻua i le Faataoto 20:5: “O le atamai i le loto o le tagata, o le vai loloto lea; a o le tagata faautauta, na te utufia mai ai.” Afai e lē faailoa mai e se tagata poto ana fautuaga, tatou te taumafai la e utufia mai ana fautuaga. E faapena foʻi le faalogologo ma le alofa. O le faautauta e utufia mai ai faalogona o le tagata. E lelei le fai o fesili, ae aua le isuisu i mataupu e fitoitonu i le tagata. Ia tuu atu i le tagata e faamatala mai mea o loo fia talatalanoa i ai. O se faaaʻoaʻoga, afai e fia talanoa se avā i faafitauli o lana faaipoipoga, atonu e faigofie mo ia ona faamatala muamua pe na faapefea ona la masani, ma faaipoipo ai. Atonu e faigofie mo se Kerisiano ua lē toe talaʻi, ona faamatala muamua le auala na ia maua ai le upu moni.

O se Luʻitau le Faalogologo ma le Alofa

O se luʻitau le faalogologo atu i se tagata ua lē fiafia mai iā i tatou, auā e masani ona tatou taʻusaʻoina la tatou mea na fai. E faapefea ona foʻia lenā luʻitau? Fai mai le Faataoto 15:1: “O le tali filemu e liliueseina ai le ita.” O le tali filemu, o le tuu atu lea o le avanoa e faamatala mai ai e le tagata ona faalogona tigā, a o e lavapapale ma faalogologo i ai.

A finau ni tagata se toʻalua, o tala na fai muamua e toe fai foʻi. La te manatu e lē o faalogologo le isi tagata. E lelei pe a onosai se tasi o i laʻua ma faalogologo lelei i le isi tagata! Ioe, e tāua ona taofiofi le ita ma ia tautala ma le faautauta ma le alofa. Ua faapea mai le Tusi Paia: “O lē ua taofi ona laugutu, o le tagata poto lea.”—Faataoto 10:19.

O le iloa ona faalogologo ma le alofa, e lē o se mea e tupu faafuaseʻi. Peitaʻi, o se mea e taumafai malosi i ai lea e manaʻomia ai le onosai. E tele aogā o le iloa ona faalogologo ma le alofa. Tatou te alolofa pe a faalogologo atu a o talanoa mai tagata. E faafiafiaina ai foʻi i tatou. O se gaoioiga poto lo tatou iloa ona faalogologo ma le alofa!

[Faamatalaga pito i lalo]

[Ata i le itulau 11]

Ia tuu mea tatou te fiafia i ai a o faalogologo atu i tagata

[Ata i le itulau 12]

O se luʻitau le faalogologo atu i se tagata ua lē fiafia mai