Ua Fua Mai Amioga Lelei

I SE motu laʻitiiti e i le itu i saute o Iapani, na amata ai ona suʻesuʻe e se tinā ma lana fanau e toʻatolu le Tusi Paia ma Molimau a Ieova. Ina ua iloa lenei mea e ona tuaoi, sa lē fiafia i latou ma lē toe fia tautatala iā te ia. Ua faamatala mai e le tinā e faapea: “O le mea sa sili ona ou tigā ai, ina ua latou mumusu e talanoa atu i si aʻu tane ma si aʻu fanau.” Ae peitaʻi, na ia fai atu i lana fanau: “E tatau lava ona tatou tautala lelei atu pea i tuaoi, ona o le suafa o Ieova.”—Mataio 5:47, 48.

Sa ia aʻoaʻoina lana fanau i le fale, ina ia faaaloalo pea i isi e tusa lava pe tetee mai. A o latou ō atu i le vaipuna vevela i le aai, e faataʻitaʻi ai e tamaiti a latou faafeiloaʻiga i le taavale. I totonu o le fale, e masani lava ona valaau atu ma le fiafia tamaiti, “Konnichiwa!”—“Talofa!” Sa faia pea ma le onosai e le aiga lenei faafeiloaʻiga i tagata uma na latou feiloaʻi, e ui lava ina lē tali lelei mai. Ae peitaʻi, sa mātauina e tagata le amioga lelei a tamaiti.

Na iʻu lava ina tali mai le tasi aiga, ma le isi aiga e faapea “Konnichiwa.” I le faaiʻuga o le lua tausaga, ae ua toetoe lava o tagata uma i le aai na tali fiafia mai pe a faafeiloaʻi atu e le aiga. Sa amata ai foʻi e tagata o le aai ona faafeiloaʻi e le tasi le isi ma ua atili ai ona latou faaleuō. Sa manaʻo le sui pulenuu e faamālō atu i tamaiti i luma o tagata, ona o la latou vaega na faia ua māfua ai lenei suiga. Ae na faapea atu le tinā i le sui pulenuu, o lea latou te faia le mea e ao i Kerisiano uma ona fai. Mulimuli ane, i se tauvaga lauga na faia i le motu, na faamatala atu ai e le tasi o le fanau tama le auala e aʻoaʻo ai e lona tinā le aiga ina ia faafeiloaʻi atu ma le faaaloalo i isi e tusa lava po o ā uiga e faaali mai. Na sili lana lauga ma na faasalalau i le nusipepa a le aai. I aso nei, ua matuā fiafia le aiga ina ua maua ni iʻuga lelei ona o le mulimuli i tapulaa faa-Kerisiano. E matuā faigofie lava ona talaʻi atu le tala lelei i isi, pe a faaleuō tagata.