O le Togiola ua Faasilisilia ai le Amiotonu a Ieova

INA ua mavae le fouvalega a Atamu ma Eva, na taʻua ai e Ieova lona finagalo ina ia faatūina se fanau o le a tuʻimomomoina lona mulivae. (Kenese 3:15) Na faataunuuina lenei mea ina ua fasiotia e fili o le Atua ia Iesu Keriso i le satauro. (Kalatia 3:13, 16) E leai se agasala a Iesu, talu ai sa afuafuaina faavavega e le mana o le agaga paia i le manava o se taupou. O le mea lea, ua aogā ai lona toto masaa e fai ma togiola e faasaʻoloto ai tagata mai le agasala ma le oti tuufaasolo mai iā Atamu.—Roma 5:12, 19.

E leai se mea e mafai ona taofia Ieova mai le faataunuuina o le mea ua ia finagalo i ai. Ina ua agasala le tagata, i le silafaga a Ieova e pei lava ua uma ona totogia le togiola, ma na mafai ona ia feagai ma ē e faatuatua i le faataunuuga o ana folafolaga. O lenei mea, ua mafai ai e le Atua ona savavali ma faauō atu i le fanau agasala a Atamu, e pei o Enoka, Noa, ma Aperaamo, e aunoa ma le faaleagaina ai o Lona paia.—Kenese 5:24; 6:9; Iakopo 2:23.

Sa faia e nisi na faatuatua i le Atua ni agasala matuiā. O se tasi o faaaʻoaʻoga, o le tupu o Tavita. Atonu e te fesili mai: ‘Ua faapefea ona faamanuia e Ieova le tupu o Tavita ina ua uma ona faia le agasala ma Patesepa, ma faapogaia le oti o lana tane o Uria?’ O se vala tāua lava, sa salamō moni Tavita ma faatuatua iā Ieova. (2 Samuelu 11:1-17; 12:1-14) E faavae i le taulaga togiola a Iesu Keriso, na mafai ai ona faamagalo e le Atua agasala a Tavita ina ua salamō, ma tausisia ai Lana faamasinoga ma Lana amiotonu. (Salamo 32:1, 2) O le faamaoniga o lenei mea, ua faamatala mai i le Tusi Paia le mea matagofie aupito sili ua faataunuuina ona o le taulaga togiola a Iesu, ua faapea mai, “ina ia faaalitinoina mai lana [Atua] amiotonu i le lē tauia o agasala ua mavae” ma “ona pō nei.”—Roma 3:25, 26.

Ioe, ua maua pea e tagata aogā ofoofogia ona o le tāua o le toto o Iesu. Ua mafai foʻi e tagata agasala ua salamō ona olioli i se mafutaga vavalalata ma le Atua, ona o le togiola. O le isi aogā  e faavae i le togiola a Keriso, o le toe faatutūina mai o ē ua maliliu i le lalolagi fou a le Atua. E aofia ai ma auauna faamaoni a le Atua o ē na maliliu a o leʻi totogia e Iesu le togiola. E oo foʻi aogā i le toʻatele o ē na feoti ona o le vālea ma e leʻi tapuaʻi iā Ieova. Ua folafola mai i le Tusi Paia: “O le a toe tutū mai ē ua amiotonu atoa ma ē ua amiolētonu.” (Galuega 24:15) I lenā taimi o le tauia e Ieova tagata usiusitai i le ola e faavavau, e faavae i le togiola. (Ioane 3:36) Na faamatala mai e Iesu: “Auā ua faapea lava ona alofa mai o le Atua i le lalolagi, ua ia au mai ai lona Atalii e toʻatasi, ina ia lē fano se tasi e faatuatua iā te ia, a ia maua e ia le ola faavavau.” (Ioane 3:16) O nei faamanuiaga uma o le a tafe mai i tagata ona o le saunia e le Atua o le taulaga togiola.

Ae peitaʻi, o le vala mataʻina o le togiola, e lē o aogā ua tatou maua mai ai. Ae e sili ona tāua le mea ua faia e le togiola mo le suafa o Ieova. Ua faamaonia ai, o Ieova, o le Atua faamasino lelei atoatoa, o lē o loo feutagaʻi ma tagata agasala, ae o loo tumau pea ona mamā ma paia. Ana lē finagalo le Atua e saunia le togiola, e leai se tasi o le fanau a Atamu e mafai ona savavali ma le Atua pe avea ma ana uō, e oo lava iā Enoka, Noa, ma Aperaamo. Sa iloa e le faisalamo lenei mea ma ia tusi ai: “Ioa e, afai e te mātaulia le amio leaga, le Alii e, o ai sē na te mafaia ona tulaʻi?” (Salamo 130:3) E ao ona tatou faafetai iā Ieova ona o le auina mai o lona Alo pele i le lalolagi, faapea Iesu, ona o lona finagalo malie e tuuina mai lona soifua e fai ma togiola mo i tatou!—Mareko 10:45.