Fesili Mai le ʻAufaitau

Pe e mafai ona tausisia se loto fuatiaifo lelei o se Kerisiano, pe afai na te taliaina se galuega e umia ai se laau malosi?

E matuā faatāuaina uma lava e Molimau a Ieova i le lalolagi, lo latou tiute tauave mai le Atua, ina ia tausia o o latou aiga. (1 Timoteo 5:8) Ae peitaʻi, e iai ni galuega patino e manino e solia ai mataupu silisili o le Tusi Paia ma e ao ona ʻalofia. E aofia ai galuega e fesootaʻi atu i taaloga faitupe, faaaogāina sesē o le toto ma le lagolagoina o le faaaogāina o le tapaa. (Isaia 65:11; Galuega 15:29; 2 Korinito 7:1; Kolose 3:5) E iai foʻi isi galuega e ui e lē o taʻusalaina tuusaʻo i le Tusi Paia, ae e mafai ona faaleagaina ai le lotofuatiaifo o se tasi po o isi foʻi.

O le faigaluega i se galuega totogi e umia ai se laau malosi po o se isi auupega, o le filifiliga lenā e fitoitonu i le tagata lava ia. Ae ui i lea, o se galuega e umia ai se laau malosi e mafai ona nofosala ai se tasi i le toto pe afai e manaʻomia ona faaaogā lana auupega. O lea, e ao i se Kerisiano ona iloilo ma tatalo e faatatau i le mataupu pe e lotomalie na te taliaina lenei avega mamafa, o le vave faia lea o se filifiliga pe faaaogā le auupega pe leai, auā e aafia ai le ola o tagata. O le umia o se auupega, e mafai foʻi ona manuʻa ai lea tagata pe oti, pe a osofaʻia e se isi po o le taui atu ma sui e se tasi.

E ono aafia ai foʻi isi i lea filifiliga. O se faaaʻoaʻoga, o le tiute autū lava a se Kerisiano, o le talaʻia lea o le tala lelei o le Malo o le Atua. (Mataio 24:14) Po o se mea talafeagai ea le aʻoaʻo o isi ina ia “nofo lelei ma tagata uma lava,” ae i le taimi e tasi o loo e saʻilia tupe e ola ai e ala i le umia o se auupega? (Roma 12:18) Ae faapefea tamaiti po o isi tagata o le aiga? Pe e lē lamatia ai o latou ola pe a teu se laau malosi i le fale? E lē gata i lea, pe e lē tausuai ai isi ona o lenei filifiliga?—Filipi 1:10.

I nei “aso e gata ai,” e toʻatele tagata ua “faasauā, o ē ʻinoʻino i le amio lelei.” (2 Timoteo 3:1, 3) O le iloaina o lenei mea, pe e mafai e se tasi ona “lē mataʻuleagaina,” pe a ia filifilia se galuega e umia ai se laau malosi lea e ono fetaiaʻi o ia ma tagata amioleaga? (1 Timoteo 3:10) E leai. O le mea lea, o le a lē vaai ai le faapotopotoga i lenā tagata o sē e “lē mataʻuleagaina,” pe a faaauau pea ona ia umia se auupega pe a uma ona fautuaina ma le agalelei o ia mai le Tusi Paia. (1 Timoteo 3:2; Tito 1:5, 6) O lea la, o le a lē agavaa lea tane po o se fafine i so o se faaeaga faapitoa i le faapotopotoga.

Na faamautinoa atu e Iesu i ona soo, afai latou te faamuamua le auaunaga o le Malo i o latou olaga, e lē tatau ona soona popolevale i le mauaina o mea o le olaga. (Mataio 6:25, 33) O le mea moni, pe afai tatou te matuā maufaatuatuaina Ieova, o le a ia “tausia [i tatou]. Na te lē tuuna e faavavau le amiotonu ia faagaeetia.”—Salamo 55:22.