Savavali i le Faatuatua, ae Lē o le Tino Mai o Mea!

“O le faatuatua ua [tatou] savavali ai, a e lē o le tino mai o mea.”—2 KORINITO 5:7.

1. E faapefea ona iloa na savali Paulo i le faatuatua ae lē o le tino mai o mea?

O LE tausaga e 55 T.A. Ua mavae le 20 tausaga talu ona talia le faa-Kerisiano e se tamāloa e igoa iā Saulo, o lē na faasauā i Kerisiano. E leʻi avea le mavae atu o le taimi e faavaivaia ai lona faatuatua i le Atua. E ui lava e leʻi mafai ona ia iloa atu mea i le lagi i ona mata faaletino, ae na mausalī pea lona faatuatua. O lea la, ina ua tusi atu i Kerisiano faauuina, o ē e iai le faamoemoe i le lagi, na faapea atu Paulo: “O le faatuatua ua [tatou] savavali ai, a e lē o le tino mai o mea.”—2 Korinito 5:7.

2, 3. (a) E faalia faapefea o loo tatou savavali i le faatuatua? (e) O le ā le uiga o le savavali i le tino mai o mea?

² O le savavali i le faatuatua, e tatau ona matuā talitonuina o le a taʻitaʻia e le Atua o tatou olaga. E tatau ona tatou mautinoa, e silafia e ia mea e sili ona lelei mo i tatou. (Salamo 119:66) A o tatou faia filifiliga i le olaga ma faataunuuina, e ao ona tatou manatunatu i “mea e lē o vaaia.” (Eperu 11:1) E aofia ai i nei mea le “lagi fou ma le lalolagi fou” pei ona folafolaina mai. (2 Peteru 3:13) Peitaʻi, o le savavali i le tino mai o mea o lona uiga, o loo tatou faamalieina na o manaʻoga ma faalogona o le tino. E mataʻutia tele lenei mea, talu ai e mafai ona oo ina tatou manatu māmā ai i le finagalo o le Atua.—Salamo 81:12; Failauga 11:9.

³ E tusa lava po o i tatou o nisi o le “lafu mamoe itiiti” e faamoemoe i le lagi, po o nisi o “isi mamoe” e faamoemoe i le lalolagi, ae e ao iā i tatou uma lava ona manatua le lapataʻiga ina ia savavali i le faatuatua ae lē o le tino mai o mea. (Luka 12:32; Ioane 10:16) Seʻi o tatou talanoaina, pe faapefea i le mulimuli i lenei fautuaga, ona puipuia ai i tatou mai le lolo atu i le fiafia i le agasala e vave mavae, le mailei o le matapeʻapeʻa ma galo ai le lata tele mai o le iʻuga o lenei faiga o mea. O le a tatou iloiloina foʻi lamatiaga o le savavali i le tino mai o mea.—Eperu 11:25.

Taumamao ma le “Fiafia i le Agasala e Vave Mavae”

4. O le ā le filifiliga sa faia e Mose, ma aiseā?

⁴ Seʻi manatu i le olaga sa ono maua e Mose, le atalii o Amaramo. O le tausia aʻe faatasi ma alo o le tupu i Aikupito, sa ono mafai ona maua ai e Mose le pule, tamaoaiga ma le taʻutaʻua. E ono mafai foʻi ona faapea mai Mose: ‘Na aʻoaʻoina aʻu i le poto uma lava o Aikupito, ou te malosi i aʻu upu ma mea ou te faia. Pe afai ou te nofo pea i le aiga o le tupu, e mafai ona ou faaaogā loʻu tulaga e maua ai aogā e oʻu uso Eperu o mafatia.’ (Galuega 7:22) Na i lo lea, na filifili Mose ina ia “agaleagaina o ia faatasi ma tagata o le Atua.” Aiseā? O le ā le mea na uunaʻia ai Mose e teena mea uma na mafai ona ia manuia ai i Aikupito? Ua tali le Tusi Paia: “O le faatuatua na tuuina ai e [Mose] o Aikupito, ua lē fefe i le ita o le tupu; auā na faamalosi o ia pei o sē iloa atu i lē lē o vaaia.” (Eperu 11:24-27) O lona faatuatua i le tauia e Ieova o ē amiotonu, na fesoasoani iā te ia e taumamao i le agasala ma le lolo atu i fiafiaga e vave mavae.

5. E faapefea ona faalaeiauina i tatou e le faaaʻoaʻoga a Mose?

⁵ E masani foʻi ona tatou fesagaʻi ma le faia o filifiliga faigatā e pei o lenei: ‘Pe e ao ona ou  tuua nisi o masaniga po o ni amioga e faalēlelei pe a fua atu i taʻiala o le Tusi Paia? Pe e tatau ona ou taliaina se galuega e foliga mai e tele ai le tamaoaiga ae o le a faalavelavea ai loʻu agaʻigaʻi i luma faaleagaga?’ Ua faalaeiauina i tatou e le faaaʻoaʻoga a Mose ina ia aua le faia filifiliga e atagia mai ai le pumoomoo o le vaai a le lalolagi i le lumanaʻi. Na i lo lea, e ao ona tatou faatuatua i le tofā mamao o ‘Lē e lē o vaaia,’ o Ieova le Atua. I le pei o Mose, tau ina ia tatou faatāua le faauōga ma Ieova e sili atu na i lo se isi mea e mafai ona tatou maua i lenei lalolagi.

6, 7. (a) Na faaalia faapefea na filifili Esau e savali i le tino mai o mea? (e) O le ā le lapataʻiga ua tatou maua mai le tala iā Esau?

⁶ E matuā ese lava Mose mai iā Esau, le atalii o Isaako. Na manaʻo Esau e vave faamalie ona manaʻoga. (Kenese 25:30-34) Sa faatalalē Esau “i mea paia,” lea na ia faatau atu ai lona tofi o le ulumatua i “le ʻai e tasi.” (Eperu 12:16) E na te leʻi manatunatu muamua i aafiaga o le a oo i lana faiā ma Ieova pe a faatau atu lona tofi. E leʻi manatu foʻi i āuga leaga e ono oo i lana fanau. E leʻi faaleagaga ona manatu. Na manatu māmā Esau i folafolaga matagofie a le Atua ma manatu i ai o ni mea e itiiti le aogā. Na ia savali i le tino mai o mea ae lē i le faatuatua.

⁷ Ua aumaia e Esau se lapataʻiga mo i tatou i aso nei. (1 Korinito 10:11) Pe a tatou fesagaʻi ma filifiliga, pe tetelē pe laiti, aua neʻi faasesēina i tatou i faamatalaga taufaaʻoleʻole a le lalolagi a Satani, e faapea e tatau ona e maua le mea ua e manaʻo i ai i le taimi nei. E ao ona tatou fesili ifo iā i tatou lava: ‘Po o oʻu faaalia faanaunauga e pei o Esau i filifiliga o oʻu faia? Po o le saʻilia o le mea oʻu manaʻo i ai i le taimi nei, o le a ou faatulaga lua ai mea faaleagaga? Po ua faaleagaina laʻu faauōga ma le Atua ma loʻu lumanaʻi i aʻu filifiliga o fai? O le ā le faaaʻoaʻoga o oʻu faataatia mo isi?’ O le a faamanuia i tatou e Ieova pe afai o atagia atu i a tatou filifiliga lo tatou talisapaia o mea paia.—Faataoto 10:22.

ʻAlofia le Mailei o le Matapeʻapeʻa

8. O le ā le lapataʻiga na maua e Kerisiano i Laotikaia, ma aiseā e aogā ai iā i tatou?

⁸ I se faaaliga iā Ioane e latalata i le faaiʻuga o le senituri muamua, na avatu ai e Iesu Keriso ua faamamaluina se feʻau i le faapotopotoga i Laotikaia, i Asia Itiiti. O se feʻau na lapataʻi i le matapeʻapeʻa. E ui i lo latou tamaoaiga faaletino, ae na augapiu ma se tulaga faaleagaga o Kerisiano i Laotikaia. Na i lo le faaauau ona savavali i le faatuatua, ua avea meafaitino ma mea e faanenefu ai la latou vaaiga faaleagaga. (Faaaliga 3:14-18) Ua iai foʻi se aafiaga faapena o le matapeʻapeʻa i aso nei. Ua faavaivaia ai lo tatou faatuatua ma taofia ai mai le “taufetuli ma le onosai i le ala” o le ola. (Eperu 12:1) Pe a tatou lē faaeteete, e ono tineia e “mea faafiafia o le olaga nei” ia gaoioiga faaleagaga ma oo atu ai ina “fetinaiina.”—Luka 8:14.

9. E faapefea ona puipuia i tatou e le lotomalie ma le talisapaia o taumafa faaleagaga?

⁹ O le ki i le puipuiga faaleagaga, o le  lotomalie lea i mea ua tatou maua na i lo le fetagofi atu i mea a le lalolagi ma le tamaoaiga faaletino. (1 Korinito 7:31; 1 Timoteo 6:6-8) Pe a tatou savavali i le faatuatua ae lē o le tino mai o mea, tatou te maua le olioli i le parataiso faaleagaga i le taimi nei. A o tatou ave i fale le tele o taumafa faaleagaga, pe lē uunaʻia ai ea i tatou e alalaga “ona o le loto fiafia”? (Isaia 65:13, 14) E lē gata i lea, tatou te fiafia e auaumea ma i latou e faaalia fua o le agaga o le Atua. (Kalatia 5:22, 23) Maʻeu le tāua o le faamalieina ma le faafouina ua tatou maua mai sauniuniga faaleagaga ua faia e Ieova!

10. O ā fesili e ao ona tatou fesili ifo ai iā i tatou lava?

¹⁰ E ao ona tatou fesili ifo iā i tatou lava i nisi o fesili e pei: ‘O le ā le tāua o meafaitino i loʻu olaga? Po o oʻu faaaogāina meafaitino o oʻu maua e faamalie ai loʻu olaga po o faaauiluma ai le tapuaʻiga moni? O ā mea ua matuā faamalieina ai aʻu? Po o le suʻesuʻeina ea o le Tusi Pai ma auaufaatasi ma Kerisiano i sauniga, po o le lafoaʻia o tiute tauave faa-Kerisiano i faaiʻuga o vaiaso? Po o oʻu faatulaga le tele o faaiʻuga o vaiaso mo faafiafiaga na i lo le auai i le talaʻiga ma isi gaoioiga e fesootaʻi atu ma le tapuaʻiga moni?’ O le savavali i le faatuatua, o lona uiga tatou te maelega i le galuega o le Malo ma le maufaatuatuaina o folafolaga a Ieova.—1 Korinito 15:58.

Aua Neʻi Galo ua Lata Mai le Iʻuga

11. E faapefea i le savavali i le faatuatua ona lē galo ai iā i tatou le latalata mai o le iʻuga?

¹¹ O le savavali i le faatuatua, e fesoasoani iā i tatou e ʻalofia ai manatu faapea, e leʻi taitai pe e lē oo mai foʻi le iʻuga. Ua tatou malamalama ua faataunuuina i mea tutupu i le lalolagi i o tatou aso valoaga a le Afioga a le Atua, auā e lē pei i tatou o ē tauemu ma aamu i valoaga a le Tusi Paia. (2 Peteru 3:3, 4) O se faaaʻoaʻoga, po ua lē faamaonia ea i uiga ma amio a tagata ua tatou ola i “aso e gata ai”? (2 Timoteo 3:1-5) Ona o le faatuatua, ua mafai ai ona tatou iloa o mea o loo tutupu i le lalolagi i aso nei, e lē na o ni mea e masani ona tutupu. Na i lo lea, ua faia aʻe ai “le faailoga” o le faatasi mai o Keriso, “ma le gataaga o le lalolagi.”—Mataio 24:1-14.

12. Na faapefea ona faataunuuina fetalaiga a Iesu i le Luka 21: 20, 21 i le uluaʻi senituri?

¹² Seʻi o tatou iloiloina se mea na tupu i le uluaʻi senituri lea ua fai ma ata o se mea o le a tupu i o tatou aso. Na lapataʻia e Iesu Keriso ona soo a o iai i le lalolagi: “A iloa e outou ua siʻosiʻomia Ierusalema i ʻau o le taua, ia outou iloa i lea aso ua latalata lona faatafunaina. O lea aso, o ē ua i Iutaia ia latou sosola i mauga; o ē ua i totonu o lea aai, ia latou ō ese.” (Luka 21:20, 21) O le faataunuuina o lea valoaga, na siʻomia ai e ʻautau a Roma i lalo o le taʻitaʻiga a Sesetia Kalusi, Ierusalema i le 66 T.A. Ae peitaʻi  o le toe tuumuli faafuaseʻi o ʻautau, sa saunia ai le faailoga, ma na mafai ai e Kerisiano ona “sosola i mauga.” Na toe foʻi ane ʻautau a Roma i le 70 T.A., ma osofaʻia le aai o Ierusalema ma faaumatia lona malumalu. Ua lipotia mai e Iosefasa e silia i le miliona Iutaia na feoti ma e 97,000 na ave faatagataotaua. Na oo le faasalaga a le Atua i lenā faiga o mea faa-Iutaia. O ē na savavali i le faatuatua ma utagia lapataʻiga a Iesu, na sao mai ai i lenā mala.

13, 14. (a) O ā mea ua toeitiiti ona tutupu lea? (e) Aiseā e ao ai ona tatou mataala i le faataunuuina o valoaga a le Tusi Paia?

¹³ O le a tupu foʻi se mea faapena i o tatou aso. O ni vaega o Malo Aufaatasi o le a aofia ai i le faaooina mai o le faasalaga a le Atua. I le uluaʻi senituri, sa faatulagaina ʻautau a Roma ina ia tausia le filemu, ma e faapena foʻi i aso nei ua faatulagaina Malo Aufaatasi ina ia tausia le filemu. E ui lava na taumafai ʻautau a Roma e faatumauina le saogalemu i le lalolagi i na ona pō, ae na avea foʻi i latou ma ʻau na faaumatiaina Ierusalema. E faapena foʻi i aso nei. Ua faaalia i valoaga a le Tusi Paia, o le a manatu ni vaega o Malo Aufaatasi o ē e iai a latou vaegaau, ua māfua vevesi ona o lotu. O le a latou faaumatia Ierusalema faaonapōnei, o lona uiga o lotu ia ua faapea mai o Kerisiano, atoa ma isi vaega uma o Papelonia le Aai Tele. (Faaaliga 17:12-17) Ioe, ua iai lotu sesē uma o le lalolagi i le faitotoʻa o le faaumatiaga.

¹⁴ O le faaumatiaina o tapuaʻiga sesē, o le a faailoga ai le amataga o le puapuaga tele. I le vaega mulimuli o le puapuaga tele, o le a faaumatia ai vaega o totoe o lenei faiga leaga o mea. (Mataio 24:29, 30; Faaaliga 16:14, 16) O le savavali i le faatuatua ua tatou mataala ai i le faataunuuina o valoaga a le Tusi Paia. O le a lē faasesēina i tatou i le manatu, o faalapotopotoga a tagata e pei o Malo Aufaatasi, o le auala lenā e aumaia ai e le Atua le filemu moni ma le saogalemu. E tatau la ona faaalia i o tatou olaga, lo tatou talitonuga ua “latalata mai le aso tele o Ieova.”—Sefanaia 1:14.

E Mataʻutia le Savavali i le Tino Mai o Mea

15. E ui lava na latou tofo i faamanuiaga a le Atua, o le ā le mailei na paʻūʻū ai Isaraelu?

¹⁵ O mea na tutupu iā Isaraelu anamua, ua faaalia ai le mataʻutia o le faavaivaia o le faatuatua o se tasi, ona o le savali i le tino mai o mea. E ui lava i le molimauina o mala e 10 ia na faalumaina ai atua sesē o Aikupito, ma tofo i le laveaʻiga ofoofogia mai le Sami ulaula, ae na lē usiusitai Isaraelu ma faia se tamaʻi povi auro e tapuaʻi i ai. Na oo ina latou lē mafai ona onosai ma ua fiu e faatalitali iā Mose, o lē na ‘faatuatuai ona alu ifo nai le mauga.’ (Esoto 32:1-4) O le leai o se onosai, na māfua ai ona latou tapuaʻi i se tupua e iloa atu e mata. O lo latou savavali i le tino mai o mea, na tigā ai le finagalo o Ieova ma na māfua ai le fasiotia o le “toʻatolu gaafe o tagata.” (Esoto 32:25-29) Pagā le leaga, pe a fai i aso nei e se tagata tapuaʻi o Ieova, ni filifiliga e atagia atu ai lona lē faatuatuaina o Ieova, ma le leai o se faatuatuaga i lona mana e faataunuu ai ana folafolaga!

16. Na aafia faapefea Isaraelu ona o le vaai i le tino mai o mea?

¹⁶ Sa iai nisi āuga leaga na oo iā Isaraelu ona o le vaai i le tino mai o mea. O le māfuaaga lenā na fefefe ma lotovaivai ai i o latou fili. (Numera 13:28, 32; Teuteronome 1:28)  O le mea lenā na uunaʻia ai i latou e luʻia le pule a Mose mai le Atua, ma muimui ona o mea ua oo i o latou olaga. O le leai o se faatuatua, na oo ai ina latou manatu e sili le olaga i Aikupito, o le nuu sa pulea e temoni, na i lo le Nuu Folafolaina. (Numera 14:1-4; Salamo 106:24) Pagā le tigā o le finagalo o Ieova, ina ua ia silasila ifo i le matuā lē faaaloalo o ona tagata mo lo latou Tupu lē vaaia!

17. Aiseā na teena ai e Isaraelu le taʻitaʻiga a Ieova i aso o Samuelu?

¹⁷ I aso foʻi o Samuelu, na toe maileia ai Isaraelu i le savavali i le tino mai o mea. Na amata ona faanaunau tagata i se tupu e mafai ona latou vāai i ai. E ui lava na faailoa atu e Ieova o ia o lo latou tupu, ae e leʻi lava lenā mo i latou e savavali ai i le faatuatua. (1 Samuelu 8:4-9) Na latou teena ma le faatamala taʻitaʻiga atoatoa ona lelei mai iā Ieova, ma sa mananaʻo ia pei o isi nuu uma ae mulimuli ane na oo āuga leaga iā i latou.—1 Samuelu 8:19, 20.

18. O ā lesona ua tatou aʻoaʻoina e uiga i le mataʻutia o le savavali i le tino mai o mea?

¹⁸ Talu ai o i tatou o ni auauna a Ieova i aso nei, tatou te faatāuaina la tatou faiā ma le Atua. Ua tatou naunau e aʻoaʻo ma faatatau i o tatou olaga lesona tāua mai mea na tutupu i aso ua mavae. (Roma 15:4) Ina ua savavali Isaraelu i le tino mai o mea, na galo iā i latou sa taʻitaʻia i latou e le Atua e ala mai iā Mose. Pe afai tatou te lē faaeteete, e mafai foʻi ona galo iā i tatou o loo taʻitaʻiina e Ieova le Atua ma le Mose Sili, o Iesu Keriso, le faapotopotoga Kerisiano i aso nei. (Faaaliga 1:12-16) E ao ona tatou mataalia ina neʻi manatu faatauvaa i le vaega i le lalolagi o le faalapotopotoga a Ieova. O lo tatou faia faapea, e mafai ona oo atu ai i le agaga faitio ma le leai o se talisapaia mo sui o Ieova, aemaise taumafa faaleagaga o loo lufilufia e le “auauna faamaoni ma le mafaufau.”—Mataio 24:45.

Ia Maumauaʻi e Savavali i le Faatuatua

19, 20. O le ā le mea o e maumauaʻi e fai, ma aiseā?

¹⁹ Ua taʻua i le Tusi Paia: “Tatou te lē tau ma tagata, a o alii sili, ma faipule, ma alii o le pōuliuli o lenei lalolagi, atoa ma agaga leaga i mea o i le lagi.” (Efeso 6:12) O lo tatou fili sili o Satani le Tiapolo. O lona sini ia mou atu lo tatou faatuatua iā Ieova. E na te faaaogā so o se faatosinaga e ono mafai ona taofia ai tatou mai le auauna atu i le Atua. (1 Peteru 5:8) O le ā le mea e puipuia ai i tatou mai le faasesēina i le tino mai o mea o le faiga o mea a Satani? O le savavali lea i le faatuatua, ae lē o le tino mai o mea! O le faatuatua ma le talitonu i folafolaga a Ieova, o le a leoleo ai mai le ‘faavaatuʻia o i tatou i la le faatuatua.’ (1 Timoteo 1:19) Ae o le laualuga o na mea uma, ia tatou maumauaʻi e faaauau ona savavali i le faatuatua ma matuā talitonu i faamanuiaga a Ieova. Tau ina ia tatou faaauau ona tatalo ina ia sao mai ia mea uma ua tali oo mai.—Luka 21:36.

²⁰ Ua iai se faaaʻoaʻoga sili a o tatou savavali i le faatuatua ae lē o le tino mai o mea. Ua taʻua i le Tusi Paia: “Na tigāina Keriso lava mo outou, ua tuuina mai ai e ia le faaaʻoaʻo mo outou, ina ia outou mulimuli atu i ona tulagāaao.” (1 Peteru 2:21) O le a talanoaina i le isi mataupu e sosoo ai le auala e mafai ai ona tatou savavali e pei o Ia.

Pe E te Manatua?

• O ā mea ua e aʻoaʻoina mai faaaʻoaʻoga a Mose ma Esau e uiga i le savavali i le faatuatua, ae lē o le tino mai o mea?

• E mafai faapefea ona ʻalofia le matapeʻapeʻa?

• Ua faapefea ona fesoasoani le savavali i le faatuatua iā i tatou e ʻalofia ai le manatu e leʻi taitai le iʻuga?

• Aiseā e mataʻutia ai le savavali i le tino mai o mea?

[Fesili mo le Suʻesuʻega]

[Ata i le itulau 17]

Na savali Mose i le faatuatua

[Ata i le itulau 18]

Pe e masani ona e lē faia galuega manaʻomia e le Atua ona o faafiafiaga?

[Ata i le itulau 20]

E faapefea ona puipuia oe i lou uaʻi atu i Afioga a le Atua?