O Ieova e Tele Lona Alofa Faamaoni
O Ieova e Tele Lona Alofa Faamaoni
‘O Ieova e tele lona alofa.’—SALAMO 145:8.
1. O le ā le tele o le alofa o le Atua?
“O LE Atua, o le alofa lava ia.” (1 Ioane 4:8) O na faamatalaga faamāfanafanaloto ua faamaonia ai e faapea, e faavae le pulega a Ieova i le alofa. E oo lava i tagata e lē o usiusitai iā te ia ua maua aogā mai le lā ma le timu lea o loo ia saunia ma le alofa! (Mataio 5:44, 45) Talu ai e alofa le Atua i le fanau a tagata, e oo lava la i ona fili e mafai ona salamō, liliu atu iā te ia ma maua le ola e faavavau. (Ioane 3:16) Peitaʻi, ua toe nei o se aga ona faaumatia lea e Ieova o tagata amioleaga lē salamō, ina ia mafai ai e tagata e alolofa iā te ia ona olioli i le ola e faavavau i le lalolagi fou amiotonu.— Salamo 37:9-11, 29; 2 Peteru 3:13.
2. O le ā le vala faapitoa o le alofa o Ieova ua ia faaalia mo i latou o ē ua tuuina atu iā te Ia?
2 Ua faaalia le alofa o Ieova i ona tagata tapuaʻi i se auala faapelepele ma e tumau. O lenā alofa ua faaalia i se upu Eperu ua faaliliuina o le “agaalofa” po o le “alofa faamaoni.” Na matuā talisapaia e le tupu o Isaraelu anamua o Tavita le alofa faamaoni o le Atua. Talu ai mea na oo iā te ia atoa ai ma lona mafaufau loloto i feutagaʻiga a le Atua ma isi, na ia faapea mai ai ma le mautinoa: “[O] Ieova . . . e tele foʻi lona alofa [“alofa faamaoni,” NW].”—Salamo 145:8.
Mātauliaina o Tagata Faamaoni o le Atua
3, 4. (a) Ua faapefea ona fesoasoani le Salamo 145 iā i tatou e mātaulia tagata faamaoni o Ieova? (e) E faapefea ona “faamanuia” le Atua e ona tagata faamaoni?
3 Na faapea mai Hana, le tinā o le perofeta o Samuelu e faatatau iā Ieova le Atua: “E leoleo e ia vae o ona tagata paia.” (1 Samuelu 2:9) O ai na “tagata paia” po o tagata faamaoni? Ua aumaia e le tupu o Tavita le tali. Ina ua uma ona ia faaneenee i uiga matagofie o Ieova, ua ia faapea mai: “E faamanuia atu foʻi iā te oe ou tagata faamaoni.” (Salamo 145:10, NW) Atonu e te ono tōmanatu pe faapefea ona faamanuia atu tagata i le Atua. E latou te faia, e ala i le viiaina o ia po o le talanoa i mea lelei e faatatau iā te ia.
4 E mātauliaina tagata faamaoni o Ieova ona latou te faaaogā o latou fofoga e faia ai talanoaga lelei e faatatau iā te ia. O ā mea e masani ona faaautū i ai a latou talanoaga i a latou faatasitasiga faasamasamanoa ma taimi o sauniga faa-Kerisiano? O le mea moni, e talanoa e faatatau i le Malo o Ieova! E ioe auauna faamaoni a le Atua i le manatu o Tavita, o lē na pese: “E tautalatala atu i latou i le mamalu o lou malo, ma taʻutaʻu atu i lou mana.”—Salamo 145:11.
5. E faapefea ona tatou iloa e manatu mai Ieova i ona tagata faamaoni pe a latou faia talanoaga lelei e uiga iā te ia?
5 Pe e faafofoga Ieova pe a vivii atu ona tagata faamaoni iā te ia? Ioe, e faafofoga mai o ia i mea o latou fai atu ai. I se valoaga e fesootaʻi atu i le tapuaʻiga moni i o tatou aso, na tusi Malaki: “Ona fetautalatalaaʻi lea ē na matataʻu iā Ieova; ua liliu mai foʻi e Ieova ona fofoga, ma ua faafofoga mai; ona tusia lea o le tusi e faamanatu i ona luma, mo ē matataʻu iā Ieova, ma mafaufau i lona suafa.” (Malaki 3:16) E fiafia le finagalo o Ieova pe a faia e ona tagata faamaoni talanoaga lelei e uiga iā te ia ma na te manatuaina i latou.
6. O ā gaoioiga e fesoasoani iā i tatou e mātaulia ai tagata faamaoni o le Atua?
6 E mātaulia foʻi auauna faamaoni a Ieova e ala i lo latou lototetele ma tausolomua e talanoa atu i tagata e lē o ni tagata tapuaʻi o le Atua moni. E mautinoa, o tagata faamaoni o le Atua ua latou “faailoa atu i le fanau a tagata ana mea mamana, ma le mamalu matagofie o lona malo.” (Salamo 145:12) Po o e saʻilia ea ma faaaogā avanoa uma e talanoa atu ai i tagata e te lē masani i ai e uiga i le pulega a Ieova? E lē pei o malo faaletagata ia ua toeitiiti nei ona aveesea lea, ae o lana pulega e faavavau. (1 Timoteo 1:17) Ua puupuu le taimi o totoe mo tagata e aʻoaʻoina ai i latou e faatatau i le pulega tautupu a Ieova e faavavau ma avea o nisi e lagolagoina lana pulega. Na pese Tavita: “O lou malo o le malo lea e faavavau lava; ma lau pule e au tupulaga lava lea.”—Salamo 145:13.
7, 8. O le ā na tupu i le 1914, ma o le ā le faamaoniga e iloa ai ua pule le Atua i le taimi nei e ala i le Malo o lona Alo?
7 Ua iai se isi māfuaaga e ao ai ona tautala atu e uiga i le pulega a Ieova talu mai le 1914. I lenā tausaga, na faavaeina ai e le Atua i le lagi le Malo faa-Mesia ma na avea ai Iesu Keriso le Alo o Tavita ma tupu. O lea la, na faataunuuina e Ieova lana folafolaga e faapea, o le a faatumauina e faavavau le pulega a Tavita.—2 Samuelu 7:12, 13; Luka 1:32, 33.
8 O le faamaoniga e iloa ai ua pule Ieova i le taimi nei, e ala i le Malo o lona Alo, o Iesu Keriso, o le faataunuuina lea o le faailoga o le faatasi mai o Iesu. O le vala sili ona mataʻina o lenā faailoga, o le galuega lea na valoia e Iesu e faia e tagata faamaoni uma o le Atua ina ua ia fetalai: “E talaʻiina atu foʻi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:3-14) Talu ai o loo maelega tagata faamaoni o le Atua e faataunuu lenā valoaga, ua sili atu nei i le ono miliona tane, fafine ma tamaiti o loo faia so latou sao i lenei galuega tutasi e lē toe faia lava. Ua toe nei o se aga ona oo mai lea o le iʻuga o i latou uma lava o ē tetee i le Malo o Ieova.—Faaaliga 11:15, 18.
Faamanuiaga Mai le Pule Silisili Ese a Ieova
9, 10. O le ā le eseesega o Ieova ma pule faaletagata?
9 Pe afai o i tatou o ni Kerisiano tuuina atu, ua tatou maua le tele o faamanuiaga mai i la tatou faiā ma le Alii o Ieova. (Salamo 71:5; 116:12) O se faaaʻoaʻoga, talu ai tatou te matataʻu i le Atua ma fai le amiotonu, ua tatou olioli ai la i lana faamaoniga ma ua tatou vavalalata ma ia i le itu faaleagaga. (Galuega 10:34, 35; Iakopo 4:8) O le eseesega, o pule faaletagata e masani ona auaumea atu i tagata lauiloa e pei o taʻitaʻi ʻau, tagata faipisinisi mauʻoa po o tagata taʻutaʻua tau taaloga ma tau faafiafiaga. E tusa ai ma se nusipepa i Aferika e taʻua o le Sowetan, na faapea mai ai se tagata maualuga o le malo e uiga i vaipanoa e matitiva tele i lona atunuu: “Ua ou malamalama lelei i le māfuaaga e lē fia ō ai le toʻatele o i matou i na nofoaga. Talu ai matou te mananaʻo ina ia faagalo le iai o na tulaga. E faatigā i o matou lotofuatiaifo ma matou te māsiasi ai ona o le taugatā o taavale o loo matou feoaʻi ai.”
10 O le mea moni, o loo manatu mamafa nisi pule ina ia lelei le tulaga o tagata o o latou atunuu. Peitaʻi, e oo lava i pule e sili ona lelei, latou te lē o masani lelei ma o latou tagatānuu. E mautinoa, tatou te ono fesili faapea: Pe iai ea se pule o matuā silasila alofa i ona tagatānuu uma ma e vave lava ona ia fesoasoani i tagata i taimi o faalavelave? Ioe, e iai. Na tusi Tavita: “E taofia i luga e Ieova atoa uma ē paʻūʻū; o ia foʻi lē faatusaʻoina o ē ua faanoʻunoʻu uma lava.”—Salamo 145:14.
11. O ā tofotofoga ma puapuaga e oo i tagata faamaoni o le Atua, ma o le ā le fesoasoani ua latou maua?
11 E tele tofotofoga ma mala e oo i tagata faamaoni o Ieova le Atua ona o o latou tulaga lē lelei atoatoa aemaise ai o loo latou soifua i se lalolagi o loo nofo toʻilalo i le pule a Satani, lē o “loo leaga.” (1 Ioane 5:19; Salamo 34:19) Ua sauāina Kerisiano. O nisi ua mafatia i ni maʻi faaumiumi po o le maliu foʻi o se tasi. I nisi taimi, o mea sesē a tagata faamaoni o Ieova atonu e māfua ai ona latou ‘faanoʻunoʻu’ i le lotomafatia. Peitaʻi, e tusa lava po o ā tofotofoga po o puapuaga e oo iā i latou, ae ua nofo sauni Ieova e faamāfanafana ma faamalosia faaleagaga i latou. E faapena foʻi ona naunau le tupu o Iesu Keriso i ona tagatānuu faamaoni.—Salamo 72:12-14.
Taumafa Faamalieloto i Aso e Tatau Ai
12, 13. Pe faapefea ona faamalieina e Ieova manaʻoga o foafoaga ola po o “mea ola uma lava”?
12 Talu ai ona e alofa faamaoni Ieova, ua ia faamalieina manaʻoga uma o ana auauna. E aofia ai le faamalieina i taumafa e aogā mo le soifua. Na tusi le tupu o Tavita: “E faasaga atu iā te oe [Ieova e] mata o mea uma lava; e te avatua foʻi a latou mea e ʻai i ona aso e tatau ai. O loo e faamafola lou aao, ma faamaoona le manaʻo o mea ola uma lava.” (Salamo 145:15, 16) E oo lava i taimi o mala, e faatulaga e Ieova tulaga o mea ina ia mafai ai e ona tagata faamaoni ona maua “mea e ʻai e tatau ma le aso.”—Luka 11:3; 12:29, 30.
13 Na taʻua e Tavita e faapea, ua maoona pe faamalieina le manaʻoga o foafoaga ola po o “mea ola uma lava,” e aofia ai ma manu. Pe ana lē seanoa laau lauusiusi o le laueleele ma laau o le sami, e lē mafai e meaola o le sami, manufelelei ma manu tataa o le laueleele ona mānavaina le okesene pe maua meaʻai. (Salamo 104:14) Peitaʻi, o loo silasila Ieova i na foafoaga uma ua faamalieina o latou manaʻo.
14, 15. Ua faapefea ona saunia taumafa faaleagaga i aso nei?
14 E iai manaʻoga faaleagaga o tagata ae e lē faapena manu. (Mataio 5:3) Maʻeu le matagofie o le auala o loo faamalieina ai e Ieova manaʻoga faaleagaga o ona tagata faamaoni! A o lumanaʻi lona maliu, na folafola ai e Iesu e faapea, o le a saunia e le “auauna faamaoni ma le mafaufau” mo ona soo “mea e ʻai i ona itu aso.” (Mataio 24:45) Ua faia aʻe lenā vasega o le auauna i aso nei i le vaega totoe faauuina o le 144,000. E ala iā i latou, ua saunia ai e Ieova le anoanoaʻi o taumafa faaleagaga.
15 O se faaaʻoaʻoga, ua mauaina e le toʻatele o tagata o Ieova aogā mai faaliliuga fou ma le saʻo o le Tusi Paia i a latou lava gagana. Maʻeu se faamanuiaga matagofie ua tatou maua, o le New World Translation of the Holy Scriptures! E lē gata i lea, ua faitau miliona lomiga mo suʻesuʻega faale-Tusi Paia o loo faaauau ona lomia i le sili atu i le 300 gagana. O nei taumafa uma faaleagaga o se faamanuiaga lea i tagata tapuaʻi moni i le lalolagi aoao. O ai e ao ona viia i nei mea uma? O Ieova le Atua. E ala i lona alofa faamaoni, ua ia faaaogā ai le vasega o le auauna ina ia saunia “mea e ʻai i ona aso e tatau ai.” E ala i na sauniuniga, ua faamalieina ai manaʻoga o tagata uma lava i le parataiso faaleagaga i aso nei. E maʻeu le olioli o auauna a Ieova i le faamoemoe ua toeitiiti ona faaliliuina lea o le lalolagi e avea ma parataiso!—Luka 23:42, 43.
16, 17. (a) O ā faaaʻoaʻoga o le mauaina o taumafa faaleagaga i ona aso e tatau ai? (e) Ua faaalia faapefea e le Salamo 145 faalogona o tagata faamaoni o le Atua e faatatau i le finauga autū na lāgā e Satani?
16 Seʻi o tatou iloiloina se faaaʻoaʻoga mataʻina o taumafa faaleagaga na maua i ona aso e tatau ai. I le 1939, na amata ai le Taua Lona Lua a le Lalolagi i Europa. I le tausaga lava lenā e tasi, na iai se mataupu i Le Olomatamata faa-Peretania o Novema 1, na faaulutalaina “Solitū.” O le iʻuga o faamatalaga manino na faailoa atu, na iloa ai e Molimau a Ieova i le lalolagi atoa le manaʻoga o le tausia o le solitū i mataupufai a atunuu fetauaʻi. Na avea lenei mea ma māfuaaga o le ita o malo o itu uma e lua o le taua, lea sa faia mo le ono tausaga, i Molimau a Ieova. Peitaʻi, e ui lava ina faasāina la latou galuega ma sauāina i latou, ae sa faaauau pea e tagata faamaoni o le Atua ona talaʻia le tala lelei o le Malo. Mai i le 1939-1946, na faamanuiaina ai i latou i se faatelega e 157 pasene. E lē gata i lenā, ua fesoasoani tala mataʻina o lo latou faamaoni i le vaitaimi o le taua, i tagata ina ia iloa le tapuaʻiga moni.—Isaia 2:2-4.
17 O taumafa faaleagaga o loo saunia e Ieova, e lē gata e talafeagai ae matuā faamalieina ai. A o aasa fetauaʻiga a atunuu i le Taua Lona Lua a le Lalolagi, na taulaʻi atu ai tagata o Ieova i se mea e sili atu ona tāua na i lo lo latou faaolataga. Na fesoasoani Ieova iā i latou ina ia malamalama e faapea, o le finauga autū, lea e aofia ai le aoao o mea, e fesootaʻi atu i lana pule silisili ese. Maʻeu le faamalieina o le iloa e faapea, ona o lo latou faamaoni, sa mafai ai e Molimau a Ieova taʻitoʻatasi ona faia se vaega itiiti i le faamaonia o le tonu o le pule silisili ese a Ieova ma o Satani o le pepelo! (Faataoto 27:11) I le lē pei o Satani o lē o loo taufaaleaga iā Ieova ma le auala e pule ai, ua faaauau pea e tagata faamaoni o Ieova ona faalauiloa atu i le lautele: “E amiotonu Ieova i ona ala uma; o loo alofa ia i ana mea uma lava na faia.”— Salamo 145:17.
18. O le ā se faaaʻoaʻoga talu ai nei o le mauaina o taumafa faaleagaga i ona aso ua tatau ai ma matuā faamalieina ai?
18 O se isi faaaʻoaʻoga o taumafa faaleagaga i ona aso ua tatau ai ma faamalieina ai, o le tusi Faalatalata Atu iā Ieova, lea na tatalaina i le faitau selau o Tauaofiaga Itumalo “O Ē Maelega e Faalauiloa le Malo” na faia i le lalolagi aoao i le 2002 ma le 2003. Na saunia lenei tusi e le “auauna faamaoni ma le mafaufau” ma na lomia e Molimau a Ieova, o loo taulaʻi atu i uiga matagofie o Ieova e aofia ai ma na o loo taʻua i le Salamo 145. E mautinoa o le a faataunuuina e lenei tusi sili ona lelei se vaega tāua e fesoasoani ai i tagata faamaoni o le Atua ina ia atili faalatalata atu ai iā te ia.
E ao Nei Ona Atili Faalatalata Atu iā Ieova
19. O le ā le taimi tāua ua faaloloʻi mai, ma o le a faapefea ona tatou faafetaiaʻia?
19 Ua latalata tele mai le taimi tāua mo le foʻiaina o le finauga o le pule silisili ese a Ieova. E pei ona valoia i le Esekielu mataupu e 38, ua toe o se aga ona faauma lea e Satani, lana gaoioiga i lona avea ai ma “Koku, o le nuu o Makoku.” O lona uiga o le osofaʻia lea o tagata o Ieova i le lalolagi aoao. O se osofaʻiga malosi a Satani ina ia gausia le faamaoni o tagata o Ieova. O le a matuā valaau atu tagata tapuaʻi a Ieova iā te ia, e oo lava i le alalaga atu mo se fesoasoani i se auala e leʻi faia lava muamua. Po o le a avea ea ma se mea noa lo latou matataʻu i le Atua ma alolofa atu iā te ia? E leai, auā ua faapea mai le Salamo 145: “E latalata mai Ieova iā i latou uma o ē valaau iā te ia, o i latou uma o ē valaau iā te ia ma le faamaoni. E faia e ia le mea e manaʻo i ai o ē matataʻu iā te ia; e faafofoga foʻi o ia i la latou alaga atu, ma faaolaina i latou. E tausi Ieova i ē alolofa atu iā te ia uma lava; a e fano iā te ia o ē amio leaga atoa uma.”—Salamo 145:18-20.
20. O le a faapefea ona faamaonia le moni o upu a le Salamo 145:18-20 i le lumanaʻi lata mai?
20 Maʻeu le faagaeeloto o le a iai i le iloaina o le latalata mai o Ieova ma vaai i lona mana laveaʻi pe a ia faaumatia tagata amioleaga uma lava! I lenā taimi tāua ua latalata tele mai, o le a faafofoga Ieova na o i “latou uma o ē valaau iā te ia ma le faamaoni.” E lē faafofoga o ia i ē faagutugutulua. Ua faaalia manino e le Tusi Paia e faapea, o le a lē aogā le valaau atu a tagata amioleaga i le suafa o le Atua i le taimi mulimuli.—Faataoto 1:28, 29; Mika 3:4; Luka 13:24, 25.
21. E faapefea ona faaalia e tagata faamaoni o Ieova latou te fiafia e faaaogā le suafa o le Atua?
21 Ua sili atu nei ona faanatinati na i lo se isi lava taimi mo i latou e matataʻu iā Ieova ona “valaau iā te ia ma le faamaoni.” E fiafia ona tagata faamaoni e faaaogā lona suafa i a latou tatalo ma a latou tali i sauniga. Latou te faaaogāina le suafa o le Atua i a latou talanoaga faasamasamanoa. E lē gata i lea, latou te faailoa atu ma le lototele le suafa o Ieova i la latou galuega talaʻi.—Roma 10:10, 13-15.
22. Aiseā e tāua ai le teena o uiga ma faanaunauga faalelalolagi?
22 Ina ia tatou maua pea aogā mai i la tatou faiā vavalalata ma Ieova le Atua, e tāua foʻi ona tatou teena mea e faaleagaina ai faaleagaga e pei o le pupū i meafaitino, faafiafiaga lē lelei, agaga lē fia faamagalo ma le lē manatu mamafa i ē matitiva. (1 Ioane 2:15-17; 3:15-17) A lē faasaʻoina na faanaunauga ma amioga, e mafai ona oo atu ai i le faia o se agasala matuiā ma lē maua ai le faamaoniga a Ieova. (1 Ioane 2:1, 2; 3:6) O le ala atamai e ao ona manatua e faapea, o le a faaauau ona alofa faamaoni mai Ieova iā i tatou pe a tatou tumau i le faamaoni iā te ia.—2 Samuelu 22:26.
23. O le ā le lumanaʻi matagofie ua saunia mo tagata faamaoni uma o le Atua?
23 O lea la, seʻi taulaʻi atu o tatou mafaufau i le lumanaʻi matagofie ua saunia mo tagata faamaoni o Ieova. O le faia faapea, ua tatou maua ai le faamoemoe matagofie o le aofia faatasi ma i latou o ē o le a faaneenee, faamanū ma vivii iā Ieova i “aso uma” ma e “faavavau faavavau lava.” (Salamo 145:1, 2) O lea la, seʻi o tatou ‘faatumau iā te i tatou i le alofa o le Atua e oo atu i le ola e faavavau.’ (Iuta 20, 21) A o tatou maua pea aogā mai uiga matagofie o lo tatou Tamā faalelagi, e aofia ai lona alofa faamaoni iā i latou e alolofa iā te ia, tau ina ia pei o tatou manatu o manatu na faaalia e Tavita i upu mulimuli o le Salamo 145: “O vii o Ieova e taʻu atu e loʻu gutu; e faafetaia e tagata uma o lona suafa paia, e faavavau faavavau lava.”
E Faapefea Ona E Tali?
• Ua faapefea ona fesoasoani le Salamo 145 i le mātaulia o tagata faamaoni o le Atua?
• E faapefea e Ieova ona faamaoona le manaʻo o tagata ma mea ola uma?
• Aiseā e ao ai ona tatou atili faalatalata atu iā Ieova?
[Fesili mo le Suʻesuʻega]
[Ata i le itulau 16]
E fiafia tagata faamaoni o le Atua e talanoa i ana gaoioiga mamana
[Ata i le itulau 17]
E lototetele auauna a Ieova e fesoasoani i ē latou te lē masani ina ia latou iloa le mamalu o lana pulega
[Ata i le itulau 18]
Ua saunia e Ieova meaʻai mo foafoaga ola po o “mea ola uma lava“
[Faamatalaga i Ata]
Manu: Parque de la Naturaleza de Cabárceno
[Ata i le itulau 19]
E avatu e Ieova le malosi ma le taʻitaʻiga i ona tagata faamaoni, o ē saʻili i lana fesoasoani e ala i le tatalo