O le Silafaga a le Atua i Ē ua Maliliu

O LE maliu o se tasi e pele e lagona ai le matuā mafatia. O faalogona mafatia, o le tuua toʻatasi ma le faalogona o le toesea e lē mafaatusalia. O le toesea o se tasi e pele ona o le maliu e oo mai ai faalogona mafatia e tusa lava po o le ā le tele o le tamaoaiga po o le tulaga aloaʻia o loo iai, ae e leai se tasi o lenei lalolagi na te mafai ona toe faafoʻisia mai le tagata ua maliu i le ola.

Ae peitaʻi, e ese le silasila a Lē na Foafoaina Mea e faatatau i mataupu. O le foafoaina o le uluaʻi tagata mai le efuefu o le eleele, e mafai foʻi ona ia toe foafoaina se tagata ua maliu. O lea la, ua silasila ai Ieova i tagata ua maliliu e pei o loo soifua. Na fetalai Iesu e tusa ai ma auauna faamaoni anamua ua maliliu e faapea: “Ua ola uma iā te ia,” o lona uiga o loo soifua i latou i le silafaga a le Atua.—Luka 20:38.

A o iai Iesu i le lalolagi, na ia maua le mana e faatūina ai ē ua maliliu. (Ioane 5:21) O lea, ua ia tagaʻi ai e pei ona silasila lona Tamā iā i latou o ē faamaoni ua maliliu. O se faaaʻoaʻoga, ina ua maliu lana uō o Lasalo, na taʻu atu e Iesu i ona aposetolo e faapea: “Ou te alu e fafagu iā te ia.” (Ioane 11:11) O le vaaiga faaletagata ua maliu Lasalo, ae peitaʻi, o le silafaga a Ieova ma Iesu o loo moe Lasalo.

I lalo o le pulega o le Malo o Iesu, o le a “toe tutū mai ē ua amiotonu atoa ma ē ua amiolētonu.” (Galuega 24:15) Mulimuli ane, o i latou ua toe faatūina o le a aʻoaʻoina e le Atua ma maua ai le avanoa e ola e faavavau i le lalolagi.—Ioane 5:28, 29.

Ioe, o le maliu o sē pele e oo mai ai le mafatia ma le faanoanoa, atonu e mo ni tausaga. E ui i lea, o le iloaina o le silafaga a le Atua e faatatau i ē ua maliliu, e faamāfanafanaina ai i tatou ma aumaia ai le faamoemoe.—2 Korinito 1:3, 4.