Talaaga o le Soifuaga

O le Auauna i Isi e Faaitiitia ai Mafatiaga

FAAMATALAINA E JULIÁN ARIAS

I le 1988, na foliga mautū ai laʻu galuega a o 40 oʻu tausaga. Na avea aʻu ma faatonusili i se kamupani faavaomalo i le vaipanoa na ou iai. Na ou mauaina se taavale manaia, se totogi lelei ma se ofisa matagofie i le aai tutotonu o Madrid i Sepania. Na faapea mai foʻi atonu e avea aʻu ma faatonusili o le kamupani i Sepania. Ae e augapiu ma soʻu iloa e faapea o le a matuā suia loʻu olaga.

I SE tasi aso, na faailoa mai ai e laʻu fomaʻi iā te aʻu e faapea, ua ou maua i se maʻi e taʻua o le multiple sclerosis lea e leai se togafiti e aogā i ai. O se tala na nutimomoia ai loʻu loto. Na oo iā te aʻu le fefe ina ua ou faitau i āuga o le maʻi o le multiple sclerosis. * E foliga mai o le a faaauau ona ou tauivi ma lenei toʻatugā i loʻu olaga atoa. O le a faapefea ona ou tausia laʻu avā o Milagros ma si oʻu atalii e tolu tausaga o Ismael? E faapefea ona matou gafatia lenei mea ua tulaʻi mai? A o oʻu tau mānatu i ni tali o na fesili, na ou toe fesagaʻi foʻi ma se isi toʻatugā.

Pe tusa ma se masina talu ona faailoa mai e le fomaʻi loʻu maʻi, na amia ai aʻu e loʻu pule i lona ofisa ma fai mai, e moomia e le kamupani ni tagata “lelei.” Ma e foliga mai atonu e lē lelei se tagata ua maua i se maʻi e faasolosolo ina tigāina—e tusa lava po ua faatoʻā amata le maʻi. O lea, na faamālōlō ai aʻu e loʻu pule. Na uma ai i inā laʻu galuega!

Na ou faatagā foliga atu i loʻu aiga o lea ou te  lototele, ae na ou manatu maʻimau e, pe ana mafai ona ou nofo na o aʻu seʻi tau tōmanatu i le mea ua tupu ma po o le ā le mea o le a ou faia. Sa lofitūina aʻu i faalogona mafatia. O le mea e sili ona tigā ai loʻu loto ona na faafuaseʻi lava ona lē toe manaʻo le kamupani iā te aʻu.

Mauaina o le Malosi i le Mea na Ou Vaivai Ai

O le mea na ou lotofaafetai ai, na iai mea na avea ma faamalosiauga iā te aʻu. Pe tusa ma le 20 tausaga muamua atu, na avea ai aʻu ma Molimau a Ieova. Na sasaa atu oʻu faalogona iā Ieova i le tatalo, ma faailoa atu iā te ia loʻu lē mautonu i le mea o le a ou faia. Na avea si aʻu avā ma faamalosiauga sili iā te aʻu ona o ia foʻi o se Molimau a Ieova. Na ou mauaina foʻi le lagolagosua mai nisi o uō pele na agalelei ma fesoasoani mai, lea na ou matuā talisapaia.—Faataoto 17:17.

Na aogā foʻi iā te aʻu le iai o le agaga fia fesoasoani i isi. Sa ou manaʻo e tausi lelei loʻu atalii, aʻoaʻo, taaalo ma toleni o ia i le galuega talaʻi. O lea la, e lē mafai ona ou siilima. E lē gata i lea, o aʻu o se toeaina i se tasi o faapotopotoga o Molimau a Ieova, ma na moomia e oʻu uso ma tuafāfine laʻu fesoasoani. O le ā se faaaʻoaʻoga ou te faia mo isi pe afai ou te faatagaina oʻu mafatiaga e faavaivaia ai loʻu faatuatua?

Na suia loʻu olaga i le itu faaletino ma le tamaoaiga—na iai aafiaga lelei ma aafiaga lē lelei foʻi. Na ou faalogo o fai le tala a se tasi fomaʻi: “E lē faaumatia e le maʻi le tagata ae e suia e le maʻi le tagata.” Ua ou aʻoaʻoina ai, e iai suiga e lelei.

Muamua lava, ua fesoasoani ‘mea matuitui i loʻu tino’ e atili ai ona ou malamalama i gasegase o isi tagata ma ou faapalepale ai iā i latou. (2 Korinito 12:7) Ua matuā manino ai iā te aʻu faaupuga o loo i le Faataoto 3:5: “Ia e faatuatua iā Ieova ma lou loto atoa; a e aua le faalagolago i lou lava atamai.” E sili atu i lenā, ona o mea ua oo iā te aʻu, ua ou iloa ai mea e sili ona tāua i le olaga, ma le auala e maua ai le lotomalie moni ma faalogona mautinoa. O loo anoanoaʻi pea mea e mafai ona ou faia i le faalapotopotoga a Ieova. Ua ou iloa ai le moni o fetalaiga a Iesu: “E sili le manuia o lē na te foaʻi atu, i lo lē na te talia mai.”—Galuega 20:35.

Se Olaga Fou

E leʻi leva talu ona ou maʻi, ae valaaulia loa aʻu i se seminā i Madrid e aʻoaʻo ai Kerisiano o loo galulue tauofo, ina ia faaleleia le auala e galulue soosootauau ai fomaʻi ma tagata Molimau a Ieova o loo latou togafitia. Na tofia mulimuli ane uso na tauofo, e avea ma Komiti o Fesootaʻiga Faafomaʻi. Na fetaui lelei le taimi na fai ai lenā seminā. Ua ou maua ai se galuega e sili ona lelei lea ua matuā faafiafiaina ai aʻu na i lo o se isi lava galuega i le lalolagi.

Na matou aʻoaʻoina i le seminā, e ao i le Komiti o Fesootaʻiga Faafomaʻi ona asiasi atu i fomaʻi ma saunia ni faamatalaga mo ē o galulue i le falemaʻi ma le faamoemoe e faaleleia le auala e felagolagomaʻi ai ma ʻalofia ai foʻi ni feeseeseaʻiga. E fesoasoani komiti i tagata Molimau a Ieova auā le saʻilia o fomaʻi e lotomalilie e faatinoina togafitiga faafomaʻi, e aunoa ma le toto. Talu ai e leai soʻu poto faafomaʻi, sa moomia ai la ona ou aʻoaʻoina upu ma mataupu faafomaʻi atoa foʻi ma faatulagaga a le falemaʻi. E ui i lea, na suia le mea e taulaʻi atu ai loʻu olaga ona o le seminā, ma ou maua ai se luʻi fou lea na ou fiafia i ai.

Faamalieina Ona o Asiasiga i Falemaʻi

E ui ina faasolosolo mālie le tigāina o loʻu maʻi, ae na faateleina oʻu tiutefai i le Komiti o  Fesootaʻiga Faafomaʻi. Talu ai na maua laʻu penisione ona o loʻu maʻi, na mafai ai la ona ou asiasi atu i falemaʻi. Na faigofie atu ma aogā nei asiasiga e ese mai le mea na ou manatu i ai, e ui na iai nai mea na faalētonu ai. O le taimi lenā na amata ai ona ou faaaogāina se nofoa faataavalevale, ae e lē o se faafitauli matuiā tele. E masani lava ona ma ō faatasi ma se isi uso o le komiti. E lē gata i lea, ua masani foʻi fomaʻi e talanoa ma tagata e faaaogāina nofoa faataavalevale. I nisi taimi, e foliga mai ai e sili atu lo latou faalogo ma lo latou amanaʻiaina o aʻu, auā ua vaavaai mai i loʻu tautigā e asiasi atu iā i latou.

Ua faitau selau fomaʻi ua ou asiasi i ai i le faagasologa o le sefulu tausaga ua teʻa. Na iai fomaʻi na naunau e fesoasoani mai, ina ua faatoʻā amata a matou asiasiga. E iai se fomaʻi e faatinoina taotoga o fatu e suafa iā Juan Duarte i Madrid, na vave lava ona lagolagosua mai, ona o lona faaaloalo i lotofuatiaifo o tagata gasegase. Talu mai lenā taimi, e sili atu ma le 200 taotoga e aunoa ma le toto ua faatinoina e Juan i Molimau a Ieova mai vaega eseese o Sepania. A o faagasolo la tausaga, ua faatuputeleina ai le aofaʻiga o fomaʻi ua faatinoina taotoga e aunoa ma le toto. Atonu o se tasi o māfuaaga o a matou asiasiga faisoo, ae o le māfuaaga autū ona o le agaʻigaʻi i luma o le poto faafomaʻi atoa ai foʻi ma iʻuga lelei o taotoga e lē faaaogāina ai le toto. Ma ua matou mautinoa ai ua faamanuiaina e Ieova a matou taumafaiga.

Ae o se vala na matuā faalaeiauina ai aʻu, o le tali lelei mai o fomaʻi na gafa faapitoa ma taotoga o fatu o tamaiti. E lua tausaga na matou asiasi atu ai i ni fomaʻi tipitipi se toʻalua ma ē na latou galulue faatasi e faia tui moe o tagata. Na matou tuuina atu iā i latou lomiga faafomaʻi e faamatala ai mea ua faia e isi fomaʻi i le matātā lava lea e tasi. Na tauia a matou taumafaiga i le 1999 i se Fono Faafomaʻi i Taotoga o Fatu o Tamaiti. E ala i le taʻitaʻiga lelei a se fomaʻi tipitipi mai Egelani, na faatino ai e fomaʻi tipitipi nei e toʻalua se taotoga e sili ona faigatā i se pepe a se ulugalii Molimau a Ieova, lea na moomia ona faaleleia se vaega o lona fatu. * Na matou olioli ma mātua o le pepe ina ua sau se tasi o fomaʻi tipitipi ma faailoa mai, ua taulau manuia le taotoga ma na latou amanaʻiaina foʻi lotofuatiaifo o le aiga. I le taimi nei, ua masani ona talia e nei fomaʻi e toʻalua taotoga o Molimau a Ieova mai vaega eseese o Sepania.

O le mea e sili ona faagaeeloto iā te aʻu i tulaga faapenei, o loʻu iloa lea e mafai ona ou fesoasoani i oʻu uso Kerisiano. Afai latou te faafesootaʻi maia le Komiti o Fesootaʻiga Faafomaʻi, e masani lava o se taimi e sili ona faigatā mo i latou. Ua moomia ona fai sa latou taotoga, a o lenei e lē o lagolagoina pe e lē mafai foʻi ona faatinoina e fomaʻi o le falemaʻi, a latou taotoga e aunoa ma le toto. Ae o se mapusaga sili i uso pe a latou iloaina e iai fomaʻi tipitipi i matātā eseese i Madrid, e mafai ona faatinoina la latou talosaga. Ua ou vaaitino lava aʻu i suiga o foliga vaaia o uso a o matou iai i le falemaʻi, muamua na atuatuvale ae uma ane, ua toʻafilemu.

 O Faamasino ma Mataupu Faafomaʻi

Na asiasi atu foʻi uso o le Komiti o Fesootaʻiga Faafomaʻi i faamasino i tausaga talu ai nei. I asiasiga na, na matou tuuina atu ai iā i latou le lomiga faa-Peretania Tausiga Faaleaiga ma Faafomaʻi o Molimau a Ieova, lea na saunia faapitoa mo tagata mautofiga faapena, ina ia latou iloa ai la matou talitonuga e faatatau i le toto ma isi togafitiga faafomaʻi o loo iai e lē faaaogāina ai le toto. Na iai se manaʻoga tele mo asiasiga faapena, auā foʻi i taimi ua teʻa, na masani ona tuuina atu ai e le ʻaufaamasino i Sepania, se faatagaga i fomaʻi e tui ai le toto e aunoa ma le ioe i ai o le maʻi.

E ese le mataʻina o ofisa o le ʻaufaamasino mai i laʻu uluaʻi asiasiga, na ou lagona ai le faatauvaa a o oʻu alu atu i loʻu nofoa. Ma na atili ai ona ou māsiasi ina ua faafuaseʻi lava ona ou paʻū mai i loʻu nofoa ona o se mea na tupu. Na ō mai nai tagata faamasino ma loia ma fesoasoani mai iā te aʻu ae na matuā mā lava laʻu fee.

E ui lava e leʻi mautonu le ʻaufaamasino po o le ā le māfuaaga o la matou asiasiga, ae na tausaafia pea uiga o le toʻatele o i latou. O le faamasino muamua na ou asia, sa tōmanatu i lo matou tulaga, ma na faapea mai e fiafia e talanoa umi ma i matou. I la matou asiasiga na sosoo ai, na susū mai lenā faamasino ma toso loʻu nofoa i totonu o lona ofisa ma faalogologo lelei mai iā te aʻu. Ona o iʻuga lelei o lenā uluaʻi asiasiga, na faamalosiau ai i matou ma aʻu aumea ina ia tuu i tua o matou lagona fefe. E leʻi umi lava ae vaaia loa nisi iʻuga lelei.

I le tausaga lava lenā, na matou tuua ai le lomiga Tausiga Faaleaiga, i se alii faamasino na talileleia i matou ma na faapea mai o le a faitau i ai. Na ou tuuina i ai le numera o laʻu telefoni neʻi tulaʻi mai se faalavelave faafuaseʻi ma moomia ona faafesootaʻi mai i matou. Ina ua mavae ni vaiaso se lua, na vili mai ai lenā alii faamasino ma fai mai na talosaga atu se fomaʻi tipitipi iā te ia e avatu se faatagaga e tui ai le toto i se Molimau a Ieova ua moomia ona taoto. Na faapea mai le alii faamasino e manaʻo e matou te fesoasoani iā te ia e saʻili se auala e amanaʻia ai le talosaga a le gasegase Molimau a Ieova ina ia lē faaaogāina le toto. Sa faigofie ona matou mauaina se isi falemaʻi lea na faia ai e fomaʻi tipitipi le taotoga e aunoa ma le toto. Na olioli le faamasino ina ua iloa le iʻuga lelei, ma na faamautinoa mai o le a ia saʻilia ni auala faapena i le lumanaʻi.

A o oʻu asiasi atu i falemaʻi, na masani ona fesiligia  i matou i mataupu faafomaʻi, talu ai na matou mananaʻo e faaaloalogia e fomaʻi aiā tatau ma lotofuatiaifo o tagata mamaʻi. Na valaaulia aʻu e se tasi falemaʻi na matou galulue faatasi i Madrid, ou te auai atu i se aʻoga i mataupu faafomaʻi. O lea, na mafai ai ona ou faamatalaina ai la matou vaaiga faale-Tusi Paia i le tele o tagata atamamai i mataupu faafomaʻi. Na mafai ai foʻi ona ou malamalama i le tele o filifiliga faigatā e tatau ona faia e fomaʻi.

O se tasi o alii faiaʻoga o lenā aʻoga o se polofesa e suafa iā Diego Gracia, e masani ona ia faamaopoopoina se aʻoga faapitoa aloaʻia i mataupu faafomaʻi mo fomaʻi i Sepania, ma e matuā lagolagoina e lenei alii fomaʻi a matou aiā tatau e tusa ai ma le tuiina o le toto. * Ona o lo matou asiasi atu soo iā te ia, na maua ai e le ofisa o le lālā o Molimau a Ieova i Sepania, se valaaulia ina ia faamatala atu ai e nisi o ona sui, o matou talitonuga i tagata aʻoʻoga a le polofesa o Diego. O nisi o tagata aʻoʻoga na, ua manatu iai o fomaʻi e aupito i lelei i Sepania.

Taliaina o Loʻu Tulaga Moni

E moni, e ui lava ou te auai i lenei galuega faamalieloto auā se lelei mo oʻu uso talitonu, peitaʻi e lē o foʻia ai oʻu faafitauli. O loo faasolosolo ina tigāina loʻu maʻi. Ae o le mea e faafetai ai, o loo malosi pea loʻu mafaufau. O loo mafai pea ona faatino oʻu tiute tauave ona o le fesoasoani mai a si aʻu avā ma si oʻu atalii. E lē mafai ona ou faia lenā mea, pe ana lē seanoa lo la lagolagosua mai. Ua lē toe mafai ona ou faamauina pe faamaulu foʻi se ofu. O le mea e sili ona ou fiafia ai, e ma te ō ma loʻu atalii o Ismael e talaʻi i Aso Toonai, ma e na te tosoina loʻu nofoa ina ia mafai ona ou talanoa atu i tagata. O loo faaauau foʻi ona ou faatinoina oʻu tiute o se toeaina i le faapotopotoga.

I tausaga e 12 ua teʻa atu, na ou fesagaʻi ai ma tulaga ogaoga. Na i lo le tigā ona o loʻu mai, e iai taimi e sili atu le tigā o loʻu loto i le vaai atu i si oʻu aiga ma le auala ua aafia ai i laʻua i loʻu maʻi. Ou te iloa e la te mafatia foʻi, e ui e lē o faailoa mai iā te aʻu. E leʻi leva ona maliu atu le tinā o laʻu ava, ma o le tausaga foʻi lenā na maliu ai loʻu tamā. O le tausaga foʻi lenā na ou faaaogāina ai le nofoa faataavalevale. Na maliu loʻu tamā i se maʻi tigāina a o matou nonofo faatasi. Na tausia e si aʻu avā loʻu tamā, ma na oo iā Milagros faalogona faapea o loo tilotilo i le mea o le a oo iā te aʻu i le lumanaʻi.

O le mea e fiafia ai, o loo galulue faatasi si o matou aiga a o gafa ma tulaga faigatā. Na i lo le nofo i se nofoa o se faatonusili i se kamupani, ae ua ou nofo nei i se nofoa faataavalevale. E ui i lea, ua sili atu le lelei o loʻu olaga i le taimi nei auā ua taulaʻi atoatoa atu e auauna mo isi. O le foaʻi atu i isi e faaitiitia ai mafatiaga, ma e faamaoni Ieova i lana folafolaga e na te faamalosia i tatou i taimi faigatā. Ua mafai ona ou faapea atu e pei o Paulo: “Ou te mafaia mea uma lava ona o ia ua faamalosi mai iā te aʻu.”—Filipi 4:13.

[Faamatalaga pito i lalo]

[Pusa i le itulau 24]

Le Manatu a le Avā

O se mea e faigatā tele iā te aʻu, le nonofo faatasi ma se tagata o loo maua i le maʻi o le multiple sclerosis. E tatau ona ou magafagafa i fuafuaga ou te faia ma taumafai e aua le soona popole i le lumanaʻi. (Mataio 6:34) E ui i lea, e tele uiga lelei e mafai ona faaalia e se tasi o loo iai i tulaga faigatā. Ua sili atu ona lelei la ma faaipoipoga, ma ua atili foʻi ona ou vavalalata ai iā Ieova. E ese le faamalosiau iā te aʻu o tala o soifuaga o isi o loo iai i tulaga mafatia. E tutusa lo ma olioli ma Julián ona o le auaunaga tāua o loo faatinoina e le tamā mo o matou uso, ma ua ou iloa e lē mafai ona tuulafoaʻia i matou e Ieova e ui e tofu lava le aso ma lona luʻi.

[Pusa i le itulau 24]

Le Manatu o le Atalii

O se faaaʻoaʻoga lelei mo aʻu le onosai o loʻu tamā ma lona agaga taumafai, ma ou te lagona o loo oʻu faia se mea aogā pe a ou tosoina lona nofoa. Ou te iloa, e lē mafai ona ou faia mea uma ou te manaʻo i ai. O aʻu o se talavou peitaʻi, ou te fia iai i le Komiti o Fesootaʻiga Faafomaʻi pe a oo ina ou matua. Ou te iloa mai folafolaga a le Tusi Paia e lē tumau pea mafatiaga ma e sili atu le matuiā o mafatiaga o le toʻatele o uso ma tuafāfine.

[Ata i le itulau 22]

E faamalosiau tele laʻu avā iā te aʻu

[Ata i le itulau 23]

Talatalanoa ma le fomaʻi tipitipi o fatu, o Juan Duarte

[Ata i le itulau 25]

E ma te fiafia e galulue faatasi ma loʻu atalii i le faiva