Po o Silafia e Ieova Mea o E Faia?

O LE ā lau tali i lenā fesili? E toʻatele o le a faapea mai: ‘Ou te talitonu e mātaulia e le Atua ia mea na faataunuuina e tane e pei o Mose, Kitiona, ma Tavita, ae ou te lē mautinoa pe fiafia o ia i so o se mea e mafai ona ou faia. E mautinoa lava ou te lē pei o Mose, Kitiona, ma Tavita.’

E moni na faia e ni tane faamaoni i taimi o le Tusi Paia ni gaoioiga mataʻiina o le faatuatua. Na latou ‘faatoʻilaloina malo, pupuni gutu o leona, tatalia le malosi o le afi, ma na sao ai mai le mata o le pelu.’ (Eperu 11:33, 34) A o isi, na faaalia lo latou faatuatua i nisi o auala e faalēiloga, ma ua faamautinoa mai e le Tusi Paia e faapea, e mātaulia foʻi e le Atua a latou gaoioiga o le faatuatua. O se faataʻitaʻiga, seʻi manatu i ni faaaʻoaʻoga i le Tusi Paia e uiga i se leoleo mamoe, se perofeta, ma se fafine ua oti lana tane.

Ua Osia e se Leoleo Mamoe se Taulaga

O le ā se mea e te manatua e uiga iā Apelu, le atalii lona lua o Atamu ma Eva? E te ono manatua na maliu o ia i se maliu faamaturo, o se mea e foliga mai e seāseā tupu i se isi o i tatou. Ae e iai se isi mea na muaʻi mātauina e le Atua iā Apelu.

I se tasi aso, na ave ai e Apelu ia manu e sili ona lelei o lana lafu ma osi atu ai le taulaga i le Atua. I aso nei, atonu e manatu i lana taulaga o se mea e matuā faatauvaa lava, ae na silafia e Ieova lea taulaga ma faaalia lona finagalo malie i ai. Ae peitaʻi, e lē ona pau lenā. I le toetoe lava fā afe tausaga mulimuli ane, na faagaeeina ai e Ieova le aposetolo o Paulo e tusi e uiga i lenā mea i le tusi o Eperu. Ina ua mavae le tele o tausaga, e leʻi galo i le Atua lenā taulaga faatauvaa!—Eperu 6:10; 11:4.

Na faapefea ona filifilia e Apelu le ituaiga o taulaga e ofoina atu? E lē o taʻua mai e le Tusi Paia, ae atonu sa manatunatu loloto o ia i lea mataupu. O ia o se leoleo mamoe, o lea, e faatalitalia lava la lona ofoina atu o ni manu mai lana lafu. O lea la, seʻi mātau, na ia ofoina atu manu aupito sili ona lelei, “o ē pepeti ai lava.” (Kenese 4:4) E ono manatu foʻi e faapea, sa ia mafaufau loloto i fetalaiga a Ieova i le gata i le faatoʻaga o Etena: “Ou te faatupuina le feitagaʻi iā te oulua ma le fafine, o lau fanau foʻi ma lana fanau; na te tuʻimomomoina lou ulu, a o oe e te tuʻimomomoina lona mulivae.” (Kenese 3:15; Faaaliga 12:9) E ui e leʻi malamalama i le faailoaina mai o “le fafine” ma lana “fanau,” atonu sa iloa e Apelu e faapea, o le ‘tuʻimomomoina o le mulivae’ o le fanau a le fafine, e tatau ona faamaligiina ai le toto. Sa ia mautinoa lelei e leai se mea e sili atu ona tāua na i lo o se meaola e iai le mānava ma le ola. O le mea tāua lava la, sa sili ona talafeagai le taulaga na ia ofoina atu.

I le pei o Apelu, ua ofoina atu e Kerisiano i aso nei ia taulaga i le Atua. E latou te lē o ofoina atu ia uluaʻi tama o le lafu, a o “le fua lea o tatou laugutu, o loo faafetai atu i lona suafa.” (Eperu 13:15) Pe a tatou talanoa atu i isi e uiga i lo tatou faatuatua, ua tatou faafetai pe vivii atu ai i le Atua.

 Pe e te manaʻo e faaleleia le tulaga o au taulaga o viiga? Ia, seʻi mafaufau lelei la i manaʻoga o tagata i lau oganuu. O ā mea o loo latou manatu mamafa i ai? O ā mea e latou te fiafia i ai? O ā ni vala o le feʻau o le Tusi Paia o le a faaoso ai lo latou naunau? I taimi taʻitasi e te molimau atu ai, ia iloilo tagata na e asiasi atu i ai ma le manatu ina ia faaleleia atili ai lou tomai i le molimau atu. Ma afai e te talanoa e uiga iā Ieova, ia faia ma le loto faamaoni. Ia avea moni lau taulaga o se “taulaga o le viiga.”

Talaʻi se Perofeta i Tuaoi e Lē Talileleia

Seʻi manatu i le perofeta o Enoka. Atonu sa na o ia lava le molimau a Ieova le Atua na iai. Pe e pei oe o Enoka, e na o oe lava le tagata o lou aiga o loo auauna faamaoni iā Ieova? Pe e na o oe le tamaitiiti aʻoga i le vasega, pe e na o oe se tagata faigaluega i lou fale faigaluega e pipii atu i mataupu silisili o le Tusi Paia? Afai o lea, atonu la o loo e fesagaʻi ma ni omiga. Atonu o loo uunaʻia oe e au uō, tauaiga, tamaiti o le vasega, po o ē tou te faigaluega faatasi ina ia e solia tulafono a le Atua. Atonu e latou te faapea mai: “E lē o iloa mai lava e se tasi le mea o e faia. E matou te lē taʻuina i se isi.” E latou te ono faapea mai, o se mea valea le popole fua i tapulaa tau amio a le Tusi Paia auā e lē o amanaia e le Atua mea nā e te faia. I le feita ona e lē pei ou manatu o o latou manatu ma faia mea o loo latou faia, atonu e latou te faia ai mea uma i lo latou malosi ina ia faavaivaia ai lou tetee atu.

O le mea moni, e lē faigofie ona faafesagaʻia na omiga, ae e lē faapea e lē mafai. Seʻi mafaufau iā Enoka, o lona fitu lea o tupulaga talu mai Atamu. (Iuta 14) E oo ane i le taimi na fanau ai Enoka, ua lē toe lagona e le toʻatele o tagata le leaga o mea leaga. Sa latou tautala i upu matagā; sa latou faia amio “faalēmataʻu.” (Iuta 15) O a latou gaoioiga ua pei lava o mea o loo faia e le toʻatele o tagata i aso nei.

Na faapefea ona feagai Enoka ma na mea? E tatou te naunau lava e fia iloa le tali o lenā fesili i aso nei. E ui lava atonu sa na o Enoka le tagata o le lalolagi i na aso sa tapuaʻi iā Ieova, ae o le mea moni, sa lē na o ia. Sa feoaʻi Enoka ma le Atua.—Kenese 5:22.

O le sini o le olaga o Enoka, ia faafiafia le Atua. Sa ia iloa o le feoaʻi ma le Atua, e iai sona uiga e sili atu na i lo o le tau ina ola i se olaga mamā tau amio. Sa faatalitalia o ia e Ieova e talaʻi. (Iuta 14, 15) Sa manaʻomia ona lapataʻia tagata e faapea, o loo mātauina uma a latou amio faalēmataʻu. Sa faaauau ona feoaʻi Enoka ma le Atua mo le sili atu i le 300 tausaga, e matuā sili atu ona umi le taimi na onosai ai na i lo o se tasi o i tatou. Sa feoaʻi pea lava o ia ma le Atua seʻia oo i lona maliu.—Kenese 5:23, 24.

Ua tofia foʻi i tatou e talaʻi e pei o Enoka. (Mataio 24:14) E lē gata i le talaʻi mai lea fale i lea fale, ae tatou te taumafai foʻi ia oo atu ma le tala lelei i o tatou tauaiga, tagata faipisinisi tatou te masani, ma uō i le vasega. Ae peitaʻi, i nisi taimi, atonu tatou te faatalatū foʻi e talaʻi atu ma le lototele. Po o le mea lenā o tupu iā te oe? Aua le fefe. Ia faataʻitaʻi i uluaʻi Kerisiano, ma tatalo i le Atua e foaʻi mai le lototele. (Galuega 4:29) Ia manatua, o le faaauau pea ona lua feoaʻi ma le Atua, e te lē savali ai na o oe.

Saunia e se Fafine ua Oti Lana Tane se Taumafataga

Seʻi mafaufau i se fafine ua oti lana tane e lē o taʻua mai le igoa na ia maua ni faamanuiaga se lua ona o le saunia o se taumafataga faigofie! E lē o ia o se Isaraelu, ae o se fafine ese o lē sa soifua i lona sefulu o senituri T.L.M. i le aai o Sarefata. I le faaiʻuga o se vaitaimi umi o lā mala ma le oge, sa itiiti ai lava sina meaʻai a le fafine na iai. Na pau lava mea na totoe iā te ia o sina luutaga o falaoamata, ma sina suāuu  itiiti e saunia ai sa la taumafataga mulimuli mo ia ma si ana tama.

I le taimi lea, na alu atu ai loa se tagata asiasi. O le perofeta a le Atua o Elia, o lē na talosaga atu i le fafine ina ia aumai sina meaʻai ma ia. Sa laʻitiiti lava le meaʻai na iai e toetoe a lē lava ai o ia ma si ana tama, ma o le mea moni, e leai se mea na sili ai mo le tagata asiasi. Ae na faamautinoa atu e Elia iā te ia le afioga a Ieova, afai e na te faasoa mai ana meaʻai iā te ia, o le a lē fia aai i laʻua ma lana tama. Sa manaʻomia le faatuatua ina ia talitonu ai, o le a amanaia o ia, le fafine ese ua oti lana tane e le Atua o Isaraelu. Peitaʻi, sa talitonu o ia iā Elia, ma na tauia o ia e Ieova. “Sa lē uma le falaoa i le kate, sa lē faaitiitia foʻi le suāuu i le fagu, e tusa ma le afioga a Ieova na fai atu ai Elia.” Sa maua e lē aunoa e le fafine ma lana tama meaʻai seʻia faaiʻuina le oge.—1 Tupu 17:8-16.

Ae peitaʻi, sa iai se isi faamanuiaga mo le fafine ua oti lana tane. I se tasi taimi ina ua uma lenā vavega, na maʻi tigāina ai le tama a le fafine ma oti ai. I le uunaʻia i le alofa, na ʻaiʻoi atu ai Elia iā Ieova ina ia toe faafoʻisia mai le ola o le tama. (1 Tupu 17:17-24) Sa manaʻomia i lenā mea se vavega e leʻi faia muamua lava. E leai se tala faamauina e uiga i se tasi na faatuina mai muamua! Po o le a toe faaalia ea e Ieova le alofa mutimutivale i lenei fafine ese ua oti lana tane? Sa ia faia faapea. Sa foaʻi atu e Ieova le mana iā Elia e toe faafoʻisia ai le ola o le tama. Sa taʻua e Iesu lenei fafine faamanuiaina i se taimi mulimuli ane: “Sa i Isaraelu i ona pō o Elia, o fafine e toʻatele ua oti a latou tane, . . . a e [na] . . . auina atu Elia i . . . Sarefata le aai o Saitonu, i le fafine ua oti lana tane.”—Luka 4:25, 26.

Ua matuā lē mautū lava le tulaga o le tamaoaiga i aso nei, e oo lava i atunuu mauoloa. Ua vāea e nisi falefaigaluega tetele a latou tagata faigaluega o ē sa avea o ni tagata faigaluega faamaoni mo le tele o tausaga. Ona o le fesagaʻi ma le tulaga o le leai o ni galuega, atonu e tofotofoina ai se Kerisiano ina ia faaalu le tele o le taimi i le galuega, ma le faamoemoe o le a taofia pea o ia e lana kamupani. O le faia faapea, atonu o le a laʻitiiti ai se taimi e auai ai i sauniga faa-Kerisiano, ma faia se sao i le faiva i le fanua, po o le tausia foʻi o manaʻoga faaleagaga ma faalogona o lona aiga. Ae peitaʻi, ua ia manatu e tusa lava po o le ā le tulaga e oo i ai, ae tatau lava ona ia tumau i le galuega.

E tatau ona popole se Kerisiano o loo iai i se tulaga faigatā tau tamaoaiga. Ua faigatā tele ona toe maua ni galuega i aso nei. E lē o taumafai le toʻatele o i tatou ina ia mauʻoa, ae i le pei o le fafine i Sarefata ua oti lana tane, e tatou te mananaʻo ia maua meaʻai mo le aiga. Ae peitaʻi, ua faamanatu mai e le aposetolo o Paulo iā i tatou le mea na fetalai mai ai le Atua: “Ou te lē tuua lava oe, ou te lē tuulafoaʻi lava iā te oe.” O le mea lea tatou te mafai ai ona fai atu ma le mautinoa: “O le Alii [Ieova] o loʻu fesoasoani ia, ou te lē fefe lava i se mea e faia e tagata iā te aʻu.” (Eperu 13:5, 6) Sa faalagolago atoatoa Paulo i lenā folafolaga, ma sa tausia pea o ia e Ieova. O le mea foʻi lenā o le a faia e le Atua mo i tatou pe afai e tatou te lē tuua o ia.

Atonu e tatou te lagona e faapea, e lē taitai lava ona tutusa a tatou galuega ma mea na faia e tagata faaleagaga e pei o Mose, Kitiona, ma Tavita, ae e mafai ona tatou faataʻitaʻi i lo latou faatuatua. E mafai foʻi ona tatou manatua ia gaoioiga faigofie o le faatuatua na faia e Apelu, Enoka, ma le fafine Sarefata ua oti lana tane. E silafia e Ieova galuega uma o le faatuatua, e oo lava i nai mea iti. Pe afai e teena e se tamaitiiti aʻoga e mataʻu i le Atua ni fualaau faasāina e ofo mai e se uō, pe afai e teena e se Kerisiano faigaluega ia faiga lē mamā i galuega, po o le auai foʻi ma le faamaoni o se Molimau matua i sauniga a  le faapotopotoga e ui lava ina vaivai ma lē lelei le soifua mālōlōina, e silafia lava e Ieova na mea uma. Ma e matuā fiafia o ia!—Faataoto 27:11.

Pe E te Mātauina Mea e Faia e Isi?

Ioe, e silafia e Ieova mea tatou te faia. O lea, i le avea o ē faaaʻoaʻo i le Atua, e tatau ona tatou mataalia ia iloa taumafaiga a isi. (Efeso 5:1) Aiseā e lē vaavaai totoʻa ai i faigatā o loo fesagaʻi ma ou uso Kerisiano ina ia auai i sauniga a le faapotopotoga, auai i le faiva i le fanua, e oo lava i a latou gaoioiga i aso faisoo?

Ona faailoa atu lea i ou uso tapuaʻi iā Ieova lou talisapaia o a latou taumafaiga. O le a fiafia i latou ona o lou mātauina o na mea, ma o lou manatu mamafa o le a faamautinoa atu ai iā i latou, e silafia foʻi e Ieova na mea.