“Ia iā te Outou le Lotofuatiaifo Lelei”

E TOʻATELE tagata latou te manatu “e tatau ona mulimuli i o latou lotofuatiaifo pe a faia ni filifiliga.” Ae ina ia avea o tatou lotofuatiaifo ma se taʻitaʻiga e maufaatuatuaina, e manaʻomia ona aʻoaʻoina lelei ina ia iloa le saʻo ma le sesē, ma e tatau ona tatou mātua faaeteete i ona taaʻiga.

Seʻi iloiloina le mea na tupu i se tamāloa e suafa iā Sakaio, e pei ona faamauina i le Tusi Paia. Sa nofo Sakaio i Ieriko, o ia o se ao lafoga sili ma o se tagata mauʻoa. I lana lava taʻutinoga na ia taʻua ai, na faatamaoaigaina o ia ona o ni faigapiʻopiʻo faamalosi—o se faiga sa mautinoa le mafatia ai o isi tagata. Pe sa faaleagaina ea e le lotofuatiaifo o Sakaio o ia e tusa ai ma ana gaoioiga lē tonu? Afai sa faaleagaina, o lona uiga sa ia lē amanaʻiaina lona lotofuatiaifo.—Luka 19:1-7.

Peitaʻi e iai se mea na tulaʻi mai na māfua ai ona toe iloiloina e Sakaio lona tulaga. Na malaga mai Iesu i Ieriko. Sa manaʻo lenei tagata puupuu sasaa o Sakaio e vaai iā te ia, ae sa ia lē mafai ona iloa atu o ia ona o le motu o tagata e toʻatele. O lea sa ia alu atu ai ma peʻa i luga o se laau ina ia ona iloa lelei atu ai. I le faafiafiaina i le naunau sa faaalia e Sakaio, na fetalai atu ai Iesu o le a ia asiasi atu i lona maota. Sa faaalia ma le fiafia e Sakaio lona agaga talimālō i lana mālō faaaloalogia.

O mea sa vaai ma faalogo i ai Sakaio a o aufaatasi ma Iesu, na mafai ona pāʻia ai lona loto ma uunaʻia ai o ia e suia ona ala. Ua ia folafola atu e faapea: “Faauta, le Alii e, o le a ou vaeluaina atu aʻu mea i ē matitiva; afai foʻi ua ou ave mea a se tasi i se ala pepelo, ou te taui atu ai e taʻifā.”—Luka 19:8.

Sa mafai ona faalelei a le lotofuatiaifo o Sakaio, ma sa ia faalogo ma gaoioi loa. Sa telē se iʻuga lelei na oo i ai. Seʻi manatu i faalogona o Sakaio ina ua fetalai atu Iesu iā te ia: “Ua oo mai le faaolataga i le aiga nei i le asō.”—Luka 19:9.

Maʻeu se faaaʻoaʻoga faalaeiau! Ua mafai ona faaalia mai ai e faapea po o le ā lava le auala sa tatou uia i le taimi ua teʻa, e mafai lava ona tatou suia. I le pei o Sakaio e mafai ona tatou uaʻi atu i upu a Iesu o loo faamauina i le Tusi Paia—ma atiina aʻe lo tatou tomai e iloa ai le saʻo ma le sesē. Ona tatou mafai ai lea e pei ona timaʻi mai le aposetolo o Peteru: “Ia iā te outou le loto fuatia ifo lelei.” E mafai ona tatou uaʻi atu i o tatou lotofuatiaifo ua uma ona aʻoaʻoina ma faia le mea saʻo.—1 Pete. 3:16.