O le ā le Tāua o le Alofa?

UA FAAPEA mai le Tusi Paia: “O le mea e manaʻomia i le tagata, o lona alofa lea.” (Faataoto 19:22) O le mea moni, e matuā moomia lava gaoioiga agalelei e uunaia e le alofa. O le upu “alofa” i le Tusi Paia, o nisi taimi e faasino atu i le agalelei lea atonu e faavae aʻe i ni faiā ua uma ona osia, pe atonu sa māfua mai i ni gaoioiga muamua o le agalelei. Ae e lē gata i lea, e aofia ai foʻi ma le faamaoni.

Sa leʻi taulau le tupu o Iuta o Ioasa ona atiina aʻe lea uiga lelei. Sa tatau ona ia matuā faaalia le lotofaafetai i le tuafafine o lona tamā ma lona toʻalua o Ieoiata. A o leʻi atoa se tausaga o Ioasa, na avea le tinā amioleaga o lona tamā ma tupu ma ia fasiotia ai uso uma o Ioasa, o ē suli i le nofoālii. E leʻi taulau ona ia fasiotia Ioasa, talu ai sa natia lelei o ia e le tuafafine o lona tamā ma lona toʻalua o Ieoiata. Sa la aʻoaʻo foʻi o ia i Tulafono a le Atua. Ina ua fitu tausaga o Ioasa, sa faaaogā ai loa e Ieoiata lana pule faaositaulaga e faasalaina ai i le oti le tupu amioleaga o Atalia ae faapaleina Ioasa e fai ma tupu.—2 Nofoaiga a Tupu 22:10–23:15.

Sa pule Ioasa o se tupu talavou amio lelei seʻia oo i le maliu o Ieoiata, ina ua mavae lenā na amata ai loa ona ia liliu atu i tapuaʻiga ifo i tupua. Na auina atu e le Atua Sakaria le atalii o Ieoiata, e lapataʻi iā Ioasa e uiga i lona liliu ese mai i ona ala faamaoni. Na fetogia e Ioasa ia Sakaria i maa. Paga se lē faamaoni na ia faaalia i le aiga na matuā agalelei iā te ia!—2 Nofoaiga a Tupu 24:17-21.

Ua taʻua e le Tusi Paia e faapea: ‘Ua lē manatua e le tupu o Ioasa le alofa o le tamā o [Sakaria] iā te ia, a ua ia fasiotia lona atalii.’ Ua faapea mai Sakaria ina o le a oti: ‘E silasila mai [Ieova], ma na te tauia.’ Sa moni upu a Sakaria, na matuā maʻi Ioasa ma sa fasiotia o ia e ana auauna.—2 Nofoaiga a Tupu 24:17-25.

Na i lo le avea o se tasi e pei o le tupu o Ioasa, o i latou uma e mulimuli i le fautuaga lenei o le a iai se lumanaʻi matagofie: “Aua neʻi teʻa ma oe le alofa ma le faamaoni . . . ona e maua ai lea o le alofa . . . i luma o le Atua, atoa ma tagata.”—Faataoto 3:3, 4.