E Iai se Aogā Sili o le Talisuaga a le Alii mo Oe

PE E iai se aogā ma se uiga tumau o le Talisuaga a le Alii mo oe? Ina ia iloa, seʻi o tatou muaʻi iloiloina le uiga na māfua ai ona faavaeina e Iesu Keriso lenei sauniga faapitoa.

I le pō o Nisani 14, i le 33 T.A., na faapotopoto ai Iesu ma ona aposetolo e toʻa 12 i se potu aupito i luga o se fale i Ierusalema ina ia faamanatuina le Paseka faaletausaga. Ina ua uma ona latou taumafaina le tausamiga o le Paseka, ona tuua loa lea e Iuta le faalata le potu ina ia faalataina Iesu. (Ioane 13:21, 26-30) O lea, na faavaeina ai loa e Iesu ma ona soo e toʻa 11 na totoe “le talisuaga afiafi a le Alii.” (1 Korinito 11:20, NW) Ua taʻua foʻi lea tausamiga o le Faamanatuga, talu ai na poloaʻiina e Iesu ona soo e faapea: “Ia outou faia lenei mea ma faamanatuga iā te aʻu.” E na o le pau lava lenei o le mea na poloaʻiina Kerisiano ina ia faamanatuina.—1 Korinito 11:24.

E tusa ma le faamatalaga i le lomifefiloi a Webster, o le faamanatuga, o se sauniga e fesoasoani “ina ia manatua ai pea” pe “ia olaola ai pea i le mafaufau.” I le tele o nofoaga, e faatūina ai e tagata se maa faamanatu, pe atofaina foʻi se aso faapitoa e faamanatu pe manatua ai se tasi, po o se mea tāua na tupu. I lenei tulaga, na faavaeina ai e Iesu se talisuaga e faamanatu ai, lea o le a avea ma fesoasoani e manatua ai pea e ona soo le tāua ma le aogā o mea na tutupu i lenā aso mataʻina. I le faagasolo mai o augātupulaga, o le a faamanatu atu ai e lenei talisuaga i ē o loo faamanatuina le uiga tāua o le mea na faia e Iesu i lenā pō, aemaise mea na ia faaaogāina e fai ma faatusa. O ā mea na faaaogā e Iesu e fai ma faatusa, ma o le ā na uiga i ai? Seʻi o tatou iloiloina le faamatalaga a le Tusi Paia e faatatau i le mea na tupu i lenā pō, i le 33 T.A.

O Mea Paia Faafaatusa

“Ona tago ai lea o ia i le areto, ua faafetai, ua tofitofi, ma avatu iā te i latou, ua faapea atu, ‘O [“le faatusa,” NW ] o loʻu tino lenei, ua foaʻiina atu mo outou; tou te faia [pea] le mea nei e fai ma faamanatuga iā te aʻu.’”—Luka 22:19.

Ina ua tago Iesu i le areto ma faapea atu, “o le faatusa o loʻu tino lenei,” sa ia faailoa atu o le areto e lē faafefeteina, sa fai ma sui po o le faatusa o lona lava tino lelei atoatoa faaletagata na ia foaʻiina mai e fai “ma ola o le lalolagi.” (Ioane 6:51) E ui lava o loo faapea mai nisi faaliliuga o le Tusi Paia “o loʻu [Eleni, es·tinʹ] tino lenei,” ae  ua faapea mai le faaliliuga a Thayer o le Greek-English Lexicon of the New Testament, e masani ona uiga le veape lenei i le “faailoa ai o se mea.” Ua faailoa mai ai le manatu e faapea, o se mea ua suitulaga, po ua fai ma faatusa.—Mataio 26:26.

Ua faapea foʻi i le ipu o le uaina. Na fetalai Iesu: “O lenei ipu o [“le faatusa,” NW] o le feagaiga fou lea i loʻu toto, ua faamaligiina mo outou.”—Luka 22:20.

I le faamatalaga a Mataio, na fetalai ai Iesu e faatatau i le ipu: “O loʻu toto lenei, o [“le faatusa,” NW] o le feagaiga ua faamaligiina mo tagata e toʻatele e faamagalo aʻi agasala.” (Mataio 26:28) Sa faaaogā e Iesu le uaina i le ipu, e suitulaga pe e fai ma faatusa o lona lava toto. O lona toto maligi na avea ma faavae o se “feagaiga fou” mo soo faauuina e le agaga, o ē o le a pule e avea ma tupu ma ositaulaga faatasi ma ia i le lagi.—Ieremia 31:31-33; Ioane 14:2, 3; 2 Korinito 5:5; Faaaliga 1:5, 6; 5:9, 10; 20:4, 6.

Ua avea foʻi le uaina i le ipu ma faamanatu e faapea, o le toto maligi o Iesu, o le a maua ai le “faamagaloina o agasala,” i lea ua tatalaina ai le ala mo i latou e taumafaina le areto ma le uaina e ulu atu ai i le ola faalelagi e avea o ni suli faatasi ma Keriso. O le mea moni, o i latou ua mauaina lenei valaaulia faalelagi, o se fuainumera e faatapulaaina, e na o i latou foʻi na e aai i le areto ma inu i le uaina i le Faamanatuga.—Luka 12:32; Efeso 1:13, 14; Eperu 9:22; 1 Peteru 1:3, 4.

Ae faapefea la ia soo uma lava o Iesu e lē o aofia ai i le feagaiga fou? O i latou na o “isi mamoe” a le Alii, o ē o loo olioli e lē ina ia pule faatasi ma Keriso i le lagi, ae i le ola e faavavau i se lalolagi parataiso. (Ioane 10:16; Luka 23:43; Faaaliga 21:3, 4) I le avea ai “o se motu o tagata e toʻatele” o auauna Kerisiano faamaoni “ua latou auauna foʻi iā te ia [le Atua] i . . . le ao ma le pō,” e fiafia lava i latou e molimauina ma le loto faafetai le Talisuaga a le Alii. I le aogā o a latou upu ma galuega, ua latou faalauiloa atu ai e faapea: “O i ai le faaolataga i lo tatou Atua, o lē tiʻetiʻe i le nofoālii, atoa ma le Tamaʻi Mamoe!”—Faaaliga 7:9, 10, 14, 15.

E Faafia Ona Fai?

“Tou te faia [pea] le mea nei e fai ma faamanatuga iā te aʻu.”—Luka 22:19.

E faafia ona fai le Faamanatuga ina ia manatua ai pea le maliu o Keriso? E leʻi taʻu patino maia e Iesu. Ae peitaʻi, talu ai na ia faavaeina le Talisuaga Afiafi a le Alii i le aso 14 o Nisani, le pō o le Paseka lea na faamanatuina e tagata Isaraelu i tausaga taʻitasi, e foliga mai la, sa finagalo Iesu ina ia faia le Faamanatuga i le aso lava lenā. Talu ai sa faamanatuina e tagata Isaraelu i tausaga taʻitasi le laveaʻiina o i latou mai le nofo pologa i Aikupito, e faamanatuina foʻi la i tausaga taʻitasi e Kerisiano le laveaʻiina o i latou mai le nofo pologa i le agasala ma le oti.—Esoto 12:11, 17; Roma 5:20, 21.

O le mea moni, e masani lava ona faamanatuina i tausaga taʻitasi se mea tāua na tupu. O se faaaʻoaʻoga, seʻi mafaufau foʻi pe a faamanatuina e se ulugalii le aso na faaipoipo ai, pe faamanatu foʻi e se atunuu se mea tāua na tupu i lona talafaasolopito. E masani lava ona faia lenā faamanatuga e faatasi i le tausaga i le aso tonu na tupu ai lenā mea. O se isi foʻi mea e faamaonia ai, mo le tele o senituri ina ua mavae Keriso, e toʻatele tagata na faapea mai o Kerisiano na taʻua i latou o le ʻau Kuatatesimani, o lona uiga, o ē faamanatuina le aso 14, auā sa faatasi i le tausaga ona latou faamanatuina le maliu o Iesu iā Nisani 14.

 Se Sauniga Faigofie ae Matuā Tāua

Na faamatalaina e le aposetolo o Paulo e faapea, o le faamanatuina o le Talisuaga a le Alii, o le a mafai e soo o Iesu ona “faailoa atu ai le maliu o le Alii.” (1 Korinito 11:26) O lea, o lenei faamanatuga, e taulaʻi atu i le vaega tāua na faia e Iesu i le faataunuuina o fuafuaga a le Atua e ala i lona maliu.

E ala i lona faamaoni seʻia oo ina maliu, na taʻutonuina ai e Iesu Keriso Ieova le Atua o Lē na Foafoaina Mea e atamai ma alofa, ma o le Pule Silisili Ese amiotonu. I le tuufaafeagai ma le tuuaʻiga a Satani ma le lē pei Iesu o Atamu, sa faamaonia ai e Iesu e faapea, e mafai lava e le tagata ona tumau i le faamaoni i le Atua, e oo lava i le fesagaʻia o omiga faigatā.—Iopu 2:4, 5.

O le Talisuaga a le Alii, e mafai foʻi ona manatua ai ma le lotofaafetai le alofa faataulagaina o Iesu. E ui lava i tofotofoga matuitui, ae sa tumau pea ona usiusitai atoatoa Iesu i lona Tamā. I lea, ua mafai ai ona ia ofoina atu lona lava soifua lelei atoatoa faaletagata e totogi ai le tau sili ona telē o le agasala a Atamu. E pei ona faamatala mai e Iesu lava ia e faapea, na sau o ia e “foaʻiina atu lona ola e fai ma togiola e sui aʻi tagata e toʻatele.” (Mataio 20:28) O le iʻuga, o i latou uma e faatuatua iā Iesu, e mafai ona faamagaloina a latou agasala ma maua le ola e faavavau e tusa ai ma le uluaʻi fuafuaga a Ieova mo le fanau a tagata.—Roma 5:6, 8, 12, 18, 19; 6:23; 1 Timoteo 2:5, 6. *

Ua faamatilatilaina ai foʻi i nei mea uma le tele o le agalelei o Ieova ma lona alofa tunoa i le faia o lea sauniuniga mo le faaolataga o le fanau a tagata. Ua faapea mai le Tusi Paia: “O le mea lava lenei ua faaalia mai ai le alofa o le Atua iā te i tatou, ina ua auina mai e le Atua lona Alo e toʻatasi i le lalolagi, ina ia tatou ola iā te ia. O le alofa lava lenei, e lē ona ua tatou alofa i le Atua, a ua alofa mai o ia iā te i tatou, ua na auina mai foʻi lona Alo o le togiola mo a tatou agasala.”—1 Ioane 4:9, 10.

Ioe, maʻeu se Faamanatuga ofoofogia! O le faigofie ma le aogā, ua alagātatau ai ona faamanatuina i le lalolagi aoao i le tele o tulaga eseese, ma ua tatau ai ona tumau pea ona avea o se faamanatuga aogā mo se taimi umi.

Lona Uiga mo Oe

E matuā faigatā ma telē le tau o le maliu faataulagaina  o lo tatou Alii o Iesu Keriso, e lē gata iā te ia, a o lona Tamā o Ieova. Ona o ia o se tagata lelei atoatoa, sa lē mafai ai ona oo le oti tuufaasolo iā Iesu e pei ona oo iā i tatou uma lava. (Roma 5:12; Eperu 7:26) Sa ono mafai lava ona faaauau pea ona soifua Iesu e faavavau. E lē mafai ona aveesea faamalosi lona soifua e aunoa ma lona malie iai. Na ia fetalai e faapea: “E leai se tasi na te aveeseina [loʻu ola] iā te aʻu, a e peitaʻi aʻu, ou te tuuina atu e aʻu lava.”—Ioane 10:18.

O lea, na ofoina atu ma le loto malie e Iesu lona soifua lelei atoatoa faaletagata e fai ma togiola ina ia “faaumatia e ia i lona maliu o lē ua i ai le malo e oti ai, o le tiapolo lea, ma tuusaunoaina ai i latou uma, o ē na faapologaina i o latou olaga uma ona o le mataʻu i le oti.” (Eperu 2:14, 15) Ua faaalia atili le alofa faataulagaina o Keriso i le auala lea na finagalo malie e maliu ai. Sa ia silafia lelei le auala o le a puapuagatia ma maliu ai o ia.—Mataio 17:22; 20:17-19.

Ua faamanatu mai foʻi e le Faamanatuga iā i tatou le auala aupito sili ua faapea ona faaalia ai le alofa o Ieova lo tatou Tamā faalelagi. Pagā se tigā na oo iā te ia, o lē e ‘alofa mutimuti vale tele ma alofa naunau,’ i le faafofoga ma silasila mai i “le tagi tele ma loimata” o Iesu i le faatoʻaga i Ketesemane, i le sasaina ma le sauā, le faasatauroina ma le lē alofa, ma le maliu tigā. (Iakopo 5:11; Eperu 5:7; Ioane 3:16; 1 Ioane 4:7, 8) I le na o le mafaufau lava i le maliu o Iesu, ua oo ai faalogona matuitui i le toʻatele o tagata i le taimi nei, ma i senituri mulimuli ane.

Seʻi mafaufau i le tau matuā telē na totogia e Ieova le Atua ma Iesu Keriso mo i tatou tagata agasala! (Roma 3:23) E tatou te fesagaʻi i aso uma lava ma āuga tigā o lo tatou tulaga agasala ma o tatou lē lelei atoatoa. Ae peitaʻi, ona o le faatuatua i le taulaga togiola a Iesu, ua mafai ai ona tatou talosaga atu i le Atua mo le faamagaloga. (1 Ioane 2:1, 2) Ua mafai ai i lenei mea ona tatou olioli i le saʻolotoga e talanoa atu ai i le Atua ma maua ai se loto fuatiaifo mamā. (Eperu 4:14-16; 9:13, 14) E lē gata i lea, ua mafai ai ona tatou olioli i le faamoemoe e ola ai i se lalolagi parataiso e oo i le faavavau. (Ioane 17:3; Faaaliga 21:3, 4) O nei mea ma le tele o isi faamanuiaga, o iʻuga uma o le gaoioiga aupito silisili o le faataulagaina e Iesu o ia lava.

Faaalia le Agaga Talisapaia mo le Talisuaga a le Alii

O le mea moni, o le Talisuaga a le Alii, o se faaaliga ofoofogia lea o “le alofa tunoa o le Atua ua matuā tele.” Ona o le alofa faataulagaina o Iesu, na mafai ai ona saunia e Ieova le Atua le taulaga togiola—e moni lava, o lana ‘meaalofa foaʻi fua e lē mafaamatalaina.’ (2 Korinito 9:14, 15) Pe e te lē lagona ai ea le lotofaafetai ma le agaga matuā talisapaia i nei faaaliga o le agalelei o le Atua e ala iā Iesu Keriso?

E matou te mautinoa, o lou lagona lenā. O lea la, e matou te valaaulia ai ma le māfana oe ina ia aufaatasi ma Molimau a Ieova i le faamanatuina o le Faamanatuga o le maliu o Iesu. O le a faia le Faamanatuga i le tausaga lenei i le Aso Lulu, Aperila 16, pe a goto le lā. O le a fiafia Molimau a Ieova i lou vaipanoa e faailoa atu iā te oe le taimi ma le nofoaga tonu e faia ai lenei sauniga e sili ona tāua.

[Faamatalaga pito i lalo]

[Pusa/Ata i le itulau 6]

“O LOʻU TINO LENEI” PO O “LE FAATUSA LENEI O LOʻU TINO” O LĒ FEA E SAʻO?

Ina ua fetalai Iesu, “O aʻu nei o le faitotoʻa” ma “O aʻu nei o le vine moni,” sa leai se tasi na manatu o ia o se faitotoʻa moni po o se vine faaletino. (Ioane 10:7; 15:1) E faapena foʻi la ina ua sii mai e le Tusi Paia Samoa le fetalaiga a Iesu e faapea: “O lenei ipu o le feagaiga fou,” e lē tatau la ona tatou manatu e faapea, o le ipu sa faauiga faaletino e faapea o le feagaiga fou. Sa faapena foʻi ina ua ia fetalai e faapea, o le areto ‘o lona’ tino, sa mautinoa lava le uiga o le areto, po o le mea sa fai ma faatusa o lona tino. O lea ua faapea mai ai le faaliliuga a Charles B. Williams: “Ua fai lenei mea ma faatusa o loʻu tino.”—Luka 22:19, 20.

[Ata i le itulau 5]

O le areto e lē faafefeteina ma le uaina, o ni faatusa talafeagai ia o le tino lelei atoatoa ma le toto maligi o Iesu

[Ata i le itulau 7]

O le Faamanatuga, o se sauniga lea e faamanatu mai ai le alofa aupito sili na faaalia e Ieova le Atua ma Iesu Keriso