Pe o le a Faaiʻuina ea le Mativa?

SA FAAPEA mai le tupu poto o Solomona o Isaraelu anamua: “Faauta foʻi i loimata o ē ua sauāina, ua leai foʻi sē na te faamāfanafanaina i latou; ua lima malosi foʻi ē na sauā iā te i latou; a ua leai sē na te faamāfanafanaina i latou.” (Failauga 4:1) E lē taumatea, o le toʻatele o i latou na sauāina sa i le mafaufau o Solomona, o ni ē foʻi e matitiva.

O le mativa e lē fuaina lea i le na o le tulaga tau tupe. E tusa ai ma suʻesuʻega na faamauina e le Faletupe o le Lalolagi iā Iuni 2002, “na iloa ai i le 1998, pe a ma le 1.2 piliona o tagata i le lalolagi aoao, e itiiti ifo i le tasi le tālā Amerika a latou tupe faaalu i le aso, ae 2.8 piliona o loo ola i le itiiti ifo i le lua tālā Amerika i le aso.” Sa mātauina e faapea e ui lava ina faaitiitia nei fuainumera na i lo le uluaʻi faatatauina, ae o “loo tumau pea le maualuga i tulaga mafatia o tagata.”

Pe o le a faaiʻuina ea le mativa? Sa taʻu atu e Iesu Keriso i ona soo e faapea: “Tou te nonofo pea ma ē matitiva.” (Ioane 12:8) Ae pe o le a faaauau pea le mativa ma ona tulaga faigatā e faavavau? E leai, aua e ui lava e leʻi folafolaina e Iesu faapea o le a lē avea uma tagata ma ē mauʻoa i le itu faaletino, ae o le a tatou lē faia ai la se faaiʻuga faapea o le a leai se faamoemoe mo ē matitiva.

E ui lava i taumafaiga ma folafolaga a tagata ina ia faaiʻuina le mativa, peitaʻi e masani lava ona lē taulau. Ua faamautinoa mai e le Afioga a le Atua, le Tusi Paia, iā i tatou faapea o le a lē toe i ai se mativa i tagata. Ae o le mea moni sa folafola atu e Iesu le “tala lelei i ē matitiva.” (Luka 4:18) O lenei tala lelei o loo aofia ai ma le folafolaga i le aveesea o le mativa. O le a tupu lenā tulaga pe a aumaia e le Malo o le Atua le faiga amiotonu i luga o le lalolagi.

Maʻeu se lalolagi o le a iai! O le tupu faalelagi o Iesu Keriso “e alofa atu . . . i lē ua vaivai ma lē ua mativa; e faaola lava e ia ē ua matitiva” ma o le a “laveaʻi o ia iā i latou ai le sauā ma le faamālō.”—Salamo 72:13, 14.

E tusa ai ma lenā taimi ua faapea mai le Mika 4:4: “A e taʻitasi ma nofo i lalo o lona vine, ma lalo o lona mati; e leai foʻi sē na te faamataʻu mai; auā ua faapea ona tulei mai ai le siʻufofoga o Ieova o ʻau.” O le a foʻia e le Malo o le Atua faafitauli uma o loo aafia ai le fanau a tagata e oo lava i le aveesea o faamaʻi ma le oti. O le a faaumatia e le Atua “le oti e faavavau, e soloiesea foʻi e le Alii o Ieova o loimata i mata uma lava.”—Isaia 25:8.

E mafai ona e talitonu i nei folafolaga auā na faagaeeina e le Atua. Aiseā e lē iloiloina ai mea moni e faamaonia ai o valoaga o le Tusi Paia e maufaatuatuaina?

[Faamatalaga i Ata i le itulau 32]

FAO photo/M. Marzot