Fesili Mai le ʻAufaitau

Pe e mafai ona faia e le faapotopotoga se fuafuaga pe afai ua lē mafai e se Kerisiano faauuina ua lē atoatoa le malosi o le tino ona auai i le faamanatuga o le Talisuaga Afiafi a le Alii?

Ioe. E mafai ma e tatau ona faia se fuafuaga ona o le magafagafa mo se Kerisiano faauuina ua lē atoatoa le malosi o le tino, atonu ua faataotolia ma ua lē mafai ona auai ma le faapotopotoga i le Faamanatuga o le maliu o Keriso. I se tulaga faapena, e mafai ona fuafuaina e le ʻautoeaina se toeaina po o se isi tane Kerisiano taʻumatuaina e ave le areto ma le uaina i lenā uso talitonu i se taimi o le pō lava lenā a o leʻi oso le lā.

E faalagolago lava i tulaga, e mafai e le toeaina po o le uso lea e avatua le areto ma le uaina ona fai ni nai upu puupuu ma faitau ni mau talafeagai. E mafai ona ia mulimuli i le faavae na faia e Iesu ina ua Ia faatūina le Talisuaga Afiafi a le Alii. O se faataʻitaʻiga, e mafai ona faitauina le Mataio 26:26, ona tuuina atu loa lea o le areto e leʻi faafefeteina pe a uma se tatalo. E mafai foʻi e le uso ona faitauina le Mataio mataupu 26, fuaiupu e 27 ma le 28, ona tuuina atu foʻi lea o le uaina pe a uma se isi tatalo. E mafai ona faia ni nai upu puupuu i le aogā o le areto ma le uaina, ona faia loa lea o se tatalo faaiʻu.

O le mea moni, e tatau lava ona faia taumafaiga talafeagai uma ina ia auai i le faamanatuina e le faapotopotoga o le Talisuaga Afiafi a le Alii. Ae o le ā e mafai ona fai i se tulaga ua matuā lē mafai ai lava e se tasi o Kerisiano faauuina o loo matuā maʻi lava, po o faataotolia i le falemaʻi, po o se tulaga faapena ona taofia o ia mai le faamanatuina o le Faamanatuga pe a goto le lā i le aso 14 o Nisani? E mafai e lenā sui faauuina ona fai e pei ona faia i le Tulafono a Mose ma faamanatuina e ia lava le Faamanatuga i le 30 aso mulimuli ane.—Numera 9:9-14.