Sa Faatasitasi ma le Fiafia “O Ē Maelega e Faalauiloa le Malo”

UA FAAPOPOLEINA le lalolagi i le tele o mala tau amioga, le tamaoaiga, ma tulaga faaupufai. Ae peitaʻi, e ui i na fevesiaʻiga, na faia e Molimau a Ieova se tauaofiaga mo aso e tolu, “O Ē Maelega e Faalauiloa le Malō.” O nei faatasitasiga na faia i le lalolagi atoa na amata iā Me 2002.

O le mea moni sa tatou matuā olioli i nei tauaofiaga. Seʻi tatou toe autaluina puupuu lenei polokalame faale-Tusi Paia faagaee loto.

O le Aso Muamua na Faamamafa ai le Maelega o Iesu

O le matua o le uluaʻi aso o le tauaofiaga “Ia Faataʻitaʻi i le Maelega o lo Tatou Alii, o Iesu.” (Ioane 2:17) O le lauga “Ia Olioli i le Tauaofia Faatasi o ni Ē Faalauiloa le Malo” na valaaulia ma le māfana ai latou ina ia aufaatasi i le olioli lea e masani ona maua e tagata o le Atua i a latou tauaofiaga. (Teuteronome 16:15) I le lauga na sosoo ai na faatalanoaina ai ni tagata talaʻi maelega o le tala lelei.

O le lauga “Ia Matuā Fiafia iā Ieova Lava Ia” sa talanoaina ai fuaiupu taʻitasi o le Salamo 37:1-11. Ua uunaʻia ai i tatou ina ia aua nei “faameo” ona e foliga mai e manuia tele ē amioleaga. E ui lava e faia e ē amioleaga tala pepelo e faatatau iā i tatou, ae e i ai le taimi o le a faamanino mai ai e Ieova po o ai moni lava ona tagata faatuatua. Sa faamatalaina i le lauga “Ia Faaalia se Agaga Lotofaafetai” le auala tatou te faaalia ai le lotofaafetai i le Atua. O Kerisiano uma lava e tatau ona avatu “taulaga o viiga” iā Ieova. (Eperu 13:15) O le mea moni, o le aofaʻiga o tatou taimi o loo tuuina atu i le auaunaga iā Ieova, e faalagolago i o tatou tulaga ma lo tatou agaga talisapaia.

O le matua o le lauga autū e faapea “Ua Uunaʻia i le Maelega Ē o Faalauiloa le Malo.” O loo faasino atu iā Iesu Keriso o ia o le faaaʻoaʻo sili o le maelega. Ina ua uma ona faavaeina le malo faalelagi i le 1914, sa manaʻomia ai ona faalauiloa atu ma le maelega e Kerisiano moni le tala lelei. Sa faasino atu e le failauga i le tauaofiaga lea sa faia i Cedar Point, Ohio i le Iunaite Setete o Amerika i le 1922, ma faamanatu mai iā i tatou le valaaulia tāua e faapea: “Ia Faalauiloa le Tupu ma lona Malo”! A o faagasolo taimi, o le maelega o auauna faatuatua a le Atua na uunaʻia ai i latou e faalauiloa upu moni matagofie o le Malo i atunuu uma.

O le aoauli o le aso muamua na talanoaina ai le lauga “Aua le Matataʻu—I le Iloa o Loo iā i Tatou Ieova” na faailoa mai ai ua avea tagata o Ieova ma taulaʻiga a Satani. E ui i tofotofoga o loo tatou fesagaʻi, ae o lo tatou manatunatu i le tele o faaaʻoaʻoga faale-Tusi Paia o le faatuatua aemaise foʻi i aso nei, e aumaia ai iā i tatou le lototele e fesagaʻia ai ma le lē fefe tofotofoga.—Isaia 41:10.

Na sosoo ai i le polokalame le lauga faasolo e tolu ona vaega i le matua e faapea “E Faamalosia i Tatou i le Valoaga a Mika Ina ia Savavali i le Suafa o Ieova.” Na faatusaina e le uluaʻi failauga le paū maulalo tau amio, faiga faaaposetasi faalotu, ma  le soona pupū atu i meafaitino i aso o Mika i o tatou taimi. Na ia taʻua: “E mautinoa lo tatou faamoemoe i le lumanaʻi, pe afai tatou te atiina aʻe se loto usiusitai, faamautinoa ua paia a tatou amio, ma faatumuina o tatou olaga i gaoioiga tuutoina faale-Atua, ma aua nei o tatou faagaloina o le a oo mai le aso o Ieova.”—2 Peteru 3:11, 12.

Na taʻua e le failauga lona lua o le lauga faasolo le faitioina e Mika o taʻitaʻi Iutaia. Sa latou faileagaina tagata matitiva, ma ē e lē mafesoasoania. Na valoia foʻi e Mika le manumalo o le tapuaʻiga moni. (Mika 4:1-5) Ona o le faamalosia e le agaga paia o Ieova, ua mafai ai ona tatou maumauaʻi e faalauiloa atu se faamoemoe matagofie. Ae peitaʻi, e faapefea pe afai ua tatou lagona le lotovaivai ona o maʻi po ua lē mafai ona faia nisi o mea? Na faapea mai le failauga lona tolu: “O mea e manaʻomia mai e Ieova e talafeagai ma e mafai ona ausia.” Sa ia talanoaina vala eseese o le Mika 6:8, lea tatou te faitau ai e faapea: “Se a foʻi se mea e finagalo ai Ieova iā te oe, pe a lē o ia mea, ia fai le amiotonu, ia naunau i le alofa, ma ia feoaʻi ma lou Atua ma le loto faamaulalo?”

Ona ua matuā faaleagaina tulaga tau amio a le lalolagi ma e mafai ona aafia ai Kerisiano, na tatou maua uma aogā mai le lauga sa faamatuaina “Tumau i le Mamā Tau Amio e Ala i le Leoleoina o Lou Loto.” O se faaaʻoaʻoga, o le tausia o lo tatou tulaga mamā o le a fesoasoani e maua ai se faaipoipoga fiafia. I le avea ma Kerisiano, e lē tatau ona tatou mafaufau e oo lava i le faia o feusuaʻiga le mamā.—1 Korinito 6:18.

O le lauga “Ia Leoleo Faasaga i le Taufaaʻoleʻole” ua faaalia ai e tatau ona tatou taulimaina ma le atamai faamatalaga taufaaʻoleʻole e pei o se mea oona, e aofia ai tala e lē moni atoatoa, ma tala taufaasesē o loo faasalalau e tagata aposetate. (Kolose 2:8) E lē tatau foʻi ona faasesēina i tatou e mafaufau faapea e mafai ona tatou faamalieina o tatou faanaunauga agasala e aunoa ma ni iʻuga leaga.

“Tapuaʻi i le Atua Moni e Toʻatasi” o le  matua lenā o le lauga faaiʻu o le aso muamua. A o agaʻi ina matuā faigatā tulaga o mea a le lalolagi, maʻeu se faamāfanafana loto i le iloaina ua toeitiiti nei ona aumaia lea e Ieova lana lalolagi fou amiotonu! O ai o le a ola ai i inā? Ua na o i latou o ē tapuaʻi iā Ieova. Ina ia fesoasoani iā i tatou, o a tatou fanau, ma a tatou tagata aʻoga o le Tusi Paia ina ia ausia lenā sini, na tatalaina ai e le failauga se tusi fou Ia Tapuaʻi i le Atua Moni e Toʻatasi. Maʻeu le olioli ina ua tatou mauaina lenei tusi!

O le Aso Lona Lua sa Faatāua ai le Maelega mo Galuega Lelei

O le matua o le aso lona lua o le tauaofiaga “Ia Maelega mo Galuega Lelei.” (1 Peteru 3:13, NW ) Sa talanoaina e le uluaʻi failauga le mau o le aso. Sa ia faamamafa mai ai e faapea, o le talanoaina ma le uigā o le mau i aso taʻitasi e faateleina ai lo tatou maelega.

Ona sosoo ai lea ma le lauga faasolo, “O Ē Faalauiloa le Malo o Loo Faamamaluina la Latou Faiva.” O le vaega muamua sa faamamafa mai ai le manaʻomia ona vaevaetonuina o le Afioga a le Atua. (2 Timoteo 2:15) O lo tatou faaaogāina ma le uigā o le Tusi Paia, ua mafai ai ona maua le avanoa e ‘galue ai le mana’ o le Afioga a le Atua i olaga o tagata. (Eperu 4:12) E tatau ona tatou tataʻi atu manatu i le Tusi Paia ma ia fefulisaʻi ina ia faatalitonu ai. O le vaega e lua o le lauga faasolo na faalaeiau ai i tatou ia toe foʻi e asia tagata lotofiafia. (1 Korinito 3:6) Ina ia faatupuina le fiafia o le tagata i le upu moni, e ao ona sauniuni lelei ma lototele e toe asia i se taimi vave. O le vaega lona tolu sa fautuaina ai le vaai i tagata tatou te feiloaʻi i ai e mafai ona avea ma soo i le lumanaʻi, ma na faaalia ai o le ofoina o se suʻesuʻega  faale-Tusi Paia i le uluaʻi asiasiga, e maua ai le olioli i le fesoasoani atu i tagata ia avea ma soo.

“Le Pogai e ‘Tatalo ai e Le Aunoa’” o le matua lenā o le lauga na sosoo ai. Ua fautua mai le Tusi Paia i Kerisiano ina ia vaavaai i le Atua mo le taʻitaʻiga i vala uma o le olaga. E manaʻomia ona i ai se taimi e fai ai a tatou tatalo totino. E sili atu i lenā, e tatau ona tatou finafinau i le tatalo, auā e faataga i tatou e Ieova e faaauau pea ona tatalo mo se taimi a o leʻi tali mai iā i tatou.—Iakopo 4:8.

O le lauga “O Talanoaga ma Isi i Mea Faaleagaga e Faalaeiauina Ai” ua uunaʻia ai tatou ina ia faaaogā le meaalofa o le tautala atu, ia maua ai aogā e lē gata iā i tatou aemaise foʻi isi. (Filipi 4:8) E manaʻomia e paaga faaipoipo ma fanau ni talanoaga faaleagaga i aso taʻitasi. I lenā itu, e tatau ai i aiga ona taumafai e taumamafa faatasi i se ʻaiga se tasi i aso taʻitasi, ina ia mafai ai ona faia ni talanoaga faalaeiau.

Na faaiʻuina le polokalame o le taeao i se lauga faamāfanafana loto e faapea “Le Auala e Iʻu ai i le Faaolataga le Tuuina Atu ma le Papatisoga.” Ua uma ona aʻoaʻoina e tagata o le a papatiso le poto, ma ua faaalia foʻi le faatuatua, le salamō, ua liliu ese mai mea sesē ma ua tuuina atu i latou i le Atua. Na taʻua e le failauga e faapea, pe a māeʻa ona papatisoina, e tatau ona faaauau pea ona tupu aʻe faaleagaga ma tumau lo latou maelega ma amioga lelei.—Filipi 2:15, 16.

E lua manatu tāua sa faamamafa i le lauga i lenā aoauli “Ia Lotomaulalo, ma Faafaigofie Lau Vaai.” O le avea ma sē lotomaulalo, o le i ai lea o se vaaiga saʻo i mea e gata mai ai lo tatou mafai ma lo tatou tulaga i luma o le silafaga a Ieova. O le lotomaulalo e fesoasoani iā i tatou e ‘faafaigofie’ ai le vaai ma taulaʻi atu i le Malo o le Atua, ae lē o meafaitino. Pe afai tatou te faia faapea, e lē tatau ona tatou popole auā o le a tausia e Ieova o tatou manaʻoga.—Mataio 6:22-24, 33, 34.

Na faaalia e le failauga na sosoo ai, le auala e tatau ai ona tatou ‘Faalagolago Atoatoa iā Ieova i Taimi o Puapuaga.’ E mafai faapefea ona tatou taulimaina mea e pei o vaivaiga totino, faafitauli tau tupe ma tulaga tau le soifua mālōlōina? Seʻi o tatou ole atu iā Ieova mo le atamai ma talosaga atu mo le fesoasoani mai i isi. Na i lo le lolo atu i le fefe po o le lotovaivai, e tatau ona faamalosia lo tatou faatuatua iā Ieova e ala i le faitauina o lana Afioga.—Roma 8:35-39.

O le matua o le lauga faasolo mulimuli o le tauaofiaga e faapea, “E Tofotofoina le Uiga o lo Tatou Faatuatua i Tofotofoga Eseese.” Na faamanatu mai e le vaega muamua iā i tatou e faapea, o le a fesagaʻi Kerisiano moni uma ma sauāga. O le a fai ma molimau i isi, e faamalosia ai lo tatou  faatuatua, ma maua ai le avanoa e faaalia ai lo tatou faamaoni i le Atua. E ui i lea, e lē manaʻomia ona tuua o tatou ola i se tulaga lamatia ona o ni māfuaaga lē talafeagai, ma tatou te lē faaaogāina ni auala e lē faale-Tusi Paia e ʻalofia ai sauāga.—1 Peteru 3:16.

O le failauga lona lua o le lauga faasolo na faia ni fesili e faatatau i le solitū. O uluaʻi Kerisiano e lē o ni tagata e talitonu e faapea e sesē taua uma, ae ua latou iloa e muamua ona latou faamaoni i le Atua. E pei o aso nei, e tausisi ma le maumauaʻi Molimau a Ieova i le mataupu silisili lenei: “e lē ni o le lalolagi outou.” (Ioane 15:19) Talu ai e mafai ona vave aliaʻe tofotofoga o lo tatou solitū, e ao ai i aiga ona iai se taimi e toe autaluina ai taʻiala a le Tusi Paia e faatatau i lea mataupu. Na faasino atu e le lauga faasolo lona tolu e faapea, o le sini a Satani e lē o le fasiotia o i tatou, peitaʻi o le aumaia lea o omiga ina ia tatou lē faamaoni ai i le Atua. O le tumau ma le faamaoni i tauemuga, omiga o amioga lē mamā, faalogona tigā, ma maʻi, e viia ai Ieova.

O se valaaulia māfana e faapea “Ia Faalatalata Atu iā Ieova” sa avea ma matua o le lauga faaiʻu o le aso. O lo tatou malamalama i uiga autū o Ieova tatou te tosina atu ai iā te ia. Na te faaaogāina lona mana e puipuia ai ona tagata, aemaise lava i le itu faaleagaga. E lē soona ʻinaʻinā o ia i lana faamasinogatonu, ae ua uunaia o ia ina ia maua le ola e faavavau e i latou o ē fai le amiotonu. Ua faaalia le atamai o le Atua i le auala sa ia faaaogāina ai tagata lē lelei atoatoa e tusia le Tusi Paia. O lona uiga sili ona mataʻina o le alofa, lea na uunaia ai o ia e faia se sauniuniga o le faaolataga mo le fanau a tagata e ala iā Iesu Keriso. (Ioane 3:16) Na faaiʻu mai e le failauga i le tatalaina o le tusi fou faamāfanafana loto Draw Close to Jehovah (Faalatalata Atu iā Ieova).

 O le Aso Lona Tolu sa Taulaʻi Atu i le Maelega mo Galuega Lelei

O le matua o le aso lona tolu o le tauaofiaga “O se Nuu e Maelega mo Galuega Lelei.” (Tito 2:14) Na amata le polokalame i le talanoaina e se aiga o le mau o le aso. Na sosoo mai ai ma le lauga “Pe E te Faatuatua iā Ieova?” Ua tuu atu e malo lo latou faamoemoega i se puna sesē e ala i le faalagolago i lo latou lava atamai ma lo latou malosi. Ae ui i lea, e ese ai auauna a Ieova, o loo lototele ma olioli e faalagolago atu iā te ia e ui i tulaga faigatā.—Salamo 46:1-3, 7-11.

O le vaega sa faamatuaina “Talavou e—Ia Sauniuni Lou Lumanaʻi Faatasi ma le Faalapotopotoga a Ieova” sa faaautū atu i ai le fesili lenei: E mafai faapefea e se talavou ona maua aogā sili i le olaga? O le a lē mafai pe afai e tuliloaina e se tasi le mauaina o tupe, o meafaitino, ma le fia lauiloa. Na faalaeiauina ma le alofa e Lē na Foafoaina i tatou le ʻautalavou ina ia manatua o ia a o talavou. Na faatalanoa e le failauga nisi o i latou o ē na aapa atu i le auaunaga faa-Kerisiano a o talavou, ma na tatou maitauina ai lo latou olioli. Maʻeu le aogā ina ua maua le sāvali fou, Talavou e, O le a Faapefea Ona Outou Faaaogāina o Outou Olaga? ua saunia e fesoasoani i Molimau talavou ia faataatia se faavae mo le ola e faavavau i le lumanaʻi faatasi ma le faalapotopotoga a Ieova!

Na sosoo ai lea ma le tala mataʻina faale-Tusi Paia lava saunia “Ia Tumau Mausalī i Taimi Faigatā.” Na otooto puupuu mai ai le auaunaga umi a Ieremia mai lava a o talavou, e oo i le faaumatiaga o Ierusalema, lea sa ia valoia ma le maelega. Sa manatu Ieremia e lē agavaa mo lona tofiga, ae peitaʻi sa ia faataunuuina e ui lava i teeteega, ma sa laveaʻia o ia e Ieova.—Ieremia 1:8, 18, 19.

Ina ua māeʻa le tala ona sosoo lea ma le lauga “Ia Pei o Ieremia—Ia Faalauiloa ma le Lē Mataʻu le Afioga a le Atua.” Ua masani ona avea ē faalauiloa le Malo i aso nei ma taulaiga o faamatalaga sesē ma le taufaaleaga. (Salamo 109:1-3) E pei o Ieremia, e mafai foʻi ona tatou faafetaiaʻia le lotovaivai e ala i le fiafia i le Afioga a Ieova. Ma o le a tatou mautinoa ai o le ā lē taulau ē e tau faasaga mai iā i tatou.

O le mea moni na matuā talafeagai ona faamatuaina le lauga lautele e faapea, “Ua Suia le Vaaiga i Lenei Lalolagi.” Ua faailogaina o tatou vaitaimi i ni suiga mataʻina. Sa valoia e le Tusi Paia na tulaga, e aofia ai le alagaina o le ‘filemu ma le saogalemu,’ ona oo mai lea o le aso faamasino a le Atua. (1 Tesalonia 5:3) O le a aumaia ni suiga matagofie —o le a faaiʻua taua, solitulafono, faiga sauā ma faamaʻi. Na i lo le faamoemoe atu i lenei faiga o mea, o le taimi lenei e tuliloa ai le tuutoina faale-Atua ma tumau i le amio mamā.

Na sosoo le otootoga o le Olomatamata ma le lauga mulimuli o le tauaofiaga, “Ia Faatumulia i Galuega Lelei Ē Maelega e Faalauiloa le Malo.” Na taʻua e le failauga le auala ua mafai ona faagaeeina faaleagaga ai i tatou i le polokalame, ma faalaeiauina ai i tatou e faalagolago atu iā Ieova. I le faaiʻuga, sa uunaia ai i tatou ina ia avea o ni ē e mamā, alofa ma ia maelega o ni ē e faalauiloa le Malo o le Atua.—1 Peteru 2:12.

Na tatou foʻi fiafia i o tatou aiga ma le agaga lea na iai i auauna a Ieova i aso o Neemia, ona o faamanuiaga faaleagaga ia na maua i le Tauaofiaga Itumalo “O Ē Maelega e Faalauiloa le Malo.” (Neemia 8:12) Pe e lē faagaeeina ai ea oe i le olioli e lenei tauaofiaga ma maumauaʻi ai e agaʻi pea i luma o sē e maelega e faalauiloa le Malo?

[Pusa/Ata i le itulau 23]

Se Tusi Fou mo Suʻesuʻega!

I le faaiʻuga o le aso muamua o le tauaofiaga, na matuā olioli ai i latou uma na auaʻi ina ua tatalaina le tusi fou Tapuaʻi i le Atua Moni e Toʻatasi. Ua saunia lenei tusi e suʻesuʻe ai ma i latou o ē ua maea ona suʻesuʻeina le tusi o Le Poto e Taʻitaʻia ai i le Ola e Faavavau ma e mautinoa o le a faamalosia ai le faatuatua o i latou o ē “ua saunia i le ola e faavavau.”—Galuega 13:48.

[Faamatalaga i Ata]

Ata i le faavaa o le tusi: U.S. Navy photo

[Pusa/Ata i le itulau 24]

Fesoasoani Ina ia Faalatalata ai i le Atua

Na faasilasila mai e le failauga mulimuli o le aso lona lua o le tauaofiaga le tatalaina o le tusi fou Draw Close to Jehovah (Faalatalata Atu iā Ieova). E fā vaega o loo aofia ai, o le vaega muamua o uiga autū taʻitasi o Ieova—o le mana, faamasinotonu, atamai, ma le alofa. O vaega taʻitasi o le tusi o loo iai se mataupu e faaalia ai le auala na saunia ai e Iesu se faaaʻoaʻoga manino o uiga o Ieova. O le fuafuaga autū o lenei tusi fou, o le fesoasoani lea iā i tatou ma a tatou tagata aʻoga ina ia ati aʻe se faiā vavalalata ma le malosi ma Ieova le Atua.

[Pusa/Ata i le itulau 26]

Taʻitaʻiga Faaleagaga mo le ʻAutalavou

O le aso lona tolu o le tauaofiaga sa tatalaina ai se sāvali faapitoa e faaulutalaina faapea, Talavou e, O le a Faapefea Ona Faaaogā o Outou Olaga? Ua saunia lenei savali ina ia fesoasoani ai i Molimau talavou ia faia ni filifiliga saʻo i le lumanaʻi, ma o loo aumaia ai foʻi ni fautuaga faale-Tusi Paia i le faia o se galuega i le auaunaga iā Ieova e faavavau.