Pe E te Manatua?

Pe na e talisapaia le faitauina o lomiga talu ai nei o Le Olomatamata? Ia seʻi vaai la pe mafai ona e taliina fesili o loo mulimuli mai:

• E faapefea e le tomai e mafaufau ai ona avea o se puipuiga aogā? (Faataoto 1:4)

E mafai ai ona tatou mataala i aafiaga e ono faaleagaina ai la tatou faiā ma Ieova ma uunaʻia ai i tatou e faia se gaoioiga atamai, e pei o le ʻalofia o faaosoosoga i faiga faaleituaiga. E fesoasoani foʻi iā i tatou e iloaina ai le tulaga lē lelei atoatoa o o tatou uso Kerisiano, lea e uunaʻia ai i tatou e ʻalofia le vave ona tali atu pe a faatigā mai se tasi. E mafai ai foʻi ona tatou ʻalofia le matapeʻapeʻa i meafaitino lea e ono faavaivaia ai i tatou i le itu faaleagaga.—8/15, itulau 21-24.

• E faapefea ona avea se tasi ma se tuaoi lelei?

E lua auala e mafai ona avea ai ma se tuaoi lelei, o le limafoaʻi ma le ave ma sē e taliaina mea ma le lotofaafetai. O se faamanuiaga le ave ma se tuaoi lelei pe a tulaʻi mai se toʻatugā. O loo taumafai Molimau a Ieova e avea i latou ma tuaoi lelei, e ala i le faaleoina atu i isi o le gaoioiga ua toeitiiti oo mai, o le faaumatiaina lea e le Atua o ē amio leaga.—9/1, itulau 4-7.

• E tusa ai ma le Tusi Paia, o ai Sagato moni ma e faapefea ona latou fesoasoani i tagata?

O uluaʻi Kerisiano uma o ni sagato moni po o tagata paia na faapaiaina e le Atua, ae lē o tagata po o se faalapotopotoga. (Roma 1:7) O le toetū aʻe i le olaga faalelagi, o le a mafai ai e le ʻaupaia ona saosaolaumea ma Keriso i le aumaia o faamanuiaga i ē faamaoni i luga o le lalolagi. (Efeso 1:18-21)—9/15, itulau 5-7.

• O le ā se aogā o le iloaina o nisi o tulaga e faatatau i taaloga afeleti i Eleni anamua mo Kerisiano?

Ua aumaia i tusitusiga a Paulo ma Iakopo ni faataʻitaʻiga e faavae mai i taaloga anamua. (1 Korinito 9:26; 1 Timoteo 4:7; 2 Timoteo 2:5; 1 Peteru 5:10) E tāua tele i se tagata afeleti i aso anamua, ona ia sona faiaʻoga lelei e toleniina o ia i le faaalia o le pulea totino ma faatonutonu ia lelei ana taumafaiga. O le tulaga moni foʻi lenā i taumafaiga faaleagaga o Kerisiano i aso nei.—10/1, itulau 28-31.

• O ā faafitauli ma taui i le tausia aʻe o fanau i atunuu ese?

O le toʻatele o tamaiti e sili atu le vave ona iloa tautalatala i se gagana fou na i lo o latou mātua, o ē atonu e faigatā ona latou malamalama i manatunatuga ma gaoioiga a a latou fanau. Atonu foʻi e faigatā i le fanau ona aʻoaʻoina aʻoaʻoga faale-Tusi Paia i gagana a latou mātua. E ui i lea e mafai ona faamalosia le liʻo faaleaiga pe a fai e aʻoaʻoina e mātua a latou fanau i la latou gagana, o ē atonu o loo iloa ni gagana ma ni aganuu se lua.—10/15, itulau 22-26.

• Aiseā e tāua ai le iloa ona faatoese?

O se faatoesega e sau mai le loto e masani lava ona avea o se auala e toe faaleleia ai se faiā. Ua aumaia i le Tusi Paia ni faaaʻoaʻoga i le aogā o le faia o se faatoesega. (1 Samuelu 25:2-35; Galuega 23:1-5) E masani lava, a fai e iai se feeseeseaʻiga i le va o ni tagata se toʻalua, e tatau lava ona iai ni mea e sesē uma ai i laʻua. O lea la e manaʻomia ai ona ōgatasi le faaalia o ni uiga lelei ma le faia o ni faatoesega.—11/1, itulau 4-7.

• Aiseā e leaga ai le taalo i taaloga faitupe, e tusa lava pe laʻitiiti se vaega tupe e faaaluina ai?

E mafai ona faatusaina le taalo i taaloga faitupe, i se uiga faatauvā ma le matapeʻapeʻa, lea e taʻusalaina e le Tusi Paia. (1 Korinito 6:9, 10) O le toʻatele o i latou ua pulea e taaloga faitupe na amata ona faia ni petipetiga ao laiti lava.—11/1, itulau 31

• Talu ai e tele tusi o le Tusi Paia na tusiaina i le gagana Eleni, aiseā la e toe manaʻomia ai fua ona toe faaliliuina le Tusi Paia i le gagana Eleni, ma o ā iʻuga na maua mai ai?

O le gagana Eleni i aso nei e iai sona eseesega mai le gagana Eleni lea sa faaaogāina i le faaliliuga o le Septuagint o Tusitusiga Eperu, faapea ma lea na faaaogā e faaliliuina ai le Tusitusiga Kerisiano Eleni. I senituri e leʻi leva atu, e tele ni taumafaiga sa faia ina ia mafai ai ona tusia se vaega po o le Tusi Paia atoa i le gagana tautala faa-Eleni. I aso nei e tusa ma le 30 faaliliuga o le Tusi Paia atoa po o ni vaega foʻi o le Tusi Paia, ua malamalamagofie ai tagata Eleni, o se tasi o na Tusi Paia o le faaliliuga matagofie o le New World Translation of the Holy Scriptures, lea na lomia i le 1997.—11/15, itulau 26-29.

• Aiseā e lē manaʻomia ai mo Kerisiano ona fai ni sefuluaʻi?

I lalo o le tulafono lea na tuuina atu iā Isaraelu anamua, sa avea le sefuluaʻi ma fesoasoani mo le ʻau sa Levī ma tagata matitiva. (Levitiko 27:30; Teuteronome 14:28, 29) O le maliu faataulagaina o Iesu na faalēaogāina ai lea Tulafono ma le faia o le sefuluaʻi. (Efeso 2:13-15) I uluaʻi Kerisiano, sa tuu i le faitalia a le tagata lava ia po o le ā lana foaʻi e fai ma e faia ma le lotomalie. (2 Korinito 9:5, 7)—12/1, itulau 4-6.

• Po o uiga atu ea le Faaaliga 20:8 e faapea o le tofotofoga mulimuli, o le a faasesēina ai e Satani tagata e toʻatele?

Ua faapea mai le mau, o i latou o le a faasesēina o le a pei “o le oneone o le sami.” I le Tusi Paia, e masani ona faauiga atu lenā faaupuga i se fuainumera e lē o iloa, e aunoa ma le faapea mai o se aofaʻiga e telē. O le fanau a Aperaamo lea na faatusaina “e pei o oneone foʻi i le matafaga,” na avea mulimuli ane ma tagata e 144,000 lo latou faitau aofaʻi. (Kenese 22:17; Faaaliga 14:1-4)—12/1, itulau 29.