E Faamanuia ma Puipuia e Ieova i Latou e Usiusitai

“A o lē faalogo mai ia te au, e nofo o ia ma le fifilemu; e filemu o ia, e le fefe i se mea leaga.”—FAATAOTO 1:33.

1, 2. Aiseā e tāua ai le usitai i le Atua? Faamatala.

O LOO pisi lava tamaʻi moa e leʻi umi ona fofoa e togitogiina meaʻai o loo maua i le mutia e lē uumi tele, ae latou te lē o amanaʻiaina le lulu o loo fetifaaʻi solo maualuga i o latou luga aʻe. Na faafuaseʻi lava ona toʻutoʻu leotele le matuāmoa i se leo lapataʻi ma faaloloa atu ona apaʻau. Na faavave lava ona tamomoʻe mai lana toloaʻi ma malu puipuia ai i lalo o ona apaʻau. E leʻi toe faaauauina e le lulu lana taumafaiga e osofaʻi. * O le ā se lesona ua tatou aʻoaʻoina ai? O le usitai e laveaʻiina ai ola!

² O lenā lesona e telē sona aogā mo Kerisiano i aso nei talu ai ua matuā taumafai malosi Satani e maileia tagata o le Atua. (Faaaliga 12:9, 12, 17) O lona sini, o le faaleagaina lea o la tatou faiā ma Ieova ina ia tatou lē maua ai lona finagalo malie ma le ola e faavavau. (1 Peteru 5:8) Peitaʻi afai tatou te faalatalata atu pea i le Atua ma vave ona talia faatonuga ua maua mai i lana Afioga ma lana faalapotopotoga, tatou te mautinoa lana puipuigamalu. Na tusi le fai Salamo e faapea: “E ufiufi ifo o ia ia te oe i ona apaau, e te sulufai foi i lalo o ona apaau.”—Salamo 91:4.

Ua Iʻu Ina Osofaʻia se Nuu Lē Usiusitai

3. O le ā na iʻu i ai le lē usiusitai pea o tagata Isaraelu?

³ A o usiusitai le nuu o Isaraelu iā Ieova, na lē aunoa ona latou maua aogā mai i lana puipuigamalu. Peitaʻi sa tele ina latou tuua Lē na Faia i latou ae liliu atu i atua laau ma maa—“mea faatauvaa ua le aoga, e le malaveai foi ia te [i latou].” (1 Samuelu 12:21) Ina ua mavae le faitau senituri o na fouvalega, na lofitūina le nuu atoa i faiga tau aʻoaʻoga sesē ma ua lē toe aogā i ai se vaifofō. Na afāina ai le finagalo o Iesu ma faapea atu: “Ierusalema e, Ierusalema e, o le fasiotia perofeta, ma fetogi i maa i e ua aauina atu ia te oe; ua tele lava oʻu manao e faapotopoto i lau fanau, e pei o le moa ona ofaofatai i lana toloai i lalo i ona apaau a e lei mafafai outou. Faauta, ua tuua lo outou fale, e faatafunaina.”—Mataio 23:37, 38.

4. Na faapefea ona manino mai i le 70 T.A. le tuulafoaʻiina o Ierusalema e Ieova?

⁴ O le tuulafoaʻiina e Ieova o Isaraelu fouvale na faamaonia i se auala mataʻutia i le 70 T.A. I le tausaga lenā, a o tauaveina e ʻautau a Roma a latou faailoga o loo iai le ata o le aeto, na latou osofaʻia Ierusalema e pei lava o se aeto o loo faatifa ifo, ma faaoo i ai le faaumatiaga mataʻutia. O le taimi lenā o loo tumutumu le aai i le tausamiga o le Paseka. Latou te leʻi mauaina le finagalo malie o le Atua e ui i le tele o ā latou taulaga. Na faamanatu mai e lenei mea le tāua o upu a Samuelu i le tupu lē usitai o Saulo: “E  tusa ea ona fiafia o Ieova i taulaga mu ma taulaga, i lona fiafia i le faalogo i le siufofoga o Ieova? Faauta, o le faalogo e sili lea i le taulaga, ma le usiusitai e sili lea i le gaʻo o mamoe poa.”—1 Samuelu 15:22.

5. O le ā le usiusitai e finagalo i ai Ieova, ma e faapefea ona tatou iloa e lē faigatā lenā usiusitai?

⁵ E ui lava e finagalo Ieova ia usiusitai tagata iā te ia, ae peitaʻi ua ia silafia lelei vaivaiga o tagata lē lelei atoatoa. (Salamo 130:3, 4) O lona finagalo o le loto faamaoni ma le usiusitai e faavae i le faatuatua, alofa, ma le mataʻu lelei ia lē faia se mea e faatigā iā te ia. (Teuteronome 10:12, 13; Faataoto 16:6; Isaia 43:10; Mika 6:8; Roma 6:17) E le faigatā lenā usiusitai e pei ona sa faaalia e le ‘faapotopotoga toʻatele o molimau a o leʻi oo mai i le faa-Kerisiano,’ o ē sa tausisi i lo latou faamaoni a o fesagaʻi ai ma tofotofoga mataʻutia, e oo lava i le oti. (Eperu 11:36, 37; 12:1) Sa faafiafiaina moni lava e nei tagata le finagalo o Ieova! (Faataoto 27:11) Peitaʻi sa iai nisi sa faamaoni i le amataga ae na lē tumau lo latou usiusitai. O se tasi o i latou, o le tupu o Iuta anamua e suafa iā Ioasa.

O le Tupu na Faaleagaina e Aumea Leaga

6, 7. O le ā le ituaiga o tupu sa iai Ioasa a o soifua Ieoiata?

⁶ Na toeitiiti lava a fasiotia le tupu o Ioasa a o tama meamea o ia. Ina ua atoa le fitu o ona tausaga, na loto tele ai le Ositaulaga Sili o Ieoiata e faailoa atu Ioasa i lumamea ina ia fai o ia ma tupu. Talu ai na avea Ieoiata, o sē e mataʻu i le Atua, ma o se tamā ma se faufautua iā Ioasa, na faia ai e lenei tupu talavou “le amiotonu i luma o Ieova i aso uma o Ieoiata le faitaulaga.”—2 Nofoaiga a Tupu 22:10–23:1, 11; 24:1, 2.

⁷ Sa aofia i galuega lelei a Ioasa le toe faafouina o le malumalu o Ieova—o se gaoioiga sa “pele i le loto o Ioasa.” (NW) Na ia faamanatu i le Ositaulaga Sili o Ieoiata le manaʻomia o le aoina o lafoga o le malumalu mai iā Iuta ma Ierusalema, e tusa ma le “poloaʻiga a Mose” ina ia totogi ai le galuega. Na mautinoa le taulau manuia o Ieoiata e faalaeiau le tupu talavou e suʻesuʻe ma usitai i le Tulafono a le Atua. O le iʻuga, na vave ona maeʻa le galuega o le malumalu ma le gaosia o ipu mo le malumalu.—2 Nofoaiga a Tupu 24:4, 6, 13, 14; Teuteronome 17:18.

8. (a) O le ā le māfuaaga autū na vaivai ai Ioasa i le itu faaleagaga? (e) O le ā le mea na iʻu ina fai e le tupu talu ai lona lē usitai?

⁸ Ae faanoanoa, e leʻi tumau ai le usiusitai o Ioasa iā Ieova. Aiseā? Ua taʻu mai iā i tatou e le Afioga a le Atua e faapea: “Ua mavae le oti o Ieoiata, ona o mai lea o alii o Iuta, ma latou ifo i le tupu. Ona faalogo ai lea o le tupu ia te i latou. Ua tuua e i latou le fale o Ieova le Atua o latou tamā, ma latou auauna i tupua o Asaira, ma isi tupua. Ona oo mai ai lea o le toʻasa ia Iuta ma Ierusalema, ona o la latou agasala lea.” O nei uunaʻiga lē lelei a alii o Iuta na māfua ai ona lē faalogo le tupu i perofeta a le Atua. O se tasi o nei perofeta o Sakaria, le atalii o Ieoiata, o lē na aʻoaʻia ma le lē fefe Ioasa ma le nuu ona o lo latou lē usiusitai. Na i lo le salamō, na faatonuina e Ioasa le fasiotia o Sakaria i le fetogia i maa. Na iʻu ina avea Ioasa ma tagata lē alofa ma lē usitai—na māfua nei mea uma ona o le leaga o aumea.—2 Nofoaiga a Tupu 24:17-22; 1 Korinito 15:33.

9. Na faapefea i le iʻuga o Ioasa ma alii ona faamaonia ai le valea o le lē usiusitai?

 ⁹ O le ā na tupu iā Ioasa ma alii, o ni aumea leaga, ina ua latou lafoaʻia Ieova? O se ʻautau mai Suria ‘e na o ni nai tagata toʻaitiiti lava’ na ō mai ma osofaʻia Iuta “ma faaumatia alii o le nuu.” E lē gata i lea, ae na latou faamalosia le tupu e tuuina atu iā i latou ana lava oloa uma faatasi ma auro ma ario o le malumalu. E ui na sao mai ai Ioasa, ae sa tuua o ia o se tagata vaivai ma maʻi. E leʻi umi se taimi mulimuli ane, ae fasiotia loa o ia e nisi o ana auauna o ē na foua lana pule. (2 Nofoaiga a Tupu 24:23-25; 2 Tupu 12:17, 18) E matuā moni le Afioga a Ieova iā Isaraelu e faapea: “A e afai e te le faalogo i le siufofoga o Ieova lou Atua, e anaana e fai ana poloaiga uma ma ana tulafono . . . , ona maua mai ai lea o oe i nei malaia uma, e oo lava ia ia te oe.”—Teuteronome 28:15.

O le Failautusi na Faasaoina Ona o le Usitai

10, 11. (a) Aiseā e aogā ai le uaʻi totoʻa atu i fautuaga a Ieova iā Paruka? (e) O le ā le fautuaga na avatu e Ieova iā Paruka?

¹⁰ Pe e masani ona e lagonaina le loto faavaivai i nisi o taimi ona e lē toʻatele nisi tou te feiloaʻi i le faiva faa-Kerisiano e faaalia le fiafia i le tala lelei? Pe e oo iā te oe mai lea taimi i lea taimi le lagona matauʻa i ē mauoloa ma ituaiga o olaga o loo latou ola ai? Afai o le tulaga lenā, seʻi mafaufau totoʻa iā Paruka le failautusi a Ieremia, ma le auala na aʻoaʻia ai o ia ma le alofa e Ieova.

¹¹ Na taulaʻi atu le silasila a Ieova iā Paruka a o ia tusia se feʻau faavaloaga. Aiseā? Talu ai ua amata ona auē o ia ma faanoanoa i le tulaga sa iai, ma ua moomoo i se isi olaga e sili atu na i lo o lona faaeaga faapitoa o le auauna i le Atua. I le mātauina o le suiga i uiga faaalia o Paruka, na avatu ai e Ieova se fautuaga manino ma le alofa e faapea: “Ua e saili ea mo oe mea tetele? Aua e te sailia; aua faauta, ou te faaoo le malaia i luga o tagata uma, . . . a ou te avatu ia te oe lou ola e fai ma vete i mea uma e te alu i ai.”—Ieremia 36:4; 45:5.

12. Aiseā e tatau ai ona tatou ʻalofia le saʻilia o “mea tetele” mo i tatou i lenei faiga o mea?

¹² Pe mafai ona e mātauina i afioga a Ieova iā Paruka Lona manatu mamafa i lenei tagata lelei, o lē sa auauna iā te ia ma le faamaoni ma le loto tele faatasi ma Ieremia? E faapena foʻi i aso nei, e manatu mamafa Ieova iā i latou ua tau amata ona saʻilia ni avanoa o loo latou manatu i ai e sili ona lelei i lenei faiga o mea. O le mea e fiafia ai, i le pei lava o Paruka, o le toʻatele o i latou nei ua talia faasaʻoga alofa a uso taʻumatuaina faaleagaga. (Luka 15:4-7) Ioe, tau ina ia tatou amanaʻia, e leai se lumanaʻi mo ē o loo saʻilia “mea tetele” mo i latou i lenei lalolagi. E lē gata ua lē maua e na tagata se fiafiaga moni, ae o le mea e sili ona leaga, o le a lē pine ae mavae atu i latou faatasi ma lenei lalolagi ma ona tuʻinanauga.—Mataio 6:19, 20; 1 Ioane 2:15-17.

13. O le ā le lesona i le loto maulalo tatou te aʻoaʻoina mai le tala iā Paruka?

¹³ E tatou te aʻoaʻoina mai foʻi i le tala iā Paruka se lesona lelei i le lotomaulalo. Ia mātau e leʻi fautuaina tuusaʻo e Ieova Paruka ae na fetalai atu e ala iā Ieremia, o lē atonu sa malamalama lelei iai Paruka i ni ona vaivaiga faaletagata. (Ieremia 45:1, 2) Peitaʻi e leʻi faamaualuga Paruka ma tetee; na ia iloa lelei ma le loto maulalo, o le fautuaga e mai iā Ieova. (2 Nofoaiga a Tupu 26:3, 4, 16; Faataoto 18:12; 19:20) Afai ae teʻi ua ‘tatou uia se ala sesē e aunoa ma lo tatou iloa’ (NW) ma tatou maua ni fautuaga mai le Afioga a le Atua, seʻi o tatou faataʻitaʻi atu i le taʻumatuaina o Paruka, i lona faautauta faaleagaga, ma lona loto maulalo.—Kalatia 6:1.

14. Aiseā e lelei ai mo i tatou le usiusitai iā i latou o loo taʻimua?

¹⁴ O lo tatou faaalia o le loto maulalo e mafai foʻi ona fesoasoani iā i latou o loo aumaia fautuaga. Fai mai le Eperu 13:17: “Ia outou usiusitai i o outou taitai [taʻimua] ma outou gauai i ai; aua o loo leoleo i latou mo o outou agaga, latou te tala atu le tala i ai, ina ia faia ma le olioli, a e aua ma le tiga; aua e le aoga lea ia te outou.” E anoanoaʻi le tele o taimi e tatalo ai  ma le faatauanau toeaina iā Ieova mo le loto tele, le atamai, ma le faautaga manaʻomia ina ia faataunuuina lenei vala faigatā o la latou galuega faaleoleo mamoe. E manaʻomia ona tatou ‘tali leleia tane faapea.’—1 Korinito 16:18.

15. (a) Na faapefea ona faaalia e Ieremia lona talitonuina o Paruka? (e) Na faapefea ona tauia Paruka i lona usiusitai ma le loto maulalo?

¹⁵ E mautinoa sa toe fetuunaʻi mafaufauga o Paruka, auā na sosoo ai ma le tuuina atu e Ieremia iā te ia o se tofiga faigatā—ia alu i le malumalu ma faitau leotele atu ai le feʻau faafaamasinoga lea na ia tusia a o faalau atu e Ieremia. Pe na usitai Paruka? Ioe, na ia faia “e tusa ma mea uma na fai atu ai Ieremia le perofeta.” O le mea moni, na ia faitauina atu foʻi le feʻau lava lenā i alii o Ierusalema, o se tulaga e lē masalomia le manaʻomia ai o le loto tele. (Ieremia 36:1-6, 8, 14, 15) Ina ua paʻū le aai iā Papelonia i le sefulu valu tausaga mulimuli ane ai, seʻi manatu i le loto faafetai e mautinoa na faaalia e Paruka ina ua faasaoina o ia, talu ai lona taliaina o lapataʻiga a Ieova ma lona taofia o le saʻilia o “mea tetele” mo ia lava!—Ieremia 39:1, 2, 11, 12; 43:6.

Na Faasaoina i le Taimi na Siʻomia ai Ona o le Usiusitai

16. Na faaalia faapefea e Ieova lona alofa mutimutivale mo tagata Iutaia i Ierusalema i le taimi na osofaʻia ai e Papelonia i le 607 T.L.M.?

¹⁶ Ina ua oo ane le iʻuga o Ierusalema i le 607 T.L.M., sa toe mātauina ai foʻi faamaoniga o le alofa mutimutivale o Ieova i ē usiusitai. I le taimi a o osofaʻia le aai, na fetalai atu Ieova i tagata Iutaia: “Faauta, ou te tuuina atu i o outou luma le ala o le ola, ma le ala o le oti. O le nofo i lenei aai e oti o ia i le pelu, ma le oge, ma le faamai; a o le alu atu, ma vavae atu i tagata o Kaletaia o e vagaia outou, e ola o ia, e avea foi lona ola ma ana vete.” (Ieremia 21:8, 9) E ui sa tatau ona faaumatia ē sa nonofo i Ierusalema, ae sa faaalia pea e Ieova lona alofa iā i latou na usiusitai iā te ia, e ui lava i lenā toe taimi faigatā. *

17. (a) O ā auala e lua na tofotofoina ai le usitai o Ieremia ina ua faatonuina o ia e Ieova e taʻu atu i tagata Iutaia a o osofaʻia, e ‘sosola’ pe ‘vavae atu i Kaletaia’? (e) E faapefea ona tatou maua aogā mai le faataʻitaʻiga a Ieremia i lona usitai ma le loto tele?

¹⁷ O le fai atu i tagata Iutaia e siilima, e lē taumatea na tofotofoina ai foʻi le usiusitai o Ieremia. O se tasi o māfuaaga ona sa matuā maelega Ieremia mo le suafa o le Atua. E leʻi manaʻo Ieremia e faalumaina lenā suafa e fili o ē o le a viiviia o latou atua e leai ni ola pe a manumalo. (Ieremia 50:2, 11; Auega 2:16) E lē gata i lenā, ua iloa lelei e Ieremia o le fai atu i tagata ia siilima, o le tuua foʻi lenā o lona ola i se tulaga lamatia, auā e toʻatele o le a faauigaina ana upu o se fouvalega. Peitaʻi, e leʻi palaai ai o ia, ae na usiusitai ma taʻu atu folafolaga a Ieova. (Ieremia 38:4, 17, 18) I le pei o Ieremia, o loo tatou faailoa atu foʻi se feʻau e lē logoleleia. O le  feʻau lava lenā e tasi na inosia ai Iesu. (Isaia 53:3; Mataio 24:9) O lea, aua nei o tatou “fefe i tagata” ae i le pei o Ieremia, ia tatou usiusitai iā Ieova ma le loto tele, ma faatuatua atoatoa iā te ia.—Faataoto 29:25.

Usiusitai a o Fesagaʻi ma Osofaʻiga a Koku

18. O ā tofotofoga o le usiusitai o le a fesagaʻi ma tagata o le Atua i le lumanaʻi?

¹⁸ E lē o toe mamao, ona oo mai lea o le faaumatiaga aʻiaʻi o le faiga aoao o mea a Satani i se “puapuaga tele” e lē mafaatusalia. (Mataio 24:21) E lē taumatea a o lumanaʻi ma a o faagasolo lenā taimi, o le a fesagaʻi tagata o le Atua ma tofotofoga tetele o lo latou faatuatua ma le usiusitai. Mo se faataʻitaʻiga, ua taʻu mai e le Tusi Paia iā i tatou faapea o Satani, i le avea ma “Koku, o le nuu o Makoku,” o le a matuā faasaga tau atu i auauna a Ieova, ma sauniunia ana ʻau e tele e pei ona faamatalaina o se “itu taua e matua tele . . . , e pei o le ao e ufitia ai le nuu.” (Esekielu 38:2, 14-16) E ui e toʻaitiiti ma leai ni auupega a tagata o le Atua, ae o le a latou saʻili atu mo le lafitaga i lalo o “apaau” po o aao o Ieova, lea o le a faaloaloa atu e puipuia ē usiusitai.

19, 20. (a) Aiseā na matuā tāua ai le usiusitai o tagata Isaraelu a o iai i le Sami Ulaula? (e) E mafai faapefea ona aogā iā i tatou i aso nei le manatunatu faatasi ma le tatalo i le mea na tupu i le Sami Ulaula?

¹⁹ E faamanatu mai e lenei mea iā i tatou le malaga a Isaraelu mai Aikupito. Ina ua maea ona taia Aikupito i mala mataʻutia e sefulu, na taʻitaʻi ai e Ieova ona tagata, e lē i le ala e sili ona puupuu e tau i le Nuu o le Folafolaga, ae na agaʻi atu i le Sami Ulaula, lea e ono faigofie lava ona siʻosiʻoina ma osofaʻia ai. Pe a manatu i ai i le vaaiga faavaegāʻau, o se gaoioiga e lē saogalemu. Faamata ana e iai i inā, e te usitai i afioga a Ieova na ala atu iā Mose ma e alu atu agaʻi i le Sami Ulaula ma le faatuatua atoa, i le iloaina e lē o le itulagi lenā e iai le Nuu o le Folafolaga?—Esoto 14:1-4.

²⁰ A o tatou faitau i le Esoto mataupu 14, tatou te mātauina ai le auala na laveaʻiina ai e Ieova ona tagata i se faatinoga o lona mana e maofa ai. Maʻeu le faamalosia ai o lo tatou faatuatua i mea tutupu faapena pe a faaalu se taimi e suʻesuʻe ma manatunatu loloto i ai! (2 Peteru 2:9) O le faatuatua malosi e mafai ona faamalosia ai i tatou e usiusitai iā Ieova, e ui lava e foliga mai o mea na te faafinagaloina e tuufaafeagai ma mafaufauga faaletagata. (Faataoto 3:5, 6) O lea, fesili ifo iā te oe lava, ‘Po o oʻu tauivi ea e faamalosia loʻu faatuatua e ala i le suʻesuʻeina ma le maelega o le Tusi Paia, tatalo, ma mafaufau loloto, faatasi ai ma le auaufaatasi e lē aunoa ma tagata o le Atua?’—Eperu 10: 24, 25; 12:1-3.

Usiusitai e Faamausalī ai le Faamoemoe

21. O ā faamanuiaga i le taimi nei ma le lumanaʻi o le a maua e i latou e usiusitai iā Ieova?

²¹ O i latou e usitai iā Ieova i o latou olaga e latou te iloaina le faataunuuina o le Faataoto 1:33, o loo faapea mai: “A o lē faalogo [usiusitai] mai iā te aʻu, e nofo o ia ma le fifilemu; e filemu o ia, e lē fefe i se mea leaga.” Maʻeu le faamāfanafana loto o nei upu matagofie pe a oo i le  aso o le toʻasa o Ieova o loo fotuaʻi mai! O le mea moni, na taʻu atu e Iesu i ona soo: “A afua ona faia o ia mea, ia tepa ae outou, ma ia ea i luga o outou ulu; aua e latalata ina faaolaina outou.” (Luka 21:28) E manino lava, ua na o i latou e usiusitai i le Atua o le a iai le mautinoa e gaoioi e tusa ma nei afioga.—Mataio 7:21.

22. (a) O le ā le māfuaaga e talitonu ai tagata o Ieova? (e) O le ā o le a talanoaina i le mataupu e sosoo mai ai?

²² O le tasi māfuaaga e talitonu ai ona “e le faia lava se mea e le Alii o Ieova, a e faaalia lona finagalo i ana auauna o perofeta.” (Amosa 3:7) E lē o toe faagaeeina e Ieova perofeta i aso nei e pei ona sa faia i aso ua teʻa; na i lo lenā, ua ia tofia se vasega o le auauna faamaoni e avatu taumafa tatau faaleagaga i ona itu aso mo lona ʻauaiga. (Mataio 24:45-47) E matuā tāua lava la mo i tatou le usiusitai i lenā “auauna”! I le mataupu e sosoo ai o le a iloa ai faapea o lenā usiusitai e faailoa ai foʻi o tatou uiga agaʻi iā Iesu, le matai o le ‘auauna.’ O ia lenā o Lē e ‘usiusitai i ai nuu.’—Kenese 49:10.

[Faamatalaga pito i lalo]

Pe E te Manatua?

• O le ā le iʻuga o le faaauau pea ona lē usiusitai o le nuu o Isaraelu?

• Na faapefea ona aafia le tupu o Ioasa i ana aumea, e lē gata i le amataga o lona soifuaga ae faapena foʻi i le taimi mulimuli?

• O a ni lesona tatou te aʻoaʻoina mai iā Paruka?

• Aiseā e leai ai se māfuaaga mo tagata usiusitai o Ieova e matataʻu ai a o lata mai le iʻuga o lenei faiga o mea?

[Fesili mo le Suʻesuʻega]

[Ata i le itulau 13]

Sa usitai le talavou o Ioasa iā Ieova, ona o le faatonutonuga na maua mai iā Ieoiata

[Ata i le itulau 15]

O aumea leaga na uunaʻia Ioasa e fasioti le perofeta a le Atua

[Ata i le itulau 16]

Faamata e te usitai iā Ieova pe ana e iai i inā ma molimauina lona mana laveaʻi e ofo ma mataʻu ai?