“O Loo iā Ieova le Faaolataga”

I TAIMI o mala faalenatura ma feteenaʻiga faavaomalo, e masani ona sulu atu ai tagata i o latou malo mo se puipuiga malu ma le saogalemu. Ona faia loa lea e malo ni polokalame e faamalosia ai le lagolagosua a tagata o le atunuu. O le tele o le lagona lotonuu ua uunaʻia e na polokalame, o le faateleina foʻi lenā o le agaga lotonuu ma oo ai ina auai pea ma maimoaina aso faamanatu o le lotonuu.

I le taimi e oo ai se faalavelave po o se mala i se atunuu, e masani lava ona oso vave aʻe i tagata le lotonuu lea e uunaʻia malosi ai le lagona autasi ua māfua ai le agaga felagolagomaʻi. Ua taʻua i le New York Times Magazine e faapea: “o le lotonuu, e sili atu ona mataʻutia e pei lava o isi faalogona,” talu ai, “o le taimi lava e faasasao atu ai, e faaalia ai ni uiga matagā.” O le faaalia o lea uiga, e ono faia ai ni gaoioiga e solia ai aiā tatau a tagata lautele ma le saʻolotoga o isi tagata o le atunuu e faatinoina ai la latou tapuaʻiga. Ua omia faapitoa ai lava Kerisiano moni ina ia faagutugutulua i o latou talitonuga. O le ā se gaoioiga o le a latou faia pe afai e lofitūina i mea o loo aafia ai le lalolagi lea o loo siʻomia ai i latou? O ā mataupu silisili o le Tusi Paia ua fesoasoani iā i latou e gaoioi ai ma le poto ma tausisia ai lo latou faamaoni i le Atua?

“Aua E te Ifo i Ai”

I nisi o taimi, o le fāʻalo i le fuʻa a le atunuu, o se faalauiloaga lea o le lotonuu. Ae o fuʻa, e masani ona faaalia ai ata o mea i le lagi, e pei o fetu, ma mea i le lalolagi. Sa faailoa atu e le Atua lona finagalo e uiga i le ifo i mea faapena ina ua ia poloaʻiina lona nuu: “Aua e te fai mo oe se tupua ua ta, po o se faatusa lava o se mea o i le lagi i luga, po o i le fanua i lalo, po o i le sami o i lalo o le fanua; aua e te ifo i ai, aua foi e te auauna i ai; auā o aʻu o Ieova lou Atua, o le Atua fuā.”—Esoto 20:4, 5.

Po o le fāʻalo pe tootuli i luma o se fuʻa e fai ma sui o le Malo, o se faasagatau lea i le tuuina atu o le tuutoina atoatoa iā Ieova le Atua? E moni, sa iai “faailoga,” po o tagavai sa faapotopoto ai ituaiga e tolu ia na vaevaeina ai tagata Isaraelu anamua a o iai i le vao. (Numera 2:1, 2) I le faamatalaina o upu Eperu e faaalia ai na tagavai, ua taʻua e le Cyclopedia a McClintock ma Strong e faapea: “E leai lava se upu o na upu Eperu o faaalia ai le manatu po o lē fea ‘tagavai’ o faailoa mai ai iā i tatou e faapea, o lenā mea o se fuʻa.” E lē gata i lea, o tagavai a Isaraelu, sa lē manatu i ai o ni mea paia, sa leʻi faia foʻi ni faamanatuga e tusa ai ma le faaaogāina. Sa na ona avea o se faailoga e faailoaina ai le nofoaga e faapotopoto ai tagata.

O le fuafuaga autū o le iai o kerupi i le falefetafai ma le malumalu o Solomona, sa faaatagia ai kerupi faalelagi. (Esoto 25:18; 26:1, 31, 33; 1 Tupu 6:23, 28, 29; Eperu 9:23, 24) O le iai o faatusa o nei kerupi, e lē ina ia tapuaʻi atu i ai, ae ua faaalia ai le mea moni, e leʻi vaai lava tagata i ai, ma e lē tatau lava ona tapuaʻi atu i agelu.—Kolose 2:18; Faaaliga 19:10; 22:8, 9.

Manatu foʻi i le ata o se gata apamemea lea  na faia e le perofeta o Mose i le taimi na feoaʻi solo ai le fanauga a Isaraelu i le vao. O lenā ata po o se faatusa, sa avea ma faailoga faavaloaga. (Numera 21:4-9; Ioane 3:14, 15) Sa leʻi teuteuina pe faaaogāina mo le tapuaʻiga. Ae peitaʻi, i senituri mulimuli ane ina ua mavae Mose, na tapuaʻi atu ai ma le lē tatau tagata Isaraelu i lenā faatusa, ma osia i ai taulaga o mea manogi. I lea, na nutililiiina ai lea faatusa e Esekia le tupu o Iuta.—2 Tupu 18:1-4.

Po o avea fuʻa a malo e na o ni faailoga o ni sauniga aogā? O le ā o faaatagia e na fuʻa? Ua taʻua e le tusitala o J. Paul Williams: “O le faailoga sili o le faatuatuaga o le lotonuu ma le autū o le tapuaʻiga, o le fuʻa.” Ua faapea mai le Encyclopedia Americana: “O le fuʻa, e paia, e pei o le koluse.” O le fuʻa, o le faailoga o le Malo. O lea, o le ifo po o le fāʻalo i ai, o se sauniga faalotu lea e faamamaluina ai le Malo. O se gaoioiga faapena, ua faailoa mai ai le tuuina atu o le faamoemoe i le Malo e na te aumaia le faaolataga, ma e lē talia lea e tusa ai ma le manatu o le Tusi Paia i le ifo i tupua.

Ua taʻua manino i le Tusi Paia e faapea: “O loo ia Ieova le faaolataga.” (Salamo 3:8) E lē aumaia e faalapotopotoga faaletagata po o a latou faailoga le faaolataga. Na apoapoaʻi mai le aposetolo o Paulo i uso Kerisiano e faapea: “Aʻu pele e, ia outou sosola ese ai i le ifo i tupua.” (1 Korinito 10:14) Sa leʻi auai uluaʻi Kerisiano i ni gaoioiga ifo i tupua a le Malo. I le tusi Those About to Die, ua mātauina ai e Daniel P. Mannix e faapea: “Sa lē mananaʻo Kerisiano e . . . avatu ni taulaga i le emeperoa o [Roma], e tai tutusa lava ma le lē mananaʻo e fāʻalo i le fuʻa i aso nei.” O lea, e faapena foʻi Kerisiano moni i aso nei. Ina ia tuutoina atoatoa atu iā Ieova, e latou te lē fāʻalo ai i fuʻa a so o se malo. O le faia faapea, ua latou faamuamua ai le Atua, ae i le taimi lava e tasi e faaaloalo atu pea i malo ma o latou taʻitaʻi. O le mea moni, ua latou iloa, o lo latou tiute tauave o le gauaʻi atu lea i “faipule silisili” faalemalo. (Roma 13:1-7) Ae o le ā la le manatu o le Tusi Paia i le usuina o vii lotonuu o malo, e pei o le vii o le fuʻa?

O ā Vii o Malo?

Ua faapea mai le Encyclopedia Americana: “O vii o malo, o faaupuga e faailoa atu ai lagona o le lotonuu, ma e masani lava ona aofia ai ma se talosaga mo le taʻitaʻiga ma le puipuiga tauatua i tagata ma o latou taʻitaʻi.” O le vii o se malo, o lona uiga, o se pese lotu po o se tatalo e fai atu e fai ma sui o se malo. E masani lava ona talosaga atu ai ina ia maua e le atunuu ia manuia faaletino ma ia tumau lana pulega. Pe e ao i se Kerisiano moni ona auai i na moomooga o le lotonuu?

Sa soifua faatasi le perofeta o Ieremia ma tagata o ē na faapea mai e auauna i le Atua. Ae peitaʻi, na poloaʻi Ieova iā te ia: “Aua e te faatoga mai mo lenei nuu, aua foi e te faia se auega, po o se faatoga mo i latou, aua e te fautua mai ia te au; auā ou te le faalogo lava ia te oe.” (Ieremia 7:16; 11:14; 14:11) Aiseā na poloaʻi atu ai faapea iā Ieremia? Talu ai, sa faatumuina lo latou nuu i le gaoi, fasioti tagata, faia o le mulilua, tauto pepelo, ma le ifo i tupua.—Ieremia 7:9.

Sa faataatia e Iesu Keriso se faataʻitaʻiga ina ua ia fetalai: “Ou te tatalo mo i latou; ou te le tatalo mo le lalolagi, a o i latou na e foaiina mai ia te au.” (Ioane 17:9) Ua taʻua i le Tusi Paia e faapea, “a o le lalolagi uma o loo nofo toilalo i loo leaga” ma “e mavae atu.” (1 Ioane 2:17; 5:19) E mafai la faapefea ona tatalo atu ma le faamaoni Kerisiano moni mo le manuia ma le faatumauina o sea faiga?

O le mea moni, e lē o vii uma o malo e aofia ai ni olega i le Atua. Ua faapea mai le Encyclopædia Britannica: “E eseese lava moomooga o vii o malo mai i tatalo mo le tupu, i faaupuga e faasino i taua a atunuu po o fevesiaʻiga . . . e oo atu i le faaalia o le lotonuu.” Ae pe e mafai e i latou o ē saʻili e faafiafia le Atua, ona olioli i taua ma fouvalega a so o se atunuu? Na valoia e Isaia tagata tapuaʻi moni, e  faapea: “Ona latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine.” (Isaia 2:4) Na tusi Paulo: “E ui lava ina matou savavali i le tino, matou te le tau faaletino; auā o auupega a lo matou nei taua e le faaletino ia.”—2 Korinito 10:3, 4.

O vii o malo, e masani lava ona faaalia ai faalogona mimita po o le fiasili o le atunuu. E leai se faavae faale-Tusi Paia o lenei manatu. I lana lauga i Areopako, na faapea mai ai le aposetolo o Paulo: “Ua faia foi e ia [Ieova le Atua] o nuu uma o tagata i le toto e tasi, ia nonofo i le fogaeleele uma lava.” (Galuega 17:26) Na taʻua e le aposetolo o Peteru: “E le faailogaina tagata e le Atua; a e peitai o le mataʻu ia te ia i nuu uma lava, ma fai le amiotonu, ua talia i latou e ia.”—Galuega 10:34, 35.

Ona o lo latou malamalama i le Tusi Paia, ua filifili ai le toʻatele ina ia faamamao mai i le fāʻalo i le fuʻa ma le usuina o pese e faaalia ai le lotonuu. Ae o le ā le mea e ao ona latou faia pe a fesagaʻi ma nei tulaga?

Ia Taumamao ma ia Faaaloalo

I se taumafaiga malosi ina ia autasi lona malo, na faatūina ai e le tupu o Nepukanesa se tupua auro telē i le fanua laugatasi o Turu. Ona ia fuafuaina lea o se sauniga e faailogaina ai, lea na ia valaauliaina ai ona alii sili uma, o taʻitaʻi, o kovana, o tagata faufautua, ma isi tagata maualuluga. Pe a latou faalogo uma i le leo o musika, sa tatau loa ona faapaʻuū tagata uma sa faapotopoto ai ma ifo i le tupua. Na faatasi ai ma i latou ni talavou Eperu se toʻatolu—o Sataraka, Mesako, ma Apeteniko. Na faapefea ona latou faaalia le lē auai i lenei sauniga faalotu? A o amata ona tatā musika, sa faapāʻuū faō uma loa i latou sa auai ma ifo i le tupua, ae sa tutū pea nei talavou Eperu e toʻatolu.—Tanielu 3:1-12.

I aso nei, pe a faʻalo i fuʻa, e masani lava ona faaloaloa atu lima, pe fāʻalo, po o le tuu o lima i fatafata. I nisi taimi, atonu e tū faamalō ai. I nisi o atunuu, e tootutuli ai tamaiti ma sogi i le fuʻa. O le tutū fifilemu a o fāʻalo isi i le fuʻa, ua faaalia ai e Kerisiano moni lo latou faaaloalo.

 Ae faapefea pe afai o le sauniga, e tau lava o lou tū e faaalia ai lou auai? Mo se faaaʻoaʻoga, seʻi faapea, ua filifilia se tamaitiiti mai se aʻoga e fai ma sui o le aʻoga atoa e fāʻalo i le fuʻa o loo agiagia i luga o se pou i fafo, ae o loo tutū faamalō uma isi tamaiti aʻoga i totonu o le potu aʻoga. I le na o le tūtū i se tulaga faapena, ua faaalia ai o loo auai faatasi i latou ma le tamaitiiti lea e i fafo, o loo fai ma sui faapitoa e fāʻalo atu i le fuʻa. O le tau lava ina e tū o le a faailoa atu ai lou auai i lea sauniga. Afai o le tulaga lenā, o i latou ua filifili e avea o ni ē mātauina ma le faaaloalo, e tatau ona nofoi pea ma le fifilemu. Ae faapefea pe afai o la e tutū le vasega ae ua amata le sauniga? Afai e tutū pea, e lē o faaalia ai i lea tulaga se fāʻalo i le fuʻa.

Seʻi faapea ua fai atu i se tasi e sau e na ona taofi le fuʻa ae lē fāʻalo i ai ae seʻi fāʻalo isi, atonu i se savali, se potu aʻoga po o se isi lava mea. Na i lo o le ‘sola ese mai le ifo i tupua,’ e pei ona poloaʻiina e le Tusi Paia, o le mea moni, o lenā lava ua e iai i le lotolotoi o le sauniga. E tutusa lava lenā ma lou auai i savali e faaalia ai le lotonuu. Auā o le faia faapea, ua e lagolagoina ai lava mea ua faamamaluina e lea savali, ma e matuā solitū ai lava Kerisiano moni.

Pe a tāina vii o malo, e pau lava le mea e masani ona faia e se tagata e faaalia ai lona auai i saafiafiga o le pese, o le tū lea i luga. I tulaga faapena, o Kerisiano, e nofoi pea i latou. Ae peitaʻi, pe afai o loo tutū pea i latou a o usu le vii o le atunuu, e lē manaʻomia fua ona latou faia se gaoioiga faapitoa o le nonofo i lalo. E lē tatau ona foliga atu na latou tutū faapitoa lava ona o le vii o le atunuu. I le isi itu, afai e manaʻomia ona tutū le vasega ma usu le vii, ia tau lava la ina tū ona o le faaaloalo ae o le a lē usu ai, ua faailoa ai lou lē auai i saafiafiga o le pese.

“Ia ia te Outou le Loto Fuatia Ifo Lelei”

Ina ua uma ona faamatalaina le lē aogā o mea e faia e tagata mo le tapuaʻiga, na faapea  mai le faisalamo: “O e faia ia mea ua tutusa lava ma i latou; o i latou uma o e faatuatua i ai.” (Salamo 115:4-8) E manino lava la, e so o se falefaigaluega lava o aafia tuusaʻo i le gaosia o mea mo tapuaʻiga, e aofia ai ia fuʻa a malo o le a lē talia e tagata tapuaʻi o Ieova. (1 Ioane 5:21) E iai foʻi isi fale faigaluega e ono aliaʻi mai ai foʻi nisi tulaga pe afai e faaalia ma le faaaloalo e Kerisiano e faapea, o i latou, e lē tapuaʻi i le fuʻa po o nisi mea ua suitulaga ai, ae e na o Ieova lava.

Mo se faaaʻoaʻoga, atonu e talosaga atu le pule o le galuega i se tagata faigaluega e na te sisiina pe tuu foʻi i lalo le fuʻa lea e sisiina i luga o se fale. O le faia ma le lē faia e se tasi o lea mea, e faalagolago i lona lava manatu e faatatau i lea tulaga. Afai o le sisiina po o le tuuina i lalo o le fuʻa o se vaega o se sauniga faapitoa o loo tutū faamalō pe e fāʻalo ai i le fuʻa, o lou tū faamalō ai foʻi la, e faaalia ai ua faia sou sao i lea sauniga

I le isi itu, afai e leai se sauniga o faia i le sisiina ma le tuuina i lalo o le fuʻa, o le faia la o nei gaoioiga, ua na o le faatinoina lea o ni galuega e pei o le sauniunia o le fale mo le faaaogāina, le tatalaina ma le lokaina o faitotoʻa, ma faamalama. I na tulaga, ua avea ai le fuʻa e na o se faailoga o le malo, ma o le sisiina ma le tuuina i lalo e aofia ai i isi galuega masani, o se mataupu e fitoi tonu i le tagata lava ia e tusa ma lona lotofuatiaifo ua aʻoaʻoina i le Tusi Paia. (Kalatia 6:5) O le lotofuatiaifo o se tagata e uunaʻia ai o ia e talosaga atu i lona pule e fai atu i se isi tagata faigaluega e na te sisiina ma tuuina i lalo le fuʻa. Atonu e lagona e se isi Kerisiano e faapea, e mafai ona ia faia lea gaoioiga pe afai e lē o aafia ai se sauniga. Po o le ā lava le filifiliga, e ao i tagata tapuaʻi faamaoni ona maua se “loto fuatia ifo lelei” i luma o le Atua.—1 Peteru 3:16.

E lē o teena e le Tusi Paia le faigaluega po o le iai i fale faitele, e pei o ofisa o le malo, ma fale aʻoga o loo sisiina ai le fuʻa a le malo. E ono aliaʻi mai foʻi fuʻa i faailoga tusi, laisene o taavale, po o isi mea e faia e le malo. O le faaaogāina o na mea e lē faapea ua auai ai tagata i gaoioiga faale-tapuaʻiga. O le mea e sili ona tāua i inei, e lē o le iai o se fuʻa po o se faatusa, ae o le auala e gaoioi ai se tagata agaʻi i lenā mea.

E masani ona faaalia fuʻa i faamalama, faitotoʻa, i taavale, i luga o kesi, po o isi lava mea. E mafai foʻi ona faatauina mai laʻei o loo lolomiina ai ata o fuʻa. I nisi o atunuu, e lē faatagaina i le tulafono ona laʻeiina na mea. E tusa lava pe e lē solia ai le tulafono i le faia faapena, ae o le ā ua faaalia e tusa ai ma le tulaga o le tagata ma manatu o le lalolagi? Na fetalai Iesu Keriso e faatatau i ona soo e faapea: “E le ni o le lalolagi i latou, faapei o aʻu foi, ou te le so le lalolagi aʻu.” (Ioane 17:16) Aua neʻi galo le aafiaga o le a oo i uso talitonu ona o na gaoioiga. Pe faamata e faamanuʻalia ai lotofuatiaifo o nisi? Pe e ono faavaivaia ai la latou faaiʻuga e tumau i le faatuatua? Na fautuaina e Paulo Kerisiano e faapea: “Ia outou mautinoa mea e sili ona tāua, ina ia avea outou ma e e lē ponā, ma ia lē tausuai nisi ona o outou.”—Filipi 1:10, NW.

“Ia Agamalu i Tagata Uma Lava”

A o faasolo ina leaga le tulaga o mea i le lalolagi i nei “aso faigata,” ua faapena foʻi ona faateleina ai le lotonuu. (2 Timoteo 3:1) Seʻi aua lava neʻi galo iā i latou o ē alolofa i le Atua, e na o Ieova lava e ou le faaolataga. Ua tatau ai ona tuutoina atoatoa atu iā te Ia. Pe a fai atu e te faia se mea e lē ōgatusa ma le finagalo o Ieova, na faapea atu aposetolo o Iesu: “E tusa ona sili o lo matou anaana i le Atua i lo matou anaana i tagata.”—Galuega 5:29.

Na tusi mai le aposetolo o Paulo: “Auā e le tatau ona faamisa o le auauna a le Alii, a ia agamalu i tagata uma.” (2 Timoteo 2:24, LF) O lea, e taumafai ai Kerisiano ina ia nonofo filemu, ia faaaloalo ma agamalu a o faalagolago atu i o latou lotofuatiaifo ua aʻoaʻoina i le Tusi Paia, i le faia o a latou lava filifiliga e tusa ai ma le fāʻalo i le fuʻa ma le usuina o le vii o le malo.

[Ata i le itulau 23]

Na filifili tauleleʻa Eperu e toʻatolu e faafiafia le Atua e ala i lo latou tutumau ma faaaloalo

[Ata i le itulau 24]

E ao faapefea ona gaoioi se Kerisiano i le taimi o se sauniga e faaalia ai le lotonuu?