Se Lesona Mai le Kasita

“UA ILOA e le kasita i le lagi ona lava po; . . . a ua le iloa e loʻu nuu le faamasinoga a Ieova.” (Ieremia 8:7) O upu nei na faalauiloa atu ai e le perofeta o Ieremia le faamasinoga a Ieova faasaga i tagata aposetate o Iuta, o ē na tuua Ieova lo latou Atua ae liliu atu ma tapuaʻi i atua ese. (Ieremia 7:18, 31) Aiseā na filifilia ai e Ieremia le kasita e fai ma faaaʻoaʻoga autū mo tagata Iutaia lē faamaoni?

I tagata Isaraelu, o le kasita (matuu) aemaise lava le kasita paʻepaʻe, sa masani ona vaaia a o femalagaaʻi i laueleele ia o loo taʻua i le Tusi Paia. O le upu Eperu mo lenei manulele lapoʻa e uumi ona vae e feāsaa’i solo, o se upu e faasino i le kenera fafine, o lona uiga “o lē faamaoni; o lē e alofa ma agalelei.” Ua talafeagai lelei lenei upu ma kasita auā o kasita papaʻe, e lē pei o le tele o isi manulele, e nonofo faatasi pea lava ia kasita tane ma kasita fafine i o latou olaga atoa. Pe a mavae lo latou nonofo i atunuu māfanafana seʻi māeʻa le tau mālūlū, o le tele o kasita, e masani lava ona toe foʻi atu i lea tausaga ma lea tausaga i faamoega lava ia na latou faaaogāina muamua.

O amioga masani a kasita, ua faataʻitaʻia ai le uiga o le faamaoni i isi auala mataʻina. E tofu sao uma lava le kasita tane ma le fafine i le faafofoaina o fuāmoa ma le fafagaina o tamaʻi manulele. Ua faamatalaina i le tusi, Our Magnificent Wildlife e faapea: “I le pei lava o mātua, o kasita, e matuā faamaoni lava le tasi i le isi. Na lele maualuga atu se kasita tane i Siamani i luga o uaea eletise malolosi ma sipaka ai. Ae sa faaauau pea e lana paaga ona faafofoa na o ia ia fuāmoa mo le 3 aso, ma i lenā taimi, na ia tuua ai le faamoega mo sina taimi puupuu ae alu atu e saʻili mai ni meaʻai. . . . I le isi foʻi taimi, pe a fanaina le kasita fafine, e tausia lava e le kasita tane na o ia ia manu laiti.”

O le mea moni, o lona faaalia o le faamaoni masani i lana paaga mo lona olaga atoa, ma le tausia ma le agalelei o ana tamaʻi manu, ua ola ai le kasita e tusa ma le uiga o lona igoa—“o lē faamaoni.” Ua avea kasita ma faaaʻoaʻoga lelei ma le malosi i le nuu lē faamaoni ma le liliu ese o Isaraelu.

I le toʻatele i aso nei, ua manatu ai i le faamaoni e faapea, o se tū faaanamua ua lē o toe aogā—o se uiga lelei ae e lē o toe aogā. O le faateleina o talaga faaipoipoga, tuulafoaʻiina, lē maufaatuatuaina, ma isi lava faiga taufaasesē, ua faaalia ai e lē o toe faatāuaina le faamaoni. I se faaeseesega, ua matuā faatāuaina ai e le Tusi Paia le faamaoni lea e uunaʻia e le alofa ma le agalelei. Ua faalaeiauina e le Tusi Paia Kerisiano ina ia “oofu outou i le tagata fou ua faia e foliga i le Atua, i le amiotonu ma le amio lelei e faamaoni.” (Efeso 4:24) Ioe, ua fesoasoani le tagata fou iā i tatou ina ia faamaoni ai, ae e mafai foʻi ona tatou aʻoaʻoina se lesona e uiga i le faamaoni mai le kasita.