Fesili Mai le ‘Aufaitau
Fesili Mai le ʻAufaitau
E tusa ai o le malamalamaga e uiga i poloaʻiga a le Tusi Paia e faatatau i le faaaogāina tatau o le toto, e faapefea ona vaai Molimau a Ieova i faatulagaga faafomaʻi e toe faaaogā ai le toto o se tasi mo ia lava?
Na i lo le filifili e tusa ai ma le lagona o le tagata lava ia pe e tusa ai o nisi o fautuaga faafomaʻi, e tatau i Kerisiano taʻitoʻatasi ona tilofaʻia ma le faamaoni le mea o loo fai mai ai le Tusi Paia. O se mataupu e fitoitonu i le vā o ia ma Ieova.
Ua faatonu mai e Ieova, o lē o loo tatou nofo aitalafu ai i o tatou ola, ina ia aua neʻi faaaogāina le toto e fai ma mea e ʻai. (Kenese 9:3, 4) I le Tulafono a Isaraelu anamua, na faatapulaa ai e le Atua le faaaogāina o le toto ona e fai ma sui o le ola. Na ia faatonu mai e faapea: “O i le toto le ola o le tino; ua ou tuuina atu ai foi ia te outou e fai aʻi le togiola mo outou i luga o le fata faitaulaga.” Ae faapefea pe a tapē e se tagata se manu e fai ai se meaʻai? Na fetalai le Atua: “Ia faamasaaina lava e ia lona toto, ma ufiufi ai i le eleele.” * (Levitiko 17:11, 13) Na toe taʻua pea lava pea e Ieova lena faatonuga. (Teuteronome 12:16, 24; 15:23) Na taʻua e le Soncino Chumash faa-Iutaia e faapea: “E lē tatau ona teuina le toto ae ia avatu e tusa o se mea ua lē aogā ona faaaogāina e ala i le sasaa i le eleele.” E leai se Isaraelu na te fai ma ana, teuina, ma faaaogāina le toto o se isi meaola, ona o lona ola e mai ia Ieova.
O le matafaioi ina ia tausia Tulafono Faa-Mose na faaiʻuina ina ua maliu le Mesia. Peitaʻi, o loo tumau pea le vaaiga a le Atua i le paia o le toto. Ina ua uunaʻia e le agaga paia o le Atua, na taʻu atu ai e le ʻauaposetolo i Kerisiano ina ia ‘faamamao mai le toto’. O lena faatonuga sa lē tatau ona manatu māmā i ai. E tutusa lava lona tāua ma le itu tau amio i le taumamao lea mai feusuaʻiga lē mamā po o le ifo i tupua. (Galuega 15:28, 29; 21:25) Ina ua faasolo ina taatele le ofoina atu ma le tuiina o toto i le senituri lona 20, na malamalama Molimau a Ieova faapea o lenei faiga e feteenaʻi ma le Afioga a le Atua. *
I nisi taimi, o le a uunaʻia ai e se fomaʻi se tagata maʻi ina ia tui ese lona toto ma teuina mo ni vaiaso a o lumanaʻi le taotoga (preoperative autologous blood donation, po o le PAD) ma pe afai la e iai se manaʻoga mo se toto, e mafai ona ia toe tuiina atu le toto lea sa teuina o le tagata maʻi ia te ia lava. Peitaʻi, o le aoina faapena, le teuina, ma le tuiina o le toto e matuā feteenaʻi lava ma le manatu o loo taʻua i le Levitiko ma le Teuteronome. E lē tatau ona teuina le toto; e ao ona sasaa ese—faafoʻi atu i le Atua, i se isi faaupuga. O le mea moni, e lē o toe pule le Tulafono Faa-Mose i le taimi lenei. E ui i lea, e faaaloalo pea Molimau a Ieova i mataupu silisili a le Atua o loo aofia ai i na tulafono, ma o loo latou maumauaʻi e ‘faamamao mai le toto.’ O lea, tatou te lē ofoina atu le toto, tatou te lē teuina foʻi mo ni tuiga toto lo tatou toto lea sa ao ona ‘sasaaina i le eleele.’ O lena faiga e lē tusa ai ma le tulafono a le Atua.
O nisi fuafuaga po o ni suʻesuʻega e faaaogā ai le toto o se tasi, e lē o matuā manino mai se feteenaʻiga ma mataupu silisili ua faamaumauina a le Atua. Mo se faaaʻoaʻoga, e toʻatele Kerisiano ua latou malilie ina ia tui ese se vaega o o latou toto ina ia suʻesuʻeina pe iloiloina, pe a māeʻa ona tiaʻi lea o lena toto sa suʻe. E iai foʻi nisi fuafuaga lavelave e faaaogā ai le toto o se tasi e ono fautuaina mai e fomaʻi le faia.
Mo se faaaʻoaʻoga, a o faagasolo nisi o taotoga, e ono aveese mai ai se vaega o le toto mai le tino i se faiga e taʻua o le hemodilution. Ua faaopoopoina se suāvai i le toto o loo totoe i le tagata maʻi. Mulimuli ane, ona toe faaalu atu uma lea ia te ia o lona toto lava lea sa faataamilo i fafo, ma ua faasolo ai la ina toe foʻi le malosi o le toto i le tulaga e tatau ona iai. I se tulaga talitutusa, o le toto lea e alu atu agaʻi i se manuʻa atonu e taofia ma faamamāina ina ia mafai ai ona toe faafoʻi atu sela mūmū i le tagata maʻi; o le faiga lea e taʻua o le faasaoina o sela. I se isi faiga, e faaalu atu ai le toto i se masini na te faaauauina mo se taimi lē tumau gaoioiga masani lea e faia e totoga o le tino (mo se faataʻitaʻiga, o le fatu, māmā, po o fatu gaʻo). Ona toe faafoʻi atu lea o le toto lea sa i le masini i le tino o le tagata maʻi. I nisi o faiga, e faaalu atu ai le toto i se masini e tuueseesea vaega o le toto (centrifuge) ina ia mafai ona aveesea ai vaega o le toto ua faaleagaina pe ua āfaina. Po o le sini, ina ia tuuesea nisi o vaega ninii o le toto ma faapea ona tuu atu i nisi vaega o le tino. E iai foʻi suʻesuʻega e faia lea e aveese mai ai se vaega o le toto ina ia mafai ona teuina pe faafefiloi ma se vailaau, ona toe tuu atu lea i le tino o le tagata maʻi.
E ono eseese auʻiliʻiliga o faiga, ae mautinoa e faaauau pea ona faateleina ia le fou o faatulagaga, o togafitiga, ma suʻesuʻega. E lē o sa matou tiute tauave le auʻiliʻiliina o faiga taʻitasi ma faia i ai se faaiʻuga. E tatau i se Kerisiano ona filifili mo ia lava pe faapefea ona faaaogāina lona toto pe a feagai ai ma se faiga o se taotoga, suʻesuʻega faafomaʻi, po o se togafitiga o loo faia i le taimi nei. A o leʻi oʻo ina tutupu mai ni toʻatugā, e tatau ona ia maua mai le fomaʻi faamatalaga moni i le auala o le a faaaogā ai lona toto a o faagasolo se togafitiga. Ona ia filifili lea e tusa ma le mea o loo faataga mai e lona lotofuatiaifo. (Tagaʻi i le pusa.)
E ao i Kerisiano ona manatua pea i o latou mafaufau lo latou tuutoina atu i le Atua ma le matafaioi ‘ina ia alolofa atu ia te ia ma o latou loto atoa, ma o latou agaga atoa, ma o latou malosi atoa, ma o latou manatu atoa.’ (Luka 10:27) I le lē pei o le toʻatele o le lalolagi, e tautele i Molimau a Ieova la latou faiā lelei ma le Atua. Ua talosaga mai Lē Foaʻi Ola ia i tatou uma ina ia faatuatua i le toto maligi o Iesu. Tatou te faitau e faapea: “O ia foi [Iesu Keriso] ua tatou maua ai le togiola i lona toto, o le faamagaloina o agasala.”—Efeso 1:7.
[Faamatalaga pito i lalo]
^ pala. 4 Na tusi le polofesa o Frank H. Gorman e faapea: “O le sasaa ese o le toto e matuā malamalama lelei o se gaoioiga o le āva lea e faaalia ai le faaaloalo mo le ola o le manu ma o lea, e faaaloalo ai i le Atua, o lē na foafoaina ma o lē o loo faaauau pea ona manatu mamafa mo lena ola.”
^ pala. 5 I le Watchtower o Iulai 1, 1951, o loo taliina ai fesili autū e faatatau i lenei mataupu, o loo faaalia ai pe aiseā e lē talafeagai ai tuiga toto e faaaogāina ai toto o loo tauofoina atu.
[Pusa i le itulau 31]
FESILI E FESILI IFO AI IA TE OE LAVA
Afai o le a faaalu ese atu i fafo se vaega o loʻu toto mai loʻu tino ma faapea ona taofia i se taimi le fegasoloaʻi, pe o le a faataga ea e loʻu lotofuatiaifo aʻu ina ia vaai i ai i lenei toto o se vaega o loʻu tino, lea e lē manaʻomia ai ona ‘sasaa i le eleele’?
Pe o le a faatigā mai ea loʻu lotofuatiaifo ua uma ona toleniina lelei i le Tusi Paia pe afai a o faagasolo se faiga po o ni togafitiga faafomaʻi, ae suia ai se vaega o loʻu toto lea na aveese, ma faapea ona toe faafoʻi mai i totonu o loʻu tino?