E Mafai Ona E Tumau i le Mamā Tau Amio i se Lalolagi Amio Lē Mamā

E AULELEI le alii. E talenia le fafine ma e lalelei. E taufai galulue i le kamupani e tasi. Sa matuā uaʻi totino atu le tamaʻitaʻi i le alii. Sa mataʻitūina e le alii le tamaʻitaʻi. E fetufaaʻi a la meaalofa. E leʻi umi lava ae ulu loa le alofa o le tasi i le isi. Na tuua e le alii lana avā ona o lea fafine. O le iʻuga, na filifili ai le fafine e nonofo pea ma lana tane ae faamuta le la faifaiga ma lea alii. E aunoa ma se lotoatoa, na taumafai ai le alii e toe foʻi i lana avā. Peitaʻi ona o le leai o se salamō moni, e leʻi taulau ai o ia. Sa faaauau pea ona ola i latou uma sa aafia ai, e ui i ni aafiaga.

O amioga mamā faaleituaiga ua lē o toe manatu i ai o se uiga lelei i lenei lalolagi. O le saʻilia ma le lē pulea o tuʻinanauga ma le faamalieina e foliga mai o se olaga masani. Ua faapea mai le New Encyclopaedia Britannica: “E foliga mai o loo taatele le mulilua ma i nisi o taimi, e pei lava le tele o le mulilua o le tele o faaipoipoga.”

Ae peitaʻi, na finagalo Ieova i faaipoipoga ina ia “faamamaluina . . . e tagata uma” ma o le moega o le faaipoipoga ia “leai sona leaga.” (Eperu 13:4, LF ) Ua faailoa mai e le Tusi Paia faapea: “Aua neʻi faaseseina outou; o e faitaaga, ma e ifo i tupua, ma e mulilulua, ma e faasotoma . . . e le fai mo latou tofi le malo o le Atua.” (1 Korinito 6:9, 10) O lea la, ina ia maua le finagalo malie o le Atua, e manaʻomia ona tatou tumau i le mamā tau amio i lenei lalolagi amio lē mamā.

E faapefea ona tatou puipuia i tatou mai taaʻiga leaga o loo siʻomia ai i tatou? I le mataupu lona 5 o le tusi o le Tusi Paia o Faataoto, o loo saunia mai ai e le tupu o Isaraelu anamua o Solomona ia tali. Seʻi o tatou tilofaʻia manatu na ia fai mai ai.

Tomai e Mafaufau ai Ina ia Puipuia Oe

Na amata i le faapea mai o le tupu o Isaraelu: “Loʻu atalii e, ia e faalogo mai i loʻu poto [“atamai,” NW].” Na ia faaopoopo mai: “Ia uai mai ou taliga i loʻu faautauta. Ina ia e tausiusi i le mafaufau; ma ia leoleoina le poto i ou laugutu.”—Faataoto 5:1, 2.

Ina ia tetee atu i faaosoosoga e faia amioga lē mamā, tatou te manaʻomia le atamai—o le tomai e faagaoioi ai le poto mai le Tusi Paia—ma le faautauta, po o le agavaa e iloa ai le eseesega o le saʻo mai le sesē ma filifili ai i le ala tonu. Ua uunaʻia i tatou ina ia uaʻi totoʻa atu i le atamai ma le faautauta ina ia puipuia ai o tatou tomai e mafaufau ai. E faapefea ona tatou faia faapea? Pe a tatou suʻesuʻeina le Afioga a le Atua, le Tusi Paia, e manaʻomia ona tatou mātauina le auala e faia ai e Ieova mea ma ia uaʻi atu o tatou taliga i lona finagalo ma ana fuafuaga. E ala i le faia faapea, o le a tatou tataʻi atu ai o tatou manatu ina ia faagaoioia i ala saʻo. E ōgatasi le tomai e mafaufau ai faapena ma le atamai tau Atua ma le poto. Pe a faaaogā tatau lenei tomai, e puipuia ai i tatou mai le maileia e faatosinaga i amioga lē mamā.

Faaeteete i Gutu Molemole

O le māfuaaga e tāua ai le tomai e mafaufau ai i le faatumauina o le mamā tau amio i se lalolagi lē mamā, ona o ala o se tagata e amio lē mamā e taufaasesē. Na lapataʻi mai Solomona e faapea: “E faasisina ifo meli ai laugutu o le fafine ese; o lona gutu foi e sili ona molemole i le suāuu; a e mulimuli ane ua oona ia, e pei o le laena; e maamaai o ia, e pei o le pelu ua faatau maai ona itu.”—Faataoto 5:3, 4.

 I lenei faataoto, o le tagata e lē taupulea ua faaata mai e se “fafine ese”—se fafine talitane. * O upu na te faatosina ai tagata e pei o le suamalie o le meli ma e sili ona molemole i lo le suāuu olive. Pe e lē amata mai ea i lenei auala le tele o faatosinaga faaleituaiga lē mamā? Mo se faaaʻoaʻoga, seʻi manatu i le mea na tupu i se failautusi lalelei e 27 tausaga le matua o Amy. Na ia faapea mai: “E matuā uaʻi mai lava ia te aʻu lenei tamāloa i le galuega ma na te viiviia aʻu i avanoa uma na te maua. O se faalogona lelei le mātauina mai e isi. Ae na mafai ona ou iloa manino atu o lona naunau mai ia te aʻu e tau lava o faiga faaleituaiga. O le a lē faaseeina aʻu i ana taumafaiga.” O upu taufaasesē a se tagata taufaasee e masani lava ona faatosina, seʻi vaganā lava ua tatou mātauina ona uiga moni. Ona o lenei mea, e moomia ai ona tatou faagaoioia lo tatou tomai e mafaufau ai.

O iʻuga mulimuli o amioga lē mamā e oona pei o le laena ma e maamaʻai pei o le pelu e faatau maai itu—e tigā ma e oo ai i le oti. O se lotofuatiaifo ua oīa, se maʻitō e leʻi manaʻomia, po o se faamaʻi pipisi e māfua mai i feusuaʻiga lē mamā e masani o iʻuga oona na o ia ituaiga o amioga. Ma seʻi manatu i le matuitui o le tigā o faalogona e oo i le paaga faaipoipo a se tasi ua lē faamaoni. O sina gaoioiga lē faamaoni tau i le faaipoipoga a se tasi e mafai ona faamanuʻalia ma faaumiumi ona aafia ai. Ioe, e tigā amioga lē mamā.

I sona manatu e uiga i le ituaiga o olaga o se fafine lē taupulea, na faaauau mai ai le tupu poto e faapea: “E o ifo ona vae i le oti; e taunuu atu ona laasaga i seoli. Ina neʻi e mafaufau i le ala o le ola, o lea ua feseai ai ona ala; e te le mafai ona e iloa.” (Faataoto 5:5, 6) O ala o le fafine amio lē mamā e taʻitaʻia atu ai o ia i le oti—o ona laasaga i Seoli, le tuugamau. Ona o le salalau atu o faamaʻi pipisi e māfua mai i feusuaʻiga lē mamā, aemaise lava le AIDS, maʻeu le moni o nei upu! O lona iʻuga e talitutusa atu i le iʻuga o i latou e ō faatasi ma ia i ona ala faapiʻopiʻo.

Faatasi ai ma se manatu mamafa moni, na augani mai ai le tupu: “O lenei, le fanau e, ia outou faalogo mai ia te au; aua foi neʻi ʻalo ese outou i upu a loʻu gutu. Ia taumamao lou ala ia te ia; aua foi e te faalatalata i le faitotoa o lona fale.”—Faataoto 5:7, 8.

E moomia ona tatou matuā faamamao ese mai taaʻiga a tagata e amio lē mamā. Aiseā e tatou te faaavanoa atu ai i tatou i o latou ala e ala i le faalogologo i musika matagā, le matamata i faafiafiaga e faaleagaina ai, po o le faaavanoa atu o i tatou i ata ma faamatalaga o faiga matagā faaleituaiga? (Faataoto 6:27; 1 Korinito 15:33; Efeso 5:3-5) Ma pagā le valea o le faauaʻi mai o i latou e ala i le faamanaia po o le faateteine pe e ala i le faia o laʻei ma teuga e lē onomea!—1 Timoteo 4:8; 1 Peteru 3:3, 4.

E Taugatā Foʻi Lona Taui

O le ā le isi māfuaaga e tatau ai ona matuā faamamao ese o tatou ala mai ala o se tagata lē taupulea? Na tali Solomona e faapea: “Ina neʻi e avatu lou matagofie i nisi, ma ou tausaga i le ua saua; ina neʻi malilie tagata ese i au oloa; neʻi i ai foi mea na e tiga ai i le fale o le tagata ese; ona e oi ai lea i ona po amuli, pe a faaumatia lou tino uma.”—Faataoto 5:9-11.

O lea na faamamafa ai e Solomona le taui taugatā o le lolo atu i amioga lē mamā. O le mulilua ma le aveesea o le mamalu, po o le faaaloalo totino, e iai lo latou sootaga. Pe e lē o se faalumaina moni ea le tau lava ina faamalieina o tatou lava faanaunauga i amioga lē mamā pe mo se isi tagata? Pe e lē faaalia ai ea le leai o se faaaloalo totino i le lolo atu lea i feusuaʻiga ma se tasi e lē o sau paaga faaipoipo?

O le ā la e aofia ai i le ‘avatu o o tatou tausaga, a tatou oloa, ma fua o a tatou galuega i tagata ese’? Na faapea mai se tasi lomiga: “O loo manino le manatu o nei fuaiupu: E ono taugatā le taui o amioga lē mamā; auā o mea uma e galue i ai se tasi o le—mamalu, pule, tamaoaiga—e ono leiloa ona o le manaʻo tele o le fafine po o le tāpā foʻi e le nuu o se sala e totogiina atu ona o le mea ua faia.” E mafai ona matuā taugatā lava faiga lē mamā!

O le leiloa o lona mamalu ma faaalu uma o ana mea totino, o le a ōi ai le tagata valea, i le faapea mai: “Sa tele naua loʻu ʻinoʻino ina  aʻoaʻoina, ma ua tetee atu e loʻu loto le aoaiga; na ou le faalogo foi i upu a e na aʻoaʻo mai ia te au; ma ua le uai atu oʻu taliga i oʻu aʻoaʻo. Toetoe lava, ua atoa mea leaga ua ou i ai, o i luma lava o le faapotopotoga ma le saofaiga.”—Faataoto 5:12-14.

I se taimi mulimuli ane, o le a fai ai e le tagata agasala le mea na taʻua e se tasi tagata poto faapitoa e faapea “o se lisi umi o ‘ana fai’: ana fai ou te faalogo i loʻu tamā; ana fai ou te lē mulimuli i oʻu lava manatu; ana fai ou te taliaina fautuaga a isi.” Peitaʻi, o lenei mea ua toe iloa ane ua fai si tuai. Ua faaleagaina nei le olaga o le tagata lea ua lē mamā i lenei taimi, ma ua eleelea lona igoa. Maʻeu le tāua mo i tatou ona tilofaʻia le taui taugatā o le faia o amioga lē mamā a o leʻi lofitūina ai i tatou!

“Ia E Inu Vai ai Lou Lava Vailepa”

Pe o faatalatū le Tusi Paia e faatatau i faiga faaleituaiga? E matuā leai lava. O faalogona o le alofa fetosinaaʻi ma le lē manofo o loo olioli ai i le va o se alii ma se tamaʻitaʻi o ni meaalofa mai le Atua. Peitaʻi, o lenei faalogona māfana e ao ona olioli ai tau lava o paaga faaipoipo. O lea mo se tane faaipoipo, na tuuina atu e Solomona lenei apoapoaʻiga: “Ia e inu vai ai lou lava vailepa, ma vai e tafe mai ai lou lava vaieli. Ia faasalalau solo ou vaipuna, ma ou vaitafe i malae; ia fai mo oe ia vai, na o oe lava; a e aua le faatasi ma oe tagata ese.”—Faataoto 5:15-17.

O “lou lava vailepa” ma “lou lava vaieli” o ni faaupuga faafatusolo mo se avā faapelepele. O le olioli i feusuaʻiga ma ia ua faatusaina i le taumafaina o se vai e faafouina ai. E lē pei o vai o loo maua i nofoaga faitele, o se vailepa po o se vaieli e manatu i ai o se mea totino. Ma ua fautuaina le tane ina ia maua mai ni fanau ma lana avā i lona aiga na i lo le faasalalau solo o ana fanau i malae, o lona uiga, i le feusuaʻi ma isi fafine. E manino mai, o le fautuaga mo se tane ia faamaoni i lana avā.

Na faaauau mai le tagata poto e faapea: “Ia manuia lou vaipuna, ma ia e fiafia i lau avā na fai a o ē taulealea. Ia pei o le aila pele o ia ma le ʻoti o le vao e matagofie; ia malie oe i ona susu i aso uma; aua le aunoa ona e matuā fiafia i lou alofa ia te ia”—Faataoto 5:18, 19.

O le “vaipuna,” o loo faasino atu i le puna o le faamalieina i feusuaʻiga. O le faamalieina e maua mai i feusuaʻiga a se tasi ma lana paaga faaipoipo e “manuia”—e foaʻi mai e le Atua. O lea, ua timaʻia ai se tane ina ia fiafia i lana avā na fai a o tauleʻaleʻa. Ia te ia, ua alofagia lana avā ma lalelei pei o le aila fafine, ma e tauagafau ma onomea pei o le oti vao.

Ona sosoo ai lea ma le faailoa atu e Solomona o fesili faatupu manatu se lua: “Loʻu atalii e, pe se a foi le mea e te fiafia ai i le fafine ese; ma e fusi le fatafata o le fafine ese?” (Faataoto 5:20) Ioe, aiseā o le a tosina atu ai se tagata ua uma ona faaipoipo i faiga faaleituaiga i fafo atu o le faaipoipoga e ala i ni faifaiga ma se tagata i le galuega, le aʻoga, po o se isi lava nofoaga?

Mo Kerisiano faaipoipoina, na tuuina atu i ai e le aposetolo o Paulo le fautuaga lenei: “O laʻu lenei e fai atu ai, le au uso e, ua itiiti ona aso ua totoe; o lenei, o e ua fai avā, ia peiseai ua le fai avā.” (1 Korinito 7:29) O le ā ua  aofia ai i lenei mea? O soo o Iesu Keriso e ao ona ‘muai saili le malo.’ (Mataio 6:33) O lea la, e lē tatau i ulugalii ona matuā faaalu uma le taimi e uaʻi atu ai le tasi i le isi ma la faatulaga lua ai manaʻoga o le Malo i o la olaga.

Manaʻomia le Pulea Totino

E mafai ona pulea tuʻinanauga i faiga faaleituaiga. E ao ona faapena i latou o loo faanaunau mo le finagalo malie o Ieova. Na timaʻi mai le aposetolo o Paulo e faapea: “O le finagalo foi lenei o le Atua, ia faapaiaina outou, ina ia faamamao outou ma le faitaaga; ia taitasi outou ma iloa ona fai o lona lava tino ma le faapaiaina ma le taʻuleleia.”—1 Tesalonia 4:3, 4, LF.

O lea e lē tatau ai mo talavou ona vavevave faaipoipo i le taimi muamua lava e faateʻia ai i latou i uunaʻiga i faiga faaleituaiga. O le faaipoipoga e manaʻomia ai se taʻutinoga, ma o le ola e ōgatusa ma lena tiute tauave e moomia ai le taʻumatuaina. (Kenese 2:24) E sili atu ona lelei le faatali seʻia “pāsia le tauosoosoga o le talavou”—le vaitaimi e malolosi ai faalogona mo feusuaʻiga ma e mafai ona faasesēina ai le faaiʻuga a se tasi. (1 Korinito 7:36, NW) Ma maʻeu le valea ma o se agasala mo se tagata matua o loo faanaunau e faaipoipo le aafia i ni faiga lē mamā ona pau lava le māfuaaga ona ua lē maua se tasi e talafeagai ai ina ia avea ma ana paaga faaipoipo!

“O Ana Amio Leaga e Maua ai Lava Le ua Agasala”

O le māfuaaga autū e sesē ai amioga lē mamā ona o Ieova—Lē na Foaʻi maia le ola ma o Lē na Tuuina maia le malosi mo faiga faaleituaiga i tagata—na te lē taliaina. O lea o le tuuina atu o le uunaʻiga sili ona malosi mo le mamā tau amio, na taʻutino mai e le tupu o Solomona: “Aua o loo i luma o fofoga o Ieova o ala o le tagata; na te fuatia foi ona ala uma.” (Faataoto 5:21) Ioe, e leai se mea na natia i fofoga o Ieova, “tatou te taʻu atu ia te ia a tatou amio.” (Eperu 4:13) So o se gaoioiga lava o faiga lē mamā faaleituaiga, e tusa lava po o le ā le faalilolilo ona faia ma o le ā foʻi ona āuga faaletino ma aafiaga i le faiā ma isi e oo i ai, e mautinoa le faaleagaina ai foʻi o le tatou faiā ma Ieova. Pagā le valea o le leiloa o le filemu ma le Atua ona o sina taimi puupuu lava mo le faamalieina e lē tatau!

O ē ua auai e aunoa ma le masiasi i amioga lē mamā atonu e sao mai ai e aunoa ma se afaina—ae e lē mo se taimi umi. Na faailoa mai faapea e Solomona: “O ana amio leaga e maua ai lava le ua agasala; o maea o ana agasala e taofia ai o ia. E oti lava o ia, a o lei aʻoaʻoina; o le tele o lona valea e sese ai o ia.”—Faataoto 5:22, 23.

Aiseā e lē tatau ai ona faasesēina se tasi o i tatou i se taimi? Auā ua uma ona muaʻi lapataʻia i tatou e le tusi o Faataoto e tusa ai o ala taufaasesē o le lalolagi. Ma ua faatulaga ai i o tatou luma le taui e masani lava ona oo i ai feusuaʻiga lē mamā—lo tatou soifua mālōlōina, a tatou mea totino, lo tatou malosi, ma lo tatou mamalu. Faatasi ai ma lena tofamamao manino, e lē manaʻomia ona tatou oo i se tulaga tatou te faia ai se lisi umi o ni “ana fai.” Ioe, e ala i le faatatauina o fautuaga ua tuuina mai e Ieova i lana Afioga faagaeeina, e mafai ai ona tatou tumau i le mamā tau amio i se lalolagi amio lē mamā.

[Faamatalaga pito i lalo]

[Ata i le itulau 30]

O iʻuga mulimuli o amioga lē mamā e oona pei o le laena

[Ata i le itulau 31]

“Ia e fiafia i lau avā na fai a o ē taulealea”