O le ā le Umi o Totoe mo Ē Amioleaga?
O le ā le Umi o Totoe mo Ē Amioleaga?
“Se a ea le mea e te . . . le fetalai [ai Ieova] ina o fasioti e le tagata agasala le tagata e sili ona amiotonu ia te ia?”—SAPAKUKA 1:13.
1. O āfea o le a tumu atoatoa ai le lalolagi i le malamalama o le mamalu o Ieova?
PE O le a faaumatia ea e le Atua ē amioleaga? Afai o lea, o le ā le umi e ao ona tatou faatalitali ai? O fesili faapena o loo fesiligia e tagata i le lalolagi atoa. O fea tatou te maua i ai ni tali? Tatou te maua i fetalaiga faavaloaga sa faagaeeina tauatua e faatatau i le taimi atofaina a le Atua. Ua faamautinoa mai e nei fetalaiga ia i tatou ua toe o se āga ona aumaia lea e Ieova le sala faafaamasinoga i ē uma e amioleaga. Ona faatoʻā mafai loa lea i le tulaga atoatoa ona “tumu le lalolagi i le malamalama o le mamalu o Ieova, faapei ona ufitia o le iliti tai i le suāsami.” O le folafolaga faavaloaga lena o loo maua i le Afioga Paia a le Atua i le Sapakuka 2:14.
2. O ā sala faafaamasinoga e tolu a le Atua o loo iai i le tusi o Sapakuka?
2 I le tusia pe ā o le 628 T.L.M., o loo iai i le tusi o Sapakuka se faasologa o sala faafaamasinoga e tolu mai ia Ieova le Atua. Ua uma ona faataunuu le lua o na faamasinoga. O le faataunuuga muamua o le faamasinoga lea a Ieova i le nuu anamua faalogogatā o Iuta. Ae faapefea le faamasinoga lona lua? O le sala faafaamasinoga a le Atua i le nuu faasauā o Papelonia. E moni la, ua ia i tatou māfuaaga uma e mautinoa ai o le a faataunuuina lava le sala lona tolu o nei sala faafaamasinoga tauatua. O le mea moni, tatou te faatalitalia ua i faitotoʻa lona faataunuuga. Mo le lelei o ē amio saʻo i nei aso e gata ai, o le a aumaia ai e le Atua le faaumatiaga i tagata amioleaga uma. O le tagata mulimuli lava o i latou ia o le a faamutaina i le “taua i le aso tele o le Atua e ona le malosi uma lava” o loo vave tele mai.—Faaaliga 16:14, 16.
3. O le ā le mea e mautinoa lava le oo mai i ē amioleaga i o tatou aso?
3 Ua matuā lalata mai lava le taua o le aso tele o le Atua. Ma o le sala faafaamasinoga tauatua mo ē amioleaga i o tatou aso e mautinoa lava e pei foʻi o le faataunuuga o sala faafaamasinoga a Ieova ia Iuta ma Papelonia. Peitaʻi i le taimi nei, ae ā pe a faaāta i o tatou mafaufau faapea o lea tatou te iai i Iuta i aso o Sapakuka? O ā ni mea o loo tutupu ai i lena laueleele?
Se Laueleele Fevesiaʻi
4. O le ā se tala e faateʻia ai ua faalogoina e Sapakuka?
4 Seʻi vaai atu faalemafaufau i le perofeta a Ieova o Sapakuka lena o loo nofonofo i luga o le taualuga māfolafola o lona fale, o loo faasavilivili ai i le mālū o le sau o le afiafi. O loo i ona autafa se laau faimusika. (Sapakuka 1:1; 3:19, upu faaiʻu) Ae ua faalogo atu Sapakuka i se tala e faateʻia ai. Ua fasiotia Uria e Ioakima le tupu o Iuta ma ua tuuina atu le tino maliu o lena perofeta i tuugamau o tagatānuu. (Ieremia 26:23) E moni, sa leʻi tumau le faatuatua o Uria ia Ieova, sa oo ina fefe ma sola atu ai i Aikupito. Peitaʻi o loo iloa e Sapakuka sa leʻi māfua faiga sauā a Ioakima ona o sona faanaunauga ia lagolagoina le tulaga mamalu o Ieova. E faamaonia mai lenei mea i le matuā lē amanaʻia e le tupu o tulafono tauatua ma lona ʻinoʻino i le perofeta o Ieremia ma isi sa auauna ia Ieova.
5. O le ā le tulaga faaleagaga sa iai i Iuta, ma ua faapēfea ona tali atu Sapakuka i nei mea?
5 Ua iloa atu e Sapakuka asu o mea manogi o loo alu aʻe i taualuga o fale o aiga o loo latalata ane. E lē o faamūina e tagata nei mea manogi i le avea o ni ē tapuaʻi ia Ieova. O loo latou faatino ni faiga faalotu sesē o loo uunaʻia e le tupu amioleaga o Iuta o Ioakima. Pagā se faalumaina ai! Ua matuā maligi loimata o Sapakuka, ma ia ʻaiʻoi atu: “Ieova e, ou te valaau seia afea, a e te le faafofoga mai; ou te alaga atu ia te oe ona o le sauaga, a e te le faaola mai? Se a ea le mea ua e faaali mai ai ia te au le amio leaga, ma e silasila i le puapuaga? e i oʻu luma le faatafunaina ma le saua, e i ai foi le fefinauaiga ma le faatupuina o le misa. O le mea lea ua faaleaogaina ai le tulafono, ua le faia foi le faamasinoga faamaoni; auā ua siosioina le ua amiotonu e le ua amio leaga, o le mea lea ua fai ai le faamasinoga faapiopio.”—Sapakuka 1:2-4.
6. O le ā ua tupu i le tulafono ma le faamasinoga tonu i Iuta?
6 Ioe, sa taatele faiga faaleaga mea ma faiga sauā. So o se mea lava e tagaʻi atu i ai Sapakuka, na te vaaia lava puapuaga, o finauga, o misa. ‘Ua faaleaogaina le tulafono,’ ua lē o toe iai se malosi. Ae faapēfea le faamasinoga tonu? Ioe, ‘ua le taitai ona faia’ i se auala manumalo! Ua lē taitai tūmau. Na i lo lena, “ua siosioina le ua amiotonu e le ua amioleaga,” i le taumafai e ʻalofia le usitaʻia o faatulagaga o le tulafono na fuafua e puipuia ai tagata lē sala. O le mea moni, ‘ua fai le faamasinoga faapiopio.’ Ua matuā leaga faia lava. Pagā se tulaga sili ona leaga ua iai mea!
7. O le ā le mea ua filifili maumauaʻi Sapakuka e fai?
7 Ua mālōlō teisi Sapakuka ona toe tomānatu lea i le tulaga ua iai. Po o le a ia faamaamulu ea? E mātua leai lava! Ina ua māeʻa ona ia toe manatunatu i tua i sauāga uma sa oo i auauna faamaoni a le Atua, ona toe faafouina ai lea e lenei tagata faamaoni lana filifiliga ia tūmau mausalī ma ia maumauaʻi o se perofeta a Ieova. O le a faaauau pea ona folafola atu e Sapakuka le feʻau a le Atua—e tusa pe oo ai i le oti i lona faia faapea.
Ua Faatino e Ieova se “Galuega” e Lē Matalitonuina
8, 9. O le ā le “galuega” lē matalitonuina o loo faatino e Ieova?
8 I le faaaliga, ua vaaia ai e Sapakuka tagata na faia tapuaʻiga sesē, latou te lē o faamamaluina le Atua. Seʻi faafofoga foʻi i le tuleiga a Ieova ia i latou: “Ia outou vaai atu i nuu ese, ma ia outou iloa, ma ia matuā taufaiofo lava.” E foliga mai, o loo tau mānatu Sapakuka pe aiseā ua fetalai atu ai faapea le Atua i nei tagata amioleaga. Ona ia lagona atu lea o Ieova o fetalai ia i latou: “Auā ou te faia se galuega i ona aso o outou, e ui lava ina talaina atu, tou te le talitonu ai lava.” (Sapakuka 1:5) O le mea moni, o Ieova lava ia o loo ona faatinoina lenei galuega e lē o mafai ona latou talitonuina. Ae o le ā lena galuega?
9 O loo faalogologo totoʻa atu Sapakuka i isi fetalaiga atili a le Atua, o loo faamauina i le Sapakuka 1:6-11. O le feʻau lenei mai ia Ieova—ma e leai se atua sesē po o se tupua e leai se ola na te mafai ona taofia lona faataunuuga: “Faauta, ou te lagaina Kaletaia, o le nuu saua ma le tele vavave, o loo latou o atu i le lautele o le lalolagi, e fai mo latou o mea e nonofo ai, a e le ni o latou nuu. O i latou e matautia ma le fefefe i ai o tagata; e tupu mai ia te i latou lava lo latou faamasinoga ma lo latou mamalu. E sili ona tele vavave foi a latou solofanua i nameri, e sili ona feai foi i luko i le afiafi; e faalialia [“osooso,” NW] foi a latou ʻau e tietie i solofanua, o a latou ʻau foi e tietie i solofanua e o mai i le mea mamao; latou te felelei pei o aeto e tele vavave e aai ai. Latou te o uma mai ina ia saua; o le faasaga mai o latou mata e pei o le matagi mai sasae; latou te faapotopotoina tagata o taua e pei o le oneone. Latou te tauemu i tupu, latou te tapisa foi i tamaalii; latou te tapisa i ʻolo uma, auā latou te tanu ai le eleele, ma latou aea. Ona atili naunau ai lea o i latou, ona latou o atu lea, ma latou nofo sala ai, o loo faapea ane, O lo latou malosi lea i lo latou atua.”
10. O ai ua faatulaʻi mai e Ieova?
10 Maʻeu se lapataʻiga faavaloaga mai Lē Silisili Ona Maualuga! O loo faatulaʻi mai e Ieova tagata Kaletaia, o le malo sauā lea o Papelonia. I lana savaliga i le ‘lautele o le lalolagi,’ o le a ia faatoʻilaloina ai le tele ma le anoanoaʻi o nofoaga. Pagā se tau faamataʻu! O ʻau e toʻatele a Kaletaia e ‘mataʻutia ma fefefe ai,’ e faapopolegia ma atuatuvale ai. E fai a latou lava tulafono lē masuia. ‘E tupu mai ia i latou a latou lava faamasinoga.’
11. E faapēfea ona e faamatalaina le agaʻi atu o ʻau a Papelonia e faasagatau ia Iuta?
11 E tele vavave atu solofanua a Papelonia na i lo nameri saoasaoa. E sili atu ona feʻai a latou ʻautietie solofanua na i lo luko fia aai o loo tutuli i le po. I le lē manofo i le fia tamomoʻe, ‘ua osooso ai a latou solofanua’ ma le lē mataofiofia. Mai Papelonia mamao ua latou agaʻi atu ai i Iuta. I le felelei atu e pei ni aeto o loo taututuu atu i se ʻaiga susua, e lē o toe mamao ona osofaʻia lea e le ʻau Kaletaia o ē ua latou maileia. Pe o le a tau ea o se osofaʻiga puupuu ma le faafuaseʻi lenei e faatino e ni nai fitafita? E matuā leai lava! “Latou te o uma mai ina ia saua,” e pei o se ʻautau matuā toʻatele o loo lolofi atu e faia se faatamaʻiaga. I o latou foliga tiotio, latou te tietie atu i sisifo e agaʻi i Iuta ma Ierusalema, i le saoasaoa e pei o le matagi mai sasaʻe. Ua matuā aoina e ʻau a Papelonia le tele o pagota ua peiseaī ai o loo latou “faapotopotoina tagata o taua e pei o le oneone.”
12. O ā uiga ua faaalia mai e tagata Papelonia, ma o le ā e mautinoa lava ua “nofo sala” ai lenei fili e mataʻu ai?
12 E tauemu atu fitafita a Kaletaia i tupu ma faifai atu i tamālii, o na tagata uma ua leai so latou malosi e taofia ai le agaʻi atu ma le lē taofiofia o fitafita. Ua latou “tapisa i ʻolo uma,” auā e paʻū so o se ʻolo lava pe a “tanu [e Papelonia] le eleele” e ala i lo latou fatufatu aʻe o se maupuʻepuʻe o palapala ina ia aʻea ai. I le taimi atofa a Ieova, o le a ‘atili ona naunautaʻi’ nei fili e matataʻu ai. I le osofaʻia o Iuta ma Ierusalema, o le a mautinoa ai lava lo latou “nofo sala” i lo latou faamanuʻalia o tagata o le Atua. Pe a mavae le manumalo e pei o se asiosio, o le a gugutu mai ai le taʻitaʻiʻau a Kaletaia e faapea: ‘O lenei malosi e mai lo matou atua lea.’ Ae pagā le papaʻu o lona iloa o mea!
Se Faavae Talafeagai mo le Faamoemoe
13. Aiseā ua faatumulia ai Sapakuka i le faamoemoe ma le mautinoa?
13 A o faateleina le malamalama i fuafuaga a Ieova, ua tupu aʻe foʻi le faamoemoe i le loto o Sapakuka. I le ia te ia o le mautinoa atoatoa, ua ia tautala faaviivii ai e faatatau ia Ieova. E pei ona faamauina i le Sapakuka 1:12 (NW), ua faapea mai le perofeta: “Ieova e, e te lē mai le vavau ea? Loʻu Atua e, loʻu Paia e, e lē maliu lava oe.” E mautinoa, o Ieova o le Atua e “mai le vavau e oo i le faavavau.”—Salamo 90:1, 2.
14. O le ā le ituaiga o olaga ua sailia e aposetate o Iuta?
14 A o manatunatu i le faaaliga ua ia maua mai le Atua ma olioli i le malamalamaga ua maua mai ai, ona toe faapea mai lea o le perofeta: “Ieova e, ua e faataatia le faamasinoga; le Papa e, ua e faavaeina le aʻoaʻiga.” Ua matuā mamafa le faamasinoga a le Atua i aposetate o Iuta, ma ua talafeagai ona aʻoaʻia i latou, o se faasalaga mamafa mai ia Ieova. Sa tatau ona latou vaai atu ia te ia o lo latou Papa, ua na o lea lo latou ʻolo malosi moni, o le malu, ma le Puna o le faaolataga. (Salamo 62:7; 94:22; 95:1) Peitaʻi, e leʻi faalatalata atu taʻitaʻi aposetate o Iuta i le Atua, ma ua faaauau pea ona latou faatigā i tagata tapuaʻi o Ieova o ē e lē faatupu vevesi.
15. O le ā le uiga o le ‘sili ona manino o fofoga [o Ieova] e lē fia silasila ai i le amioleaga’?
15 Ua matuā mafatia ai lava le perofeta a Ieova i lenei tulaga. Ona ia faapea mai lea: “E sili ona manino ou fofoga, e te le fia silasila i le amio leaga, e le mafai foi ona e silasila i le agasala.” (Sapakuka 1:13) Ioe, e ‘sili ona manino fofoga [o Ieova] e lē fia silasila i le amioleaga,’ o lona uiga, na te lē faatagaina pea le faaauauina o le amioleaga.
16. E faapēfea ona e aoteleina mea o loo tusia i le Sapakuka 1:13-17?
16 Ona oso aʻe ai lea o ni fesili faatupu manatu i le mafaufau o Sapakuka. Ua ia fesili e faapea: “Se a ea le mea e te silasila ai i e o fai amio faaʻoleʻole, ma ē le fetalai ina o fasioti e le tagata agasala le tagata e sili ona amiotonu ia te ia? ma ē faia tagata ia pei o iʻa o le sami, pei o mea fetolofi, e leai so latou faipule? Ua latou avae ia te i latou uma i le mātau, ua aofia i latou i lo latou upega, ua taenaʻi foi ia te i latou i lo latou tuʻi; o le mea lea ua latou fiafia ai, ma ua mitamita lava. O le mea lea latou te fai ai taulaga i lo latou upega, latou te faamu ai foi mea manogi i lo latou tuʻi; auā o ia mea e lelei ai a latou mea ua maua, e lololo ai foi a latou mea e ʻai. O le mea ea lea latou te sasaa atu ai lo latou upega, ma le le mapu ona fasioti pea lava i atu nuu?”—Sapakuka 1:13-17.
17. (a) Ua faapēfea ona faataunuu e ʻautau a Papelonia le fuafuaga a le Atua, e ala i lo latou osofaʻia o Iuta ma Ierusalema? (e) O le ā le mea o le a faaali atu e Ieova ia Sapakuka?
17 I le osofaʻia o Iuta ma lona aai laumua o Ierusalema, o le a gaoioi ai ʻautau a Papelonia e tusa ma o latou lava manaʻo. O le a latou lē iloa o loo latou auauna i le avea o se auala a le Atua mo le faaoo mai o lana sala faafaamasinoga amiotonu i tagata lē faamaoni. E faigofie la ona iloa le pogai sa faigatā ai ia Sapakuka ona malamalama faapea o le a faaaogā e le Atua ʻautau a Papelonia amioleaga e faaoo maia Lana faasalaga. O na tagata Kaletaia lē alolofa e lē o ni tagata tapuaʻi ia Ieova. Latou te manatu i tagata ua na o ni ‘iʻa ma ni mea fetolofi’ e puʻea ma faatoʻilaloina. Peitaʻi, o le a lē umi ona iai Sapakuka i lona tulaga lē mautonu. Ua toeitiiti ona faaali atu lea e Ieova i lana perofeta e faapea o le a lē tumau pea ona iai Papelonia e aunoa ma le faasalaina ona o lo latou vetea ma le matapeʻapeʻa o le nuu ma lo latou faamasaa ma le lē alofa o toto o tagata.—Sapakuka 2:8.
Ia Nofo Sauni mo Isi Fetalaiga a Ieova
18. O le ā e mafai ona tatou aʻoaʻoina mai le uiga faaalia o Sapakuka, e pei ona atagia mai i le Sapakuka 2:1?
18 Peitaʻi, i le taimi nei, o loo faatalitali Sapakuka mo nisi fetalaiga a Ieova ia te ia. Ua taʻu mai ma le maumauaʻi e le perofeta e faapea: “Ou te tu i le mea ou te leoleo ai, ou te tu foi aʻu i le ʻolo, ou te vaavaai foi ina ia ou iloa pe se a se mea e fetalai mai ai o ia ia te au, pe se a foi se mea ou te tali atu ai i laʻu finauga.” (Sapakuka 2:1) Ua matuā naunautaʻi lava Sapakuka i mea o le a fetalai ai le Atua e ala atu ia te ia o se perofeta. O lona faatuatua ia Ieova o se Atua e na te lē faatagaina le amioleaga ua māfua ai ona ia tau mānatu pe aiseā ua faateleina ai pea le amioleaga, peitaʻi o loo ia loto malie e toe fetuunaʻi ona manatunatuga. Ae faapēfea la i tatou? Pe a tatou tau mānatu pe aiseā ua faataga ai pea le iai o nisi mea leaga, o lo tatou mautinoa i le amiotonu o Ieova le Atua e ao ona fesoasoani ia i tatou e tausia ai lo tatou paleni ma faatalitali ia te ia.—Salamo 42:5, 11.
19. I le moni o afioga a le Atua ia Sapakuka, o le ā na tupu i tagata faalogogatā o Iutaia?
19 E moni lava ana afioga ia Sapakuka, auā na faaoo mai e le Atua le sala faafaamasinoga i le malo faalogogatā o Iutaia e ala i le faataga o ʻautau a Papelonia e osofaʻia Iuta. I le 607 T.L.M., na latou faaumatia ai Ierusalema ma le malumalu, na latou fasiotia ē matutua ma ē iti, ma ave faatagataotaua le toʻatele. (2 Nofoaiga a Tupu 36:17-20) Ina ua mavae le faatāfeaina mo se taimi umi i Papelonia, sa mafai ona toe foʻi atu se vaega totoe o tagata Iutaia faamaoni i lo latou nuu ma mulimuli ane ai toe fausia le malumalu. Peitaʻi, ina ua mavae lena, sa toe faamaonia foʻi le lē faamaoni o tagata Iutaia ia Ieova—ae maise lava ina ua latou teena Iesu o le Mesia.
20. Na faapēfea ona faaaogā e Paulo le Sapakuka 1:5 e tusa ai o le teena o Iesu?
20 E tusa ai ma le Galuega 13:38-41, na faaali atu e le aposetolo o Paulo i tagata Iutaia i Anetioka po o le ā e uiga i ai le teena o Iesu ma ʻinoʻino i lana taulaga togiola. I le toe siiina mai o le Sapakuka 1:5, sa lapataʻi mai Paulo e faapea: “Ia outou, neʻi oo ia te outou le mea ua fai mai ai perofeta, O outou o e ʻinoʻino, ina vaai mai ia, ma ofo, ma mou ia; auā ou te faia lava e aʻu se galuega i ona aso o outou, o le galuega e ui ina faamatalaina ai ia te outou e se tasi, tou te le talitonu i ai.” I le ōgatasi ma upu na sii mai e Paulo, sa iai se faataunuuga lona lua o le Sapakuka 1:5 ina ua agaʻi atu ʻau a Roma ma faaumatia Ierusalema ma lona malumalu i le 70 T.A.
21. Sa faapeī manatu o tagata Iutaia i aso o Sapakuka i le “galuega” a le Atua o le faaumatiaina o Ierusalema e ʻautau a Papelonia?
21 I tagata Iutaia sa iai i aso o Sapakuka, o le “galuega” a le Atua o le faaumatiaina o Ierusalema e ʻautau a Papelonia, sa faigatā ona talitonuina talu ai o lena aai sa avea ma nofoaga o le tapuaʻiga a Ieova ma o le nofoaga foʻi sa nofotupu ai lana tupu faauuina. (Salamo 132:11-18) Ona o na māfuaaga, sa leʻi faaumatiaina ai lava muamua Ierusalema. Sa leʻi susunuina muamua lava foʻi lona malumalu. Sa leʻi faatoʻilaloina muamua lava foʻi le aiga tautupu o Tavita. Sa faigatā la ona talitonuina faapea o le a faataga e Ieova se mea faapena e tupu. Peitaʻi e ala ia Sapakuka, na avatu ai e le Atua se lapataʻiga talafeagai e faapea o le a tupu moni lava nei mea e faateʻia ai. Ma e faamaonia e talafaasolopito le tutupu moni lava o na mea e pei ona valoia ai.
Le “Galuega” Lē Matalitonuina a le Atua i o Tatou Aso
22. O le ā o le a aofia ai i le “galuega” lē matalitonuina a Ieova i o tatou aso?
22 Pe o le a faia ea e Ieova se “galuega” lē matalitonuina i o tatou aso? Ia mautinoa o le a ia faia lena mea, e ui lava ina foliga mai e faigatā ona talitonuina e tagata masalosalo. O le galuega lē matalitonuina a Ieova i le taimi lenei, o le faaumatiaina lea o Kerisinetoma. I le pei o Iuta anamua, latou te faapea mai o loo tapuaʻi i le Atua ae ua matuā faaleagaina lava. O le a faamautinoa e Ieova ua lē pine ona tafiesea lea o vaega uma lava o le faiga o mea faalotu a Kerisinetoma, e faapena foʻi ia “Papelonia le Aai Tele,” le emepaea o lotu sesē i le lalolagi.—Faaaliga 18:1-24.
23. O le ā na uunaʻia e le agaga o le Atua le perofeta o Sapakuka e fai?
23 E iai ma nisi galuega sa finagalo Ieova e fai e Sapakuka a o leʻi oo i le faaumatiaga o Ierusalema i le 607 T.L.M. O ā mea e leʻi tulei atu ai le Atua i lana perofeta? Ioe, o le a faalogo atu Sapakuka i ni mea o le a faapogaia ai lona faaaogāina o lana laau faimusika ma pese atu ia Ieova i tatalo o faavauvauga. Ae muamua lava, o le a uunaʻia e le agaga o le Atua le perofeta e folafola atu ni auēga mataʻina. E mautinoa lava o le a tatou talisapaia le mauaina o le malamalamaga i uiga loloto o na upu faavaloaga mo le taimi atofaina a le Atua. O lea la, seʻi o tatou uaʻi atili atu i le valoaga a Sapakuka.
Pe E te Manatua?
• O ā tulaga o mea sa iai i Iuta i aso o Sapakuka?
• O le ā le “galuega” lē matalitonuina sa faatino e Ieova i taimi o Sapakuka?
• O le ā le faavae mo le faamoemoe sa iai ia Sapakuka?
• O le ā le “galuega” lē matalitonuina o le a faatino e le Atua i o tatou aso?
[Fesili mo le Suʻesuʻega]
[Ata i le itulau 9]
Sa tau mānatu Sapakuka pe aiseā ua faataga ai e le Atua le amioleaga e faateleina pea. Pe o faapena foʻi lou manatu?
[Ata i le itulau 10]
Sa valoia e Sapakuka le mala o le a oo i le nuu o Iuta e ala mai i ʻautau a Papelonia
[Ata i le itulau 10]
O toegāmea o le faatafunaga o Ierusalema, lea na faaumatia i le 607 T.L.M., na maua i mea na ʻeliina mai le palapala