E Mafai Ona E Silafia le Lumanaʻi!

E toʻatele tagata e mafaufau mamafa e faatatau i le lumanaʻi. Latou te mananaʻo e fuafua, ia faia ma le atamai ni teugā tupe mo ni tupe tului, ma ia lagona le saogalemu. Ae pe e iai ea se auala e faamautinoa ai po o le ā o tuu mai i le lumanaʻi?

I SE taumafaiga ina ia sailia le tali, ua faataʻitaʻia ai e tagata ituaiga uma o mea eseese. O saienitisi e gafa ma mataupu tau siʻosiʻomaga ma olaga o tagata, e taʻua o futurologists, ua latou iloiloina āʻega o mea o iai nei ma faia ai ni o latou manatu i mea o le a tutupu i le lumanaʻi e faavae aʻe i nei āʻega. Ua faapena foʻi ona fai e i latou e suʻesuʻeina le tamaoaiga ia latou foʻi matātā. O ē saili atu i faailoga i fetu ma ē fai valovaloga latou te saili atu i āta o fetu ma paneta o tusia ai ni feʻau faapitoa, o polo tioata, ma ni faiga mamana faamisitelio, ma e toʻatele tagata ua mulimuli atu ia i latou. Mo se faataʻitaʻiga, o lē na saili i faailoga i fetu e igoa ia Nostradamus mai Falani o loo faaauau pea ona lauiloa o ia, e ui ua āu senituri talu ona maliu.

O nei tagata uma e faafoliga mai o ni perofeta ua faamaonia le matuā lē maufaatuatuaina ma ua aumaia ai le lē fiafia. Aiseā? Talu ai latou te lē amanaʻia Ieova le Atua ma lana Afioga, le Tusi Paia. Ona o lenei māfuaaga, ua lē mafai ai ona latou taliina fesili autū e pei o nei: ‘Aiseā e mafai ai ona ou mautinoa o mea o valoia mai i le Tusi Paia o le a tutupu? E faapefea ona talafeagai atu na mea i le fuafuaga a le Atua mo le fanau a tagata? E mafai faapefea e aʻu ma loʻu aiga ona maua aogā mai nei valoaga?’ Ua taliina e le Tusi Paia nei fesili.

E tele foʻi isi auala e sili atu ai ona lelei valoaga a le Tusi Paia. I le lē pei o valovaloga a ē saili atu i fetu, e tuu e valoaga a le Tusi Paia le avanoa e faia ai le filifiliga totino a le tagata lava ia. O lea la, e leai se tasi faapea ua uma ona tuupoina sona iʻuga. (Teuteronome 30:19) O tusitusiga e pei o tusitusiga a Nostradamus e aunoa ma ni taʻitaʻiga o amioga tatau o iai, ma latou te pupunia lena mea i misiterio ma faiga e faagaeetia ai. Peitaʻi o valoaga a le Tusi Paia e iai se faavae mausalī o amioga tatau. Ua faamatala mai ai pe aiseā e faia ai e le Atua le mea ua ia fuafuaina. (2 Nofoaiga a Tupu 36:15) Ma o valoaga a Ieova e taulau pea, auā o le “Atua e le mafai ona tala pepelo.” (Tito 1:2) O lea, o tagata taʻitoʻatasi ua taʻitaʻia e le Afioga a le Atua e ola i ni olaga ua faamalamalamaina, e iai se fuafuaga ma e fiafia, e aunoa ma le faaaluvaleina o ō latou taimi tāua ma ālāmanuia i sailiga faivavale.—Salamo 25:12, 13.

O nei manatu ma le anoanoaʻi o isi manatu, na talanoaina i le Tauaofiaga Itumalo a Molimau a Ieova na faia i le lalolagi aoao i le 1999/2000 o “Afioga Faavaloaga a le Atua.” O lauga, faatalanoaga, faataʻitaʻiga, ma se tala faale-Tusi Paia na tataʻi atu ai manatu o le aofia i le tofi matagofie faaleagaga o loo maua e i latou o loo suʻesuʻe ma faatatauina afioga faavaloaga a le Atua. O le a autalu e le mataupu o sosoo mai nisi o manatu tāua mai le tauaofiaga.