E Iai Maatāua Ola i Namibia!

PLAY

E Iai Maatāua Ola i Namibia!

O NAMIBIA e taatia faasolo atu i le toetoe lava 1,000 maila [tusa ma le 1,500 kilomita] i le talafatai i saute sisifo o Aferika. O le talafatai atoa o le atunuu e iai faga oneone, o maupuepue o papa, ma vaega laugatasi lautetele o loo tanu e le maamaa. E filo faatasi ai i maa masani o loo maamaā ai matafaga o Namibia, ni maatāua o ituaiga uma o lanu mananaia. E oo foi i taimane e iai nisi taimi e maua ai iina. Peitai o loo iai i le atunuu se isi mea e sili atu lona tautele na i lo nei maa. O loo iai i Namibia maatāua ola—o tagata mai le tele o ituaiga eseese faaleatunuu.

O uluai tagata na aināina Namibia sa tautatala i se tuufaatasiga o gagana e taʻua o le Khoisan. Sa iloagofie la latou gagana i ni leo ʻoʻi. O nisi o tagata o loo tautatala i le gagana Khoisan i aso nei o tagata e eena o latou tino e taʻua o Damara, o tagata e lē eena tele o latou tino mai se vaega toalaiti e taʻua o Nama, ma tagata e lauiloa i tuligāmanu e taʻua o Bushman. E tele foi ituaiga o tagata uli na ō mai i Namibia i ni senituri e lei mamao tele atu. E tolu ni vaega faaleatunuu ua vaevaeina i ai i latou nei: o le ʻau Ovambo (o le vaega e sili ona toatele i Namibia), o le ʻau Herero, ma le ʻau Kavango. Na amata ona nofoia Namibia e tagata Europa a o faagasolo le senituri lona 19. E toatele isi tagata na faimalaga ane ma nonofo ai ina ua iloa e maua taimane i oneone o le toafa.

E tāua tagata o loo nofoia Namibia auā o i latou o se vaega o le lalolagi o tagata lea na foai mai i ai e le Atua lona Alo, ma tatala ai le ala i le ola e faavavau. (Ioane 3:16) E faitau selau tagata Namibia mai ituaiga eseese ua latou tali lelei mai i le feau o le faaolataga. E mafai ona faatusaina i latou i maatāua ola talu ai o loo latou iai faatasi ma “mea ua manaomia e nuu uma” lea ua aoaoina nei i le fale o le tapuaiga ia Ieova.—Hakai 2:7.

Ua Amata le Eligā Maatāua Faaleagaga

O le tausaga e 1928 na amata ai ona eliina maatāua faaleagaga o Namibia. O le tausaga lena na lafo ane ai e le lālā a le Sosaiete o le Olo Matamata i Aferika i Saute ni lomiga faale-Tusi Paia e 50,000 i tagata sa taape solo ai i le atunuu. I le tausaga na sosoo ai, na asia ai e se Kerisiano faauuina mai Aferika i Saute e suafa ia Lenie Theron, i latou uma na faaalia le naunau fiafia. E fa masina na ia āsaina ai na o ia lenei atunuu telē, ma na mafai ona ia ofoina atu le silia i le 6,000 lomiga faale-Tusi Paia mo suesuega, i le gagana Afrikaans, gagana Peretania, ma le gagana Siamani. E mautinoa sa lei iuvale lenei galuega.

Seʻi manatu mo se faaaoaoga, ia Bernhard Baade, o se tagata Siamani eli maatāua. I le tausaga e 1929 na sapalai atu ai ana fuamoa e se tagata faifaatoaga, ma sa afifi lelei e le faifaatoaga fuamoa taitasi i se itulau o se lomiga a le Olo Matamata. Sa fiafia tele Bernhard e faitau itulau taitasi, ma tau mānatu po o ai na tusiaina lea tusi. Na iu ina oo lana faitau i le itulau mulimuli, lea o loo tusia ai le tuatusi i Siamani o le Sosaiete a le Olo Matamata. Na tusi talosaga atu Bernhard mo nisi lomiga ma iu ai ina avea o ia ma uluai tagata Namibia e taliaina le upu moni.

Taunuu Ane se Aufaigaluega Faataimi Atoa

I le tausaga e 1950, na taunuu ane ai i Namibia misionare e toafā, o ē na aʻoaʻoina i le Aʻoga Faale-Tusi Paia a le Olomatamata o Kiliata. E oo ane i le 1953, ua faateleina le aofai o misionare i le toavalu. Na aofia ai Dick ma Coralie Waldron, o se ulugalii mai Ausetalia ma o loo auauna faamaoni ai pea iinei. E toatele isi tagata galulue faataimi atoa i le faalauiloaina o le Malo, mai Aferika i Saute ma isi atunuu na latou auai atu ai foi i le eliina o maatāua faaleagaga i Namibia. Ua auina atu foi i Namibia nisi misionare, faapea i latou na faauu mai le Aʻoga mo Toleniga i le Faiva.

O se isi vala o loo saosaolaumea i le tuputupu aʻe faaleagaga i Namibia o le faaliliuina lea ma le lolomiina o lomiga faale-Tusi Paia i gagana autū a tagata o le atunuu, e pei o le gagana Herero, Kwangali, Kwanyama, Nama/Damara, ma le gagana Ndonga. Talu mai le 1990, na amata faagaoioia ai i le aai laumua o Windhoek, se ofisa matagofie mo faaliliuga ma se fale mo le aufaigaluega tauofo faataimi atoa. Fai mai Karen Deppisch, o lē o loo auauna faatasi ma lana tane i le galuega faaevagelia faataimi atoa i vaega eseese o Namibia: “E matuā ofo le toatele o tagata pe a matou ofo atu i ai lomiga i la latou lava gagana, ae maise lava ona e itiiti ni tusi o so o se ituaiga ua mafai ona lomia ai i lena lava gagana.”

Le Faaiilaina o Maatāua

O nisi maatāua moni a Namibia ua faaiilaina a o fetāfeaʻi solo galu ma le oneone i le silia ma le faitau meleniuma o taimi. Ae o le mea moni, o na fetāfeaʻiga masani e lē maua mai ai ni maatāua ola. E manaomia ni taumafaiga mo tagata lē lelei atoatoa ina ia “to ese le tagata tuai” ae faaofuina i latou i se uiga fou e pei o uiga o Keriso. (Efeso 4:20-24) Mo se faaaoaoga, o le faamamaluina o tuaā ua maliliu o se aganuu e malosi i le tele o ituaiga a Namibia. O i latou e lē faatinoina gaoioiga o le tapuaiga i tuaā e masani ona sauāina e tagata o o latou aiga ma o latou tuaoi. Pe a aʻoaʻoina e tagata mai le Tusi Paia faapea o ē ua oti “latou te le iloa se mea,” e fesagai i latou ma se tofotofoga. (Failauga 9:5) I le ā le itu?

Ua faamatala mai e se Molimau o le ituaiga o Herero e faapea: “Sa avea o se luʻi tele le usitai atu i le upu moni. Na ou taliaina se suesuega faale-Tusi Paia ma Molimau a Ieova, ae na umi se taimi o oʻu taumafai e faatatauina mea na ou aʻoaʻoina. Muamua, sa tatau ona ou faamautinoa pe o le a ou saogalemu pe a ou lē faatinoina talitonuga faauputuu. Mo se faaaoaoga, ou te aveina atu le taavale ma pāsia nisi o nofoaga i Namibia e aunoa ma loʻu tū e tuu se maa i luga o se tuugamau po o le sii aʻe o loʻu pulou e faatalofa atu ai i tagata ua feoti. Na faasolosolo mālie lava ona ou mautinoa ai, e leai se mea e tupu ia te au ona o loʻu lē tapuaia o tuaā ua maliliu. Maeu loʻu fiafia auā ua faamanuia mai e Ieova aʻu taumafaiga ina ia ou fesoasoani i loʻu aiga ma isi tagata fiafia ia latou aʻoaʻoina le upu moni!”

E Manaomia ni Tagata e Eliina Maatāua Faaleagaga

A o lei taunuu ane i ai misionare i le 1950, sa na o le toatasi lava le tagata talaʻi o le tala lelei i Namibia. Ua iai nei se faatelega lelei o le aofaiga i se tumutumuga e 995. Peitai, o loo totoe pea le tele o galuega e fia faia. O le mea moni, e iai nisi vaipanoa o loo seāseā lava galueaiina. Pe o talafeagai ea ma lou tulaga lou auauna i se vaipanoa o loo manaomia tele ai ni tagata maelega e faalauiloaina le Malo? Pe a talafeagai, faamolemole, ia ō mai nei loa i Namibia ma fesoasoani mai ia i matou i le sueina ma le faaiilaina o nisi maatāua faaleagaga.—Faatusatusa i le Galuega 16:9.

[Faafanua/Ata i le itulau 26]

(Tagaʻi i le lomiga mo le ata atoa)

AFERIKA

NAMIBIA

[Ata]

O Namibia o se atunuu o maatāua matagofie

[Ē Ana le Ata]

[Ata i le itulau 26]

Ua talaʻia le tala lelei i vaega uma lava o ituaiga eseese o tagata i Namibia

[Ata i le itulau 28]

Pe mafai ona e auauna i se mea o loo manaomia tele ai ni tagata e faalauiloaina le Malo?