Ia Alofa ia i Latou e ‘Aiga i le Faatuatua’

O KERISIANO moni e iai se sootaga pei o se aiga ia i latou lava. O le mea moni, talu mai le uluai senituri T.A., na taʻua ai e le tasi le isi e faapea o le “uso” ma le “tuafafine.” (Mareko 3:31-35; Filemoni 1, 2) E lē na o ni faaupuga; ua faamatalaina e nei upu le lagona o tagata tapuai o le Atua o le tasi i le isi. (Faatusatusa i le 1 Ioane 4:7, 8.) Na fetalai Iesu e faapea: “O le mea lea e iloa ai e tagata uma lava o oʻu soo outou, pe afai ua outou fealofani.”—Ioane 13:35.

Na iloatino lena alofa ia Iulai 1997 ina ua mavae se la mala faaumiumi ae sosoo mai ai ma ni timuga mamafa ma lologa i Sili. Sa faafuasei lava ona toatele tagata na manaomia ni meaʻai, lavalava, ma isi mea faapena. I tulaga o mala faalenatura, e tauivi ai Molimau a Ieova ina ia mulimuli i le apoapoaiga a Paulo i tagata Kalatia e faapea: “O lenei, ia tatou agalelei, ia faatatau i mea e tutupu i lea aso ma lea aso i tagata uma lava, aemaise i le aiga o le faatuatua.”—Kalatia 6:10, LF.

I lea, na vave ai ona faamaopoopo e Molimau a Ieova i latou lava e tali atu mo se fesoasoani. Sa aoaoina mai meaʻai, lavalava, ma isi mea faapena, na faavasegaina, fafao i pusa, ma aauina atu loa i le nofoaga o loo tupu ai le mala. E oo lava i tamaiti sa latou foai faameaalofa atu meataalo! Na maofa se tasi tuafafine ina ua ia vaai atu ua faatumulia le Maota o le Malo i fesoasoani laveai. Fai mai a ia: “Sa ou tu ua lē magagana, ua ou lē iloa pe ou te ʻata pe ou te tagi. O mea tonu lava ia sa matou manaomia.”

 Ona faafuasei lava lea ona lūlū se mafuie ma taia ai se vaega o le vaipanoa lava lea na aafia i lologa. E tele fale na faatamaia ai. Ina ia faafetaiaia le manaoga, na faavaeina ai nisi o komiti mo le tuuina atu o fesoasoani laveai. O Komiti o Faugafale, ia sa masani ona gafa ma faugafale mo maota o sauniga a Molimau a Ieova, na aapa atu ma tuuina atu le lagolagosua. O le ā le iuga? O ni fale talafeagai—na fuafuaina ma fausia e uso—na foai faameaalofa ia i latou o ē na faatamaia o latou fale. E ui o nei fale e lē tetelē, ae na matuā eseese foliga ma fale na faia faaaitalafu ia na saunia mai e ala i fesoasoani mo le lautele sa leai ni fola ma ni faamalama ma sa lē valiina foi.

O nisi uso sa faimalaga mamao atu lava e fesoasoani. O le taʻitaʻifono o se tasi o Komiti o Faugafale na faia se asiasiga umi mo aso sosoo e lua e matauina mea na faaleagaina i le vaipanoa—e ui lava e alu i se nofoa faataavalevale. Sa galue mamafa se uso tauaso i le laʻuina o laau i le kamuta o lē na tatipiina e tusa ai ma le lapopoa sa manaomia. O se uso e logonoa na laʻuina amopou ma tuu i mea sa manaomia ai.

Sa maofa le toatele o tagata maimoa i le fesoasoani na tuuina atu e uso. I se tasi aai, na faatū ai se taavale a leoleo i tafatafa o le fale o se tuafafine lea na toe faafou. Sa faaosofia le naunau fia iloa o leoleo. Sa fesili atu se tasi o leoleo i se uso: “O ai nei tagata faigaluega ma o latou foliga mai e fiafia tele, ma e fia se totogi o latou maua?” Na faamatala atu e le uso e faapea, o na tagata uma o se aufaigaluega tauofo. Na faamatala e se tasi leoleo e faapea, e na te totogiina se sefuluai i masina uma i lana lotu, ae e lei asiasi atu lava lana faifeau ia te ia talu mai le mafuie! I le aso na sosoo ai na maua ai e le tuafafine se telefoni mai se leoleo. Sa matauina foi e lea leoleo le aufaigaluega. Na ia faapea mai, na matuā maofa lava o ia ona o le agaga maelega o le aufaigaluega, ma na toeitiiti lava a aufaatasi atu i ai ma ia!

O le mea moni, o fesoasoani laveai i Sili, sa avea o se mea na fiafia ai le aufaigaluega tauofo ma na avea o se molimau sili ona lelei i ē na matamata ane.