Po o le a Manumalo ea le Lelei i le Leaga?

I LE toetoe lava lua afe tausaga ua mavae, na faamasinoina ai Iesu Keriso o se tagata e lē sala mo lona ola. Sa taupulepule tagata leaga ina ia faaumatia o ia ona o lona tautala i le upu moni. Sa molia sese o ia i le fouvale, ma na alalaga le motu o tagata ina ia faasalaina o ia i le oti. O se kovana Roma, o lē na sili atu ia te ia le faatāuaina o lona tulaga faapolotiki na i lo o le ola o se kamuta faatauvaa, na ia faasalaina Iesu i se oti mataʻutia. I le vaaiga a tagata uma lava, sa foliga mai na manumalo le leaga.

Ae peitai, i le po a o leʻi faasalaina o ia i le oti, na taʻu atu ai e Iesu i ona soʻo: “Ua ou manumalo i le lalolagi.” (Ioane 16:33) O le ā le uiga o lana tala? I se tasi vaega, e faapea, o le leaga i le lalolagi sa leʻi ita faamoemoe ai o ia pe fia taui ma sui atu. Sa leʻi mafaia e le lalolagi ona faia o ia ina ia leaga. (Faatusatusa i le Roma 12:2, Phillips.) E oo lava ina ua maliu o ia, na ia tatalo mo i latou na faia lona faasalaga: “Loʻu Tamā e, ia e faamagaloina atu ia te i latou; auā ua latou le iloa le mea ua latou faia.”—Luka 23:34.

Sa faaalia e Iesu—seia oo lava i lona maliu—e mafai ona faatoilaloina le leaga. Sa ia uunaia ona soʻo ina ia tau la latou lava taua e tetee ai i le leaga. E mafai faapefea ona latou faia o lena mea? E ala i le utagiaina o le fautuaga faale-Tusi Paia “aua le taui atu le leaga i le leaga i se tasi” ma ia “faatoilaloina le leaga i le lelei,” e pei ona sa faia e Iesu. (Roma 12:17, 21) Ae pe aogā moni lena auala?

Sa Tau ma le Leaga i Dachau

O Else o se fafine Siamani na faafalepuipuiina i Dachau, o lē na avatua se meaalofa tautele i se teine Rusia e 14 tausaga lona matua, o le meaalofa o le faatuatua ma le faamoemoe.

O Dachau o se falepuipui sauā lauiloa, o i inā na faasalaina ai i le oti le faitauafe o tagata i le faamomoleina i le kasa oona, ma e faitau selau e aofia ai ma lenei teine Rusia talavou, na tuuina atu ina ia faia i ai ni iloiloga matuā lē alofa faafomaʻi. O Dachau e foliga mai sa tutasi i le leaga. Ae peitai, e oo lava i lena laueleele faafaatusa na foliga mai e lafulafuā, ae ua totogo aʻe ai le lelei ma ua oo ina faateleina.

Sa matuā lagona e Else le faanoanoa mo lenei teine talavou o lē na faamalosia e vaavaai a o toso faataugāina e leoleo Siamani lona tinā. I le tuu o lona lava ola i se tulaga lamatia, sa vaavaai ai Else mo ni avanoa e talanoa atu ai i le teine e uiga i le lelei ma le leaga ma e uiga i le faamoemoe faale-Tusi Paia o le toetu. Sa ia aʻoaʻo lana uō talavou ina ia alofa na i lo o le inoino. Ma na faasaoina lenei teine talavou mai tulaga sili ona leaga sa iai i Dachau, ma e faafetai atu ai ia Else.

Na faia e Else lenei mea ona sa manao o ia e mulimuli i le faaaʻoaʻoga lē manatu faapito a Keriso. I le avea o se tasi o Molimau a Ieova, sa ia aʻoaʻoina ai ina ia aua le taui atu le leaga i le leaga, ma o lona faatuatua na uunaia ai o ia e fesoasoani atu i isi ina ia faia faapena. E ui lava na puapuagatia o ia i Dachau, ae sa manumalo o ia i tulaga tau amioga lelei i le vaitaimi o se pulega amio leaga. Ma e lē na o ia le tagata na faia faapea.

I lana tusi A History of Christianity, na mātauina ai e Paul Johnson e faapea “[o Molimau a Ieova] sa latou teena so o se felagolagomaiga ma  le pulega faa-Nasi, lea na latou taʻusalaina o se matuā leaga lava. . . . E ivasefulufitu pasene o i latou na pagatia i ituaiga o sauāga eseese.” Pe sa o se tauiviga ea e aunoa ma se faamoemoe? I le tusi Values and Violence in Auschwitz, na faapea mai ai se tamaitai Polani e suesue i tulaga tau amio ma gaoioiga lautele o Anna Pawelczynska e uiga i Molimau: “O lenei vaega toaitiiti o pagota sa avea o se faavae mautū o le malosi o o latou talitonuga, ma na manumalo i latou i la latou taua e tetee atu i faiga faa-Nasi.”

E ui i lea, mo le toatele o i tatou, o le taua sili, o le tau lea e tetee atu i le leaga i totonu o i tatou na i lo o le leaga i fafo. O se tauiviga i totonu o i tatou lava.

Faatoilaloina le Leaga i Totonu o i Tatou

Ua faapenei ona faamatalaina e le aposetolo o Paulo lenei taua: “Auā ou te lē faia o le mea lelei ou te loto i ai, a o le mea leaga ou te lē loto i ai, o le mea lea ou te faia.” (Roma 7:19, The New Testament, a William Barclay) E pei ona iloa lelei e Paulo, o le faia o le mea lelei, e lē o se mea e masani ai.

O Eugenio * o se tane talavou Sepania o lē na tau mo le lua tausaga ma ona faanaunauga leaga. Ua ia faamatala mai e faapea: “Sa ou taumafai ina ia ou maumauai ia te aʻu lava. Mai lava i le taimi o oʻu laitiiti, sa ia te aʻu se faanaunauga e faia amioga lē tatau. I oʻu tausaga talavou, sa ou auai ma loʻu loto naunau i feusuaiga faatauatane, ma o laʻu tala saʻo, sa ou fiafia i lena ituaiga o olaga.” O le ā na ia manao e suia mulimuli ane i ai?

Na faapea mai Eugenio: “Sa ou manao e faafiafia le Atua, ma na ou aʻoaʻoina mai le Tusi Paia faapea sa lē faamaonia e ia le auala sa ou ola ai. O lea sa ou filifili ai ina ia avea ma se ituaiga o tagata ia ese mai, ia ola e tusa ma taʻiala a le Atua. O aso uma lava, sa tatau ai ona ou tau e tetee i mafaufauga sese ma le eleelea e tumau pea ona lofituina ai loʻu mafaufau. Sa ou maumauai lava ina ia ou manumalo i lenei taua, ma sa ou tatalo faatauanau mo le fesoasoani mai le Atua. Ina ua mavae le lua tausaga, na faatoilaloina ai loa le leaga, e ui lava o loo oʻu maumauai pea ia te aʻu lava. Ae sa aogā le tauiviga. Ua ia te aʻu le faaaloalo totino, maua se faaipoipoga lelei, ma e sili i mea uma, o se faiā lelei ma le Atua. Ua ou iloa mai mea na oo ia te aʻu faapea, o mafaufauga leaga e mafai ona liaʻieseina a o leʻi oo ina fua mai—pe afai e te faia moni lava se tauiviga.”

O taimi uma lava e teena ai se manatu leaga, e manumalo ai le lelei i le leaga, ma i taimi uma foi tatou te teena ai le taui atu o le leaga i le leaga. E ui lava ina tāua na manumalo, ae e lē o mafai ona faaumatia ai mafuaaga autū e lua o le leaga. Po o le ā lava lo tatou taumafai malosi, e lē mafai lava ona tatou manumalo atoatoa i o tatou vaivaiga tuufaasolo, ma o loo faia pea e Satani ni taaʻiga leaga i tagata. O lea, po o le a mafai ea ona suia lenei tulaga?

O le a Faaumatia Atoatoa le Tiapolo

O le faamaoni o Iesu seia oo i le oti, sa avea lea o se toʻilalo popo mo Satani. Sa lē taulau le Tiapolo i lana taumafaiga e faavaivaia le faamaoni o Iesu, ma o lena lē taulau na faailogaina ai le amataga o le iʻuga o Satani. E pei ona faamatala mai e le Tusi Paia, na oo le maliu ia Iesu, o lea, na “faaumatia e ia i lona maliu . . . o le tiapolo lea.” (Eperu 2:14) Ina ua mavae lona toetu, na taʻu atu e Iesu i ona soʻo: “Ua tuuina mai ia te au le pule uma lava i le lagi ma le lalolagi.” (Mataio 28:18) Ma o lenei pule o le a faaaogāina e faaleagaina ai galuega a Satani.

O loo faamatalaina i le tusi o Faaaliga le aso na lafo ifo ai e Iesu Satani mai le lagi. O lenei Matai fai mea leaga, faatasi ma ana temoni, sa taofiofia i le nofoaga maulalo i le lalolagi. Ma o le iʻuga, ua lapatai mai ai le Tusi Paia, o le a faateleina le amio leaga: “O i talofa ia te outou o e nonofo i le fanua ma le sami, auā ua alu ifo ia te outou le tiapolo ua lotoa tele, auā ua na iloa ua saasaa ona po.”—Faaaliga 12:7-9, 12.

Ua faaalia i valoaga o le Tusi Paia faapea o lenei mea tāua i talafaasolopito, ua uma ona tupu—i le vaitaimi o le Taua Muamua a le Lalolagi. * O le faamatalaga lena o le faatelega mataʻina o le amio  leaga lea ua tatou molimauina i o tatou taimi. Ae ua lē pine ona matuā saisaitia loa lea o Satani ina ia lē toe mafai ona ia taaʻina se tasi.—Tagai i le Faaaliga 20:1-3.

O le ā o le a uiga i ai nei mea uma mo tagata?

“Latou te Lē Faia se Mea Leaga”

I le avea ma Tupu o le Malo o le Atua, o le a lē pine ona faaaogāina lea e Iesu lana ‘pule i le lalolagi’ e faamaopoopo ai se polokalama o le toe aʻoaʻoina i mea faaleagaga. “Auā e aʻoaʻoina ē o nonofo i le laueleele lāfulemū i le amiotonu.” (Isaia 26:9, NW) O le a faigofie ona iloa e tagata uma na mea aogā. Ua faamautinoa mai ia i tatou e le Tusi Paia: “Latou te le faia se mea leaga [“latou te lē amio leaga,” Interlinear Hebrew/Greek English Bible a Green], latou te le faaumatia foi se mea . . . auā e tumu le lalolagi i le malamalama o Ieova, e pei ona ufitia o le iliti tai i le suāsami.”—Isaia 11:9.

E oo lava i le taimi nei, e mafai lava ona foia le tele o o tatou faanaunauga leaga. Pe a lē toe iai ni taaʻiga faatemoni, o le a matuā sili atu ona faigofie, ona “ʻalo ese i le leaga, a ia fai mea lelei.”—1 Peteru 3:11.

Ua ia i tatou mafuaaga uma e mautinoa ai faapea, e mafai e le lelei ona faatoilaloina le leaga auā o le Atua e lelei, ma faatasi ai ma lana fesoasoani, o le a mafai ai e i latou o ē mananao e faia le lelei ona faatoilaloina le leaga, e pei ona faamaonia e Iesu e ala i lana lava faaaʻoaʻoga. (Salamo 119:68) O i latou ua mananao nei e tau e tetee atu i le leaga, e mafai ona vaavaai atu i luma i le ola ai i se lalolagi ua faamamāina ua pulea e le Malo o le Atua, se pulega ua tofia ina ia faaumatia e faavavau le leaga. Ua faamatalaina e le faisalamo le iʻuga: “O le alofa ma le faamaoni ua la fetaiai; o le amiotonu ma le filemu ua la feasogi. E tupu ae le faamaoni ai le lalolagi; e vaavaai ifo foi le amiotonu mai le lagi.”—Salamo 85:10, 11.

[Footnotes]