Le Pope ma le Apokalipise

AVERTING ARMAGEDDON (Taofia o Amaketo) o le ulu tala lena na faaigoa ai e ni tagata tusitala se toalua la laua tusi i le 1984 i faiga faapolotiki talu ai nei a le pope. Sa faia e Gordon Thomas ma Max Morgan-Witts ni lipoti e uiga i pope mo le 17 tausaga. O le ā se vaaiga tatou te maua mai ia i latou e uiga i o latou manatu i tulaga sili o le Lotu Katoliko e faatatau i le apokalipise?

E tusa ai ma nei tusitala, na tusia e Monsignor Emery Kabongo, le failautusi totino a Ioane Paulo ll faapea: “O le Pope ua pei lava o se Hekulasi faaleagaga i lona taumafai e taofia le Amaketo faaniukelea.”

E foliga mai o taʻitaʻi lotu o loo latou popole lava e uiga i se faaumatiaga faalekelope e ala i gaoioiga a tagata na i lo o le manatu e uiga i le faalaa filifilia a le Atua i faiga faaletagata— i le apokalipise na valoia mai e le Tusi Paia. Peitai fai mai le tusi Averting Armageddon: “Ia i latou o loo aufaatasi ma Kabongo, e leai se faailoga vaaia o latou popole i ni taumafaiga e faatuai ai le oo mai o le apokalipise o loo latou mafaufau i ai . . . A e peitai i tua atu o nei faiga masani o loo i ai se popole tele ua oo atu foi i le Komiti o Epikopō i le lalolagi atoa. Ua ia aumaia ma le faaeteete ni faaiuga i se faaaliga e faailoa mai ai le faaumatiaga, o loo taʻuleagaina ai ‘taua e faamataʻu ai, sauā ma le mataʻu, le gaosia o mea tau taatele a itu e lua a e maise lava mea tau faaniukelea, ma le soona faatauina atu o auupega o taua.’” E oo lava i le pope o loo aafia ai. Na lipotia mai e Thomas ma Morgan-Witts faapea i ana fata tusi o lana potu tusi o loo i ai ni tusi e pei o le International Defense Review, The Problems of Milltary Readiness, ma le Surprise Attack: Lessons for Defense Planning. Na la faaopoopo mai:

“I tafatafa o tusi a Pope, ua i ai ni tusi o lo feagai ma le mataupu o loo taulai atu nei i ai manatu o le Pope: o le faaiʻuga, o le suesuega o aʻoaʻoina a le Tusi Paia, o loo finau mai faapea o le a faavaeina e le Atua Lona Malo i luga o le lalolagi e ala i faasologa o ‘mea tutupu’ e faaiʻuina ai se vaitaimi. Ua talitonu ma le faamaoni Ioane Paulo . . . faapea a o lei oo i le faaiʻuga o le senituri, atonu o le a tafiesea le lalolagi e se malosi ‘mautinoa.’ Pe mata o ni faamaʻi? Se Mala lona lua e Faaumatia ai? Po o ni lāmala, oge, i se tulaga lei mafaufauina? Po o se taua faaniukelea? Ua le aunoa nei ona mataʻu o ia i lena mea faaiu na taʻu mai; atonu, ua ia iloa e tatou na manatunatu mamafa i ai faapea, ua lafo atu nei ia te ia se vaega o le avea ma ulu o le lotu i se mala faaniukelea.”

O le Averting Armageddon ua taulai atu ai foi manatu i se “uati” faafaatusa o loo faasino i le “aso o le malaia” lea e masani lava ona faamatilatila mai i le Bulletin of the Atomic Scientists. Ina ua muai faasalalauina lenei “uati” ia Tesema 1947, sa faatonuina ina ua toe fitu minute ta le 12 i le po, e faaalia ai “po o lea le latalata ua i ai le lalolagi i se Amaketo faaniukelea.” Ina ua mavae se maliega i le faatapulaaina o mea tau i le 1972. (SALT). na toe faafoi atu ai vae o le uati i tua i le toe 12 minute ta le 12 i le po. I le 1984 sa tusi ai Thomas ma Morgan-Witts: “Ua taʻu mai nei e le uati ua toe tolu minute i le tulua o po ma ao. O lona sili atu lea ona latalata i le aso o le malaia mo le tolu-sefulu tausaga.”

E ui lava i taumafaiga a le Pope e “taofia se Amaketo faaniukelea,” a e ia Novema 1985, o loo faailoa mai pea e avea o le uati e tolu lava minute o loo totoe. O lea la, aua nei faaseseina i tatou i le manatu faapea o le a faaumatia e malo le fanau a tagata. Na i lo o le taumafai e alofia le apokalipise, o le a avea i tatou ma tagata popoto pe afai tatou te sailia le auala a le Atua o le faaolataga mai le apokalipise, auā e moni lava, “e oo mai i le lalolagi uma” lenei mea.—Faaaliga 3:10.