Pe na e faitau māeʻaeʻa i lomiga taʻitasi o Le Olomatamata o lenei tausaga? O lea, pe mafai ona e taliina fesili o loo mulimuli mai?

O le ā le faaaʻoaʻoga na faataatia e Ieova i le auala e feutagaʻi ai ma fafine?

Na feutagaʻi Ieova ma fafine i se auala tonu, ma e na te leʻi faatāua atu tamāloloa nai lo o fafine. Na faafofoga mai le Atua iā i latou, ma na tāua iā te ia o latou faalogona ma popolega. Na ia maufaatuatuaina foʻi i latou e faia lana galuega.—w24.01, itu. 15-16.

E faapefea ona tatou faatatauina le Efeso 5:​7, lea e faapea mai e “aua neʻi outou faia mea o loo latou faia”?

Ua lapataʻia i tatou e aua neʻi faifaimea faatasi ma i latou e lē mananaʻo e tatou te usiusitaʻi i tapulaa a le Atua. E lē o faatatau atu e na o tagata e tatou te feiloaʻi i ai, ae e aofia ai foʻi ma i latou i le Initaneti.—w24.03, itu. 22-23.

O ā faamatalaga sesē e manaʻomia ona tatou ʻalofia?

E manaʻomia ona tatou faaeteete i faamatalaga e leai ni faamaoniga lea e ala mai i o tatou uso ma tuafāfine, o imeli mai i tagata e tatou te lē iloa, ma faamatalaga a ē ua liliuese mai i le upu moni o loo faafoliga mai e fiafia i le upu moni.—w24.04, itu. 12.

O ā mea ua tatou iloa ma mea e tatou te lē iloa e faatatau i le auala o le a faamasinoina ai e Ieova le tupu o Solomona, i latou na maliliu i le faaumatiaga o Sotoma ma Komoro, ma le Lolo?

E tatou te lē o iloa po ua tuu atu i latou e Ieova i le faaumatiaga e faavavau. Peitaʻi, ua tatou iloa e silafia e ia mea moni uma lava ma e tele lona alofa mutimutivale.—w24.05, itu. 3-4.

O le ā ua tatou mautinoa i ai ona o le Atua “o le Papa”? (Teu. 32:4)

E mafai ona tatou sulufaʻi iā Ieova. E maufaatuatuaina ma e faamaoni i ana folafolaga. E maumauaʻi ma e lē suia ona uiga ma lona finagalo.—w24.06, itu. 26-28.

O le ā e fesoasoani iā te oe e faamasani ai i se faapotopotoga fou?

Ia faalagolago iā Ieova, e fesoasoani atu iā te oe e pei ona ia fesoasoani i ana auauna i le taimi ua teʻa. Ia ʻalofia le faatusatusa o lau faapotopotoga fou i lau faapotopotoga na iai muamua. Ia pisi i mea fai i lau faapotopotoga fou, ma taumafai e atiaʻe ni faauōga fou.—w24.07, itu. 26-28.

O ā lesona e tatou te aʻoaʻoina mai i talafaatusa e tolu o loo i le Mataio mataupu e 25?

O le talafaatusa i mamoe ma ʻoti o loo faamatilatila mai ai le uiga o le faamaoni. O le talafaatusa i taupou faautauta ma taupou vālea, ua faamatilatila mai ai le nofosauni ma ia mataala. Ua faamatilatila mai i le talafaatusa i taleni le tāua o le galue mamafa ma ia filigā.—w24.09, itu. 20-24.

O le ā le maualuga o le faapaologa o le malumalu o Solomona?

I nisi o manusikulipi anamua, o loo taʻua ai i le 2 Nofoaiga a Tupu 3:4 e “120 kupita” le maualuga o le faapaologa, ma e tutusa lenā ma le 53 mita (175 futu). Ae o loo taʻua i isi tusitusiga e “20 kupita,” ma e tutusa lenā ma le iva mita (30 futu) le maualuga. E foliga mai e talafeagai le faapea atu e 20 kupita pe a fua i le mafiafia o puipui o le malumalu.—w24.10, itu. 31.

O le ā le uiga o le manatu e ao i auauna o le faiva ona “taʻitasi a latou avā”? (1 Timo. 3:12)

E uiga atu i le faaipoipo i le fafine e toʻatasi, ma e lē tatau ona ia faia feusuaʻiga lē mamā ma se isi e ese mai i lana avā. E lē gata i lea, e lē tatau ona iai ni ona uiga faatafai i se isi fafine.—w24.11, itu. 19.

Aiseā e faapea atu ai o le tala o loo i le Ioane 6:53 e lē o faaata mai ai le mea e faia i le Talisuaga Afiafi a le Alii?

I le Ioane 6:​53, na fetalai ai Iesu e manaʻomia ona aai i lona tino ma feinu i lona toto. Na ia faia lenā fetalaiga i le 32 T.A. i Kalilaia, a o talanoa atu i tagata Iutaia e leʻi faatuatua iā te ia. Peitaʻi, na faatoʻā faavaeina le Talisuaga Afiafi a le Alii i se tausaga mulimuli ane i Ierusalema, lea na fetalai atu ai Iesu i ē o le a latou pule faatasi i le lagi.—w24.12, itu. 10-11.