E leai, e lē o taʻua i le Tusi Paia po o le talafaasolopito se mea faapena na tupu.

O le auala o loo faaliliuina ai lenei mau i le tele o faaliliuga o le Tusi Paia, ua manatu ai nisi na papatisoina i le vai isi mo tagata ua feoti i aso o Paulo. O se faataʻitaʻiga, ua taʻua i le New International Version: “Afai e leai se toetū, o le ā o le a tupu iā i latou ua papatisoina mo ē ua oti?”

Peitaʻi, seʻi mātau faamatalaga a ni tagata atamamai se toʻalua e suʻesuʻeina le Tusi Paia. Na taʻua e Dr.  Gregory Lockwood, o le manatu e faapea na papatiso “ni tagata mo tagata ua feoti,” “e leai se faamaoniga i le talafaasolopito po o le Tusi Paia na tupu lenā ituaiga papatisoga.” Na faapea mai foʻi le polofesa o Gordon D. Fee: “E leai se faavae i le talafaasolopito po o le Tusi Paia mo lenā ituaiga papatisoga. E lē o taʻua foʻi i le Feagaiga Fou lenā papatisoga, ma e leai se faamaoniga e iloa ai na faia e uluaʻi Kerisiano lenā papatisoga po o isi foʻi lotu na faavae ina ua maliliu le ʻauaposetolo.”

Ua taʻua i le Tusi Paia, e ō soo o Iesu e “fai tagata o nuu uma lava ma soo, ma papatiso atu iā i latou . . . ia aʻoaʻoina i latou ia tausi i mea uma” na ia poloaʻi mai ai. (Mata. 28:19, 20) A o leʻi avea se tasi ma soo papatiso, e manaʻomia ona aʻoaʻoina o ia e faatatau iā Ieova ma Lona Alo, ia talitonu ma usitaʻi iā i laʻua. E lē mafai e se tagata ua oti ona faia lenā mea. E lē mafai foʻi ona faia e se Kerisiano o loo soifua lenā mea mo le tagata ua oti.​—Fai. 9:5, 10; Ioa. 4:1; 1 Kori. 1:14-16.

O le ā la le uiga o le tala a Paulo?

E leʻi talitonu nisi tagata Korinito i le toetū. (1 Kori. 15:12) Ae na faamaonia e Paulo le sesē o lenā manatu. Na ia faapea mai “o aso uma ou te fesagaʻi ai ma le oti.” E leʻi oti Paulo i lenā taimi. Peitaʻi, e ui na ia fesagaʻia lamatiaga ae na mautinoa e Paulo pe a oti, o le a toe faatūina o ia i le lagi i se tino agaga e matuā malosi e pei foʻi o Iesu.​—1 Kori. 15:30-32, 42-44.

E tatau ona malamalama tagata Korinito, o le avea ma Kerisiano faauuina e latou te fesagaʻia ai i aso uma faigatā, ma o le a latou feoti ma toe faatutū mai. O le “papatisoina iā Keriso Iesu” e aofia ai ma le “papatisoina i lona maliu.” (Roma 6:3) O lenā papatisoga faafaatusa mo le ʻaufaauuina, o le a latou uia ai se ala e iʻu ai ina latou feoti ma o le a faatutūina i latou i le lagi.

I le silia ma le lua tausaga talu ona papatisoina Iesu i le vai, na ia fetalai atu ai i ona aposetolo e toʻalua: “Lua te papatiso foʻi i le papatisoga e papatisoina ai aʻu.” (Mare. 10:38, 39) E lē o uiga atu Iesu i le papatisoina i le vai. Ae o le uiga o lana fetalaiga, o le a fasiotia o ia ona o lona tumau faamaoni i le Atua. Na tusi le aposetolo o Paulo, o le a “tigāina faatasi” le ʻaufaauuina “ina ia faamamaluina faatasi foʻi i [latou].” (Roma 8:16, 17; 2 Kori. 4:17) O lea, e tatau foʻi la ona feoti le ʻaufaauuina ina ia faatutūina i latou e ola i le lagi.

O lea, e mafai ona faaliliuina ma le saʻo le faamatalaga a Paulo e faapea: “Auā a leai, o le ā se mea e faataunuuina e i latou ua papatisoina ina ia avea ma tagata oti? Pe afai e lē toe faatutūina ē ua oti, aiseā la ua papatisoina ai i latou ina ia avea ma tagata oti?”