E FINAGALO Ieova le Atua ia olioli Kerisiano i le filemu, ma ia avea o se vala tāua o o tatou olaga. O le avea o i tatou ma ē e tausia le filemu, e maua ai e tagata tapuaʻi moni le tele o le filemu. E fesoasoani foʻi e tosina mai ai i le faapotopotoga Kerisiano isi o loo naunau ia maua le filemu.

O se faataʻitaʻiga, na mātauina e se fomaʻi faataulāitu lauiloa i Madagascar le autasi o Molimau a Ieova. Na faapea ifo lenei tamāloa, ʻPe a alu alu ae ou fia auai i se lotu, o le lotu lea o le a ou alu i ai.’ A o faagasolo taimi, na ia lafoaʻi ana faiga faataulāitu, faaalu ni masina e faaleleia ai lana faaipoipoga, ma avea ai ma tagata tapuaʻi o Ieova, le Atua o le filemu.

E pei o lenei tamāloa, i tausaga taʻitasi e faitau afe tagata ua latou maua i le faapotopotoga Kerisiano le filemu na latou matuā naunau i ai. Peitaʻi, ua taʻua manino mai i le Tusi Paia pe afai e iai le “lotoleaga ma le misa” i totonu o le faapotopotoga, e mafai ona faaleagaina ai ni faauōga ma faapogaia ai faafitauli. (Iako. 3:14-16) A o le mea e fiafia ai, ua aumaia i le Tusi Paia fautuaga aogā i auala e mafai ona tatou ʻalofia ai na faafitauli, ma faatupu le filemu. Seʻi o tatou iloilo pe na faapefea ona aogā nei fautuaga i nisi o mea moni na tutupu.

“E leʻi lelei lo ma va ma se uso na ma faigaluega faatasi. I se tasi taimi na ma tauupu ai, na ō mai ni tagata se toʻalua ma matamata i le ma misa.”​—CHRIS.

“Na faafuaseʻi ona faamuta e se tuafafine na masani ona ma talaʻi faatasi, a ma fuafuaga mo le talaʻiga. Na sosoo ai ma le lē toe talanoa mai iā te aʻu. Ou te leʻi iloa pe aiseā.”​—JANET.

“Na matou talanoa toʻatolu i le telefoni. Na faatofā mai le isi ma na ou manatu ua tapē lana telefoni. Sa ou faia loa ni tala lē lelei e faatatau iā te ia, i le isi tagata lea na matou talanoa. Peitaʻi, e leʻi tapēina lana telefoni.”​—MICHAEL.

“Na amata ona iai ni faafitauli i le va o ni paeonia se toʻalua i la matou faapotopotoga. Na otegia e le tasi le isi. Na avea le la misa ma mea na faalotovaivaia ai isi.”​—GARY.

Atonu e te manatu e lē matuiā tele nei faafitauli. Peitaʻi, na ono faapogaia ai ni aafiaga tumau i faalogona ma le itu faaleagaga o ē na aafia ai. O le mea e lelei ai, na mafai ona toe maua le filemu i le va o na uso ma tuafāfine, ona na latou mulimuli uma i taʻiala a le Tusi Paia. O ā ni taʻiala o le Tusi Paia e te manatu na latou faatatauina?

 “Aua neʻi outou femisaaʻi a o outou ō atu.” (Kene. 45:24) O le fautuaga lenā a Iosefa i ona uso ina ua toe foʻi atu i lo latou tamā. Maʻeu le atamai o na upu! Pe a lē pulea e se tasi ona faalogona ma itaita gofie, e na te ono faapogaia ai foʻi le ita o isi. Na iloa e Chris o ona vaivaiga o le faamaualuga ma le lē fia talia o ni faatonuga. Na manaʻo o ia e faia se suiga, o lea na ia faatoese ai i le uso na la misa ma taumafai malosi ia pulea lona ita. Ina ua mātauina e le uso taumafaiga a Chris e faia se suiga, na uunaʻia ai foʻi o ia e faia faapea. Ua la auauna faatasi nei ma le fiafia iā Ieova.

“E faalēaogāina fuafuaga pe a lē iai ni talanoaga i mataupu faalilolilo.” (Faata. 15:22) Na filifili Janet e ao ona ia faatatauina lenei upu moni. O lea na alu ai loa ma ʻtalanoa’ atu i le isi tuafafine. A o la talanoa, na fai atu ma le faautauta Janet i le tuafafine e faamatala saʻo mai le māfuaaga ua lē fiafia ai. I le amataga na lē fiafia uma i laʻua. Ae a o faaauau ona la talanoa i se auala filemu, na iʻu ina toe faaleleia le la feeseeseaʻiga. Na iloa ane e le tuafafine na sesē lona manatu e faatatau i se mataupu e leʻi aafia ai Janet. Na faatoese atu o ia iā Janet ma ua la toe auauna faatasi nei iā Ieova o ni uō lelei.

“Pe afai foʻi e te avatu lau taulaga i le fata faitaulaga, ona e manatua ai lea o loo iai se mea e lē malie ai lou uso iā te oe, inā tuu ia o lau taulaga i luma o le fata faitaulaga, ae ia e alu e muaʻi faalelei ma lou uso.” (Mata. 5:23, 24) Atonu e te manatua o le fautuaga lenei na taʻua e Iesu i lana Lauga i le Mauga. Na lē lelei faalogona o Michael ina ua ia iloa ua ia faia ni faamatalaga lē lelei e faatatau i le isi uso. O lea na taumafai malosi ai ia toe maua le filemu i lo la va ma le uso. Na talanoa saʻo atu ma le lotomaulalo i le uso ma faatoese i ai. O le ā le iʻuga? Ua faapea mai Michael, “Na faamagalo moni lava aʻu e loʻu uso.” Na toe lelei le la faigāuō.

“Ia faaauau ona onosaʻi le tasi i le isi, ma ia fefaamagaloaʻi ma le lotoatoa pe afai ua faia e se tasi se mea e tigā ai le isi.” (Kolo. 3:12-14) I paeonia e toʻalua lea na iai lo la faafitauli, sa fesoasoani i ai ma le agalelei se toeaina ina ia mafaufau i fesili e pei o nei: ʻPo o se mea e tatau iā i maʻua le avea o la ma feeseeseaʻiga ma pogai e faanoanoa ai isi? Pe e iai moni lava se māfuaaga tāua e lē mafai ai ona onosaʻi le tasi i le isi, ma faaauau ona ma auauna ma le filemu iā Ieova?’ Na talia ma faatatau e paeonia le fautuaga a le toeaina. Ua la toe faifaimea faatasi nei a o la talaʻi atu le tala lelei.

Pe a faatigā mai se tasi iā te oe, atonu o le laasaga lelei muamua e te faia, o le faatatauina lea o le fautuaga o loo i le Kolose 3:12-14. Ua iloa e le toʻatele pe a faaalia le lotomaulalo, o  le a mafai ona latou faamagalo ma faagalo. Ae faapefea pe afai e tatou te taumafai e faamagalo ae e lē mafai? E mafai ona fesoasoani iā i tatou le mataupu silisili o loo i le Mataio 18:15. E ui sa talanoa Iesu e faatatau i agasala matuiā, ae sa ia taʻua i inei se mea e mafai ona tatou faia i so o se taimi e tulaʻi mai ai se faafitauli i lo tatou va ma se uso po o se tuafafine. Ia e alu atu i lou uso po o le tuafafine, ma taumafai e talanoa ma foʻia le faafitauli i se auala agalelei ma lotomaulalo.

E tele isi fautuaga aogā o loo iai i le Tusi Paia. O le tele o na fautuaga e manaʻomia ai ona tatou faaalia le “fua o le agaga, o le alofa, o le olioli, o le filemu, o le faapalepale, o le agalelei, o le mataalofa, o le faatuatua, o le agamalu, ma le amio pulea.” (Kala. 5:22, 23) E fesoasoani le suāuu ina ia sologa lelei ai le gaoioi o vaega o se masini. I se tulaga talitutusa, pe afai e tatou te faaalia nei uiga lelei mai iā Ieova, o le a faigofie ona foʻia a tatou feeseeseaʻiga ma maua ni faiā filemu.

E tofu i tatou ma uiga ma e eseese uma o tatou uiga. O nei uiga eseese e mafai ona maua ai ni faauōga fiafia. Peitaʻi, o le eseese o uiga e mafai foʻi ona faapogaia ai ni feeseeseaʻiga. Na taʻua e se toeaina taʻumatuaina le faataʻitaʻiga lenei: “E ono faigatā i se tagata e matamuli ona faifaimea faatasi ma se tagata e faaleuō ma fiafia e talanoa i isi. E foliga mai e lē tāua lenā eseesega, peitaʻi e mafai ona iʻu ai i ni faafitauli matuiā.” Pe e te manatu la e iai lava faafitauli i le va o ni tagata e eseese o latou uiga? Seʻi manatu i ni aposetolo se toʻalua. Na faapeʻī uiga o Peteru? Atonu e te manatu o sē e lē fefe e tautala ma e osovale. Ae ā Ioane? E tatou te ono manatu o ia o sē e alofa ma e mafaufau muamua lava a o leʻi tautala ma faia se gaoioiga. Na eseese uiga o Peteru ma Ioane, peitaʻi na la galulue faatasi a o auauna iā Ieova. (Galu. 8:14; Kala. 2:9) I aso foʻi nei, e mafai ona galulue faatasi ni Kerisiano e matuā eseese uiga.

 Atonu e iai i lau faapotopotoga se uso e te lē fiafia i ana faamatalaga ma gaoioiga. Peitaʻi, ua e iloa na maliu Keriso mo lenā tagata ma e tatau ona e faaalia i ai le alofa. (Ioa. 13:34, 35; Roma 5:6-8) O lea, nai lo o le musu e faauō atu i lenā tagata pe taumafai e ʻalofia o ia, ia fesili ifo iā te oe lava: ʻPo o faia e loʻu uso se mea e feteenaʻi ma tulafono a Ieova? Po o ia taumafai ma le loto i ai e faatigā mai iā te aʻu? Po le mea e pau lava ona e eseese o ma uiga?’ A o le fesili lenei e sili ona tāua: ʻO le ā sona uiga lelei e mafai ona aogā iā te aʻu?’

E tāua tele le fesili mulimuli. Pe afai o lenā tagata e lē fefe e tautala a o oe e te filemu, seʻi mafaufau la i le faigofie i lenā tagata ona amata ni talanoaga i le talaʻiga. E mafai ona e ofo atu e te lua galulue faatasi i le talaʻiga ma aʻoaʻoina mai ai se lesona iā te ia. Pe afai e masani ona limafoaʻi lenā tagata i isi a o oe e fai sina ou limamau, aiseā e lē vaai ai i lona fiafia e maua mai i le foaʻi atu i ē ua loa le soifua, o ē mamaʻi, po o ē o manaʻomia se fesoasoani? O le manatu tāua, e ui e eseese o oulua uiga ma lou uso, ae e ono mafai ona lua vavalalata e ala i le taulaʻi atu i uiga lelei. Atonu e lē avea ai oulua ma ni uō mamae, ae e mafai ona fesoasoani e te lua vavalalata ai ma faatuputeleina ai le filemu i lo oulua va faapea le faapotopotoga.

E foliga mai na matuā eseese uiga o Evotia ma Sunetui. Peitaʻi, na faalaeiau e le aposetolo o Paulo i laʻua “ia tutusa o la manatu i le autasi i le Alii.” (Fili. 4:2) E tatou te mananaʻo foʻi e tapuaʻi iā Ieova faatasi ma o tatou uso ma tuafāfine, ma tausia le filemu i le faapotopotoga.

E mafai ona faatusaina o tatou faalogona lē lelei e faatatau i isi, i vao leaga e tutupu i totonu o se togālaau manaia. E ono faateteleina na faalogona lē lelei pe afai e tatou te lē taumafai e liaʻi ese. Pe a pulea e le ita le loto o se tasi, e mafai ona iai se aafiaga i le faapotopotoga. Pe afai e tatou te alolofa iā Ieova ma o  tatou uso, o le a tatou faia le mea sili e ʻalofia ai le avea o a tatou feeseeseaʻiga, ma pogai e saveʻu pe faaitiitia ai le filemu o tagata o le Atua.

Pe a tatou taulima feeseeseaʻiga ma le sini ia tausia le filemu, e ono faateʻia i tatou i iʻuga e sili ona lelei e maua mai ai. Seʻi mātau le mea na tupu i se tasi o Molimau. Na ia faapea mai: “Na ou manatu na pei aʻu o se teineitiiti i le auala na feutagaʻi mai ai se tasi tuafafine. Na matuaʻi oʻu lē fiafia lava. A o oso aʻe loʻu ita, na amata ona ou tautala lē faaaloalo atu iā te ia. Na ou mafaufau, ʻAfai e lē faaaloalo mai iā te aʻu, ou te lē faaaloalo foʻi la i ai.’”

Na toe tomānatu lenei Molimau e faatatau i ana gaoioiga. “Na amata ona ou mātauina ua lē lelei oʻu uiga, ma na ou matuā lē fiafia ai iā te aʻu lava. Na ou iloa ua tatau ona sui oʻu manatu. Ina ua uma ona ou tatalo iā Ieova e faatatau i le mataupu, sa ou faatauina loa se meaalofa itiiti mo le tuafafine, ma tusi i ai se card e faatoese i ai ona o oʻu uiga lē lelei. Na ou fusi o ia ma na ia fusi mai iā te aʻu, ma na ma malilie faatasi loa e faagalo le mea na tupu. E leʻi toe iai lava se faafitauli i lo ma va.”

O loo matuā naunau tagata ia maua le filemu. Peitaʻi, pe a iai ni mea e tofotofoina ai o latou tulaga ma uiga faamaualuga, o le toʻatele lava e gaoioi i se auala e lē tausia ai le filemu. E moni lenā manatu i le toʻatele o tagata e lē tapuaʻi iā Ieova. Peitaʻi, e tatau ona iai le filemu ma le autasi i tagata tapuaʻi o Ieova o loo tauaveina lona suafa. Na faagaeeina e Ieova Paulo e tusi: “Ou te ʻaiʻoi atu iā te outou, ina ia savavali e tusa ma le valaau na valaauina ai outou, ia matuā lotomaulalo ma agamalu, ia faapalepale ma onosaʻi le tasi i le isi i le alofa, ia matuā naunau e tausia le autasi i le agaga i le fusi o le filemu.” (Efe. 4:1-3) O lenā “autasi i le agaga o le fusi o le filemu” e matuā tautele. O lea, tau ina ia tatou faamalosia lenā fusi o le filemu, ma ia maumauaʻi e foʻia so o se feeseeseaʻiga e ono tulaʻi mai i lo tatou va ma isi uso ma tuafāfine.